KEMAN israelitas kiskej Babilonia itech xiuit 537 achto itech totonaluan, Jiova kinekia maj kuali moajsini ojti kampa nejnemiskiaj ijkuak mokepaskiaj Jerusalén. Kiniluij: “Xikyektalikan ojti kampa panos xolal. Xikixmelauakan, xikixmelauakan patauak ojti. Xikajchiuakan tet” (Is. 62:10). ¿Keniuj kitakamatkej judíos nejin tajtolmej? Xa sekin tayekankej uan kiixmelaujtiyajkej tekochmej uan tal uan ijkon okachi kuali panoskiaj akin ualayaj taikan.

Ijkon kemej israelitas kitojtokakej se ojti, tejuan kemej yeskia tiktojtokaj se ojti tein techuika maj tikajsikan tekimej tein ika tikueyichiuaskej Dios. Yejuatsin kineki maj nochi itekitikauan ompa nejnemikan uan maj amo kikauakan maj kintsakuili tein amo moneki. Yejua ika itech iTajtol techyolmajxitia: “Xikixmelaua kampa ojtoka momets uan nochi moojuan chikaujkayetos” (Prov. 4:26). Nejin tayolmajxitilis techpaleuia tinochin, yeski titelpochmej oso amo.

Keman taltikpakneminij ika tajtouaj se telpoch, kemansa kikuij tajtolmej kemej, “yejua uelis kiajsis nochi tein kiixtalis”. Ijkon kijtouaj porin miakej telpochmej semi chikaujtokej, niman uelij kichiuaj teisa uan kitelnejnekij kiajsiskej tein kiitaj ke kuali. Yejua ika Biblia kijtoua: “Ininkualtsinyo telpochmej yejua ininchikaualis” (Prov. 20:29). Komo se telpoch kikui itech itekiyo Dios nejon tein ueli kichiua uan ichikaualis, uelis kiajsis tekimej tein ika kiueyichiuas Jiova uan yekmelauj yolpakis.

Sayoj ke taltikpakneminij no kiitaj nochi tein telpochmej uelis kichiuaskej. Keman se telpoch akin itaixpantijkauj Jiova tel kuali momachtia, itamachtijkauan oso akin iniuan momachtia, kichikaujkauiaj maj kiseli okachi uejueyi tamachtilis uan maj kiajsi nikan taltikpak tein kiitaj ke tel kuali. Oso komo nesi ke tel kuali mauiltia, xa kiyolchikauaskej maj  mochiua se mauiltijkej tein kitelixmatij. ¿Mitspanouani nejon? ¿Tikixmati aksa akin kichikaujkauiaj maj kichiua? ¿Toni kipaleuis se itatojtokakauj Cristo maj kuali taixpejpena?

Tein tamachtia Biblia uelis mitspaleuis xinejnemi itech se okachi kuali ojti. Eclesiastés 12:1 kijtoua: “Xikelnamiki, axkan, moUeyi Tachijchiujkauj itech tonalmej keman titelpoch”. ¿Keniuj uelis ‘tikelnamikis’ moUeyi Tachijchiujkauj? Tein melauj, ¿keniuj uelis tikelnamikiskej tinochin?

Maj tiknemilikan tein kipanok se tokniuj kayot África occidental akin itokay Eric. * Yejua kiteluelitaya mauiltis fútbol. Yejua ika, keman kipiaya 15 xiujmej kiyoleujkej maj mauilti iniuan akin motelixmatiaj itech ueyi altepet kampa pouia. Nejon kijtosnekia ke amo uejkaua, ueliskia yas Europa kampa okachi kimachtiskiaj, uan ijkon mochiuaskia semej uejueyi mauiltianij ika fútbol. Sayoj ke komo kichiuaskia nejon, ¿ueliskia kielnamikis iUeyi Tachijchiujkauj kemej tayolmajxitia Biblia? Maj tikitakan toni kiixpejpenak Eric uan toni techmachtia ineskayo.

Keman Eric yajtoyaok tamachtiloyan, peuak momachtia Biblia iniuan itaixpantijkauan Jiova uan momachtij ke yejuatsin senkis kimelauas kuejmolmej tein kipiaj taltikpakneminij. Kiajsikamatik ke okachi monekia maj kikuini itonaluan uan ichikaualis uan maj ika kichiuani itanejnekilis Dios. Yejua ika amo kitemoj mochiuas se tel kuali mauiltijkej, ta moauij uan kitemoj kiajsis tekimej itech inechikol Dios. Satepan kiselij tekit kemej tapaleuijkej itech nechikol uan okachi satepan kiyoleujkej maj kiseliskia Tamachtilis ika Biblia tein kinmakaj Takamej akin Ininselti.

Komo kiixpejpenaskia mochiuas se ueyi mauiltijkej, xa kitelixmatiskiaj uan kitelpiaskia tomin. Sayoj ke yejua kimatia ke semi melauak nejin tein tayolmajxitia Biblia: “Tein kipatiuita tominpixkej kiita kemej ixolal tein chikauak, uan kinemilia ke se tepamit tein kipaleuia” (Prov. 18:11). Kemaj, nepaleuil tein moita ke tomin kimaka aksa sayoj se takajkayaualis. Tein melauj, akin kiteltemouaj motomintiskej maski kichiuaskej tein yeski, miakej motajyouiltiaj “ika miak tataman ouijkayome” (1 Tim. 6:9, 10).

Teyolpaktij tikmatiskej ke moajsij miakej telpochmej akin kiixpejpenanij kitekitiliskej Jiova miak tonalmej, uan nejon kinpaleuia maj yolseujtokan uan maj yekmelauj yolpakikan. Eric kijtoua: “Peuak nitekiti iniuan akin miak tonalmej kitekitiliaj Jiova. Uan nikita ke okachi kuali maj nipoui iniuan nejon tekitinij, uan niktasojkamatilia Jiova maj nechpaleuiani maj niktojtoka ojti kampa nikajsiskia yolpakilis uan tein yekmelauj kuali”.

¿Uan tejua toni tikchiuas? Semi kuali komo amo tikixtalia tikajsis tein onkak nikan taltikpak, ta okachi kuali komo tiktojtoka ojti tein mitspaleuis ximochiua precursor.

Se tokniuj takat iuan inamik akin takalpanotoj Betel ompa Estados Unidos kimoujkaitakej yolpakilis tein kipiayaj tokniuan akin ompa tekitiaj. Tokniuj siuat kijkuiloj satepan: “Timomatkaj tikpiaskej se kuali nemilis”. Yejua uan itakauj kiixtalijkej kitemoskej keniuj okachi kitekitiliskej Jiova.

Yekinika semi kinouijmakaya kipataskej tein monekia. Sayoj ke se tonal, itech tanemilijkej texto tein moita mojmostaj. Nejon tonal katka Juan 8:31 kampa Jesús kiyekijtoj: “Komo namejuan nankisentokaj nankiyektakamatiyoue nochi ten namechilijtok, ijkuakon melau nanmochiuaske nannomomachtijkauan”. Ika nejin tajtolmej, kinemilijkej: “Maski monekis tikchiuaskej tein yeski uan ijkon tinemiskej ika amo miak taman, amo nenkaj”. Kinamakakej ueyi kali tein kipiayaj, uan kikaujkej seki taman tein amo tayekantoya, uan yajkej itech se nechikol kampa okachi monekia nepaleuil. Axkan kichiujtokej tekit kemej precursor, uan no tapaleuiaj maj mochijchiua Kalmej kampa tiMosentiliaj uan tapaleuiaj itech uejueyi nechikolmej tein uejkauaj eyi tonal. ¿Keniuj momachiliaj? Yejuan kijtouaj: “Semi tikmoujkaitaj maj techtelyolpakti tinemiskej ika amo miak taman, uan tikchiujtoskej tein inechikol Jiova techyoleua maj tikchiuakan”.

Salomón kijkuiloj: “Moixtololouan moneki tachiaskej taixpan, kemaj, [...] maj senkis tachiakan moixpankopa” (Prov. 4:25). Ijkon kemej akin kinejnemiltia se tepos moneki tachias taixpan itech ojti, no ijkon moneki maj amo tiktojtokakan tein techtsakuilis maj tikixtalikan uan maj tikajsikan tekimej tein ika tikueyichiuaskej Dios.

 ¿Katiyejua seki tekimej uelis tikixtalis tikajsis? Kemej neskayot, uelis tiktekitilis Jiova miak tonalmej. No uelis tiyas itech okse nechikol kampa okachi monekij tanojnotsanij, oso itech se kampa kemaj moajsij miakej tanojnotsanij sayoj ke monekij tayekananij oso tapaleuianij. ¿Tikuelitaskia titapaleuis? ¿Keyej amo tikixpantilia tokniuj takalpanojkej? Komo tikneki titapaleuitiuj okachi uejka, uelis titajtanis ox moajsij nechikolmej kampa moneki nepaleuil. *

Maj oksepa tiknemilikan tein kijtoua Isaías 62:10. Seki judíos xa tel tekitikej ijkuak kiajchiujkej tet tein onkaya ojti uan kiixmelaujkej, uan ijkon okseki israelitas ueliskiaj mokepaskej kampa kayomej katkaj. Sayoj ke amo nenkaj tekitikej, ta ixolal Dios kuali mokepak uan amo kipanok tein amo kuali. Yejua ika, komo timochikaujtok tikajsis tekimej tein ika tikueyichiuas Dios amo ximosenkaua. Ika inepaleuil Jiova no uelis tikajsis. Xikijkuani itech ojti tein uelis mitstsakuilis uan xiktajtani Dios maj mitsmaka tamatilis. Tikitas keniuj mitspaleuia maj ‘nochi moojuan chikaujkayetoʼ (Prov. 4:26).