Tein tayolmajxitia Biblia kinpaleuia namikuanij maj yolpakikan porin kitemaka Jiova akin kichiuak maj onka nemilis kemej namikuanij. Nejon techpaleuia maj tiknextikan netasojtalis uan okseki taman tein techpaleuis maj kuali timouikakan, techiluia toni taman uelis taijtakos, uan no keniuj uelis kuali timonojnotsaskej. (Xikonixtajtolti Colosenses 3:8-10, 12-14.)

Namikuanij moneki mopoujkaitaskej. Keman kichiuaj kemej Dios kinauatia takat uan siuat, uelis yolpakiskej. (Xikonixtajtolti Colosenses 3:18, 19.)

Netasojtalis kinpaleuis namikuanij maj senyetokan. Dios techmachtia keniuj uelis titetasojtaskej. Yejuatsin uan iKonetsin Jesucristo, techmakaj se kuali neskayot ika netasojtalis. (Xikonixtajtolti 1 Juan 4:7, 8, 19.)

Komo namikuanij kiitaj nenamiktilis kemej se inetetayokolil Dios, kinpaleuis maj senyetokan. Dios kineki maj nochipa ijkon moajsikan, porin nejon tapaleuia maj kuali yetokan kemej kalyetouanij. Yejuatsin kichijchiuak takat uan siuat maj uelikan mopaleuikan uan maj moyolchikauakan. Uan no kinchijchiuak kemej yejuatsin tamati, tein kijtosneki, ke uelis kinextiskej netasojtalis ijkon kemej Jiova kinextia. (Xikonixtajtolti Génesis 1:27 uan 2:18, 24.)