“Akin amo tetapojpoluia kiuejueloua puente kampa yejua monekis panos”. Nejin tajtolmej tein kijtoj tajkuilojkej Edward Herbert akin nemik 400 xiujmej achtoya, kinextia ke semi moneki titetapojpoluiskej porin satepan monekis titajtaniskej maj techtapojpoluikan (Mateo 7:12). Sayoj ke onkak okse taman tein okachi moneki techolinis maj tikchiuakan, uan nejon kinextij tatitanil Pablo. (Xikonixtajtolti Colosenses 3:13, TNM.)

Kemej tinochin titajtakouanij kemansa titekualantiaj oso yejuan no ijkon techchiuaj (Romanos 3:23). ¿Toni uelis tikchiuaskej uan ijkon amo timouejkatiliskej iniuan oksekin? Pablo, ika ichikaualis Dios techyolmajxitia maj titeijyouikan uan maj titetapojpoluikan. Uan nejon semi tapaleuia axkan ijkon kemej tapaleuij ome mil xiuit achtoya keman kijkuiloj. Maj tikitakan tein kijtoj.

“Xiksentokakan ximoxikojtiyakan se iuan okse.” Tajtol griego tein mokepa kemej “xiksentokakan ximoxikojtiyakan se iuan okse”, kiteajsikamatiltia ke moneki se moijyouis. Se amaix kijtoua ke itatojtokakauan Cristo akin moijyouiaj, “uelij kixikouaj ininnepololuan oksekin oso keman kichiuaj teisa tein amo kiuelitaj”. Uan tajtol “se iuan okse”, kinextia ke moneki timoijyouiskej tinochin. Ika okseki tajtolmej, tein techpaleuis maj amo timouejkatilikan iniuan oksekin porin kichiuaj seki taman tein amo techpaktia, moneki tikajsikamatiskej ke seki taman tein tikchiuaj no uelis kinkualantis oksekin. Sayoj ke, ¿komo aksa techyolxokolia?

“Xiksentokakan [...] ijsiujka ximotapojpoluikan se iuan okse.” Se motelmachtijkej kijtoua ke tajtol griego tein mokepa kemej “ijsiujka ximotapojpoluikan”, “amo yejua tajtol tein kiteajsikamatiltia netapojpoluilis [...], ta tein kiteajsikamatiltia kualtakayot”. Okse amat kijtoua ke nejon tajtol uelis kijtosnekis ke “kitemaka tein teyolpaktij, se kualtakayot, se nepaleuil”. Tiknextiaj kualtakayot keman ika miak pakilis titetapojpoluiaj maski ‘aksa techyolxokolij’. Sayoj ke ¿keyej moneki ijkon tikchiuaskej? Tepitsin porin xa niman monekis maj nejon taltikpaknenkej techikneli oso maj techtapojpolui.

“Kemej Jiova ijsiujka namechtapojpoluij [...], no ijkon xikchiuakan.” Yejua nejin tein okachi moneki techolinis maj titetapojpoluikan ika miak pakilis, porin Jiova ijkon techtapojpoluia (Miqueas 7:18). Maj tepitsin titanemilikan itech ueyi teiknelilis tein Jiova kinnextilia tajtakouanij akin moyolnonotsaj. Yejuatsin amo tajtakoua kemej tejuan, sayoj ke ika miak pakilis uan niman techtapojpoluia maski kimati ke amo keman monekis maj tiknextilikan teiknelilis oso maj tiktapojpoluikan. Yekmelauj Jiova techkauilia okachi kuali neskayot ika netapojpoluilis.

Iteiknelilis Jiova techtokia iuan uan techolinia maj no ijkon tikchiuakan (Efesios 4:32–5:1). Semi kuali maj timotajtanikan: “Komo Jiova nechtapojpoluia ika ueyi teiknelilis, ¿keniuj nejua amo niktapojpoluis aksa tel tajtakojkej kemej nejua akin yekmelauj moyolnonotsa ika tein nechchiuilij?” (Lucas 17:3, 4).