1, 2. 1) ¿Toni panoua keman kinyekpiaj ichkamej? 2) Itech itonaluan Jesús, ¿keyej miakej taltikpakneminij katkaj kemej ichkamej tein amo kipiayaj inintajpixkauj?

ICHKAMEJ kuali moskaltiaj ijkuak ichkatajpixkej kinita maj kuali moajsikan. Se amaix kampa ika tajtoua keniuj kiniskaltiaj ichkamej kinextia ke, “komo ichkatajpixkej sayoj kinuika ixtauat uan amo kinmaka okseki taman tein kinpoloua, uelis kiitas ke seki xiujmej satepan, mokokouaj uan amo uelis ika mopaleuis”. Sayoj ke keman kinita ichkamej kemej moneki, moajsij kemej kineki.

² No ijkon kuali moajsi nechikol komo tokniuan ichkatajpianij kuali kinyekpiaj sejsemej ichkamej tein Dios kinkauilia maj kinitakan. Xikonelnamiki ke Jesús kinikneliaya taltikpakneminij porin “tajyouijtoyaj uan tayokoyayaj keme ichkame ten kuamoyautokke uan keme ne ichkame ten amo kipiaj in tapixke” (Mat. 9:36). ¿Keyej ijkon moajsiaj? Porin akin monekia kinmachtiskej Tanauatil kipiayaj ome nemilis, amo teikneliayaj uan tel tajtaniaj teisa. Akin kinixyekanayaj israelitas itech taneltokalis amo kinpaleuiayaj nion kintamakayaj ichkamej, ta “kintalilia[ya]j [...] ouijkayot ten semi etik” (Mat. 23:4).

3. ¿Toni moneki kielnamikiskej tayekananij itech nechikol keman tekitij kemej ichkatajpianij?

³ Tokniuan ichkatajpianij itech nejin tonalmej, oso tayekananij akin kinixtaliaj, kipiaj se tekit tein moneki amo kiauilmatiskej. Kinitaj ichkamej akin iaxkauan Jiova uan Jesús, akin motokaytij kemej “kuali tapixke” (Juan 10:11). Nejin ichkamej takoualmej “ika ipatiu ne itasojmouiskaesyotsin” Jesús tein kitoyauak (1 Cor. 6:20; 1 Ped. 1:18, 19). Yejua semi kintasojta hasta ininka kitemakak inemilis. Tayekananij nochipa moneki kielnamikiskej ke iKonetsin Dios, Jesucristo akin tetasojtakej uan “Tayekankatapixke ten  kinyekpixtinemi nochi itaneltokakauan”, kinita keniuj kichiuaj tekit kemej ichkatajpianij (Heb. 13:20).

4. ¿Toni tikitaskej itech nejin tamachtilis?

⁴ Yejua ika, ¿keniuj tokniuan ichkatajpianij moneki kinitaskej ichkamej? Akin pouij itech nechikol kintajtaniaj maj ‘kintakamatiyakan inintayekankauan’. Sayoj ke, tayekananij akin kichiuaj kemej Cristo kiniluiaj maj amo ‘moueyichiuakan ininixpan akin iaxkauan Dios’ oso maj amo kinchikaujkauikan (Heb. 13:17; xikonixtajtolti 1 Pedro 5:2, 3, TNM). Sayoj ke, ¿keniuj tayekananij uelis kinyekanaskej ichkamej sayoj ke amo kinchikaujkauiskej? Ika okseki tajtolmej, ¿keniuj uelis kinmakaskej ichkamej tein kinpoloua sayoj ke amo kitelpanoltiskej tanauatil tein Dios kinmaka?

5. ¿Toni techmachtia Isaías 40:11 kemej Jiova techyekpia?

⁵ Keman tanauatijkej Isaías ika tajtoj Jiova, kinextij: “Kemej ichkatajpixkej kinyekpias iichkauan. Ika imay kinnechikos ichkamej; uan iyolixko kinuikas. Kinyekanas ika nejmachkayot ichkatenamej tein tatamakatokej” (Is. 40:11). Nejin tajtolmej kinextia ke Jiova kinmaka nochi tein kinpoloua akin pouij itech nechikol akin amo chikaujkej uan akin amo uelij mopaleuiaj. Ijkon kemej se ichkatajpixkej kimati tein kipoloua sejse iichkauj uan niman kinmaka tein moneki, Jiova no kiita tein kinpoloua akin pouij itech nechikol uan yolpaki kinmakas nepaleuil tein moneki. Uan ijkon kemej se ichkatajpixkej kiuika ichkatsin iyolixko keman moneki, Jiova akin “techyoliknelijtinemi”, no ijkon kemej yeskia techuikas iyolixko keman tikpiaskej ouijkayomej. Techyolseuis uan techmakas chikaualis keman tikpiaskej uejueyi tayejyekolis oso keman tikpiaskej se taman ouijkayot (2 Cor. 1:3, 4).

6. ¿Keniuj tokniuan ichkatajpianij uelis kichiuaskej kemej Jiova?

⁶ ¡Tel kuali neskayot kinkauilia Jiova tokniuan ichkatajpianij! Ijkon kemej yejuatsin, yejuan moneki kiitaskej tein kinpanoua ichkamej porin komo kimatij ouijkayomej tein kipiaj uan tein kinpolojtok nejon tonalmej, uelis kinyolchikauaskej uan kinmakaskej nepaleuil tein moneki (Prov. 27:23). Nejin kijtosneki ke tayekananij moneki kitemoskej tajtoskej iniuan tokniuan. Maski amo mokalakiaj itech ininnemilis, kinextiaj ke kintekipachoua tein kiitaj uan tein kikakij itech nechikol uan ika netasojtalis kinpaleuiaj akin amo chikaujkej (Hech. 20:35; 1 Tes. 4:11).

7. 1) Itech itonaluan Ezequiel uan Jeremías, ¿toni kinchiuiliayaj iichkauan Dios? 2) ¿Toni tein motelneki kinmachtia tayekananij ijkuak kiitaj ke Jiova kinixtopeuak ichkatajpianij akin kikaujkej yejuatsin?

⁷ Maj tiknemilikan tein kichiuayaj ichkatajpianij itech itonaluan Ezequiel uan Jeremías, akin Dios kinixtopeuak porin amo kinyekpiakej iichkauan Jiova kemej monekia. Kemej amo akin kinyekpiaya ichkamej, kemej yeskia uetsiaj ininmako tekuanimej oso poliuiaj. Nejon ichkatajpianij amo kintamakayaj, ta ininka mauiltiayaj uan “kisentokakej motamakakej sayoj yejuan” (Ezeq. 34:7-10; Jer. 23:1). Jiova no kinixtopeua akin taixyekanaj itech taneltokalismej kampa kijtouaj ke kitojtokaj Cristo porin no ijkon kichiuaj kemej ne uejkauj. Yejua ika, motelneki maj tayekananij kinyekpiakan ichkamej ika netasojtalis.

8. ¿Keniuj Jesús kitemakak se kuali neskayot keman monekik kinmelauas imomachtijkauan?

⁸ Kemej titajtakouanij, seki iichkauan Dios xa kinouijmaka kiajsikamatiskej tein yejuatsin kichia maj kichiuakan. Xa amo kichiuaj se taman tein tayolmajxitia Biblia oso amo kinextijkej kuali taixejekolis keman kichiujkej  se taman. Keman ijkon panoua, ¿toni moneki kichiuaskej tayekananij? Moneki kichiuaskej kemej Jesús kichiuak iniuan imomachtijkauan nochipa keman motajtolteuiayaj akoni okachi ueyi yeskia itech iTekiuajyo Dios: Jesús amo kualanik, ta kisentokak kinmachtij uan kinyolmajxitij maj kinextianij yolyemanilis (Luc. 9:46-48; 22:24-27). Uan keman kinmetspajpakak, kinnextilij toni kijtosnekia yolyemanilis, se kualneskayot tein nochin tayekananij moneki kinextiskej (xikonixtajtolti Juan 13:12-15; 1 Ped. 2:21).

9. ¿Keniuj kinpaleuij Jesús imomachtijkauan?

⁹ Tein Jesús kinemiliaya keniuj moneki tekitis se ichkatajpixkej itech nechikol, semi taman katka ke tein se tonal kinextijkej tatitanilmej Santiago uan Juan. Yejuan kitemojkej kipiaskej se ueyi tanauatil itech iTekiuajyo Dios. Sayoj ke Jesús kinmelauak ijkon: “Tayekanani de tataman pueblojme moueyimatij uan mopouaj ueyi chiuanime [...] uan kinmachililtiaj inchikaualis den ne inpueblojkauan. Pero ma amo ijkon namouan. Ta, naken kinekis mochiuas tayekanke namouan, yejua ne ma mochiua keme se tetakeual san den nochin” (Mat. 20:25, 26). Tatitanilmej monekia amo moueyichiuaskej ininixpan oksekin, ta monekia kitsakuiliskej nejon tanejnekilis uan amo nochipa tanajnauatijtoskiaj.

10. 1) ¿Keniuj kineki Jesús maj tayekananij kinitakan ichkamej? 2) ¿Toni neskayot kikauak Pablo ika yolyemanilis?

¹⁰ Jesús kichia maj tayekananij kinitakan ichkamej kemej yejua kichiuak. Ika miak pakilis moneki kinpaleuiskej tokniuan uan amo mochiuaskej kemej yeskia inintekouan. Pablo kinextij yolyemanilis, kemej moita itech nejin tajtolmej tein kiniluij tayekananij akin moajsiaj Éfeso: “Namejuan kuali nankimatij ya de keniu nichipaukanemia [...] desde ne tayekanatonal kuak niajsik kampa talme de Asiajkopaka. Uan nochi nojon tonalme nimotekitiltiaya sayo ika inTotekotsin uan nitekitia ika ne yolyemanalis”. Tatitanil kinekia maj tayekananij kinpaleuianij oksekin ika nochi ininyolo uan ika yolyemanilis. Satepan kijtoj: “Nejua nachipa namechnextilijtinemik ke moneki xitekitikan para ijkon uelis nankinpaleuiske ne nekes ten amo [‘chikaujkej’, TNM]” (Hech. 20:18, 19, 35). Okse tonal kintajkuilouilij tokniuan akin nemiaj Corinto ke yejua amo kiyekanaya inintakuaujtamatilis, ta katka se tekitikej yolyemanik akin kinekia kinpaleuis maj kitekitilikan Jiova ika yolpakilis (2 Cor. 1:24). Kemej tikitaj, Pablo kinextiaya yolyemanilis uan chikauak tekitia. Nejon kinyeknextilia axkan tayekananij keniuj moneki tekitiskej itech nechikol.

11, 12. ¿Keniuj se tayekankej uelis kipaleuis se tokniuj maj kuali taixpejpena?

¹¹ Tayekankej itech nechikol moneki nochipa tayolmajxitis ika iTajtol Dios (Tito 1:9). Sayoj ke moneki kichiuas ika “ne yolyemanalis” (Gál. 6:1). Se kuali tajpixkej itech nechikol amo kichikaujkauia se tokniuj maj kichiua se taman, ta kinemilia keniuj kipaleuis maj kichiua teisa porin kitasojta Jiova. Uelis kinextilis toni tayolmajxitilis tein kipia Biblia moneki kiitas keman kiixpejpenas se taman tein motelneki uan kiitas iuan tein mokixtiani itech toamaixuan. Uelis kiyolchikauas maj kinemili toni panos ika ikuali uikalis iuan Jiova ika tein kiixpejpenas kichiuas. No uelis kiajsikamatiltis ke motelneki kitataujtis Dios maj kiyekana achto ke taixpejpenas (Prov. 3:5, 6). Sayoj ke satepan ke kiitas nochi nejin iuan tokniuj, kikauas maj yejua kiixpejpena toni kichiuas (Rom. 14:1-4).

¹² Tayekananij moneki maj sayoj ika Biblia tayolmajxitikan uan tamachtikan. Yejua ika, moneki maj kimatikan kitekitiltiskej iTajtol Dios uan maj ompa kikixtikan  tein tamachtiaj. Ijkon amo kitelpanoltiskej tanauatil tein kipiaj. Ta yejuan amo ininaxkauan ichkamej, uan sejsemej tein pouij itech nechikol monekis tanankiliskej iixpan Jiova uan Jesús ika tein kichiuaskej (Gál. 6:5, 7, 8).

13, 14. ¿Itech toni taman tayekananij moneki kinkauiliskej se kuali neskayot tokniuan?

¹³ Satepan ke tatitanil Pedro kiniluij tayekananij itech nechikol maj amo ‘moueyichiuakan ininixpan akin iaxkauan Dios’, kinyolchikauak maj mochiuakan “neskayomej ininixpan ichkamej” (1 Ped. 5:3, TNM). ¿Keniuj uelis se tayekankej kichiuas nejin tein tayolmajxitia Pedro? Maj tikitakan ome taman tein moneki kipias akin “kineki mochiuas keme tayekanke”. Moneki “ma kuatamatkanemi” uan “kinyekyekanas [i]ka kuali ichankauan”. Akin kineki mochiuas tayekankej moneki “ma kuatamatkanemi”, tein kijtosneki maj kuali kiajsikamati tein tayolmajxitia Dios uan moneki kimatis keniuj kichiuas itech inemilis. Moneki kipias kuali taixejekolis uan amo ijsiujka taixejekos. Uan komo kipia ichankauan, moneki kuali kinixyekanas, porin “komo amo ueli kinyekkuika nichankauan, ¿kenin uelis kinyekanas taneltokani ten pouij iuan Totajtsin Dios?” (1 Tim. 3:1, 2, 4, 5). Akin pouij itech nechikol kinolinia maj takuaujtamatikan iniuan tayekananij keman kiitaj ke kipiaj nejon kualneskayomej.

¹⁴ Tayekananij no moneki kikauaskej se kuali neskayot itech tanojnotsalis kemej kichiuak Jesús. Yejua semi kitayekanaltij kitetapouis kuali tanauatilmej keman moajsia nikan taltikpak. Uan no kinnextilij imomachtijkauan keniuj kichiuaskej nejon tekit (Mar. 1:38; Luc. 8:1). Itech totonaluan, tokniuan semi kinyolchikaua ijkuak tanojnotsaj iniuan tayekananij, kiitaj yolpakilis tein kinextiaj itech nejin tekit tein motelneki uan kinolinia maj no ijkon kichiuakan kemej tanojnotsaj tayekananij. Keman tayekananij kixelouaj tonal uan kikuij ininchikaualis itech tanojnotsalis maski moneki kichiuaskej okseki taman, nochin tokniuan itech nechikol kinolinia maj no ijkon kichiuakan. Tayekananij no kikauaj se kuali neskayot keman momachtiaj tein moitas itech nechikolmej, tanankiliaj uan kichiuaj okseki tekit, kemej tachipauaskej uan kiyektaliskej Kali kampa tiMosentiliaj (Efes. 5:15, 16; xikonixtajtolti Hebreos 13:7).

15. Xikonijto keyej tayekananij kiixtaliaj tajtoskej iniuan tokniuan uan ijkon kinyolchikauaskej.

¹⁵ Se kuali tajpixkej niman kichiua tein moneki ijkuak se ichkat moxokolij oso kokolispeuak. No ijkon, tayekananij niman kiitaj akin poui itech nechikol akin tajyouijtok oso moneki kiyolchikauaskej oso kiyolmajxitiskej. Akin xiuejkejya uan akin mokokouaj xa monekis maj kinpaleuikan ika tein kinpoloua, sayoj ke okachi moneki maj kinmakakan nepaleuil uan yolchikaualis  tein kitemaka iTajtol Dios (1 Tes. 5:14). Uan no, telpochmej uan ichpochmej xa kiixnamikij okseki ouijkayomej, kemej “tenika motekauiliaj telpochme ma kinuiyakan tech in tajtakol” (2 Tim. 2:22). Yejua ika, tein kinpaleuis maj uelikan kinyekpiakan akin pouij itech nechikol, moneki kemansa kinkalpanoskej uan ijkon uelis kimatiskej tein kinpanoua uan kinyolchikauaskej ika tajkuilolmej tein kinamikis. Keman niman kiitaj kuejmolmej, miakpa, uelis momelauas achto ke mochiuas ueyi kuejmol.

16. Keman se tokniuj itech nechikol kipia ueyi ouijkayot uan uelis kijtakos ikuali uikalis iuan Dios, ¿toni moneki kichiuaskej tayekananij?

¹⁶ ¿Uan komo se tokniuj itech nechikol kipia ueyi ouijkayot uan uelis kijtakos ikuali uikalis iuan Dios? Momachtijkej Santiago kijkuiloj: “¿Moajsi namouan aksa akin mokokoua? Maj kinnotsa tayekananij itech nechikol, uan maj yejuan kitatataujtilikan, uan maj kiojxilikan aceite itech itokay Jiova. Uan netataujtil ika takuaujtamatilis kipajtis akin mokokoua uan Jiova kiajokuis. Uan no, komo kichiuak tajtakolmej, kitapojpoluis” (Sant. 5:14, 15, TNM). Maski aksa akin kemej yeskia mokokoua amo kitemoua ininnepaleuil tayekananij; yejuan moneki niman kipaleuiskej keman kimatiskej ouijkayot. Keman tayekananij kitataujtiaj Dios iniuan tokniuan, kitajtaniaj maj kinajokui uan kinpaleuiaj keman moneki, kinextiaj ke mochiuaj kuali ichkatajpianij itech nechikol akin kinyolchikauaj ichkamej akin kinkauilijtokej maj kinitakan (xikonixtajtolti Isaías 32:1, 2).

17. ¿Toni panoua keman tayekananij kichiuaj kemej “Tayekankatapixke”?

¹⁷ Tayekananij mochikauaj kichiuaskej kemej “Tayekankatapixke” Jesucristo itech nochi tekit tein kichiuaj itech nechikol. Nepaleuil tein kitemakaj nejin takamej semi kinpaleuia ichkamej maj kuali moajsikan iixpan Dios. Kemej tikpiaj ininnepaleuil, techolinia maj tiktasojkamatilikan uan maj tikueyichiuakan Jiova, okachi ueyi Tajpixkej.