Itech metsti diciembre noyampa taltikpak kitaliaj Jesús kemej se konetsin akin yekin yolik tein yetok kampa kintemiliaj tapialmej tein kikuaskej. Sayoj ke ¿moneki tiknemiliskej ke kisentoka moajsi Jesús kemej se konetsin?... * Moajsi se taman kemej okachi moneki tikitaskej. ¿Keniuj? Maj tikelnamikikan tein panok se youak keman seki ichkatajpianij yetoyaj ixtauat ompakauin itech xolal Belén.

Se ángel monextijtiuetsik kampa yetoyaj ichkatajpianij uan kiniluij: “Nijin youal yoliko ya se pili. Uan yejua ne mochiuas namotemakixtijkau uan yejua itokay Totekotsin Cristo”. Uan no kiniluij ijkon: “Nankitaske in konetsin tetsiliutok ika seki pilkueyit uan uetstika tech se pesebre kampa takuaj tapialme”. Satepan monextijkej miakej ángeles uan peujkej kiueyichiuaj Dios.

¿Keniuj timomachiliskia komo tikinkakiskia ángeles kiueyichiuaj Dios?... Ichkatajpianij tel yolpakiaj. Kijtojkej: “Tiyoue Belénkopaka uan ompa tikitaske toni mochiuak”. Ompa kinajsikej “María uan José. Uan ompa kitakke in okichpilkonet Jesús uetstok tech in pesebre”.

Tepitsin satepan, ompa Belén ajsikej oksekin takalpanouanij. Semi kimoujkakakiaj tein ichkatajpianij kiniluiayaj. ¿Tikuelita tikakis teisa tein kualtsin kemej nejin tein kijtojkej ika Jesús?... Tinochin akin tiktasojtaj Dios kemaj techyolpaktia tikakiskej. Axkan maj tikitakan keyej kintelyolpaktij kimatiskej ke yolik Jesús. Tein techpaleuis maj tikmatikan, moneki tikitaskej tein panok keman María ayamo kipiaya itakauj.

Se tonal, se ángel akin itokay Gabriel kikalpanoj María uan kiiluij ke kipiaskia se konetsin. Kimatiltij ke konetsin yeskia ueyichiujkej uan motokaytiskia “ikoneu de Totajtsin Dios in kachi ueyi chiuke”.  No kinextij ke yeskia tekiuaj uan itaixyekanalis amo keman tamiskia.

María kinekia kimatis keniuj ueliskia kipias nejon konetsin porin amo kipiaya itakauj. Gabriel kimelauilij: “Totajtsin Dios ten kachi ueyi chiuke, [...] mitsyeualoltikiu ika nichikaualis” uan “ten yolikiu, yejua ne kipouaske Yolchipaktsin uan [...] Ikonetsin de Dios”. Jiova ika ichikaualis yaya kichiuati se tel ueyi taman: kikuiskia inemilis iKonetsin akin moajsia iluikak, uan kipanoltiskia iijtik María uan ijkon moskaltiskia kemej nochin konemej.

¿Tikitani ke kampa tachijchiuaj itech Navidad kitaliaj eyi “reyes magos” akin kikalpanojtokej Jesús?... Nejon amo yejua tein yekmelauj panok. Tein melauj, “reyes magos” katkaj sitalixmatinij uan Jiova amo kiyolpaktia tein kichiuaj yejuan. Maj tikitakan toni panok keman ajsikej. Biblia kijtoua: “Kuak kalaktiayaj ya kalijtikpa, ijkuakon kitakke in okichpil iuan inantsin María”. Nejin kinextia ke Jesús amo katkaok se konet akin yekin yolik nion yetoya kampa kintatemiaj tapialmej, ta katka se okichpil uan nemia itech se kali iuan José uan María.

¿Tikmati keniuj kimatkej nejon sitalixmatinij kani yetoya Jesús?... Kitojtokatiyajkej tein moitaya kemej se sitalij. Sayoj ke achto ke kinajxitiskia Belén, nejin tein moitaya kemej sitalij, kinuikak Jerusalén kampa yetoya tekiuaj Herodes. Uan Biblia kijtoua ke nejon tekiuaj kinekia kiajsis Jesús porin kinekia kimiktis. ¿Akoni kitalij nejon “sitalin” ompa?... Amo Dios, ta Satanás, akin kitauelita.

Satanás kineki maj nochin kinemilikan ke Jesús se konetsin akin amo ueli mopaleuia. Sayoj ke xikelnamiki ke ángel Gabriel kiiluij María: “Jesús [...] kinyekantinemis in pueblojuani [...] sen nachipa. Uan [...] amo keman kuetauis”. Axkan Jesús taixyekantok ne iluikak uan amo uejkaua kinixpolos nochin akin kitauelitaj Dios. Ijkon moneki tikitaskej, uan yejua nejon moneki tikinmachtiskej oksekin.