Nejin yejua semej versículos tein moajsi itech Biblia tein okachi moijtoua uan moixmati. Moijtoua ke amo onkak okse tajkuilol maj “tel kuali kimelaua ika amo miak tajtolmej keniuj Dios kinita taltikpakneminij, ijkon kemej ojti tein teuika itech nemakixtilis”. Yejua ika, amo tikmoujkaitaj maj itech seki altepemej moajsikan akin kijkuilouaj nejin versículo itech uejueyi amat tein kinextiaj senteixtenoj, kijkuilouaj itech inincarro oso itech tepamit.

Akin kichiuaj nejin taman kiyekmatij ke Dios kinteltasojta uan yejua ika takuaujtamatij ke kinmakas nemilis nochipaya. ¿Toni tikonnemilia tejuatsin? ¿Tikonnemilia ke Dios kichiuani teisa tein ika mitsonnextiliani ke mitsontasojta?

Miakej taltikpakneminij kineltokaj ke tein onkak iluikak uan taltikpak uan taltikpakneminij Dios kinchijchiuak. Ta nochi tein yoltok semi ouij uan tel kuali chijchiujtok uan yejua ika kinextia ke aksa tel tamatkej kichijchiuak. Uan no, tel miakej mojmostaj kitasojkamatiliaj Dios porin kinmakatok nemilis. Uan kiajsikamatij ke yejuatsin moneki kinpaleuis maj kisentokakan yoltokan uan maj kinyolpakti tein kichiuaj itech ininnemilis, porin yejuatsin techmakatok ejekat, at, takual uan okseki taman tein kipia taltikpak.

Kuali tikchiuaj komo tiktasojkamatiliaj Dios porin techmaka nochi nejin; yejuatsin toTachijchiujkauj uan techpaleuia maj tiksentokakan tiyoltokan (Salmo 104:10-28; 145:15, 16; Hechos 4:24). Nejon se taman kemej technextilia inetasojtalis. Tatitanil Pablo kinextij nejon ika nejin tajtolmej: “Yejuatsin techmakatok tonemilis nikan taltikpak, uan [...] toijiyo.  Uan nochi ten tikpiaj tomako ya [...]. Ika iuelilis de Totajtsin Dios nochi tejuan tinentinemij uan tinejnentinemij uan tiyoltinemij” (Hechos 17:25, 28).

Sayoj ke Dios amo sayoj technextilia inetasojtalis keman techmaka tein techpaleuia maj tiksentokakan tiyoltokan. Yejuatsin amo techchijchiuak maj sayoj tiyoltokan, ta maj tikmachilikan ke moneki timotokiskej iuan uan techmaka tein techpaleuis maj ijkon tikchiuakan (Mateo 5:3). Ijkon, uelis tipouiskej iniuan ichankauan Jiova. Kemaj, komo titatakamatij uelis timochiuaskej tiikoneuan (Romanos 8:19-21).

Ijkon kemej kijtoua Juan 3:16, Dios kinextij ke techtasojta keman kiualtitanik iKonetsin, Jesús, nikan taltikpak maj tamachtiki keniuj tamati iDios uan iTajtsin uan maj toka momikiliki. Sayoj ke miakej taltikpakneminij amo senkis kiajsikamatij keyej monekik momikilis uan keniuj keman momikilij monextia ke Dios techtasojta. Maj tikitakan tein kijtoua Biblia.

Maski tinochin tikokolispeuaj, tiueuentsintiaj uan timomikiliaj, amo yejua nejon tein Dios kinekia maj tikpanokan. Yejuatsin kinchijchiuak yekinika takat uan yekinika siuat maj nemiskiaj nochipaya itech se xochital nikan taltikpak. Sayoj ke kinnauatij se taman: monekia kitakamatiskej, porin komo amo kichiuayaj, momikiliskiaj (Génesis 2:17). Yekinika takat, Adán, kiixnamikik iueyi taixyekanalis Dios, uan nejon kichiuak maj yejua uan ikoneuan momikiliskiaj. Tatitanil Pablo kijtoj: “Itechkakopaka ne achtopa tagat Adán ten motajtakolmakak in tajtakol momauak ya tech nochi senmanauak. Uan no tikmatij ke ongak mikilis nochi senmanauak ika por ne tajtakol de Adán. Uan no ne mikilis mosouako uan takitskijtinemiko inpan nochi in taltikpakuani porin nochi in taltikpakuani motajtakolmakakke” (Romanos 5:12).

Sayoj ke Dios kitasojta melaujkayot (Salmo 37:28). Yejua ika, maski amo uelia kikauaya ijkon tein Adán kichiuak keman amo tatakamatik maski kimattoya ke amo monekia kichiuas, amo kintatsakuiltij taltikpakneminij maj nochipa tajyouikan uan maj momikilikan ika itajtakol sayoj se takat. Ta kitalij tein kichiuaskia maj momelauaskia tein panok uan kichiuak maj taltikpakneminij tatakamatinij oksepa ueliskiaj kichiaskej nemiskej nochipaya. ¿Keniuj? Keman kitekitiltij tanauatil “nemilis ika nemilis” (Éxodo 21:23, nota). Adán kipoloj nemilis tein amo kipia tajtakol, yejua ika aksa monekia kitemakas se nemilis kemej tein Adán kipiaya: se nemilis tein amo kipiaskia tajtakol.

Moita ke nion semej ikoneuan Adán ueliskiaj kichiuaskej, sayoj ke Jesús kemaj (Salmo 49:6-9). Yejua amo yolik ika tajtakol, ijkon kemej Adán. Yejua ika, keman kitemakak inemilis, uelik kinmakixtij taltikpakneminij itech tajtakol uan kinpaleuij ikoneuan yekinika takat uan siuat maj ueliskiaj kipiaskej nemilis tein kipiakej yejuan (Romanos 3:23, 24; 6: 23). Sayoj ke ¿moneki tikchiuaskej teisa uan ijkon uelis tikpiaskej nejon nemilis porin Jiova kinextij netasojtalis?

Juan 3:16 kisentoka kijtoua: “Para ma nochi ne ten iuantsin [Jesús] takuautamatiske, [...] ma amo ixpoliuikan. Ta, ma kipiakan ne yek nemilis nachipa”. Nejin kijtosneki ke komo tiknekij tikseliskej nemilis nochipaya moneki tikchiuaskej se taman: tikneltokaskej Jesús uan tiktakamatiskej.

Aksa uelis kijtos: “Nejin versículo amo ika tajtoua tatakamatilis. Jesús kijtoj ke nochin akin ‘iuantsin takuautamatiske’ kipiaskej nemilis nochipaya”. Sayoj ke moneki tikelnamikiskej ke Biblia kinextia ke takuaujtamatilis amo sayoj kijtosneki se kineltokas teisa. Kemaj, takuaujtamatilis amo sayoj kijtosneki se kineltokas Jesús uan se kijtos ke yejua toTemakixtijkauj. No moneki timochikauaskej tikchiuaskej tein tamachtij; sayoj ijkon uelis tikpiaskej itatiochiualis Dios. Komo amo tikchiuaj, sayoj nenkaj tikijtoskej ke titakuaujtamatij. Biblia kijtoua: “Se itakuautamatilis amo teyi ipatiu komo amo kinextijtinemi [...] ika ne kuali tatakamatilis” (Santiago 2:26). Komo titakuaujtamatij iuan Jesús moneki techolinis maj tikchiuakan itech tonemilis tein tikneltokaj.

Pablo kimelaua ika nejin tajtolmej: “Techmachililtia ne tetasojtalis de Cristo ke moneki ma titekititinemikan [...] porin kuali tikyekajsikamatij ya nijin tamachilis ke [...] Cristo momikilij para kinixpakayotis nochi in taltikpakuani uan ijkon kixtauak nintajtakoluan. Uan [...] para ke yejuan ma amo moyolpaktijtinemikan ok. Ta, para ke yejuan ma sayo Cristo kitekitilijtinemikan. Porin sayo Yejuatsin momikilij uan oksepa pankisak yoltok” (2 Corintios 5:14, 15). Komo yekmelauj tiktasojkamatij maj Jesús kitemakani inemilis kemej netetayokolil, tikpataskej tein monekis itech tonemilis; amo tiktayekanaltiskej totanejnekilis uan timochikauaskej tikchiuaskej tein tamachtij Jesús, akin toka momikilij. Ika okseki tajtolmej, moneki yekinika tikchiuaskej itech tonemilis tein Jesús tanauatij. Uan moneki moitas ke tikpataj itech tein tikixpejpenaj, tein tikchiuaj uan kemej timonejnemiltiaj. ¿Toni netetayokolil tikseliskej komo titakuaujtamatij iuan Jesús?

Itamian Juan 3:16 ika tajtoua se taman tein Dios motenkauak kichiuas: akin kinextiaj ke takuaujtamatij itech inemilis Jesús tein kitemakak uan kichiuaj tein Jiova tanauatia amo momikiliskej, ta kipiaskej nemilis nochipaya. Sayoj ke, akin Dios kintasojta amo sayoj seko nemiskej nochipaya.

Sekin nemiskej nochipaya ompa iluikak. ¿Keniuj tikmatij? Porin Jesús kiniluij imomachtijkauan ke yaya kintayektaliliti ompa iluikak kampa iuan taixyekanaskej (Juan 14:2, 3; Filipenses 3:20, 21). Akin moajokuiskej ompa iluikak “tekititinemiske keme tiopixkame itenkopaka Totajtsin Dios uan itenkopaka Cristo. Uan yejuan tayekantinemiske iuan Cristo ipan se mil xiume” (Apocalipsis [Revelación] 20:6).

Amo miakej itatojtokakauan Cristo kiseliskej nejin netetayokolil. Tein melauj, Jesús kijtoj: “Amo ximomoujtikan, amo ueyi oloch ichkamej, porin nanmoTajtsin namechmakati tekiuajyot” (Lucas 12:32, TNM). ¿Kanachi taltikpakneminij pouij itech “amo ueyi oloch ichkamej”? Apocalipsis 14:1, 4 kijtoua: “Uan [...] nikitak ya Yejuatsin ten tamati keme ichkatsin [...] metsijkatok ipan ne tepetsin ten kiliaj Sión. Uan ompa iuan Yejuatsin yetoyaj se ciento uan omepoal uan naui mil taneltokani de Dios. Uan nochi yejuan ijkuiliutok tech inixkuako in tokayit de Cristo uan in tokaytsin de Dios, Yejuatsin Itajtsin de Cristo. Uan ne taneltokani [...] yejuan nojonkes Dios kinkouak ika iesyotsin de Cristo uan [...] yejuan in tayekankakoneuan de Totajtsin Dios uan den Cristo ten tamati keme ichkatsin”. Keman tikitaj ke tel miak millones taltikpakneminij moajsinij nikan taltikpak, 144,000 yekmelauj se “amo ueyi oloch ichkamej”. Uan no, nejin versículo kijtoua ke yeskij tekiuanij. ¿Akonimej kinixyekanaskej?

Jesús no ika tajtoj oksekin akin no kiseliskej tatiochiualismej tein kiualkuis Tekiuajyot tein moajsi iluikak. Yejua kijtoj: “Nikinpia oksekin noichkauan ten ayamo poutokke tech nijin ichkat kolal. Yejuan  nojonkes no moneki nikinualkuis uan yejuan no kitakamatiske notajtoluan. Uan ijkon onkas sayo se sen oloch yetolis de noichkauan uan no onkas sayo se tapixke san” (Juan 10:16). Nejin “okseki ichkamej” kichiaj nemiskej nochipaya nikan taltikpak, ijkon kemej Adán uan Eva ueliskiaj nemiskiaj. ¿Keniuj tikmatij?

Biblia miakpa kijtoua ke taltikpak mochiuas se xochital. Komo tikonneki tikonitas ox melauak, xikontapo moBiblia uan xikonixtajtolti nejin tajkuilolmej: Salmo 37:9-11; 46:8, 9; 72:7, 8, 16; Isaías 35:5, 6; 65:21-23; Mateo 5:5; Juan 5:28, 29 uan Apocalipsis 21:4. Itech nejin tajkuilolmej moijtoua ke tamis neteuilis, mayan, kokolismej uan mikilis. Ika tajtouaj se tonal keman taltikpakneminij kinchijchiuaskej kalmej, kitekiskej tein kitokaskej uan kiniskaltiskej ininkoneuan itech se taltikpak kampa onkas yolseuilis. * ¿Tikonuelitaskia ijkon tionnemis? Onkak miak taman tein kinextia ke uelis tikneltokaskej ke amo uejkaua mochiuas nejin tein Dios motenkauak.

Satepan ke tikitakej nejin, ¿melauj ke kiyeknextia ke Dios kichiuani miak taman tein ika techpaleuiani? Yejuatsin techmakani nemilis, tamatilis, uan tein techpaleuis maj tiksentokakan tiyoltokan. Sayoj ke tein okachi moneki, kiualtitanik iKonetsin maj toka momikiliki uan ijkon uelis tikpiaskej okachi uejueyi tatiochiualismej, kemej timomachtijkej itech Juan 3:16.

Nemilis nochipaya itech se taltikpak kampa onkas yolseuilis uan takualtsinkan, kampa amo onkas kokolismej, neteuilismej, mayan nion mikilis, kichiuas maj nochipaya tiyolpakikan. Sayoj ke tisejsemej moneki timochikauaskej tikchiuaskej tein motajtani uan ijkon uelis tikseliskej nejon tatiochiualismej. Sayoj moajsi se netajtanil tein moneki tiknankiliskej: ¿toni tikchiujtokej tein ika tiknextiaj ke tiktasojkamatiliaj Dios tein toka kichiuani?