¡SEMI melauak nejin tajtolmej! Nikan taltikpak semi tikpanouaj “tein amo kuali” itech tonemilis. Yejua ika se motajtania ox uelis tikpiaskej yekmelauj yolpakilis.

Kemej neskayot, maj tikitakan tein kipanok Maria. Yejua nochipa tekititoya, sayoj ke axkan ke kipia 84 xiujmej, amo semi ueliok kisa ichan. Maski itanemilil kuali tekiti, amo semi ueliok moolinia. ¿Keniuj ueliskia kipias yekmelauj yolpakilis ijkon kemej moajsi?

¿No ijkon mitsonpanoua tejuatsin? Xa kemansa tionmotajtaniani ox uelis tikonpias yekmelauj yolpakilis itech monemilis. Xa tikonpia se tekit tein mojmostaj tikonchiua uan semi tesioujtij, uan xa amo akin kiita chikaujkayot tein tikonchiua. Uan maski moita ke kuali tionpanoua, xa mitsontekipachoua tein panos satepan, oso kemansa tionmomachilia moselti oso tiontayokoya, uan tionmotajtolteuia iniuan mochankauan. Xa momikiliani semej akin tikontasojta. Yejua nejon tein kipanok se takat akin motokaytia André. Ipopaj ijsiujka kokolispeuak uan momikilij. Yejua tel kuali iuan mouikaya uan nejon semi kijtakoj uan kimachiliaya ke amo ueliskia kixikos nejon tein panok.

Maski tein yeski taman tein amo kuali tikpanouaj, tinochin tikmachiliaj ke moneki tikmatiskej se taman: ¿uelis tikpiaskej yekmelauj yolpakilis itech tonemilis? Tanankilil tikajsij itech inemilis se takat tein nemik nikan taltikpak kemej ome mil xiuit achto: yejua Jesucristo. Maski kipanok miak ouijkayomej, kipiak yekmelauj yolpakilis itech inemilis. Uan tejuan no uelis tikpiaskej komo tiktojtokaj neskayot tein kikauak.