1. Ijkon kemej tatitanilmej, ¿toni no tiktelnekij tikmatiskej?

ITEKIYO Dios tein Jesús kichiujtoya nikan taltikpak amo uejkaua tamiskia, uan imomachtijkauan kitelnekiaj kimatiskej toni mochiuaskia satepan. Yejua ika, seki tonalmej achto ke momikiliskia Jesús, naui itatitaniluan kitajtanijkej: “¿Kemanian mochiuas nochi nejin, uan toni neskayot tikitaskej itech moyetolis uan itamiampa nochi tein mochiujtok itech taltikpak?” (Mat. 24:3, TNM; Mar. 13:3). Tanankilil tikajsij itech Mateo capítulo 24 uan 25 kampa Jesús achtook kijtoj miak taman tein panoskia. Nejon tein kijtoj tiktelnekij tikmatiskej keniuj mochiuas. Itajtoluan motelneki itech tonemilis, porin tejuan no tiktelnekij tikmatiskej toni mochiuas satepan.

2. 1) Ijkon kemej panouanij xiujmej, ¿toni tiktemouanij okachi kuali tikajsikamatiskej? 2) ¿Katiyejua eyi netajtanilmej tikitatij?

² Ijkon kemej panouanij xiujmej, ika netataujtil itekitikauan Jiova momachtianij ika nejmachkayot tein achtook Jesús kijtoj ke mochiuaskia itamian tonalmej. Ijkon tikchiuaj porin tiknekij okachi kuali tikajsikamatiskej kemanian mochiuas tein kijtoj Jesús. Kemej neskayot, maj tikitakan nejin eyi netajtanilmej: ¿Kemanian peua “kachi ueyi tajyouilis”? ¿Kemanian kijtoua Jesús akonimej “ichkamej” uan akonimej “cabras”? ¿Kemanian ualas oso ejkos Jesús? (Mat. 24:21; 25:31-33.)

3. ¿Keniuj achto tikajsikamatiaj ke mochiuaskia okachi ueyi tajyouilis?

³ Itech seki xiujmej tikajsikamatiaj ke okachi ueyi tajyouilis peuak itech xiuit 1914, keman mochiuak Yekinika Neteuilis itech Nochi Taltikpak. Uan tikneltokayaj ke Jiova kitsakuilij itech xiuit 1918 keman tamik neteuilis, uan ijkon tokniuan taixpejpenalmej ueliskiaj kiteixmatiltiskej kuali tanauatilmej itech altepemej (Mat. 24:21, 22). Satepan ke kitamichiuaskiaj nejon tekit, itaixyekanalis Satanás ixpoliuiskia. Tikneltokayaj ke okachi ueyi tajyouilis kipiaskia ipeujyan (1914 hasta 1918),  tonalmej keman motsakuiliskia (itech xiuit 1918 uan satepan) uan itamian (itech Armagedón).

4. ¿Toni moyekajsikamatik kemej mochiuaskia tein Jesús achtook kijtoj?

⁴ Satepan, keman oksepa moyekitak tein Jesús achtook kijtoj tein mochiuaskia itamian tonalmej, tikajsikamatkej ke seki taman tein moijtoj ojpa mochiuaskia (Mat. 24:4-22). Yekinika mochiuak ompa Judea itech yekinika siglo, uan ojpatika mochiuaskia semanauak taltikpak itech totonaluan. Nejin tein tikajsikamatij tapaleuia maj momelaua okseki taman tein Jesús achtook kijtojka. *

5. 1) ¿Toni ouijkayot peuak itech xiuit 1914? 2) ¿Kemanian mochiuak tekokojkayot tein kiualkuik tajyouilis itech yekinika siglo?

⁵ No tikajsikamatkej ke ipeujyan okachi ueyi tajyouilis amo peuak itech xiuit 1914. ¿Keyej amo? Porin Biblia kinextia ke okachi ueyi tajyouilis peuaskia keman kiixnamikiskiaj taneltokalis tein amo melauak uan amo ijkuak moteuiskiaj altepemej. Yejua ika, tachiualismej tein peuak mochiuaj itech xiuit 1914 amo kinextijkej ke peujkaya okachi ueyi tajyouilis, ta sayoj “ipeujyan tekokojkayot tein kiualkui tajyouilis” (Mat. 24:8, TNM). Nejin “tekokojkayot tein kiualkui tajyouilis” yekinika mochiuak ompa Jerusalén uan Judá itech xiuit 33 hasta 66 itech totonaluan.

6. ¿Toni tachiualis kinextis ke peuakya okachi ueyi tajyouilis?

⁶ ¿Toni tachiualismej kinextiskej ke peuakya okachi ueyi tajyouilis? Jesús achtook kijtoj: “Keman nankiitaskej tein pitsotik taixpolojkej, kemej tein ika tajtojka tanauatijkej Daniel, ijkatok kampa taueyichiuaj (taixtajtoltijkej maj kikui itaajsikamatilis), tein nanyetoskej Judea xicholokan itech tepemej” (Mat. 24:15, 16, TNM). Nejin tajtolmej yekinika mochiuak itech xiuit 66: tateuianij romanos (“tein pitsotik”) ijkatoyaj “kampa taueyichiuaj” keman kiixpolojkej Jerusalén uan itemplo (tein judíos kiitayaj ke yektik). Ojpatika mochiuas keman Organización de las Naciones Unidas (tein  axkan kiitaj ke “pitsotik”) ijkatos “kampa taueyichiuaj” keman kiixnamikiskej taneltokalis tein kijtoua ke kitojtoka Cristo (tein kiitaj ke yektik akin ompa pouij) uan nochi tein poui itech Ueyi Babilonia. Keman mochiuas nejin, ijkon kemej kijtoua Apocalipsis 17:16-18, kinextis ke peuakya okachi ueyi tajyouilis.

7. 1) ¿Keniuj momakixtijkej itatojtokakauan Cristo itech yekinika siglo ijkon kemej Jesús motenkaujka? 2) ¿Toni uelis tikchiaskej maj mochiua satepan?

⁷ Jesús no achtook kijtoj: ‘Motokotsos [...] ne tonalmej’. Nejin tajtol yekinika mochiuak itech xiuit 66 keman tateuianij romanos “kitokotso[jkej]” oso kitsakuilijkej taixnamikilis. Tokniuan taixpejpenalmej akin nemiaj Jerusalén uan Judá uelik cholojkej uan ijkon momakixtijkej (xikonixtajtolti Mateo 24:22; Mal. 3:17). ¿Uan toni uelis tikchiaskej maj mochiua satepan? Itech okachi ueyi tajyouilis, Jiova “kitokotsos” itaixnamikilis Naciones Unidas tein kiualkuilis taneltokalis tein amo melauak, uan ijkon amo teuan ixpoliuis taneltokalis tein melauak. Nejon tapaleuis maj momakixtikan itekitikauan Dios.

8. 1) ¿Toni mochiuas satepan ke panos yekinika taman tein ika peuas okachi ueyi tajyouilis? 2) ¿Kemanian moajsikamati ke kiseliskej netetayokolil ne iluikak 144,000 akin mokauajok nikan taltikpak? (Xikonita nota 2 itamian tamachtilis.)

 ⁸ ¿Toni mochiuas satepan ke panos yekinika taman tein ika peuas okachi ueyi tajyouilis? Itajtoluan Jesús kinextia ke panos seki tonalmej achto ke peuas Armagedón. ¿Toni mochiuas? Tanankilil tikajsij itech Ezequiel 38:14-16 uan Mateo 24:29-31 (xikonixtajtolti). * Satepan ualas Armagedón tein yeski kemej ijkuak ixpoliuik Jerusalén itech xiuit 70 (Mal. 4:1). Keman ualas neteuilis Armagedón tein ika tamisya okachi ueyi tajyouilis, yeski se taman “ten amo keman nankitakke desde kuak tsinpeuak in taltikpak” (Mat. 24:21). Uan keman panosya, peuas iTekiuajyo Cristo tein uejkauas Mil Xiuit.

9. ¿Keniuj techpaleuia tein Jesús achtook kijtoj toni panos itech okachi ueyi tajyouilis?

⁹ Nejin tein Jesús achtook kijtoj toni  panos itech okachi ueyi tajyouilis, techyolchikaua. ¿Keyej? Porin techyekmatiltia ke maski tikpiaskej uejueyi ouijkayomej, itekitikauan Dios kemej se xolal makisas keman ualas okachi ueyi tajyouilis (Apoc. 7:9, 14). Sayoj ke okachi techyolpaktia tikmatiskej ke itech Armagedón, Jiova kinextis ke sayoj yejuatsin kinamiki maj taixyekana uan kichipauas itokay tein yektik (Sal. 83:18; Ezeq. 38:23).

10. Itech seki xiujmej, ¿kemanian tikajsikamatiaj ke moijtoskia akonimej ichkamej uan akonimej cabras?

¹⁰ Axkan maj tikitakan kemanian mochiuas okseki taman tein Jesús achtook kijtoj: neskayot tein kinextia ke yejua kijtos akonimej ichkamej uan akonimej cabras (Mat. 25:31-46). Itech seki xiujmej, tikajsikamatiaj ke moijtoskia akonimej ichkamej uan akonimej cabras itech nochi itamian tonalmej, tein kijtosneki itech xiuit 1914 uan satepan. Tiknemiliayaj ke akin amo kiseliskiaj tamachtilis ika iTekiuajyo Dios uan momikiliskiaj achto ke peuaskia okachi ueyi tajyouilis, momikiliskiaj kemej cabras uan amo ueliskiaj moajokuiskej.

11. ¿Keyej itech xiuit 1914 amo peuak moijtoj akonimej ichkamej uan akonimej cabras?

¹¹ Itech amaix La Atalaya xiuit 1995, oksepa kimelaujkej Mateo 25:31, kampa kijtoua: “Nimoualuikas ika chikaualis [...] [uan] nechyeualojtiualaske nochi niángeles [...] Dios. Uan [...] nimotalis [...] kampa ne notaixejeko[j]kan”. Moijtoj ke itech xiuit 1914, maski Jesús mochiuak Tekiuaj itech iTekiuajyo Dios, amo motalij ‘kampa ne itaixejekojkan’ kemej Juez itech nochi altepemej (Mat. 25:32; no xikonita Daniel 7:13). Sayoj ke, itech neskayot kampa ika tajtoua ichkamej uan cabras, kiyeknextia Cristo kemej Juez (xikonixtajtolti Mateo 25:31-34, 41, 46). Kemej Jesús amo motalij itech xiuit 1914 kemej se Juez itech nochi altepemej, itech nejon xiuit amo peuak kijtoua akonimej ichkamej uan akonimej cabras. * Komo ijkon, ¿kemanian peuaskia?

12. 1) ¿Kemanian yekinika peuas Jesús tekitis kemej Juez itech nochi altepemej? 2) ¿Toni tachiualismej moijtoua itech Mateo 24:30, 31 uan Mateo 25:31-33, 46? (No xikonita nota 4 itamian tamachtilis.)

 ¹² Tein achtook Jesús kijtoj ke mochiuaskia itamian tonalmej, kinextia ke yejua yekinika peuas tekitis kemej Juez itech nochi altepemej, satepan ke ixpoliuis taneltokalis tein amo melauak. Kemej tikitakej itech  párrafo 8, seki taman tein mochiuas itech nejon tonalmej moijtoua itech Mateo 24:30, 31. Keman tikitaj nejin tajkuilol, tikajsij ke Jesús achtook kijtoj seki taman kemej tein no moijtoua itech neskayot kampa ika motajtoua ichkamej uan cabras. Kemej neskayot, achtook moijtoua ke Jesús ualas ika chikaualis iuan ángeles; no monextia ke nochin taltikpakneminij uan altepemej senolochmej moajsiskej iixpan. Uan no, akin kinitaskej kemej ichkamej ‘ajkotachiaskej’ porin kiseliskej ‘nemilis nochipaya’, * uan akin kinitaskej kemej cabras “mochoktiske” keman kiajsikamatiskej ke senkis ixpoliuiskej (Mat. 25:31-33, 46).

13. 1) ¿Kemanian kijtos Jesús akonimej ichkamej uan akonimej cabras? 2) ¿Keniuj techpaleuia itech totanojnotsalis nejin tein tikajsikamatij?

¹³ ¿Toni techajsikamatiltia nejin tein timomachtiaj? Techmachtia ke Jesús kijtos itech nochi altepemej akonimej ichkamej uan akonimej cabras keman ualas itech okachi ueyi tajyouilis. Uan itech Armagedón, tein ika tamis okachi ueyi tajyouilis, akin tamatiskej kemej cabras senkis ixpoliuiskej. ¿Keniuj techpaleuia itech totanojnotsalis nejin tein tikajsikamatij? Techpaleuia maj tikitakan ke motelneki tikinnejmachtiskej taltikpakneminij. Hasta keman peuas okachi ueyi tajyouilis, uelisok mopataskej uan yaskej itech ojti tein teuika itech “yek nemilis” (Mat. 7:13, 14). Maski axkan miakej monejnemiltiajya kemej  ichkamej oso cabras, nejon senkis moijtos itech okachi ueyi tajyouilis. Yejua ika, moneki maj tiksentokakan titanojnotsakan. Maj tikintapouikan iTekiuajyo Dios nochin akin tiueliskej uan ijkon uelis kikakiskej uan kiseliskej.

14, 15. ¿Katiyejua naui textos ika tajtoua keman Cristo ualas kemej Juez?

¹⁴ Komo okachi timomachtiaj tein Jesús achtook kijtoj, ¿kinextis ke no monekis tikpataskej tein tikajsikamatiaj kemanian mochiuas okseki taman tein motelneki? Maj tiksentokakan tikitakan itajtoluan Jesús uan ijkon tikajsiskej tanankilil.

¹⁵ Tein Jesús achtook kijtoj itech Mateo 24:29–25:46, tel ika tajtoj tein mochiuaskia itamian nejin tonalmej uan itech okachi ueyi tajyouilis tein amo uejkaua ejkos. Ompa Jesús kijtoj chikueyi tanemililmej tein kinextia ke ualas oso ejkos. * Keman ika tajtoj okachi ueyi tajyouilis kiyeknextij: “Nechitaske [...] kuak Nejuatsin niualajtos ya mixtsalan”. No kijtoj: “Amo nankimatij toni horas ualas Namotayekankateko”. Uan kiajxitij: “Nimoualuikas ya kuak namejuan amo [...] nannechchixtoske”. Uan no, itech neskayot kampa ika tajtoj ichkamej uan cabras, kinextij ke ‘moualuikas ika chikaualis’ (Mat. 24:30, 42, 44; 25:31). Nejin naui tanemililmej techuika itech tonalmej keman Jesús ualas kemej Juez. ¿Kani itech itajtoluan Jesús tikajsij okseki naui tanemililmej tein ika tajtoua keman ualas?

16. ¿Katiyejua okseki naui textos kijtoua ke ualas Jesús?

¹⁶ Keman Jesús ika tajtoj takeual takuaujtamach uan tamatkej, kijtoj: “¡Yolpaki nejon takeual komo iteko keman ejkos, kiajsikiuj ijkon kichiujtok!”. Uan no, itech neskayot kampa ika tajtoua ichpochmej kijtoj: “Keman yejuan takouatoj, ejkok novio”. Uan itech neskayot kampa ika motajtoua istak tomin kijtoj: “Satepan ke panok miak tonalmej ualaj ininteko nejon takeualmej”. Ompa no kijtoj: “Keman nejua niejkoskia, nikselijtoskia tein noaxka” (Mat. 24:46; 25:10, 19, 27, TNM). ¿Kemanian mochiua nejin okseki naui tanemililmej?

17. Ijkon kemej kijtoua Mateo 24:46, ¿kemanian tikajsikamatiaj ke ejkoskia Jesús?

¹⁷ Achto, itech toamaixuan momelauani ke nejin naui tanemililmej kijtosnekia  keman Jesús ejkok oso ualaj itech xiuit 1918. Kemej neskayot, maj tikitakan keniuj tikajsikamatiaj tein mochiua iuan takeual takuaujtamach uan tamatkej tein Jesús ika tajtoj (xikonixtajtolti Mateo 24:45-47). Tiknemiliayaj ke kemej kijtoua versículo 46, Jesús ualaj itech xiuit 1918 keman kiitako keniuj tokniuan taixpejpenalmej kichiujtoyaj itekiyo Dios, uan itech xiuit 1919 kikauak imako takeual takuaujtamach nochi tein iaxka (Mal. 3:1). Sayoj ke, keman okachi tikyekitaj tein Jesús achtook kijtoj, kinextia ke moneki tikpataskej tein tikajsikamatiaj kemanian mochiuas seki taman tein moijtojka. Maj tikitakan keyej.

18. ¿Toni tikajsikamatij axkan ke tikitakejya nochi tein Jesús achtook kijtoj?

¹⁸ Itech versículos tein moajsi achto ke ajsis itech Mateo 24:46, tataman tajtol tein kijtosneki ualas, nochi kiyeknextia tonalmej keman Jesús ualas uan kijtos toni kiseliskej taltikpakneminij itech okachi ueyi tajyouilis (Mat. 24:30, 42, 44). Uan no, kemej tikitakejya itech  párrafo 12, tein kijtoua Mateo 25:31 mochiuas satepan keman ualas uan kijtos toni kiseliskej taltikpakneminij. Yejua ika, taixejekol maj tikijtokan ke ijkuak kikauas imako takeual takuaujtamach nochi tein iaxka, kemej kijtoua Mateo 24:46, 47, no mochiuas satepan keman ualas itech okachi ueyi tajyouilis. * Kemej tikitaj, ijkuak timomachtiaj nochi tein Jesús achtook kijtoj, kiyeknextia ke chikueyi tanemililmej tein techmachtij ke ualas, mochiuas keman yejua kijtos toni kiseliskej taltikpakneminij itech okachi ueyi tajyouilis.

19. 1) ¿Toni yankuik taajsikamatilis tikitakej itech nejin tamachtilis? 2) ¿Toni netajtanilmej tiknankiliskej itech okseki tamachtilis?

¹⁹ Maj tikijtokan ika seki tajtolmej tein timomachtijkejya. Ipeujyan nejin tamachtilis, tikijtojkej eyi netajtanilmej tein ika tajtoua kemanian mochiuaskia seki taman. Yekinika tikitakej ke okachi ueyi tajyouilis amo peuak itech xiuit 1914, ta peuas keman Naciones Unidas kiixnamikiskej Ueyi Babilonia. Satepan, tikitakej keyej Jesús amo no kijtoj akonimej ichkamej uan akonimej cabras itech xiuit 1914, ta kijtos itech okachi ueyi tajyouilis. Uan no, tikmelaujkej ke Jesús amo ualaj uan kikauak imako takeual takuaujtamach nochi tein iaxka itech xiuit 1919, ta kichiuas itech okachi ueyi tajyouilis. Ika seki tajtolmej, nochi eyi taman mochiuas satepan: itech okachi ueyi tajyouilis. Nejin tein tikijtojkej, ¿keniuj kipata kemej tikajsikamatiaj okseki taman tein moijtoua itech neskayot kampa ika motajtoua takeual takuaujtamach uan tamatkej? ¿Uan keniuj no ijkon kipata kemej tikajsikamatiaj okseki neskayomej tein Jesús kijtoj tein mochiua itamian tonalmej? Nejin netajtanilmej tein motelnekij tikitaskej itech okseki tamachtilis.