1, 2. 1) ¿Akoni akin monamiktiti kichiuas maj onka yolpakilis ne iluikak? 2) ¿Toni netajtanilmej tiknankilitij axkan?

KEMAN aksa monamiktiti kiuikilia miak tonalmej kichiuas tein monekis nejon tonal. Sayoj ke axkan ika titajtotij se nenamiktilis tein motelneki: inenamiktilis se tekiuaj. Xikonnemili nejin: ¡kemej 2,000 xiujmejya peuak kichiuaj tein monekis nejon tonal! Uan axkan, amo uejkaua novia iuan mosentilisya novio. Uan ichan Tekiuaj mokakis kualtsin tatsotson uan tel miakej ángeles mokuikatiskej: “Ma tikmouistilikan Totajtsin Dios porin [...] kipixtinemi nochi chikaualis uan axkan Yejuatsin peuak ya tayekantinemi [...]. Uan ne tajtolis no kijtoaya ijkuin: Ximoyolpaktikan uan ximouelitakan uan xikueyipanchiuakan Totajtsin Dios. Porin ne Yejuatsin ten tamati keme ichkatsin, [...] monamiktiti ya. Uan nochi itaneltokakauan [...] kinejneuiliaj keme se tesiuajtan [akin motayektalilijya]” (Apoc. 19:6, 7).

² “Ichkatsin” akin kichiuas maj tel yolpakikan ne iluikak ijkuak monamiktis yejua Jesucristo (Juan 1:29). ¿Keniuj motakentia keman monamiktia? ¿Akoni novia? ¿Keniuj kipaleuianij novia uan ijkon uelis yetos nejon tonal? ¿Kemanian monamiktiaj? Tikmatij ke nejon kichiuas maj onka yolpakilis ne iluikak, sayoj ke ¿no  yolpakiskej akin kichiaj nemiskej nochipaya nikan taltikpak? Tiktelnekij tikmatiskej tanankilil, yejua ika maj tiksentokakan timomachtikan Salmo 45.

3, 4. 1) ¿Keniuj moijtoua itech Salmo ke yeski itaken Novio tein kikuis keman monamiktis? 2) ¿Toni kichiua maj yolpaki Novio? 3) ¿Akonimej “ininichpochuan tekiuanij” uan “inamik tekiuaj” Jiova, akin yolpakij iuan Novio?

³ (Xikonixtajtolti Salmo 45:8, 9.) Novio, Jesucristo, motalilia se kualtsin taken keman monamiktia. Semi kinamiki maj itaken kipia “ajuiyakkayot tein okachi kuali”, kemej mirra uan casia, seki aceite tein ompa Israel ika kixelouayaj teisa tein yeskia iaxka Dios (Éx. 30:23-25).

⁴ Kualtsin tatsotson tein ne iluikak mokaki itech kaltekiuaj kichiua maj yolpaki Novio ijkon kemej motokia inenamiktilis. No ijkon yolpaki “inamik tekiuaj” oso inamik Jiova, tein kijtosneki inechikol ne iluikak, uan nejin yejuan ángeles akin yektikej, akin no kintokaytiaj “ininichpochuan tekiuanij. Semi teyolpaktia keman ne iluikak nochin kisenijtouaj: “Ximoyolpaktikan uan ximouelitakan [...] porin ne Yejuatsin ten tamati keme ichkatsin, [...] monamiktiti ya”.

5. ¿Akoni “inamik Ichkatsin”?

⁵ (Xikonixtajtolti Salmo 45:10, 11.) Tikmatijya akoni Novio, sayoj ke ¿akoni novia? Yejuan senolochmej taixpejpenalmej akin pouij itech nechikol tein kiixyekana Jesucristo (xikonixtajtolti Efesios 5:23, 24). Yejuan tekiuajtiskej iuan Cristo itech Tekiuajyot tein moajsi imako Mesías (Luc. 12:32). Nejin 144,000 akin kinixpejpenkej ika espíritu ‘kiseuikaj kampa yeski youi Cristoʼ (Apoc. 14:1-4). Mochiuaj “inamik Ichkatsin” uan iuan nemij ichan ne iluikak (Rev. 21:9, TNM; Juan 14:2, 3).

6. 1) ¿Keyej tokniuan taixpejpenalmej kintokaytiaj kemej “iichpoch tekiuaj”? 2) ¿Keyej kiniluiaj tokniuan taixpejpenalmej maj kielkauakan ininxolal?

⁶ Akin yeski novia amo sayoj kitokaytiaj “ichpoch”, ta no “iichpoch tekiuaj” (Sal. 45:13). ¿Akoni nejon “tekiuaj”? Yejuatsin Jiova, porin kinselia tokniuan taixpejpenalmej kemej ‘ikoneuan’ (Rom. 8:15-17). Kemej yejuan mochiuaskej se novia ompa iluikak, kiniluiaj: “Xikelkaua moxolal uan ichan mopopaj [taltikpaknenkej]”. Inintanemilil moneki kipiaskej itech nochi “ten ualeutok ne eluiyaktsinko. Uan amo [...] ten poutinemij nikan taltikpak san” (Col. 3:1-4).

7. 1) ¿Keniuj Cristo kipaleuiani maj moajsi kemej moneki akin yeski inovia? 2) ¿Keniuj novia kiita Novio?

⁷ Ijkon kemej panouanij xiujmej, Jesús kipaleuiani akin yeski inovia maj moajsi kemej moneki uan ijkon uelis iuan monamiktis ne iluikak. Tatitanil Pablo kimelauak ke “Cristo kitasojtak nechikol uan ika motemaktij, uan ijkon kichiuas yektik keman kichipauas ika at tein kijtosneki tajtoltsin, uan ijkon yejua iixpan kitenextis nechikol kualtsin petantok, amo tsojkuiltik, nion kejkelpachtik, nion okse taman kemej nejon, ta maj yektik uan maj amo teyi kipia tein amo kuali” (Efes. 5:25-27, TNM). Pablo no kiniluij tokniuan taixpejpenalmej akin nemiaj ne uejkauj itech altepet Corinto: “Nejua semi niknektok namechpaleuis ika ne tayolnejnekilis ten Dios nechmaktilij ya. Uan [...] namechchiualtij ke xipoutinemikan iuan Cristo, ijkon keme se tesiuau ma kipia sayo se [...] [itakauj]. Uan no nikneki namechtenextis iixpantsinko namotekotsin Cristo ke namejuan nanyolchipauke, ijkon keme se chipauak siuapiltsin” (2 Cor. 11:2). Novio, Tekiuaj Jesucristo, okachi kiyolpaktia kualtsinyot tein kipia akin yeski inovia porin chipauak itaueyichiualis. Uan novia kiita kemej ‘iteko’ uan ‘moixpiloua iixpan’ kemej akin mochiuas itakauj.

8. ¿Keyej kinamiki maj moijto ke novia youi “senkis takualnextil”?

⁸ (Xikonixtajtolti Salmo 45:13, 14a.) Novia ajsi “senkis takualnextil” keman monamiktia tekiuaj. Itech Apocalipsis 21:2 moijtoua ke tamati  kemej se altepet, Yankuik Jerusalén, uan moijtoua ke “mokualnextia kuak yetok ya para monamiktis” iuan itakauj. Nejin altepet tein moajsi iluikak kipia “ikualtsiyo de Dios” uan ualpetantok kemej “se tet ten semi patio [...] ten kiliaj jaspe. Uan ne naltonilot kinejneuilia cristal” (Apoc. 21:10, 11). Itech amaix Apocalipsis tel kualtsin momelaua keniuj petantok yankuik Jerusalén (Apoc. 21:18-21). ¡Yejua ika akin kijkuiloj Salmo kijtoua ke novia youi “senkis takualnextil”! Ta nenamiktilis mochiua ne iluikak.

9. 1) ¿Akoni “tekiuaj” akin kiuikiliaj novia? 2) ¿Keniuj takentok novia?

⁹ Novia kiuikiliaj Novio, Tekiuaj Mesías. Yejua kipaleuijtok maj moajsi kemej moneki ‘keman kichipaua ika at tein kijtosneki tajtoltsin’, yejua ika ‘yektik uan amo teyi kipia tein amo kuali’ (Efes. 5:26, 27, TNM). Novia no moneki takentiyas kemej kinamiki ijkuak monamiktis. ¡Uan kemaj ijkon moajsi! “Itaken kipia seki taman ika oro” uan “ika taken tajkitil kiuikiliskej tekiuaj”. Keman monamiktia Ichkatsin, novia motakentia ika “kualtsin tilma ten kualtsin chipaktsin uan ten pepetaka, ijkon keme se tesiuajtan ten monamiktiti ya. Uan ne kualtsin taken”, yejua ininkuali tachiualisuan taixpejpenalmej (Apoc. 19:8).

10. ¿Kemanian monamiktis Ichkatsin?

¹⁰ (Xikonixtajtolti Revelación 19:7, TNM.) ¿Kemanian monamiktis Ichkatsin? Maski “inamik motayektalilijya” uan ijkon uelis yetos nejon tonal, tein kisentoka kijtoua tajkuilol amo kimelaua keniuj mochiuas nenamiktilis, ta kinextia tein mochiuas tein ika tamisya okachi ueyi tajyouilis (Apoc. 19:11-21). ¿Kijtosneki nejon ke nenamiktilis mochiuas achto ke Novio, Tekiuaj Jesucristo, senkis tatanis? Amo. Tein achtook moijtoua itech Apocalipsis amo motekpana ijkon kemej mochiujtiyas. Salmo 45 kinextia ke Tekiuaj monamiktia satepan ke motajkoilpilia iespada uan ‘kisentoka taixpan kintaniti’ akin kitauelitaj (Sal. 45:3, 4).

11. ¿Keniuj mochiujtiyas seki taman achto ke mochiuas nenamiktilis?

¹¹ Yejua ika, uelis tikijtoskej ke nochi tein mochiuas satepan motojtokatiyas ijkon: yekinika ixpoliuis “siuaauilnenke”, Ueyi Babilonia, tein kijtosneki taneltokalismej tein amo melaujkej tein moajsij noyampa taltikpak (Apoc. 17:1, 5, 16, 17; 19:1, 2). Satepan, Cristo kiixpolos nochi tein mokauasok itech taltikpak kampa taixyekana Satanás itech Armagedón, ijkuak “moteuiske ika guerra iuan Dios tech ne ueyi tonal [...] porin sayo Yejuatsin kipixtinemi nochi chikaualis” (Apoc. 16:14-16; 19:19-21). Uan ika tamis, Tekiuaj Tateuijkej senkis tatanis ijkuak kinpantamotas Satanás uan iamokuali ejekauan itech taltekoch, kampa amo teyi uelis kichiuaskej ta moajsiskej kemej yeskia mikemej (Apoc. 20:1-3).

12, 13. 1) ¿Kemanian uelisya monamiktis Ichkatsin? 2) ¿Akonimej yolpakiskej ne iluikak keman monamiktis Ichkatsin?

¹² Tokniuan taixpejpenalmej moajokuij ne iluikak ijkon kemej tami ininnemilis nikan taltikpak itech iyetolis Cristo. Tepitsin satepan ke ixpoliuis Ueyi Babilonia, Jesús kinsentilis iuan akin mokauajok uan no pouij iuan novia (1 Tes. 4:16, 17). Yejua ika, nochin akin pouij iuan “novia” yetoskej iluikak achto ke peuas neteuilis Armagedón. Keman tamis nejon neteuilis, Ichkatsin uelisya monamiktis. ¡Semi yolpakiskej nejon tonal! Apocalipsis 19:9 kijtoua: “Tatiochiualme de Dios nochi nekes ten Dios kinnotsak ya ma tatakuakij tech ne iluit kuak monamiktiti Yejuatsin ten tamati keme ichkatsin”. Tikyekmatij ke 144,000 akin mochiuaj novia semi yolpakiskej. Uan Novio senkis yolpakis porin iuan moajsiskej akin iuan tekiuajtiskej tein kemej yeskia takuaskej uan tatayiskej itech mesa, tein kijtosneki itech iTekiuajyo (Luc. 22:18, 28-30). Sayoj ke, amo kijtosneki ke sayoj Novio uan novia yolpakiskej keman monamiktis Ichkatsin.

 ¹³ Kemej tikitakej achto, ne iluikak tel miakej ángeles mosenkuikatiskej: “Ximoyolpaktikan uan ximouelitakan uan xikueyipanchiuakan Totajtsin Dios. Porin ne Yejuatsin ten tamati keme ichkatsin, [...] monamiktiti ya. Uan nochi itaneltokakauan [...] kinejneuiliaj keme se tesiuajtan [akin motayektalilijya]” (Apoc. 19:6, 7). ¿Uan itekitikauan Jiova akin moajsij nikan taltikpak? ¿No yolpakiskej?

14. ¿Akonimej “ichpochmej yektikej” akin ininka motajtoua itech Salmo 45?

¹⁴ (Xikonixtajtolti Salmo 45:12, 14b, 15.) Tanauatijkej Zacarías achtook kijtoj ke itamian tonalmej moajsiskiaj taltikpakneminij akin kayomej itech nochi altepemej akin semi kitasojkamatiskiaj maj uelikan kitekitilikan Jiova iniuan tokniuan taixpejpenalmej akin mokauajok. Kijkuiloj: “Itech nejon tonalmej majtakti takamej itech nochi tataman tajtolmej tein tajtouaj itech altepemej mokitskiskej, kemaj, yekmelauj mokitskiskej itech itaken se takat tein yeski judío, uan kijtoskej: ‘Yekmelauj tiyaskej namouan, porin tikakinij ke Dios yetok namouan’” (Zac. 8:23). Itech Salmo 45:12 “majtakti takamej” kintokaytiaj kemej “iichpoch Tiro” uan “tominpianij itech xolalmej”. Yejuan kitemouaj kinpaleuiskej tokniuan taixpejpenalmej akin mokauajok uan kitemouaj maj kinpaleuikan maj kitekitilikan Dios. Itech xiuit 1935 uan satepan, tel miakej taltikpakneminij mokauanij maj taixpejpenalmej ‘kinualkuikan [...] itech melaujkayot’ (Dan. 12:3). Akin nochipa kinpaleuiaj tokniuan taixpejpenalmej moajchiuilianij itech ininnemilis nochi taman taueyichiualis tein amo melauak. Yejua ika kintokaytiaj “ichpochmej yektikej” akin iuan youij novia. Yejuan  motemaktianij iuan Jiova uan amo keman kikauanij Novio, Tekiuaj Jesucristo.

15. ¿Keniuj “ichpochmej yektikej” kinpaleuiaj taixpejpenalmej akin mokauajok nikan taltikpak?

¹⁵ Taixpejpenalmej akin mokauajok nikan taltikpak semi kintasojkamatiliaj “ichpochmej yektikej” akin iuan youij novia porin kinpaleuiaj maj motetapoui “kuali tanauatilmej ika tekiuajyot” itech nochi taltikpak (Mat. 24:14, TNM). Amo sayoj “espíritu uan novia kisentokaj kijtouaj: ‘¡Xiuiki’”, ta no akin kikakij kijtouaj: “¡Xiuiki!” (Rev. 22:17, TNM). Kemej tikitaj, ‘okseki ichkamej’ kinkakinij tokniuan taixpejpenalmej keman kijtouanij “¡Xiuiki!” uan no iniuan kinyoleuaj taltikpakneminij (Juan 10:16).

16. ¿Toni tatiochiualis kinmakani Jiova okseki ichkamej?

¹⁶ Taixpejpenalmej akin mokauajok nikan taltikpak kintasojtaj ‘okseki ichkamej’ uan kinyolpaktia kimatiskej ke Jiova, iPopaj Novio, kinmakak tatiochiualis maj yolpakikan ika inenamiktilis Ichkatsin. Moijtojka ke nejon “ichpochmej yektikej” akin iuan youij novia, “kinualkuis[kiaj] ika yolpakilis”. Kemaj, okseki ichkamej akin kichiaj nemiskej nochipaya nikan taltikpak, no ijkon yolpakiskej kemej ne iluikak keman monamiktis Ichkatsin. Semi kinamiki maj Apocalipsis kinixnexti akin pouij iniuan “uel miak tagayot”, akin kitekitiliaj Jiova nikan taltikpak, ke ijkatokej “iixpantsinko ne tayekankatrono uan [...] ten tamati keme ichkatsin”. Yejuan kitekitiliaj Dios nikan taltikpak ikaltenixpan tein kemej yeskia templo tein iaxka yejuatsin (Apoc. 7:9, 15).

17, 18. 1) ¿Toni tein kuali kiualkuis inenamiktilis Ichkatsin? 2) ¿Akonimej Cristo mochiuas ininpopaj itech iTekiuajyo tein uejkauas Mil Xiuit?

¹⁷ (Xikonixtajtolti Salmo 45:16.) “Ichpochmej yektikej” akin iuan youij inovia Cristo ne iluikak, okachiok yolpakiskej keman kiitaskej tein kuali tein kiualkuis nenamiktilis itech yankuik taltikpak. Novio, Tekiuaj Jesucristo kichiuas maj moajokuikan ‘iuejkaujtatuan’, akin mochiuaskej ‘ikoneuan’ (Juan 5:25-29; Heb. 11:35). Sekimej nejon ikoneuan kinixtalis “kemej tayekananij itech nochi taltikpak”. Uan no, uelis tikchiaskej maj kinixpejpena seki tayekananij akin amo kikauaj Dios uan kinixtalis maj kiyekanakan tein monekis itech yankuik taltikpak (Is. 32:1).

¹⁸ Itech iTekiuajyo Cristo tein uejkauas Mil Xiuit, yejua mochiuas ininpopaj okseki taltikpakneminij. ¿Keyej? Porin nochin akin takuaujtamatiskej itech inemilis Jesús tein kitemakak kiseliskej nemilis nochipaya (Juan 3:16). Ijkon mochiuas ‘ininPopaj akin amo kipia itamilis’ (Is. 9:6, 7).

19, 20. ¿Toni nochin itatojtokakauan Cristo kinolinia maj kichiuakan keman kiitaj keniuj mochiujtiuj tein moijtoua itech Salmo 45 tein semi teyolpaktia?

¹⁹ (Xikonixtajtolti Salmo 45:1, 17.) Kemej tikitaj, akin kichiuaj kemej Cristo kiitaj ke motelneki tein moijtoua itech Salmo 45. Taixpejpenalmej akin mokauajok nikan taltikpak kintelyolpaktia kimatiskej ke amo uejkaua mosentiliskej ne iluikak iniuan ininikniuan uan iuan ininNovio. Okseki ichkamej kinolinia maj okachi mokauakan maj kinyekana ueyichiujkej Tekiuaj, uan motasojkamatij maj kipiakan tatiochiualis tekitiskej iniuan akin pouij iuan novia tein mokauajok nikan taltikpak. Satepan ke mochiuas nenamiktilis, Cristo uan akin iuan tekiuajtiskej kinualkuiliskej taltikpakneminij miak tatiochiualismej tein nion ueli tiknemiliaj (Apoc. 7:17; 21:1-4).

²⁰ Keman tikitaj keniuj mochiujtiuj nejon “taman tein teyolpaktia” tein mouika iuan Tekiuaj Mesías, ¿melauj ke techolinia maj ika ‘titajtokan itokay’ oso maj tikteixmatiltikan? Komo ijkon, ¡maj tikueyitalikan Tekiuaj “itech tonalmej tein ualaskej uan nochipaya”!