1. 1) ¿Katiyejua ikualneskayouan Jiova uelis timomachtiskej? 2) ¿Keniuj techpaleuis komo timomachtiaj ikualneskayouan Jiova?

KEMAN tiontanemilia keniuj tamati Jiova, ¿katiyejua kualneskayomej tikonelnamiki? Xa okachi tiontanemilia itech netasojtalis, melaujkayot, tamatilis uan uelilis. Sayoj ke, tikmatij ke Jiova kipia miak kualneskayomej tein techtokia iuan. Tein melauj, uelis tiktekpanaskej panoua 40 uan nochi momelauani itech toamaixuan. Komo tikitaj sejse ikualneskayouan keman timomachtiaj toselti oso kemej kalyetouanij, tikyekmatij ke uelis tikajsiskej miak taman tein kinextia keniuj tamati Dios. ¿Keniuj techpaleuis nejon nemachtil? Techolinis maj okachi tiktasojkamatikan nochi tein kinextia toTajtsin. Uan keman okachi tiktasojkamatiskej, okachi tiknekiskej timotokiskej iuan, uan tikchiuaskej kemej yejuatsin (Jos. 23:8; Sal. 73:28).

2. 1) Xikonijto se neskayot tein kinextia keniuj uelis okachi tiktasojkamatiskej ikualneskayouan Jiova. 2) ¿Toni ika timomachtitij?

² Sayoj ke, ¿toni kijtosneki se kitasojkamatis teisa? Nikan kijtosneki ke tikitaj ke tel kuali. Nejon tasojkamatilis uelis yolik moskaltis. Maj tikijtokan se neskayot: se yankuik tapalol yolik tikuelilijtiyaskej, tein kijtosneki ke tikitaskej ke tel kuali, komo tikijnekuij, tikyekouaj uan ijkon tikmatij ke semi uelik uan satepan tejuan no tikchijchiuaj nejon tapalol. No ijkon, okachi tiktasojkamatiskej se kualneskayot tein kinextia Dios komo timochikauaj tikixmatiskej, itech titanemiliaj uan satepan no ijkon tikchiuaj itech tonemilis (Efes. 5:1). Nejin tamachtilis uan okseki ome tein tikitaskej satepan, techpaleuis maj okachi tiktasojkamatikan ikualneskayouan Dios tein xa amo semi ika titanemiliaj. Keman tikitaskej sejsemej tiknankiliskej eyi netajtanilmej: 1) ¿Toni kijtosneki? 2) ¿Keniuj kinextia Jiova? 3) ¿Keniuj uelis tiknextiskej itech tonemilis?

3, 4. 1) ¿Keniuj tikijtoskiaj ke tamati se taltikpaknenkej akin kichiua maj amo teouijmaka se motokis iuan? 2) ¿Keniuj techyekiluia Jiova ke kineki maj se motoki iuan?

³ Maj achto tikitakan nejin kualneskayot. ¿Keniuj tikijtoskiaj ke tamati taltikpaknenkej akin kichiua maj amo teouijmaka se motokis iuan? Uelis tikijtoskej ke kualtakat, ika miak pakilis tapaleuia uan amo teouijmaka se tajtos iuan. Keman tikakij uan tikitaj kemej tajtoua, kemej nesi iixko uan kemej kichiua teisa, nesi ke amo teouijmaka se motokis iuan.

⁴ ¿Keniuj kinextia Jiova nejon kualneskayot? Maski yejuatsin akin kichijchiuak nochi tein onkak, techyekiluia ke amo sayoj ika miak pakilis techkaki uan kinankilia tonetataujtiluan, ta kinektok kichiuas (xikonixtajtolti Salmo 145:18 uan Isaías 30:18, 19). Uelis tiknojnotsaskej ika yolseuilis keman yeski uan kampa yeski, uan timotokiskej iuan ika nochi toyolo porin senkis tikmatij ke amo keman techixtopeuas (Sal. 65:2; Sant. 1:5). Biblia kimelaua ke Jiova kichiua seki taman kemej yeskia se taltikpaknenkej porin kineki maj tiktemokan inepaleuil. Kemej neskayot, David akin kijkuiloj Salmo, kijtoj ke “iixtololouan Jiova” totech yetokej uan ‘iyekmay kuali techkitskijtok’ (Sal. 34:15; 63:8). Tanauatijkej Isaías kinextij ke tamati kemej se ichkatajpixkej keman kijtoj: “Ika imay kinnechikos ichkamej; uan iyolixko kinuikas” (Is. 40:11). Xikonnemili tein kijtosneki nejon. Jiova kineki maj amo uejka tiyetokan iuan, kemej se ichkatsin tein kuali momachilia keman kinapaloua itajpixkauj tetasojtakej. ¡Yekmelauj toTajtsin kichiua maj amo teouijmaka se motokis iuan! ¿Keniuj no ijkon uelis tikchiuaskej?

5. ¿Keyej motelneki maj tayekananij kichiuakan maj amo teouijmaka se motokis iniuan?

⁵ Yankuixtok, itaixpantijkauan Jiova akin tanojnotsaj ika nochi ininyolo uan moajsij noyampa taltikpak, kintajtanijkej: “¿Toni kualneskayot okachi tikontasojkamati maj kipia se tayekankej?”. Miakej tanankilijkej:  “Maj amo teouijmaka se motokis iuan”. Kemej tikmatij, nochin akin tikchiuaj kemej Cristo moneki timochikauaskej tikpiaskej nejon kualneskayot, sayoj ke tayekananij okachi moneki kinextiskej (Is. 32:1, 2). Keman se tokniuj siuat kimelauak keyej kiita ke motelneki maj se tayekankej kinexti nejon kualneskayot, kijtoj: “Tein nechpaleuis maj nikixmati ikualneskayouan uan nikselis nepaleuil tein kiualkui, moneki maj kuali nimomachili keman iuan nitajtoua”. ¿Tikitaj keyej semi melauak tein kijtoj tokniuj? ¿Uan keniuj uelis kichiuas aksa maj oksekin amo kinouijmaka motokiskej iuan?

6. ¿Katiyejua se taman tein tapaleuia maj oksekin amo kinouijmaka maj motokikan iuan aksa?

⁶ Se taman tein techpaleuia maj amo teouijmaka se motokis iuan aksa, yejua komo yekmelauj ininka motekipachoua oksekin. Keman se tayekankej ijkon kichiua iniuan nochin tokniuan, uan ika miak pakilis kineki kinpaleuis, niman uelis kiitaskej oksekin, hasta akin okachi telpochmej uan ichpochmej (Mar. 10:13-16). Carlos akin kipia 12 xiujmej kijtoj: “Nejua nikuelita keman nikinita tayekananij ixuetskatokej ompa itech Kali kampa tiMosentiliaj uan nochin kintajpalojtokej”. Kemej tikmatij, amo sayoj moneki maj tayekankej kijto ke kichiua maj amo kinouijmaka oksekin maj motokikan iuan, ta moneki kinextis (1 Juan 3:18). ¿Keniuj uelis kichiuas nejon?

7. ¿Keyej tarjeta tein se motalilia itech ueyi nechikol tapaleuia maj ueli tipeuakan titajtokan iuan aksa, uan toni techmachtia nejon?

⁷ Maj titanemilikan itech nejin neskayot. Keman se tokniuj takat mokepaya itech avión satepan ke yajka ueyi nechikol tein uejkaua eyi tonal itech okse ueyi altepet, kipiaya tarjeta tein se motalilia ompa. Itapaleuijkauj akin kipatanaltia avión kiitak itech tarjeta tajtolmej “Maj uiki iTekiuajyo Dios” uan kiiluij: “Kemaj, maj uiki. Moneki ika titajtoskej nejon”. Satepan yejuan tajtojkej, uan takat kiselij ika miak pakilis toamaixuan. Timiakej no tikpanouanij se taman kemej nejon. ¿Keyej tapaleuia nejon tarjeta maj ueli tipeuakan titajtokan iuan aksa? Porin kemej yeskia tikiniluiaj taltikpakneminij: “Uelis tiontajtos nouan. Xinechontajtani kani niyouj”. Nejon amatsin kinextia ke ika miak pakilis uelis ika titajtoskej tein tikneltokaj. No ijkon, tokniuan tayekananij moneki kichiuaskej teisa tein nesis uan kiniluis tokniuan: “Uelis tiontajtos nouan”. ¿Toni uelis yeski nejon?

8. ¿Toni uelis kichiuaskej tayekananij tein ika kinextiskej ke yekmelauj ininka motekipachouaj oksekin, uan keniuj kinpaleuia tokniuan itech nechikol?

⁸ Itech se ueyi altepet iuan okse uelis yeski tataman kemej motajpalouaj, sayoj ke komo tiixuetskaj, kuali tikinseliaj uan tikintajpalouaj ika nochi toyolo, tiknextijtoskiaj ke yekmelauj ininka timotekipachouaj tokniuan. ¿Sayoj ke akoni moneki yekinika kichiuas? Keman Jesús mosentili iniuan imomachtijkauan, “motokij kampa yetoyaj” yejuan (Mat. 28:18). No ijkon, axkan yejuan tayekananij motokiaj iniuan tokniuan uan kinnojnotsaj. ¿Keniuj kinpaleuia tokniuan itech nechikol? Se tokniuj siuat akin kipia 88 xiujmej uan tekiti kemej precursor, kijtoj: “Keman tayekananij ixuetskatokej keman nechseliaj itech Kali kampa tiMosentiliaj uan nechiluiaj tajtolmej tein teyolchikaua, okachi moskaltia netasojtalis tein nikinpialia”. Okse tokniuj siuat akin amo kikaua Dios kijtoj: “Xa nesi ke amo semi tapaleuia tein kichiuaj, sayoj ke nejua nechtelpaleuia maj tayekankej ixuetska keman nechselia itech nechikol”.

9, 10. 1) ¿Toni tel kuali neskayot techmaka Jiova? 2) ¿Keniuj uelis tayekananij kinextiskej ke ika miak pakilis uelis tapaleuiskej?

 ⁹ Kemej tikmatij, amo akin uelis tajtos touan komo tiknextiaj ke tikpiaj miak tekit. Jiova techmaka se tel kuali neskayot porin Biblia  kinextia ke “amo uejka yetika de cada senme de tejuan” (Hech. 17:27). Se taman kemej tayekananij uelis kinextiskej ke ika miak pakilis uelis tapaleuiskej, komo kiixtaliaj tajtoskej iniuan tokniuan akin uejueykej, telpochmej uan ichpochmej achto ke peuas oso tamis nechikol. Se precursor kijtoj: “Keman se tayekankej nechtajtania keniuj niyetok uan kiyekkaki tein niknankilia, nikmachilia ke noka motekipachoua”. Uan se tokniuj siuat akin ajsitokya 50 xiujmej kitekitilijtok Jiova kijtoj: “Tayekananij akin kiixtaliaj tajtoskej nouan keman tami nechikol, kichiua maj semi kuali nimomachili”.

¹⁰ Kemej tikmatij, tayekananij kipiaj miak taman tein moneki kichiuaskej. Maski ijkon, itech nechikolmej moneki kiixtaliskej achto kinitaskej tokniuan.

11, 12. 1) ¿Toni kijtosneki maj aksa amo techikotasojta? 2) ¿Keniuj kinextia Biblia ke Jiova amo techikotasojta?

¹¹ Jiova no kinextia ke amo techikotasojta. ¿Toni kijtosneki nejon kualneskayot tein iuan techtokia? Kijtosneki ke “amo techichikouia, amo techikoita oso amo kiixpejpena akoni kipaleuis”. Akin yekmelauj amo techikotasojta kinextia ika itanemilil uan ika itachiualis. ¿Keyej motelneki nejon ome taman? Porin sayoj akin kinemilia ke moneki amo tachikotasojtas, kiolinis maj kinexti ke amo akin kichikotasojta. Itech Escrituras Griegas Cristianas, tajtol amo techikotasojta kijtosneki ke amo taixpejpena keman kitemaka nepaleuil (Hech. 10:34). Akin amo techikotasojta, amo kiita keniuj ixtamati aksa, nion no toni chiujkej oso keniuj moita tapani, ta kiita keniuj yekmelauj tamati.

¹² Jiova senkis amo techikotasojta yejua ika techmaka se tel kuali neskayot. ITajtol kinextia ke “amo [kinchichikotasojta] in tagayot” uan “amo kinextia ke aksa kichikotasojta” (xikonixtajtolti Hechos 10:34, 35 uan Deuteronomio 10:17). Yejua nejon moitak keman mochiuak se ouijkayot itech itonaluan Moisés.

13, 14. 1) ¿Toni ouijkayot kipiakej makuil isiuapipiluan Zelofehad? 2) ¿Keniuj kinextij Jiova ke amo techikotasojta?

 ¹³ Keman israelitas amo uejkaua kalakiskiaj itech Tal tein Dios motenkaujka kinmakas, makuil siuamej iknimej akin katkaj ininselti, kipiakej se kuejmol. Kimatiaj ke ininchankauan kemej nochin kalyetouanij israelitas, kinnamikia kiseliskej tal tein kipiaya ininpopaj (Núm. 26:52-55). Kemej ixyetoya kichiuaskej nejon tonalmej, tal kinnamikia kiseliskej tekoneuan takamej. Sayoj ke ininpopaj, Zelofehad, akin pouia itech ichankauan Manasés, momikilij uan amo kipiak se okichpil (Núm. 26:33). Yejua ika, ¿kinmakaskiaj tal oksekin ichankauan uan siuamej amo teyi kiseliskiaj?

¹⁴ Makuil siuamej iknimej kiitatoj Moisés uan kitajtanijkej: “¿Keyej kijkuaniskej itokay topopaj inintatajkoyampa ichankauan porin amo kipiak okichpil?”. Ompa kitataujtijkej: “Xitechmaka tein toaxka yeski  inintatajkoyampa iikniuan topopaj”. ¿Toni kichiuak Moisés? ¿Kiniluij ke amo ueliskia mopataskia tein ixyetoya? Amo, ta yejua “kiixpantilij Jiova tein tajtaniaj siuamej” (Núm. 27:2-5). ¿Toni tanankilij Jiova? Yejuatsin kiiluij Moisés: “Isiuapipiluan Zelofehad melauak tein kijtojtokej. Moneki tikinmakas tein ininaxka yeski, inintatajkoyampa iikniuan ininpopaj, uan moneki tikchiuas maj ajsi ininmako tein ininpopaj kipiaya”. Kemej tikitaj, Jiova kichiuak okse taman. Kiajxitilij tanauatil nejin tajtolmej tein kiiluij Moisés: “Komo se takat momikilia uan amo kipia okichpil, namejuan moneki nankichiuaskej maj pano imako isiuapil tein yejua kipiaya” (Núm. 27:6-8; Jos. 17:1-6). Nejon tonalmej uan satepan, tanauatil tein Dios kitalij kinpaleuiskia nochin siuamej israelitas akin kipiaskiaj se ouijkayot kemej nejon.

15. 1) ¿Keniuj kinita Jiova nochin itekitikauan, uan okachiok akin amo kipiaj nepaleuil? 2) ¿Toni okseki neskayomej itech Biblia kinextia ke Jiova amo techikotasojta?

¹⁵ Nejon tein Jiova kiixtalij kinextia ke teiknelia uan amo techikotasojta. Kinextij ke kinitaya nejon siuamej akin amo kipiayaj nepaleuil ijkon kemej oksekin israelitas akin okachi kuali moajsiaj (Sal. 68:5). Nejin sayoj semej neskayomej tein moajsi itech Biblia tein kitemaka se tamachtilis tein teyolchikaua: Jiova amo kinchikotasojta itekitikauan (1 Sam. 16:1-13; Hech. 10:30-35, 44-48).

16. ¿Toni uelis tikchiuaskej uan ijkon okachi kuali tiknextiskej ke amo titechikotasojtaj kemej Jiova?

¹⁶ ¿Keniuj no ijkon uelis tikchiuaskej kemej Jiova akin amo techikotasojta? Maj tikelnamikikan ke nejin kualneskayot monextia ika totanemilil uan totachiualis. Sayoj komo tiknemiliaj ke moneki amo titechikotasojtaskej, tiknextiskej ke amo titechikotasojtaj. Kemej tikmatij, tinochin tikuelitaj tiknemiliskej ke amo titechikotasojtaj uan amo titechikoitaj. Sayoj ke amo nochipa niman ueli tikmatij keniuj yekmelauj tikinitaj oksekin. ¿Keniuj uelis tikmatiskej ox yekmelauj techitaj ke amo titechikotasojtaj? Keman Jesús kinekik kimatis keniuj kiitayaj taltikpakneminij, kintajtanij itasojikniuan akin iniuan takuaujtamatia: “¿Kenin kijtoaj in tagayot? ¿Akoni yeski Nejuatsin ni Yektagatsin?” (Mat. 16:13, 14). No ijkon uelis tiktajtaniskej se totasojikniuj tein tikmatij ke techyekiluis ox techitaj ke amo titechikotasojtaj. Sayoj ke, komo yejua techiluia ke kiita ke tepitsinok titechikotasojtaj oso tikinchikoitaj akin tajtouaj okse tajtol oso okachi kuali tikinitaj akin kipiaj tomin oso ueyi tamachtilis. ¿Toni moneki tikchiuaskej? Moneki tiktataujtiskej Jiova maj techpaleui maj tikpatakan totanemilil uan ijkon okachi tiknextiskej ke amo titechikotasojtaj kemej Jiova (Mat. 7:7; Col. 3:10, 11).

17. ¿Keniuj uelis tiknextiskej ke amo titechikotasojtaj?

 ¹⁷ Itech nechikol tiknextiaj ke amo tiknekij titechikotasojtaskej ijkon kemej Jiova, keman tikinpoujkaitaj uan tikintasojtaj nochin tokniuan. Kemej neskayot, tikinyoleuaj tochan nochin maski xa okseko kayomej, kipiaj tepitsin tomin, amo kipiaj inintatuan oso amo nemiok ininnamik (xikonixtajtolti Gálatas 2:10 uan Santiago 1:27). Uan no, tikinmatiltiaj kuali tanauatilmej nochin taltikpakneminij maski seseko kayomej. Yejua ika semi techyolpaktia tikpiaskej toamaixuan kemej itech 600 tataman tajtolmej. ¡Nejon tel kuali kinextia ke amo titechikotasojtaj!

18. ¿Keniuj tejuatsin tikonnextis ke tikontasojkamati maj amo teouijmaka se motokis iuan Jiova nion maj techikotasojta?

¹⁸ Tein melauj, keman tikitaj ke Jiova kichiua maj amo teouijmaka se motokis iuan nion techikotasojta, okachi tiktasojkamatij nejon ikualneskayouan. Uan techolinia maj no ijkon tiknextikan iniuan tokniuan uan akin tikinnojnotsaj.