Komo se amatajkuilol ualeua imako Dios, tikmatij ke amo onkak okse kemej yejua, uan Biblia amo ijkon kemej okse. Mokixtiani itech amat tel miak millones itech seki ciento tajtolmej. Uan no, tamatilis tein ixnesi ompa kipia chikaualis tein tapaleuia maj taltikpakneminij kipatakan ininnemilis. (Xikonixtajtolti 1 Tesalonicenses 2:13 uan 2 Timoteo 3:16.)

Uelis tikyekmatiskej ke Biblia ualeua imako Dios porin kinextia tein yekmelauj panos satepan, se taman tein taltikpakneminij amo ueli kichiuaj. Kemej neskayot, maj ika titajtokan amatajkuilol Isaías. Itech se tekoyok tein moajsi ompakauin mar Muerto kiajsikej se tajkuilol kampa kikopinkej nejon amatajkuilol kemej cien xiujmej achto ke Jesús yoliskia. Ompa moijtouaya ke itech altepet Babilonia amo akinok nemiskia. Nejon tein achtook moijtojka mochiuak miak xiujmej satepan ke Jesús momikilij. (Xikonixtajtolti Isaías 13:19, 20 uan 2 Pedro 1:20, 21.)

Biblia moijkuiloj kemej itech mil seiscientos xiujmej, uan kijkuilojkej kemej cuarenta takamej. Yejuan sayoj se taman tamachtilis ika tajtojkej uan amo moixnamikik tanemililmej tein kijkuilojkej. ¿Keniuj uelik kichiujkej nejon? Dios kinixyekanak. (Xikonixtajtolti 2 Samuel 23:2.)

Maski kemansa Dios kinmatiltij tajkuilouanij inintenkopa ángeles, keman teisa kinitaltiaya oso kintakochitaltiaya, miakpa kitaliaya tanemilil itech inintsontekon uan kinkauaya maj kiixpejpenaskiaj tajtolmej tein ika kitematiltiskiaj itamachtilis. (Xikonixtajtolti Apocalipsis [Revelación] 1:1; 21:3-5.)