“Itech inintonaluan nejon tekiuanij, Dios tein nemi iluikak kitalis se tekiuajyot tein amo keman ixpoliuis. Uan nejin tekiuajyot amo panos imako okse xolal. Kikuechos uan kitalis itamilis nochi nejin tekiuajyomej, uan yejua uejkauas nochipaya.” (Daniel 2:44.)

ITekiuajyo Dios se taixyekanalis tein yetok iluikak uan tekiuaj yejua Jesucristo. Yejua kinixpolos tekiuanij tein axkan moajsij uan ijkon kiitas maj mochiua itanejnekilis Dios amo sayoj iluikak ta no nikan taltikpak (Mateo 6:9, 10). ITekiuajyo Dios amo keman kiixpataskej, porin “Totekotsin Jesucristo Totemakixtijkatsin tayekantinemis sen nachipa”, yejua ika senkis onkas yolseuilis (2 Pedro 1:11).

“Satanás monextijtinemi [...] keme yeskia se ángel [...] ten kualkui tanextsin de Dios. Ika ya nojon no ijkon monextiaj uan tekititinemij ne itakeualuan de Satanás keme yeskia tanojnotsani de Dios [...]. Uan nojonkes tamachtiani Dios kintamixpolos ijkon keme kinnamiki nintachiualisuan ten kichiutinenke.” (2 Corintios 11:14, 15.)

Taneltokalismej tein amo melaujkej moitas ke yejua Satanás akin yekmelauj iaxka. Senkis ixpoliuiskej uan amo akinok kitelpaleuis itaneltokalis nion temiktis. Ijkon, akin kitasojtaj “Dios ten nachipa yoltika“ uelis kiueyichiuaskej ika “se takuautamatilis” uan “ika espíritu uan ika tein melauak”. ¡Nejon tonalmej kemaj onkas yolseuilis uan nochin kualtsin mouikaskej! (1 Tesalonicenses 1:9; Efesios 4:5; Juan 4:23, TNM.)

“Totajtsin Dios inuan yetinemis [...]. Kinelkaualtis de ninchokilisuan [...]. Uan amo aken momikilis ok; uan amo aken mochoktis ok; uan amo aken motekipachos ok; uan amo aken yoltajyouis ok. Uan ijkon yeski porin nochi tajtamik ya de ne achtopa onkaya.” (Apocalipsis 21:3, 4.)

Nochi nejin Jiova kichiuas ika iKonetsin, Jesús, akin toka kitemakak inemilis (Juan 3:16). Keman taixyekanas Jesucristo, taltikpakneminij kipiaskej  nemilis tein amo kipia tajtakol. Amo onkasok tajyouilis, porin “Totajtsin Dios inuan yetinemis” uan kitamis “ninchokilisuan”. Amo uejkaua, tajtakol uan tajyouilis amo onkasok. “Akin yolmelaujkej yejuan ininaxkatis taltikpak, uan ompa nemiskej nochipaya.” (Salmo 37:29.)

“[Jesucristo] kikitskij ne ueyi tekuani uan kiilpij uan kitsakuato para se mil xiuit [...], yejua ne in achtopa kouat ten nentiualaya. Uan [...] itokay in amokuali Satanás. Uan [...] kipantamotak [...] kampa ne ueyi taltekoch uan kipantsakuak uan kipanneskayotij ika nisello. Uan ijkon [...] amo uelis ok kinkajkayautinemis ok in taltikpakuani.” (Apocalipsis 20:2, 3.)

Ixpoliuis nochi tein kiixyekantok Satanás keman yejua uan amokuali ejekamej kinilpiskej uan kinpantamotaskej itech “ueyi taltekoch”, tein kijtosneki ke amo teyi uelis kichiuaskejok. Amo uelis kinyekanaskejok taltikpakneminij. ¡Tel kualtsin se nemis itech se taltikpak kampa amo taixyekanasok Satanás uan iamokuali ejekauan!

Itamian tonalmej tamis keman mochiuas tein Jesús kitokaytij “kachi ueyi tajyouilis”. Yejua kijtoj: “Onkas kachi ueyi tajyouilis ten amo keman nankitakke desde kuak tsinpeuak in taltikpak. Uan amo keman onkas ok satepan okse tajyouilis keme nijin” (Mateo 24:21).

Yeski okachi ueyi tajyouilis porin kiualkuis miak taman tajyouilis kemej amo keman moitani, uan nejin tamis keman “moteuiske ika guerra iuan Dios tech ne ueyi tonal [...] porin sayo Yejuatsin kipixtinemi nochi chikaualis”. Nejin miakej kiixmatij kemej “Armagedón” (Apocalipsis 16:14, 16).

Akin kitasojtaj tein melauak senkis kichiaj keman ixpoliuis tein amo kuali nikan taltikpak. Maj tikitakan sayoj seki tatiochiualismej tein kiseliskej keman taixyekanas iTekiuajyo Dios.

“Uel miak tagayot” nemiskej itech se yankuik taltikpak kampa senkis onkas yolseuilis: ITajtol Dios kiyekijtoua ke “uel miak tagayot” tein amo ueli mopoua makisaskej keman mochiuas “kachi ueyi tajyouilis” uan nemiskej itech se yankuik taltikpak kampa onkas melaujkayot (Apocalipsis 7:9, 10, 14; 2 Pedro 3:13). Nochin akin ompa nemiskej kitasojkamatiliskej Jesucristo, “ichkatsin [...] [tein] kinajchiuilis nintajtakoluan de nochi taltikpakuani” (Juan 1:29).

Itamachtilis Dios kiualkuis miak taman tein kuali: Itech yankuik taltikpak “pexontos itaixmatilis Jiova kemej at kipexontia ueyiat” (Isaías 11:9). Nejon tamachtilis tein kitemakas Jiova kipias tanauatilmej tein tapaleuis maj kuali nemikan taltikpakneminij uan no iuan nochi tein ompa moajsis. Dios motenkaua: “Nejua, Jiova, nimoDios, Akin mitsnextilia keniuj kuali mitsyas, Akin mitsnejnemiltia kampa moneki tiojtokas” (Isaías 48:17).

Akin tikintasojtaj tein momikilijkejya oksepa nemiskej: Keman Jesús yetoya nikan taltikpak, oksepa kimakak nemilis Lázaro akin iuan kuali mouikaya (Juan 11:1, 5, 38-44). Nejin kinextij tein kichiuas keman taixyekantos itech iTekiuajyo Dios (Juan 5:28, 29).

Nochipaya onkas yolseuilis uan melaujkayot: Keman Cristo taixyekantos, amo onkasok teikamauiltilis. ¿Keyej? Porin Jesús, kuali kimati tein kipia itech iyolo aksa, uan nejon kipaleuis maj kimati akoni yolmelauak uan akoni amo. Akin amo kinekij kikauaskej tein amo kuali, amo uelis nemiskej nikan taltikpak keman Dios tayektalis (Salmo 37:9, 10; Isaías 11:3, 4; 65:20; Mateo 9:4).

Axkan tikitakej sayoj seki taman tein kijtoua iTajtol Dios ke mochiuas satepan tein semi kualtsin. Keman iTekiuajyo Dios taixyekantos nikan taltikpak, “yekmelauj yolpakiskej” nochipaya (Salmo 37:11, 29). Uan nochi tein kichiua maj onka tajyouilis senkis ixpoliuis. Dios techyekiluia: “Xikitakan, Nejuatsin nikyankuikatalis nochi ten ongak. [...] Notajtoluan nochi kuika ten melau” (Apocalipsis 21:5).