Amo onkak keyej techteltekipachos kani motalia se akin kikalankixtiaj itech nechikol keman timosentiliaj. Nejin amaix kinyolchikauani tetatmej akin kitekitiliaj Dios, komo kiitaj ke kuali yetok, maj kipaleuikan ininkonetsin akin kikalankixtijkej itech nechikol akin nemiok iniuan. Kemej kinextij La Atalaya 15 de noviembre de 1988, página 19 uan 20, tetatmej uelis kimachtiskej ika Biblia se ininkonetsin akin kikalankixtijkej itech nechikol akin nemiok kalijtik. Ijkon, ininkonetsin kiselis yolchikaualis tein kipaleuis maj mokepa iuan Jiova.

Amo onkaskia kuejmol komo konetsin akin kikalankixtijkej itech nechikol motalia ika kuali taixejekolis iniuan itatuan itech Kali kampa tiMosentiliaj. Kemej amo motajtani maj se akin kikalankixtiaj motali hasta taikampa itech nechikol, amo onkaskia kuejmol komo konetsin motalia iniuan itatuan kampa yejuan motaliskej. Kemej tikmatij, tetatmej kitemouaj maj ininkonetsin mochikaua ikuali uikalis iuan Dios. Komo yejuan motaliaj iuan ininkonetsin, uelis kiyekitaskej maj kuali takaki itech nechikol uan maj kipaleui tamachtilis. Nejon semi ouij kichiuaskiaj komo okseko iselti motalia.

Axkan, ¿kijtosneki ke konetsin akin kikalankixtijkej amo uelis motalis iniuan itatuan itech nechikol komo amo nemiok kalijtik? Achto nejin amaix kiyeknextiani keniuj se itatojtokakauj Cristo moneki mouikas iuan se ichankauj akin kikalankixtiaj tein amo nemiok kalijtik. * Sayoj ke ijkuak kalyetouanij kikauaj maj se ininchankauj akin kikalankixtijkej motali ika kuali taixejekolis iniuan keman mochiujtok nechikol, semi taman ke kitemoskej mouikaskej iuan maski amo moneki. Komo kalyetouanij akin amo kikauaj Dios kiitaj kemej moneki ininchankauj akin kikalankixtijkej itech nechikol, uan mochikauaj kichiuaskej kemej Biblia kinyolmajxitia keniuj moneki mouikaskej iuan, amo onkak keyej timotekipachoskej (1 Cor. 5:11, 13; 2 Juan 11).

Komo se akin kikalankixtijkej itech nechikol kichiua kemej moneki keman mosentilia, amo onkak kuejmol maj motali iuan se ichankauj oso iuan okse tokniuj itech nechikol. Kemansa, uelis kiualkuis okseki kuejmolmej komo moixtalia kani monekiskia motalis itech Kali kampa tiMosentiliaj. Ika tein tikitakejya, komo akin mosentiliaj, tein no ompa moajsij ichankauan, mochikauaj kitakamatiskej tein Biblia kijtoua keniuj moneki mouikaskej iuan akin kikalankixtijkej, uan komo amo kinkuejmoloua tokniuan kampa motalia yejua, amo onkak keyej techteltekipachos nejon. *