KEYEJ SEKIN OMEYOLOUAJ: Miakej kinemiliaj ke Dios sayoj kinita taltikpakneminij kemej tajtakouanij akin amo kinnamiki maj ininka motekipacho. Kendra, akin kipiaya se kokolis tein kichiuaya maj semi motayokoltiani, tel amo kuali momachiliaya porin amo uelia senkis kitakamatia itanauatiluan Dios. Yejua kijtoua: “Yejua ika amo nikchiuayaok netataujtil”.

TONI TAMACHTIA BIBLIA: Jiova amo sayoj kiita tonepololuan uan tel kuali techajsikamati. Biblia kijtoua: “Yejuatsin kuali techixmati keniuj tichijchiujtokej, uan kielnamiki ke tichijchiujtokej ika talnex”. Yejua ika, yejuatsin amo techmaka tein technamikia tikseliskej ika tajtakolmej tein tikchiuaj, ta techiknelia uan techtapojpoluia komo timoyolnonotsaj (Salmo 103:10, 14).

Maj titanemilikan itech ineskayo tekiuaj David, akin ika titajtojkej itech yekinika tamachtilis. Yejua kiluij Dios: “Moixtololouan nechitakej keman nikatka se embrión, uan nochi tein kipia itech moamaix ijkuiliujtoya”. Uan no kijtoj: “Xinechita, noDios, uan xikixmati noyolo” (Salmo 139:16, 23). Maski David tajtakojka, seki tein kichiuak tel amo kuali katka, kiyekmatia ke Jiova kiitaskia itech iyolo ke moyolnonotsak.

Uelis tikonyekmatis ke Jiova okachi kuali mitsonajsikamati kemej amo akin ueli kichiua. Biblia kijtoua: “Taltikpaknenkej kiita tein nesi tapani, sayoj ke Jiova kiita iyolo aksa” (1 Samuel 16:7). Yejuatsin kimati keyej tikchiuaj seki taman. Kimati keniuj tein tikixtijkej itech tochankauan, kemej timoskaltijkej, tein techyoualoua, uan kemej titamatij techuika maj ijkon timonejnemiltikan. Uan no kiita uan kipatiuita maj timochikauakan okachi kuali timonejnemiltiskej, maski kemansa timopolouaj.

Kemej Dios yekmelauj mitsonixmati, ¿keniuj uelis mitsonyolseuis ika nejon?