1. ¿Keyej netasojtalis tein Dios uan iKonetsin mopialiayaj moskaltij?

JESUCRISTO, iKonetsin Jiova, kijtoj: “Nejuatsin niktasojta Notajtsin” (Juan 14:31). No kijtoj: “Notajtsin Dios nechtasojta Nejuatsin ni Ikonetsin” (Juan 5:20). Nejin amo moneki tikmoujkaitaskej, ta Jesús tel miak xiujmej tekitik iuan iTajtsin achto ke ualaskia nikan taltikpak. Katka “tekitikej tein ixmach” (Prov. 8:30). Itech nejon xiujmej, kitelixmatik ikualneskayouan iTajtsin uan uelik no kinextij, uan netasojtalis tein mopialiayaj okachi moskaltij.

2. 1) ¿Toni netasojtalis? 2) ¿Toni netajtanilmej tiknankilitij?

² Netasojtalis se taman tein se kimachilia tein ualeua itech se iyolo. Biblia kijtoua ke Jiova semi “teyoltasojta” (Sant. 5:11). Tejuan no moneki tikmachiliskej nejon iuan Jiova. Ta tein melauj, yejuatsin motenkaua ke komo tiktakamatij, techtasojtas (xikonixtajtolti Deuteronomio 7:12, 13). Sayoj ke ¿keniuj uelis tiktasojtaskej aksa akin amo tikitaj? ¿Toni kijtosneki se kitasojtas Jiova? ¿Keyej moneki maj tiktasojtakan? ¿Keniuj uelis tiknextiliskej tonetasojtalis?

3, 4. ¿Keyej uelis tiktasojtaskej Dios?

³ “Dios se Espíritu”, yejua ika amo ueli tikitaj (Juan 4:24, TNM).  Maski ijkon, uelis tiktasojtaskej. Tein melauj, Biblia techyolchikaua maj tikchiuakan. Kemej neskayot, Moisés kiluij xolal Israel: “Moneki tiktasojtas Jiova moDios ika nochi moyolo uan ika nochi monemilis uan ika nochi mochikaualis” (Deut. 6:5).

⁴ ¿Keyej uelis tiktasojtaskej Dios? Porin yejuatsin techchijchiuak kemej tikmachiliskej ke moneki tikueyichiuaskej uan maj ueli tiknextikan netasojtalis. Keman tikchiuaj nejon, netasojtalis tein tikpialiaj moskaltia uan okachi tiyolpakij. Yejua nejon kijtosnekia Jesús keman kijtoj: “Yolpakij akin kimachiliaj ke moneki motokiskej iuan Dios, porin yejuan pouiskej itech iluikaktekiuajyot” (Mat. 5:3, TNM). Miakej no kinemiliaj ke totech moajsi tiknejnekiskej tikueyichiuaskej Dios. Tajkuilojkej Abraham C. Morrison, itech iamatajkuilol Man Does Not Stand Alone [Taltikpaknenkej amo yetok iselti], kijtoj ke se kimoujkaita se kiitas ke noyampa, taltikpakneminij kiteltemouaj Dios uan kinekij kineltokaskej.

5. ¿Keniuj tikmatij ke uelis tikajsiskej Dios?

⁵ ¿Taixejekol maj tiktemokan Dios? ¿Tiueliskej tikajsiskej? Kemaj, ta yejuatsin kineki maj tikajsikan. Tatitanil Pablo kiyeknextij nejon keman kinnojnotsak seki taltikpakneminij itech Areópago. Kampa yetoya uelia kiitaya Partenón, se tiopan kampa moajsia Atenea, se tiotsin siuat tein kiueyichiuayaj itech altepet Atenas. Xionmonemili ke tejuatsin tionyetok iniuan nejon taltikpakneminij keman Pablo peua ika tajtoua Dios akin “kichijchiuak in taltikpak uan nochi miak tataman ten ongak” uan kimelaua ke “Yejuatsin amo kalyetinemi tech in tiopan ten tamachijchiu de se tagat san”. Satepan kijtoua: “Kichijchiuak sanse tagat san uan nojon tagat nochi tejuan timochiuakoj tiixuiuan. Uan Yejuatsin kitalij ke ma tikalyetokan nochi tejuan tiixuiuan tech nochi senmanauak. Uan [...] tanauatij de kan yoltoske uan kan moskaltiske uan kan kalyetoske cada taman pueblojuani nikan taltikpak [...] para [...] ma tiktemokan uan ma timotokitij iixpan Yejuatsin uan ma tikajsikan. Porin ueyi melau ke Yejuatsin amo uejka yetika de cada senme de tejuan” (Hech. 17:24-27). Kemaj, uelis tikajsiskej Dios. Panoua siete millones uan tajko itaixpantijkauan Jiova kiajsinij uan kitasojtaj ika nochi ininyolo.

6. ¿Katiyejua kijtoj Jesús ke katka “kachi ueyi tanauatil uan de kachi kuika ueyi chikaualis”?

⁶ Netasojtalis tein tikpialiaj Jiova moneki ualeuas itech toyolo. Keman se fariseo kitajtanij Jesús katiyejua katka okachi ueyi tanauatil, yejua kiyekiluij: “‘Xiktasojta moueyitekotsin Totajtsin Dios ika nochi moyolo, uan ika nochi motanejnekilis, uan ika nochi motanemililis’. Yejua ya nijin in kachi ueyi tanauatil uan de kachi kuika ueyi chikaualis” (Mat. 22:34-38).

7. ¿Toni kijtosneki tiktasojtaskej Jiova 1) ika nochi toyolo? 2) ika nochi totanejnekilis oso tonemilis? 3) ika nochi totanemililis?

⁷ ¿Toni kijtosnekia Jesús keman kijtoj ke moneki tiktasojtaskej Dios ika ‘nochi toyolo’? Kijtosnekia ke moneki tiktasojtaskej ika nochi tein tikpiaj itech toyolo, tein techpaleuia maj tiknejnekikan tikyolpaktiskej uan maj tikmachilikan tein kimachilia. No kijtoj ke moneki tiktasojtaskej ika ‘nochi totanejnekilis’ oso tonemilis, tein kijtosneki, nochi kemej titamatij uan tein tikchiuaj itech tonemilis. Uan ika tamik, kijtoj ke moneki tiktasojtaskej ika ‘nochi totanemililis’, tein kijtosneki, kemej titanemiliaj uan tein tiknemiliaj. Ika amo miak tajtolmej, moneki tiktasojtaskej ika nochi kemej titamatij uan ika nochi tein tikpiaj, uan maj amo teyi tiktsakuiltilikan.

8. Netasojtalis tein tikpialiaj Dios, ¿toni techolinis maj tikchiuakan?

⁸ Komo tiktasojtaj Jiova ika nochi toyolo, tonemilis uan totanemilil, nochipa timomachtiskej iTajtol, tikchiuaskej ika yolpakilis tein yejuatsin techtajtania uan tikteixmatiltiskej ika yolpakilis kuali tanauatilmej ika iTekiuajyo (Mat. 24:14; Rom. 12:1, 2). Komo tiktasojtaj Jiova ika nochi toyolo, kichiuas maj okachi timotokijtiyakan iuan (Sant. 4:8). Tein melauj, amo uelis tikijtoskej nochi taman keyej moneki tiktasojtaskej Dios, sayoj ke maj tikitakan seki.

9. ¿Keyej tikontasojta Jiova?

⁹ Jiova techchijchiuak uan techmaka nochi tein techpoloua. Pablo kijtoj: “Ika iuelilis de Totajtsin Dios nochi tejuan tinentinemij uan tinejnentinemij uan tiyoltinemij” (Hech. 17:28). Jiova techtayokolij nejin tel kualtsin taltikpak (Sal. 115:16). No techmaka tein tikuaskej uan okseki taman tein techpaleuia maj tiksentokakan tiyoltokan. Yejua ika, Pablo uelik kiniluij akin nemiaj Listra akin kinueyichiuayaj tiotsitsin ke Jiova, “Dios ten nachipa yoltika”, “ipa kinnextilijtiualaya in taltikpakuani akoni Yejuatsin kuak Yejuatsin kinpaleuijtiaya. Uan no [...] kinualtitaniliaya in kioutsin uan kinmaktiliaya kuajkuali takilome. Uan no Yejuatsin namechmaktiliaya uel miak in takualis para nanixuitoske uan para nanmoyolpaktijtoske” (Hech. 14:15-17). ¿Melauj ke nejin se taman tein motelneki tein techolinia maj tiktasojtakan toUeyi Tachijchiujkauj uan Akin techmaka nochi tein techpoloua? (Ecl. 12:1.)

10. ¿Toni tikonmachilia keman itech tiontanemilia inemilis Jesús tein kitemakak?

¹⁰ Dios kichiuani tein tapaleuia maj tami tajtakol uan mikilis tein Adán techpanoltilij (Rom. 5:12). Biblia kijtoua: “Dios techueyinextilia iueyitetasojtalistsin maski tejuan tech ne tonal tikatkaj semi titajtakolejke [...,] kuak Cristo momikilij toixpatka” (Rom. 5:8). Komo yekmelauj timoyolnonotsaj uan titakuaujtamatij itech nejon netetayokolil, Jiova techtapojpoluis totajtakoluan. ¿Melauj ke nejin kichiua maj okachi tiktasojtakan yejuatsin? (Juan 3:16.)

11, 12. ¿Toni taman nechialis Jiova techmaka?

¹¹ Jiova techmaka se nechialis tein techyolpaktia uan techyolseuia (Rom. 15:13). Kemej tikchiaj tinemiskej nochipaya, nejon techpaleuia maj titaxikokan keman moyejyekoua totakuaujtamatilis. Taixpejpenalmej akin amo keman kikauaskej Dios kiseliskej “se tetayokolil keme yeskia se corona [...], yejua ne in yek nemilis ten amo keman tamis” ompa iluikak (Apoc. 2:10). Uan okseki itekitikauan Jiova akin amo keman kikauaskej kinyolpaktis kiseliskej nemilis nochipaya nikan taltikpak tein yeski se xochital (Luc. 23:43). ¿Keniuj timomachiliaj ika nejin ome taman nechialis? ¿Melauj ke kichiua maj tiyolpakikan, maj tiyolseuikan uan maj tiktasojtakan Dios, akin techmaka “nochi in tetayokolil ten kuali uan ten chipauak”? (Sant. 1:17.)

¹² Dios techmaka kualtsin nechialis ke onkas neajokuilis (Hech. 24:15). Melauak ke semi titayokoyaj keman aksa akin tiktasojtaj momikilia. Sayoj ke Dios motenkaua ke mikemej moajokuiskej, uan nejon nechialis kichiua maj amo semi titajyouikan kemej “ne oksekin tagayot ten amo kiyolikachixtokke” (1 Tes. 4:13). Jiova kiyolnejneki oksepa kinmakas ininnemilis akin momikilijkej, okachiok itekitikauan akin amo keman kikaujkej, kemej Job akin yolmelauak katka (Job 14:15). Xionmonemili keniuj titelyolpakiskej keman mikemej moajokuiskej uan tikitaskej yolpakilis tein kimachiliskej kalyetouanij uan tasojiknimej keman oksepa mosenajsiskej. ¡Okachi tiktasojtaskej toTajtsin akin moajsi iluikak! ¡Jiova semi yolkuali porin techmaka nejon tel kualtsin nechialis!

13. ¿Keniuj tikmatij ke Jiova yekmelauj toka motekipachoua?

¹³ Jiova yekmelauj toka motekipachoua (xikonixtajtolti Salmo 34:6, 18, 19 uan 1 Pedro 5:6, 7). Kemej tikmatij ke yejuatsin nochipa kinpaleuia itekitikauan akin amo keman kikauaj, kuali timomachiliaj porin tikmatij ke techyekpia kemej ‘iichkauan’ (Sal. 79:13). Uan tein motenkaua kichiuas satepan okachi kiyeknextia netasojtalis tein techpialia. Itechkopa Jesucristo, Tekiuaj itech iTekiuajyo Dios, kitamis tateuilis, teikamauiltilis uan tein amo kuali tein mochiujtok itech nejin taltikpak, uan akin tatakamatiskej uelis kipiaskej yolseuilis uan nochi tein monekis (Sal. 72:7, 12-14, 16). ¿Melauj ke nejin tein Jiova motenkaua techolinia maj tiktasojtakan ika nochi toyolo, tonemilis, tochikaualis uan totanemilil? (Luc. 10:27.)

14. ¿Toni ueyi tatiochiualis techmaka Jiova?

¹⁴ Techmaka ueyi tatiochiualis maj  timochiuakan tiitaixpantijkauan (Is. 43:10-12). Tiktasojtaj Jiova porin techmaka ueyi tatiochiualis maj tikpaleuikan iTekiuajyo uan maj tikintapouikan akin tajyouiaj kualtsin nechialis tein tikpiaj. Uelis tikinnojnotsaskej ika takuaujtamatilis uan tiknextiskej ke tikneltokaj tein tikiniluiaj porin tikixtiaj itech iTajtol Dios akin melauak, akin nochipa kichiua tein motenkaua (xikonixtajtolti Josué 21:45 uan 23:14). Kemej tikitaj, onkak miak taman keyej tiktasojtaskej Jiova. Sayoj ke ¿keniuj uelis tiknextiskej ke yekmelauj tiktasojtaj?

15. ¿Keniuj techpaleuia komo timomachtiaj Biblia uan tikchiuaj tein kijtoua?

¹⁵ Maj timomachtikan Biblia ika nejmachkayot uan maj tikchiuakan tein kijtoua. Ijkon tiknextiaj ke tiktasojtaj Jiova uan tiknekij maj iTajtol techyekana (Sal. 119:105). Komo tikpanotokej se ouijkayot, techyolseuis tikixtajtoltiskej itech Biblia tajtolmej kemej nejin: “Se yolo tein tayokoxtok uan motekipachojtok, noDios, amo tikixtopeuas” uan “Monetasojtalis tein amo tami, Jiova, kisentokak nechpaleuij. Keman nonetekipacholuan motelmiakilijkej, tinechyolchikauak uan tinechyolseuij” (Sal. 51:17; 94:18, 19). Jiova uan Jesús kinikneliaj akin tajyouiaj (Is. 49:13; Mat. 15:32). Timomachtiskej Biblia techpaleuia maj okachi kuali tikitakan ke Jiova toka motekipachoua, uan nejon kichikaua netasojtalis tein tikpialiaj.

16. ¿Keyej moskaltia netasojtalis tein tikpialiaj Jiova keman nochipa timotataujtiaj?

¹⁶ Maj nochipa timotataujtikan. Nejon techtokia iuan Jiova, ‘Akin kikaki netataujtil’ (Sal. 65:2). Keman tikitaj ke kinankilia tonetataujtiluan, okachi tiktasojtaj. Kemej neskayot, xa se tonal tikitakej ke amo kikaua maj moyejyeko totakuaujtamatilis okachi ke tein uelis tikxikoskej (1 Cor. 10:13). Xa keman timotekipachojtoyaj tiktataujtijkej Jiova maj techpaleuiani, uan satepan tikmachilijkej “yolseuilis” tein sayoj yejuatsin ueli techmaka (Filip. 4:6, 7). Kemansa xa toyolijtik tikchiuanij netataujtil, kemej tein kichiuak Nehemías, uan satepan tikitakej keniuj Jiova technankilij (Neh. 2:1-6). Kemaj, ijkuak ‘tiksentokaj de timotatatautiliaj’ uan tikitaj ke Jiova technankilia, moskaltia netasojtalis tein tikpialiaj uan okachi tikyekmatij ke techpaleuis  keman moyejyekos totakuaujtamatilis (Rom. 12:12).

17. ¿Keniuj tikitaskej nechikolmej komo tiktasojtaj Jiova?

¹⁷ Maj nochipa tiyakan nechikolmej uan uejueyi nechikolmej (Heb. 10:24, 25). Israelitas mosentiliayaj uan ijkon kikakiaj Jiova uan kiixmatiaj, nejon kinpaleuiaya maj kiueyichiuanij ika ueyi poujkaitalis uan maj kitakamatinij iTanauatil (Deut. 31:12). Komo yekmelauj tiktasojtaj Jiova, amo tikitaj ke ouij tikchiuaskej itanejnekilis (xikonixtajtolti 1 Juan 5:3). Yejua ika, maj timochikauakan tiyetoskej itech nochi nechikolmej. Maj amo tikauakan maj poliui netasojtalis tein tikmachilijkej keman tikixmatkej Jiova (Apoc. 2:4).

18. ¿Toni tekit tikchiuaj porin tiktasojtaj Dios?

¹⁸ Maj tikteixmatiltikan ika yolpakilis “yek melau tanextililis [...] ten kualkui ne nemakixtilis” (Gál. 2:5). Netasojtalis tein tikpialiaj Dios techolinia maj tikteixmatiltikan Tekiuajyot tein moajsi imako Mesías, iKonetsin Dios, akin tateuis itech Armagedón porin ‘kipaleuia tein melauak’ (Sal. 45:4; Apoc. 16:14, 16). ¡Techtelyolpaktia tikinpaleuiskej taltikpakneminij maj kiixmatikan netasojtalis tein Dios technextilia uan yankuik taltikpak tein motenkauak kiualkuis! (Mat. 28:19, 20.)

19. ¿Keyej moneki tiktasojkamatiskej tekit tein kichiuaj tayekananij itech nechikol?

¹⁹ Maj tiktasojkamatikan tekit tein kichiuaj ichkatajpianij (Hech. 20:28). Jiova kineki maj tikpiakan tein okachi kuali uan yejua ika kinixtaliani tayekananij itech nechikolmej. Yejuan tamatij kemej “kampa se motatis keman taejeka uan kampa se mopaleuis keman kiouaejeka, kemej miak at tein motaloua kampa tauaktok, kemej iyekauil se ueyi tepejxit kampa tel tauaktok” (Is. 32:1, 2). ¡Semi se kitasojkamati keman se kiajsi kani se motatis porin tel taejeka oso se kiajsis iyekauil se tepejxit keman tel tona! Nejin neskayomej techpaleuia maj tikitakan keniuj tokniuan tayekananij techpaleuiaj uan techyolchikauaj maj tiksentokakan tiktekitilikan Jiova keman tikpiaj kuejmolmej. Komo tikintakamatij nejin “takamej kemej netetayokolilmej”, tiknextiskej ke tikintasojtaj yejuan uan no Dios uan Cristo, Taixyekankej itech nechikol (Efes. 4:8, TNM; 5:23; Heb. 13:17).

20. Komo aksa kipia se tel kuali uikalis iuan Jiova, ¿keniuj itech mochiua tein kijtoua Santiago 1:22-25?

²⁰ Komo tikpiaj se tel kuali uikalis iuan Jiova, ‘tiktakamatinemiskej nochi ten technextilia in Tajtoltsin de Dios; uan amo sayo tikakiskej’ (xikonixtajtolti Santiago 1:22-25). ‘Tiktakamatinemiskej’ kijtosneki ke totakuaujtamatilis techolinia maj tiknekikan tikteixmatiltiskej kuali tanauatilmej uan maj titanankilikan itech nechikolmej. Tiktasojtaj Dios ika nochi toyolo uan yejua ika tiktakamatij “chipaktsin tanauatil” tein techmaka, kampa techiluia nochi tein kichia maj tikchiuakan (Sal. 19:7-11).

21. ¿Kemej toni tamati tonetataujtiluan tein tikchiuaj ika nochi toyolo?

²¹ Netasojtalis tein tikpialiaj Jiova techolinia maj nochipa tiktataujtikan. Tiopixkamej itech xolal Israel monekia mojmostaj kichichinouiliskej kopal Jiova. Yejua ika tekiuaj David kijtoj ke inetataujtiluan tamatia kemej popoch, keman mokuikatij: “Maj nonetataujtil tamati kemej popoch tayekchijchiuj tein motemaka moixpan; keman nimomaajokui, maj tamati kemej netetayokolil ika tatet tein motemaka tiotakpa” (Sal. 141:2; Éx. 30:7, 8). Maj tikchiuakan tonetataujtiluan ika yolyemanilis uan ika nochi toyolo, uan maj tikuikan tajtolmej tein ika tikueyitaliskej uan tiktasojkamatiliskej. Ijkon, Jiova kiyolpaktis tonetataujtiluan kemej yeskia popoch tein ajuiyak (Apoc. 5:8).

22. ¿Toni tikitaskej itech okse tamachtilis?

²² Jesús kijtoj ke moneki tiktasojtaskej Dios, sayoj ke no maj tikintasojtakan oksekin (Mat. 22:37-39). Kemej tikitaskej itech okse tamachtilis, keman tiktasojtaj Jiova uan tein techyolmajxitia, okachi amo techouijmaka tikintasojtaskej oksekin.