1. Kemej xolal Israel tein Jiova kiixpejpenka taixnamikik, ¿toni nechikol kiixpatak? (Xikonita taixkopin ipeujyan tamachtilis.)

ITECH yekinika siglo Jiova kiixtalij nechikol kampa kichiuayaj kemej Cristo, uan itech nejin tonalmej kinpaleuiani maj oksepa kiueyichiuakan kemej yejuatsin kiyolpaktia. Itech tamachtilis tein achto tikitakej, timomachtijkej ke xolal Israel tein Jiova kiixpejpenka taixnamikik, yejua ika yejuatsin kiixtopeuak uan kiixpejpenak se nechikol kampa pouiaj yekinika itatojtokakauan Cristo. Nejin yankuik nechikol makisak keman kiixpolojkej Jerusalén itech xiuit 70 porin kipiaya itatiochiualis Dios (Luc. 21:20, 21). Nejon tein mochiuak itech yekinika siglo kinextij tein kipanoskiaj itekitikauan Jiova itech totonaluan. Tein amo kuali tein mochiujtok itech taltikpak kampa Satanás taixyekantok amo uejkaua ixpoliuis, sayoj ke akin kitekitiliaj Dios nikan taltikpak akin pouij itech inechikol makisaskej itamian tonalmej (2 Tim. 3:1). ¿Keyej ueli tikyekijtouaj ke ijkon mochiuas?

2. 1) ¿Toni kijtoj Jesús keman ika tajtoj “kachi ueyi tajyouilis”? 2) ¿Keniuj peuas “kachi ueyi tajyouilis”?

² Keman Jesús ika tajtoj iyetolis tein amo moita uan itamilis tein amo kuali tein mochiujtok nikan taltikpak, kijtoj: “Onkas kachi ueyi tajyouilis ten amo keman nankitakke desde kuak tsinpeuak in taltikpak. Uan amo keman onkas ok satepan okse  tajyouilis keme nijin ten nankipanoske” (Mat. 24:3, 21). Nejin okachi ueyi tajyouilis tein amo kemanok mochiuas, peuas keman Jiova kinolinis taltikpaktekiuajyomej maj kiixpolokan “ueyi [...] Babilonia”, tein kijtosneki, nochi taneltokalismej tein amo melaujkej tein moajsij noyampa taltikpak (Apoc. 17:3-5, 16). ¿Toni panos satepan?

3. Satepan ke ixpoliuis taneltokalis tein amo melauak, ¿toni kinpanos itekitikauan Jiova?

³ Satepan ke taneltokalis tein amo melauak ixpoliuis, Satanás uan taltikpakneminij akin kinixyekana kinixnamikiskej itekitikauan Jiova. Biblia kijtoua toni kichiuas “Gog tein poui itech tal Magog”: “Tikinixnamikikiuj kemej se ueyi kiouaejekat, uan tikemis tal kemej mixti, tejua uan nochi motateuijkauan uan miakej xolalmej mouan”. Kemej itaixpantijkauan Jiova amo kinpiaj tateuianij uan se xolal tein nion tepitsin kitemoua tateuis, moitas ke ijsiujka kinixpoloskej. Sayoj ke ¡semi mopolojtoskej komo kinixnamikij! (Ezeq. 38:1, 2, 9-12.)

4, 5. ¿Toni kichiuas Jiova keman Satanás kitemos kiixpolos ixolal?

⁴ ¿Toni kichiuas Jiova keman Satanás kitemos kiixpolos ixolal? Kemej yejuatsin okachi Ueyi Taixyekankej, niman techpaleuis. Komo kinixnamikij itekitikauan, kiixnamikij yejuatsin (xikonixtajtolti Zacarías 2:8). Kemej moita, toTajtsin akin nemi iluikak niman techmakixtis. Nejon nemakixtilis mochiuas keman tein amo kuali tein mochiujtok itech taltikpak kampa Satanás taixyekantok ixpoliuis itech Armagedón, “guerra iuan Dios tech ne ueyi tonal [...] porin sayo Yejuatsin kipixtinemi nochi chikaualis” (Apoc. 16:14, 16).

⁵ Keman Biblia ika tajtoua nejon neteuilis, moijtoua ke mochiuas nejin: “‘Jiova kipia se tajtolteuilis iniuan altepemej. Yejua kijtos toni kinnamiki kiseliskej nochin taltikpakneminij. Uan kintalis itech espada akin amo yolkualmej’, ijkon kijtoua Jiova. Yejua nejin tein kijtoua Jiova akin kinixyekana tateuianij: ‘¡Xikitakan! Se tetsauit momoyauas itech se altepet iuan okse. Uan se ueyi kiouaejekat ualkisas kampa okachi uejka itech taltikpak. Uan akin Jiova kinmiktis itech nejon tonal yekmelauj peuas moajsiskej kampa ika peua taltikpak hasta kampa ika tami. Amo kinchokiliskej, nion kinajokuiskej nion kinpachoskej. Mokauaskej kemej tapalan ompa talixko’” (Jer. 25:31-33). Tein amo kuali tein mochiujtok itech taltikpak kampa taixyekantok Satanás ixpoliuis itech neteuilis Armagedón. Sayoj ke akin kitekitiliaj Dios nikan taltikpak akin pouij itech inechikol, makisaskej.

6, 7. 1) ¿Kani ualeuaj akin pouij itech “uel miak tagayot”? 2) ¿Toni kinextia ke inechikol Dios kisentoka moskaltia?

⁶ Inechikol Dios moskaltijtok nikan taltikpak porin akin pouij ompa kipiaj itatiochiualis. Biblia techyekiluia ke “iixtololouan Jiova kinitaj akin yolmelaujkej, uan inakasuan kinkakij keman motataujtiaj” (1 Ped. 3:12, TNM). Uan kiyeknextia ke iniuan yolmelaujkej moajsiskej “uel miak tagayot”, tel miakej taltikpakneminij akin makisaskej keman panos “ueyi tatsakuiltilis” (Apoc. 7:9, 14). Xionmonemili keniuj tionmomachilis keman tejuatsin tionmakisas itech “ueyi tatsakuiltilis” iniuan nejon “uel miak tagayot”.

⁷ ¿Kani ualeuaj akin pouij itech “uel miak tagayot”? Kinsentilijtokej akin kayomej itech nochi xolalmej porin motanojnotstok ijkon kemej Jesús kijtojka ke panoskia: “Nejin kuali tanauatilmej ika tekiuajyot motetapouis semanauak taltikpak kampa nemij uan ijkon nochin kimatiskej; uan ompa ejkos tamilis” (Mat. 24:14, TNM). Itech itamian tonalmej, yejua  tekit tein kitayekanaltia inechikol Dios. Ika nejin tekit tel miakej taltikpakneminij momachtianij keniuj kiueyichiuaskej Dios “ika espíritu uan ika tein melauak” (Juan 4:23, 24, TNM). Kemej neskayot, itech xiujtekit 2003 hasta 2012, panoua 2,707,000 taltikpakneminij motemaktijkej iuan Dios uan moauijkej. Itech nejin tonalmej, itech nochi taltikpak moajsij panoua 7,900,000 itaixpantijkauan Jiova, uan tel miakej iniuan mosentiliaj itech nechikolmej, okachiok keman xijxiujtika moelnamiki imikilis Jesús. Kemaj, tikmatij ke ijsiujka momiakiliaj itekitikauan Dios porin yejuatsin “kiskaltia” uan amo tejuan (1 Cor. 3:5-7). ¡Techtelyolpaktia tikitaskej keniuj xijxiujtika okachi momiakiliaj akin pouij itech “uel miak tagayot”!

8. ¿Keyej okachi moskaltia inechikol Jiova itech totonaluan?

⁸ Se kimoujkaita keniuj momiakiliaj itekitikauan Dios porin yejuatsin kinixyekantok itaixpantijkauan (xikonixtajtolti Isaías 43:10-12). Ne uejkauj moijtojkaya: “Tein tsikitsin, mochiuas se mil, uan tein amo ueyi, mochiuas se altepet tel chikauak. Nejua, Jiova, nikijsiuiltis keman ajsis tonalmej” (Is. 60:22). Yekinika, tokniuan taixpejpenalmej akin mokauajok nikan taltikpak katkaj kemej “tein tsikitsin”, sayoj ke Jiova kitiochiuak inintanojnotsalis uan itech inechikol Dios okachi momiakilijkej tokniuan taixpejpenalmej (Gál. 6:16). Uan kisentoka moskaltia ijkon kemej kinsentilijtiyouij “uel miak tagayot”.

9. ¿Toni moneki tikchiuaskej uan ijkon uelis tikseliskej tel kualtsin nemilis tein Dios motenkaua techmakas?

⁹ Itech Biblia yejuatsin motenkaua ke tikpiaskej se tel kualtsin nemilis satepan, yeski titaixpejpenalmej oso tipouiskej itech “uel miak tagayot”. Sayoj ke komo tiknekij tikseliskej nejon nemilis, moneki tiktakamatiskej itanauatiluan Dios (Is. 48:17, 18). Maj titanemilikan itech israelitas. Komo kitakamatiaj Tanauatil tein kiselijka Moisés kinpaleuiskia maj kuali yetoskiaj porin ompa kipiaya tanauatilmej tein kinyekanaskia itech nochi ininnemilis, kemej itech nejin: keniuj kipiaskiaj yolpakilis kemej kalyetouanij, keniuj kiniskaltiskiaj ininkoneuan, keniuj ueliskiaj kuali mouikaskej iniuan oksekin uan maj amo takajkayauaskiaj itech tanamakalis (Éx. 20:14; Lev. 19:18, 35-37; Deut. 6:6-9). No ijkon axkan techpaleuia itanauatiluan uan itayolmajxitilis Jiova. Uan amo teouijmaka se kichiuas (xikonixtajtolti 1 Juan 5:3). Komo tiktakamatij, amo sayoj techpaleuis maj kuali tiyetokan, ta no ‘tikpixtiyaskej se yek takuautamatilis’ (Tito 1:13).

10. ¿Keyej moneki tikxeloskej tiempo keman timomachtiskej Biblia uan titaueyichiuaskej kemej kalyetouanij?

¹⁰ Nikan taltikpak, inechikol Jiova moyektalijtok. Kemej neskayot, okachi kuali tikajsikamattiyouij tamachtilis tein melauak. Taixejekol maj ijkon mochiua porin “ojti kampa nejnemij yolmelaujkej kemej yeskia tanex tein tatanextijtiuj hasta mokaua kualtsin tonayan” (Prov. 4:18). Sayoj ke moneki timotajtaniskej: “¿Nikixmati yankuik taman kemej moajsikamati se tamachtilis tein kipia Biblia? ¿Nimomattok mojmostaj nikixtajtoltis Biblia? ¿Niknejnektok nikixtajtoltis sejse yankuik amaix tein kisa? ¿Nikixtalijtok se tonal itech semana nitaueyichiuas kemej kalyetouanij?”. Tein melauj, nejin amo ouij, sayoj moneki kuali tikixtaliskej hora keman tikchiuaskej. Sayoj ke motelneki maj tiksentokakan timomachtikan Biblia, maj tikchiuakan tein timomachtiaj uan maj tikauakan maj inechikol Dios techyekana, okachiok axkan ke amo uejka yetok okachi ueyi tajyouilis.

11. ¿Keniuj itekitikauan Dios nochipa kintelpaleuiani keman mosentiliaj uan kiueyichiuaj yejuatsin?

¹¹ Inechikol Jiova kineki maj kuali  tiyetokan uan yejua ika miakpa techelnamiktia ke moneki tikakiskej nejin tein tayolmajxitij Pablo: “Moneki ma tiktemolijtiyakan [...] keniu timotasojtatiyaske se uan okse uan de keniu tikchiutiyaske in kuali tachiualisme. Uan sekin tokniuan amo mosentilijtinemij [...] pero ma amo ijkon ma tikchiutinemikan tejuan. Ta, [...] ma timopaleuijtiyakan se uan okse ika ne yolmajxitilis porin tikitaj ke kachi motokijtiuits ya ne tonal” (Heb. 10:24, 25). Keman israelitas miakpa mosentiliayaj uan ijkon kiueyichiuayaj Jiova, yejuatsin kinmachtiaya miak taman. Uan no, semi yolpakiaj itech nejon tonalmej. Kemej neskayot, maj tiknemilikan yolpakilis tein kimachilijkej itech itonaluan Nehemías keman kichiujkej iluit tein kipiayaj itech Sakakaltsitsin (Éx. 23:15, 16; Neh. 8:9-18). Itech nejin tonalmej, no tikseliaj nejon nepaleuilmej keman tiyouij nechikolmej uan uejueyi nechikolmej. Moneki timochikauaskej nochipa ompa tiyetoskej porin nejon techpaleuia maj amo tikauakan Dios uan maj techyolpakti tiktekitiliskej (Tito 2:2).

12. ¿Keniuj moneki tikitaskej tanojnotsalis ika iTekiuajyo Dios?

¹² Kemej tipouij itech inechikol Dios, tikpiaj tatiochiualis titapaleuiskej itech “tekit tein yektik ika kuali tanauatilmej” (Rom. 15:16, TNM). Keman tikchiuaj nejin “tekit tein yektik”, “iuan titekitij Dios” akin “Yolchipauaktsin” (1 Cor. 3:9, TNM; 1 Ped. 1:15). Uan no, keman tikteixmatiltiaj kuali tanauatilmej titapaleuiaj maj moueyitali itokay. ¡Se ueyi tatiochiualis titapaleuiskej maj moteixmatilti “kualtsitsin kuali tanauatilmej tein techmaka Dios akin yolpaki”! (1 Tim. 1:11, TNM.)

13. ¿Keniuj uelis tikpiaskej nemilis uan se kuali uikalis iuan Jiova?

¹³ Dios kineki maj amo tikauakan uan maj tikpaleuikan inechikol itech tein yeski taman tein kiixtalis porin ijkon tikpiaskej chikauak totakuaujtamatilis. Moisés kiniluij israelitas: “Yekmelauj axkan niktalia iluikak uan taltikpak kemej taixpantinij nanmoixpan, ke niktalij moixpan nemilis uan mikilis, tatiochiualis uan taijtakolis; uan moneki tikixpejpenas nemilis uan ijkon tiksentokas tiyoltos, tejua uan mokoneuan, komo tiktasojta Jiova moDios, tikaki itajtol uan amo tikaua yejuatsin; porin yejua monemilis uan akin kichiuas miak tonalmej xinemi itech tal tein Jiova motenkauak kinmakas mouejkaujtatuan Abrahán, Isaac uan Jacob” (Deut. 30:19, 20). Kemaj, tikpiaskej nemilis komo tiktasojtaj Jiova, tiktakamatij itajtol uan komo amo keman tikauaj.

14. ¿Toni kimachiliaya se tokniuj keman itech tanemiliaya inechikol Dios nikan taltikpak?

¹⁴ Tokniuj Pryce Hughes, akin amo keman kikauak Dios uan inechikol, se tonal kijkuiloj: “Nikteltasojkamati porin nimonejnemiltij ijkon kemej nimomachtij itanejnekilis Jiova achto ke peuaskia xiuit 1914 [...]. Nikauas maj nechyekana inechikol Jiova nikan taltikpak yejua tein nikita ke okachi moneki. Keman peuak nimomachtia, nikajsikamatik ke amo se kinextia tamatilis komo se takuaujtamati iniuan taltikpakneminij. Keman ijkon nikajsikamatik, nikixtalij nikauas maj inechikol Dios nechyekana. ¿Keniuj okse taman uelis se kiselis itatiochiualis Jiova?”.

15. ¿Toni neskayot tein moajsi itech Biblia techmachtia keniuj moneki tikseliskej se yankuik taajsikamatilis?

¹⁵ Komo tiknejnekij maj Jiova techtatiochiui, moneki tikpaleuiskej inechikol uan tikseliskej yankuik taajsikamatilis ika se tamachtilis tein kipia Biblia. Maj tikitakan se neskayot. Satepan ke Jesús momikilij, tel miakej judíos akin kichiuayaj kemej Cristo kitelnekiaj kisentokaskej kitakamatiskej Tanauatil tein Moisés kiselijka (Hech. 21:17-20). Sayoj ke itech amat  tein Pablo kinijkuilouilij tokniuan hebreos, kinpaleuij maj kiitakan ke amo tapialmej tein kitemakayaj kemej kijtouaya Tanauatil kinpaleuiaya maj kintapojpoluianij inintajtakoluan, ta Cristo akin “motemaktij yejua mismo uan motekauilij ma kimiktikan sepa san” (Heb. 10:5-10). Tikyekmatij ke miakej nejon tokniuan kipatakej inintanemilil uan kiselijkej itayolmajxitilis Pablo. ¿Toni techmachtia nejon? Tejuan no moneki timomachtiskej Biblia ika nejmachkayot uan tikseliskej ika yolyemanilis yankuik taajsikamatilis ika iTajtol Dios oso yankuik taman kemej motanojnotsas.

16. 1) ¿Keyej tel kualtsin yeski keman tinemiskej itech yankuik taltikpak? 2) ¿Toni tikonyolnejneki tejuatsin maj mochiua itech yankuik taltikpak?

¹⁶ Nochin akin amo keman kikauaskej Jiova uan inechikol kiseliskej miak tatiochiualismej. Tokniuan taixpejpenalmej kipiaskej uejueyi tatiochiualismej keman tekiuajtiskej iuan Cristo ompa iluikak (Rom. 8:16, 17). Uan komo tikchiaj tinemiskej nikan taltikpak, maj timonemilikan keniuj tel kualtsin tinemiskej itech Xochital. ¡Se ueyi tatiochiualis tikpiaj maj tikintapouikan oksekin nejin yankuik taltikpak tein Dios motenkaua kiualkuis! (2 Ped. 3:13.) Ompa, “akin yolnejmachmej ininaxkatis taltikpak uan yekmelauj yolpakiskej porin kipiaskej ueyi yolseuilis” (Sal. 37:11). “Kinchijchiuaskej kalmej uan ompa chanchiuaskej”, uan no kinyolpaktis “tekit tein kichiuaskej ika ininmauan” (Is. 65:21, 22). Amo onkasok teikamauiltilis, nion tatasojtilis nion mayan (Sal. 72:13-16). Ueyi Babilonia amo akinok kikajkayauas porin amo yetosok (Apoc. 18:8, 21). Akin momikilijkejya moajokuiskej uan uelis nemiskej nochipaya (Is. 25:8; Hech. 24:15). ¡Tel kualtsin nemilis kipiaskej tel miakej akin motemaktijkejya iuan Jiova! Sayoj ke komo tiknekij tikitaskej nejin tein motenkauak Dios, moneki tikchikauaskej tokuali uikalis iuan, uan tiksentokaskej timokauaskej maj techyekana inechikol.

17. ¿Keniuj moneki tikitaskej inechikol Jiova uan taueyichiualis tein tikmakaj yejuatsin?

¹⁷ Amo uejkaua ixpoliuis tein amo kuali tein mochiujtok nikan taltikpak. Yejua ika, maj tikchikauakan totakuaujtamatilis uan maj tiktasojkamatikan nochi tein Dios techmaka uan ijkon uelis tikueyichiuaskej. Maj tikchiuakan kemej David akin kijkuiloj Salmo, akin mokuikatij: “Se taman niktajtaniani Jiova... uan yejua tein niktemos, maj ueli ninemi ichan Jiova nochi tonalmej tein ninemis, uan ijkon nikyekitas nochi tein kualtsin tein kichiua Jiova uan nikitas ika tasojkamatilis itemplo” (Sal. 27:4). Maj tisejsemej amo tikauakan Jiova uan ixolal, uan maj tiksentokakan tikauakan maj inechikol techyekana.