1. ¿Toni tein tel kualtsin kipanotokej miakej telpochmej akin kichiuaj kemej Cristo?

TINEMIJ itech tonalmej tein motelnekij. Tel miakej taltikpakneminij itech nochi xolalmej, okachi ke achto, kiselijtokej taueyichiualis tein melauak (Apoc. 7:9, 10). Miakej telpochmej uan ichpochmej kipanotokej miak taman tein kualtsin keman kinpaleuiaj oksekin maj kiajsikamatikan tamachtilis tein kitemaka Biblia uan maj momakixtikan (Apoc. 22:17). Sekin kinpaleuiaj taltikpakneminij maj momachtikan Biblia, tein kinpaleuia maj kipiakan okachi kuali nemilis; oksekin kiteixmatiltiaj kuali tanauatilmej ika nochi ininyolo kampa tajtouaj okse tajtol (Sal. 110:3; Is. 52:7). Tekit tein kichiujtokej itekitikauan Jiova kiualkui yolpakilis. Telpochmej, ¿keniuj uelis okachi nantapaleuiskej?

2. ¿Keniuj kinextia ineskayo Timoteo ke Jiova kineki kinmakas tekimej akin telpochmej? (Xikonita taixkopin ipeujyan tamachtilis.)

² Axkan uelis tikixpejpenas tikchiuas tein satepan mitspaleuis xikseli okachi tekimej itech itekiyo Dios. Xitanemili itech Timoteo, akin katka kayot xolal Listra. Yejua taixpejpenak ika tamatilis, uan nejon kipaleuij satepan itech inemilis. Keman xa kipiaya kemej 20 xiujmej, kiselij tekit kemej misionero (Hech. 16:1-3). Nesi ke sayoj seki metsti satepan, Pablo kititanik maj kinyolchikauati tokniuan itech nechikol Tesalónica, tein yekin moixtalijka,  kampa kintelixnamikiaj, uan nejon kichiuak maj Pablo kisani ompa (Hech. 17:5-15; 1 Tes. 3:1, 2, 6). ¿Ueli tiknemilia keniuj momachilij Timoteo keman kiselij nejon tekit?

3. 1) ¿Toni motelneki tikixpejpenas itech monemilis? 2) ¿Kemanian uelis tikchiuas?

³ Keman titelpochok, moneki tikixpejpenas tein okachi moneki. Sayoj ke moajsi se taman tein motelneki: ox tiktekitilis Jiova. ¿Kemanian okachi kuali uelis tikixpejpenas nejon? Jiova mitsiluia: “Xikelnamiki [...] moUeyi Tachijchiujkauj itech tonalmej keman titelpoch [oso tiichpoch]” (Ecl. 12:1). ¿Uan keniuj uelis tikelnamikis Jiova? Sayoj komo tiktekitilia ika nochi moyolo (Deut. 10:12). Yejua nejon tein motelneki tikixpejpenas itech monemilis, porin mitsyekanas itech nochi tein tikchiuas satepan (Sal. 71:5).

4. ¿Toni tein moneki tikixpejpenas itech monemilis mitspaleuis oso mitstsakuilis okachi xiktekitili Dios?

⁴ Tein melauj, amo sayoj mitsyekanas itech monemilis tein tikixpejpenas tikchiuas itech itekiyo Jiova. Kemej neskayot, no monekis tikixpejpenas ox timonamiktis uan akoni iuan, oso keniuj timoixpanoltis. Sayoj ke maski nejon tein tikixpejpenas no moneki, semi kuali komo yekinika timotajtania ox tikneki tiktekitilis Jiova ika nochi moyolo (Deut. 30:19, 20). ¿Keyej? Porin nejon tein tikixpejpenas mouikaj. Tein tikixpejpenas tikchiuas itech nenamiktilis uan tekit mitspaleuis oso mitstsakuilis okachi xiktekitili Dios (no xikita Lucas 14:16-20). Uan komo tikneki tiktekitilis Dios mitsolinis kuali xitaixpejpena itech nenamiktilis uan tekit. Yejua ika, achto xikixpejpena toni tayekantos itech monemilis (Filip. 1:10).

5, 6. Xikonijto se neskayot tein kinextia ke komo kuali se taixpejpena uelis okachi se kitekitilis Jiova.

⁵ Keman tikixtalisya tiktekitilis Dios, ximotajtani toni yejuatsin kineki xikchiua uan xikixtali keniuj tiktekitilis. Se tokniuj akin kayot Japón kijkuiloj: “Keman nikpiaya 14 xiujmej, nikisak tanojnotsalis iuan se tayekankej itech nechikol, uan yejua kiitak ke amo nechyolpaktiaya nitanojnotsas. Ika netasojtalis nechiluij: ‘Okachi kuali xiyouj mochan Yuichiro. Ompa ximotali uan xitanemili itech nochi tein Jiova moka kichiuani’. Ijkon nikchiuak. Tein melauj, niksentokak nitanemilijtoya uan nikchiujtoya netataujtil miak tonalmej. Yolik nikpatak notanemilil uan peuak nechyolpaktia niktekitilis Jiova. Kemej nikuelitaya nikixtajtoltis kampa ininka tajtoua akin kichiuaj tekit kemej misionero, peuak niknemilia okachi niktekitilis Dios”.

⁶ Yuichiro kisentoka kijtoua: “Nikixtalij nikixpejpenas nikchiuas tein satepan nechpaleuiskia maj niktekitili Jiova itech okse altepet. Kemej neskayot, nimomachtij tajtol inglés. Keman nikisak ueyi kaltamachtiloyan, peuak nitamachtia inglés amo miak hora itech semana uan ijkon uelia nikchiuaya tekit kemej precursor. Keman nikpiaya 20 xiujmej peuak nimomachtia tajtol mongol uan uelik nikinkalpanoto seki tanojnotsanij itech nejon tajtol. Ome xiuit satepan, itech 2007, niyajki Mongolia. Keman nitanojnotsato iniuan seki tokniuan akin kichiuaj tekit kemej precursor uan nikitak ke miakej taltikpakneminij kitemouayaj tamachtilis tein melauak, niknekik ompa ninemitiuj uan nimokepak Japón nikchiuato tein nechpaleuiskia maj nitapaleuiti ompa. Itech metsti abril xiuit 2008 peuak nitekiti kemej precursor ompa Mongolia. Ouij se moixpanoltia, sayoj ke miakej kiselijtokej kuali tanauatilmej, uan nejua nikinpaleuijtok maj motokikan iuan Jiova. Nikyekmati ke nikixpejpenak tein okachi kuali”.

7. 1) ¿Toni moneki tikixpejpenaskej toselti? 2) ¿Toni neskayot techkauilij Moisés?

⁷ Sejse itaixpantijkauj Jiova moneki  kiixpejpenas toni kichiuas ika inemilis (Jos. 24:15). Tejuan amo ueli timitsiluiaj ximonamikti oso amo, akoni iuan, nion katiyejua tekit xiktemo. ¿Tikixpejpenas se tekit tein amo monekis ximotelmachti? Nansekimej tokniuan telpochmej akin tamechtasojtaj, nannemij itech xolalmej kampa semi tatasojti, oksekin, kampa onkak miak tein ika se moixpanoltis. Nannochin nantatamamej, tataman tein ueli nankichiuaj, tein nankiixmatij, tein nankiuelitaj uan tein nankiixtaliaj nankichiuaskej itech itekiyo Dios. Xa namechpanoua kemej telpochmej hebreos itech ne uejkauj altepet Egipto: Moisés ueliskia kipias miak taman itech tekiuajyot, sayoj ke oksekin katkaj takeualmej (Éx. 1:13, 14; Hech. 7:21, 22). Kemej namejuan, yejuan nenkej itech tonalmej tein motelnekiaj (Éx. 19:4-6). Sejsemej monekik kiixpejpenaskej toni kichiuaskiaj ika ininnemilis. Uan Moisés kiixpejpenak tein okachi kuali (xikixtajtolti Hebreos 11:24-27).

8. ¿Toni kinpaleuis telpochmej akin kinemilijtokej toni kichiuaskej ika ininnemilis?

⁸ Jiova mitspaleuia xitaixpejpena ika tamatilis axkan ke titelpoch. Yejuatsin mitsmaka tayolmajxitilis itech Biblia tein uelis tikuis itech tein yeski taman tein tikpanotos (Sal. 32:8). Uan no, motatuan akin no kiueyichiuaj Jiova uan tayekananij itech nechikol uelis mitspaleuiskej xikita keniuj tikchiuas itech monemilis tein Jiova mitsyolmajxitia (Prov. 1:8, 9). Maj tikitakan eyi tayolmajxitilis tein kitemaka Biblia, tein mitspaleuis xikixpejpena tein satepan mitsualkuilis tein kuali.

9. 1) ¿Keniuj techpoujkaita Jiova? 2) ¿Toni ueli kinextiaj akin yekinika kitemouaj iTekiuajyo Dios?

⁹ Xiktemo yekinika iTekiuajyo Dios uan imelaujkayo (xikixtajtolti Mateo 6:19-21, 24-26, 31-34). Jiova techpoujkaita keman techkaua maj tejuan titaixpejpenakan. Yejuatsin amo mitsiluia kanachi tiempo moneki titanojnotsas. Sayoj ke Jesús techyolmajxitij maj yekinika tiktemokan iTekiuajyo Dios. Komo ijkon tikchiua, uelis tiknextis ke tiktasojta Dios, ininka timotekipachoua oksekin uan ke tiktasojkamati maj tikchiakan tinemiskej nochipaya. Ika tein tikixpejpenas itech nenamiktilis uan tekit, ¿tikitani ox nejon kichiuas ximoteltekipacho tikpias miak taman oso mitsolinis xiktemo iTekiuajyo Dios uan imelaujkayo?

10. ¿Toni kichiuak Jesús tein kiyolpaktij, uan toni kichiuas xiyolpaki?

¹⁰ Komo tikinpaleuia oksekin tiyolpakis (xikixtajtolti Hechos 20:20, 21, 24, 35). Jesús techmachtij ika netasojtalis nejin taman tein motelneki. Yejua tel yolpakik porin kichiuak itanejnekilis iTajtsin uan amo tein yejua kinekia. Yolpakia keman kiitaya ke taltikpakneminij akin yolyemankej kiseliayaj kuali tanauatilmej (Luc. 10:21; Juan 4:34). Tejua xa tikmachilijya yolpakilis tein teualkuilia se kinpaleuis oksekin. Komo tikita tein Jesús tamachtij keman tikixpejpena itech monemilis tein okachi moneki, tiyolpakis uan tikyolpaktis Jiova (Prov. 27:11).

11. ¿Keyej Baruc amo yolpakiaok, uan toni Jiova kiyolmajxitij?

¹¹ Okachi se yolpaki komo se kitekitilia Jiova (Prov. 16:20). Nesi ke Baruc, itajkuilojkauj Jeremías, kielkauak nejon. Ejkok se tonal keman amo kiyolpaktiayaok kichiuas itekiyo Dios, yejua ika Jiova kiiluij: “Tejua, tiksentoka timotemolia miak taman tein uejueyi. Amo xiksentoka xiktemo. Porin, xikita, nikualkuiliti se ueyi tajyouilis nochi tein yoltok [...] uan yekmelauj nimitsmakas monemilis kemej se teisa tein mokauak kampa yeski tiyas” (Jer. 45:3, 5). ¿Toni tiknemilia? ¿Toni kiualkuiliskia yolpakilis Baruc? ¿Maj motemoliskia miak taman tein uejueyi, oso maj makisaskia keman Jerusalén ixpoliuiskia porin katka se itekitikauj Dios akin amo kikauak? (Sant. 1:12.)

12. ¿Toni kiixpejpenak Ramiro tein kiualkuilij yolpakilis?

 ¹² Se tokniuj akin yolpaki porin kinpaleuia oksekin yejua Ramiro. Yejua kijtoua: “Nochankauan nemij Bolivia kampa semi tepeyoj tein moixmati kemej los Andes uan semi kipanouaj tatasojtilis. Yejua ika semi ueyi nepaleuil katka keman nokniuj akin tayekana nechiluij maj niyouj ueyi kaltamachtiloyan uan yejua taxtauaskia. Sayoj ke yankuixtok nimoauijka uan nikselijka okse tayoleualis: se tokniuj akin kichiua tekit kemej precursor nechyoleujka maj iuan nitanojnotsati itech se xolalkonet. Niyajki ompa, nimomachtij niktekis tsonti uan ika nejon tekit nimoixpanoltiaya. Miakej taltikpakneminij kitasojkamatiaj keman tikinyoleuayaj maj momachtikan Biblia. Satepan peuak nimosentilia itech se yankuik nechikol itech se maseual tajtol. Nikchiuakya tekit kemej precursor panouaya majtakti xiuit, uan nikmati ke nion se tekit ueliskia nechualkuilis yolpakilis tein nechualkuilia keman nikinpaleuia taltikpakneminij maj kiajsikamatikan kuali tanauatilmej itech inintajtol”.

13. ¿Keyej axkan ke titelpoch uelis okachi senkis tiktekitilis Dios?

¹³ Xiyolpaki tiktekitilijtos Jiova axkan ke titelpoch (xikixtajtolti Eclesiastés 12:1). Amo xiknemili ke achto ke okachi tiktekitilis Jiova moneki tikajsis se kuali tekit. Axkanya uelis tipeuas senkis tiktekitilis, achto ke monekis tikintekipanos oso tikinyekpias mochankauan, axkan ke amo timokokoua uan tikpia chikaualis uan ijkon uelis tikchiuas tekimej tein uejueyi. ¿Toni tikuelitaskia tikchiuas itech itekiyo Jiova? ¿Tikneki tikchiuas tekit kemej precursor, tikintapouis kuali tanauatilmej akin tajtouaj okse tajtol, oso xa okachi titekitis itech nechikol kampa tipoui? Tein yeski tein tikixtalijtok tikchiuas itech itekiyo Dios, monekis tikpias tein ika timoixpanoltis. ¿Toni tekit  tikchiuas? ¿Katiyejua nemachtil monekis tikpias?

14. ¿Ika toni moneki moyekpiaskej telpochmej keman kitemoskej se tekit?

¹⁴ Eyi tayolmajxitilis tein kitemaka Biblia tein tikitakejya uelis mitspaleuis xikita katiyejua tekit okachi mitspaleuis. Periódico oso oksekin xa uelis mitsmatiltiskej katiyejua tekit onkak kampa tinemi oso kampa tikneki titapaleuitiuj. Tein mitsmatiltiskej uelis mitspaleuis, sayoj ke ximoyekpia. Akin amo kitasojtaj Jiova uelis kichiuaskej xiktasojta tein onkak nikan taltikpak (1 Juan 2:15-17). Uan komo peua tikita tein taltikpak kitemaka, moyolo uelis ijsiujka mitskajkayauas (xikixtajtolti Proverbios 14:15; Jer. 17:9).

15, 16. ¿Akonimej uelis okachi kuali mitsyolmajxitiskej ika tekit?

¹⁵ Keman tikmatisya katiyejua tekit uelis tikixpejpenas, monekis tikselis kuali tayolmajxitilis (Prov. 1:5). ¿Akoni uelis mitspaleuis ika tayolmajxitilis tein kitemaka Biblia xikita katiyejua tekit okachi mitspaleuis? Xikinkaki akin kitasojtaj Jiova, akin mitstasojtaj uan kuali kiixmatij tein tikpanoua. Yejuan mitspaleuiskej xikita toni ueli tikchiua uan keyej yejua tikneki. Tein mitsiluiskej xa kichiuas oksepa xikita tein tikixpejpenak. ¡Se ueyi tatiochiualis tikpia komo motatuan kitasojtaj Jiova! Tayekananij itech monechikol kipiaj tamatilis tein Dios kitemaka uan uelis mitsyolmajxitiskej. Uan no, xitajto iniuan akin kichiuaj tekit kemej precursor uan tokniuan takalpanouanij. ¿Keyej kiixtalijkej senkis kitekitiliskej Dios? ¿Keniuj peuak kichiuaj tekit kemej precursor, uan keniuj moixpanoltianij? ¿Toni tein kuali kinualkuilia tekit tein kichiujtokej? (Prov. 15:22.)

¹⁶ Akin kuali mitsixmatij uelis kuali mitsyolmajxitiskej. Kemej neskayot, xiknemili ke amo tiknekiok timomachtis uan tikneki tipeuas titekitis kemej precursor, okachi porin amo tikneki tikchiuas tein motajtani itech kaltamachtiloyan. Aksa akin mitstasojta uelis kiitas keyej tikneki tikchiuas nejon uan mitspaleuis xikajsikamati ke komo tiksentoka timomachtia uelis mitsmachtis amo niman ximosenkaua, se kualneskayot tein motelneki komo tikneki tiktekitilis Jiova ika nochi moyolo (Sal. 141:5; Prov. 6:6-10).

17. ¿Toni taman tekit moneki amo tikixpejpenas?

¹⁷ Melauak ke nochin akin kitasojtaj Dios kipiaj tayejyekolis tein uelis kichiuas maj mouejkatilikan iuan (1 Cor. 15:33; Col. 2:8). Sayoj ke seki tekimej okachi uelis teijtakoskej ke oksekin. Xa tikitani ke seki tokniuan kipolojkej inintakuaujtamatilis porin kiixpejpenkej kichiuaskej se taman tekit (1 Tim. 1:19). ¿Toni mitsmachtia? Mitsnextilia ke moneki timoyekpias uan ijkon amo tikixpejpenas teisa tein uelis kijtakos mokuali uikalis iuan Dios (Prov. 22:3).

18, 19. ¿Toni uelis kichiuas se telpoch oso ichpoch komo ayamo kiyolnejneki kitekitilis Dios?

¹⁸ Komo tikyolnejneki tiktekitilis Jiova, xikseli titekitis kampa uelis axkan ke titelpoch. Axkanya moneki tikixpejpenas tein mitspaleuis xiyolpaki tiktekitilis Dios itech nejin tonalmej tein motelnekij (Sal. 148:12, 13).

¹⁹ Sayoj ke ¿komo ayamo tikyolnejneki tiktekitilis Dios? Komo ijkon, amo ximosenkaua uan xiksentoka xikchikaua motakuaujtamatilis. Satepan ke Pablo kijtoj keniuj mochikauak kichiuas tein kipaleuiskia maj Dios kitiochiuani, kijkuiloj: “Komo namejuan nankipiaj okse tanemilil, Dios namechmatiltis tanemilil tein ika titajtouaj. Sayoj ke, hasta kampa timoskaltianijya, maj tiksentokakan tikyekchiuakan nejin tein tikchiujtiuitsej” (Filip. 3:15, 16, TNM). Nochipa xikelnamiki ke Jiova mitsteltasojta. Xitanemili itech tayolmajxitilis tein mitsmaka ika tamatilis. Yejuatsin uelis okachi mitspaleuis kuali xitaixpejpena axkan ke titelpoch oso tiichpoch.