“Niman keman aksa momikilia, komo kichiuak uejueyi tajtakolmej ialma youi miktan kampa kitatsakuiltiaj, itech ‘tit tein amo keman seui’.” (Catecismo de la Iglesia Católica.) Uan seki tamachtianij itech taneltokalis kijtouaj ke akin moajsij miktan senkis mouejkatilijkej iuan Dios.

“Nemilis [oso alma] tein tajtakoua... yejua momikilis.” (Ezequiel 18:4.) Akin momikilijkejya “amo kimatijok nion teyi” (Eclesiastés 9:5). Komo alma momikilia uan mikemej amo teyi kimatijok, ¿keniuj uelis tajyouiskej itech “tit tein amo keman seui” oso hasta moyolkokoskej porin uejka moajsij iuan Dios?

Itech Biblia, tajtolmej tein ualeuaj itech tajtol hebreo uan griego tein miakpa kikepaj kemej “miktan”, tein melauj kijtosneki kampa moseuijtokej akin momikilijkejya. Kemej neskayot, keman Job kijyouij se ueyi kokolis, kitataujtij Dios: “Maj itech Seol xinechtaliani” (Job 14:13). Job kinekia moseuis itech se taltekoch, amo kampa tajyouijtoskia oso kampa okachi mouejkatiliskia iuan Dios.

Komo tiknemiliaj ke Dios tetajyouiltia, nejon amo kichiua maj tiktasojtakan, ta maj timouejkatilikan. Rocío, akin nemi México kijtoua: “Keman katka nikonetok nechmachtijkej ke onkak se miktan kampa techichinouaj. Kemej nimotelmoujtiaya niknemiliaya ke Dios amo tetasojta nion kinextia ke yolkuali. Niknemiliaya ke katka tauel uan amo kineki maj nion akin mopolo”.

Rocío kipatak itanemilil keman momachtij itech Biblia keniuj tamati Dios uan kimatik keniuj moajsij mikemej. Yejua kijtoj: “Keman nikmatik nejin, nikmachilij kemej yeskia nechkixtilijkej se tamamal. Peuak nitakuaujtamati ke Dios kineki maj kuali tinemikan, ke techtasojta uan ke nejua ueli niktasojta. Axkan nikita kemej se tepopaj akin kinmajchana ikoneuan uan kineki maj kuali nemikan” (Isaías 41:13).

Miakej mochikauaj chipaujkanemiskej porin amo kinekij maj kintatsakuiltikan miktan, sayoj ke Dios amo kineki maj tiktekitilikan sayoj porin tikmouiliaj. Jesús kijtoj: “Xiktasojtakan in Toueyitekotsin to Dios” (Marcos 12:29, 30). Uan no, keman tikmatij ke Dios nochi kichiua ika melaujkayot, uelis titakuaujtamatiskej ke tein kiixtalijtok kichiuas amo uejkaua, no yeski ika melaujkayot. Ijkon kemej Elihú, akin katka itasojikniuj Job, ika takuaujtamatilis uelis tikijtoskej: “¡Uejka yetok maj Dios akin melauak kichiua tein tel amo kuali, uan akin kipia nochi uelilis maj kichiua tein amo melauak!” (Job 34:10).