1. 1) ¿Toni tikmachiliaj tinochin ke moneki tikpiaskej? 2) ¿Iniuan akonimej uelis tikpiaskej se kuali uikalis?

TALTIKPAKNEMINIJ tikmachiliaj ke moneki kuali timouikaskej iniuan oksekin. Moijtoua ke ome taltikpakneminij kuali mouikaj keman semi motasojtaj uan kuali moixmatij. ¿Melauj ke tinochin kuali timomachiliaj iniuan tochankauan uan totasojikniuan akin techtasojtaj, techpatiuitaj uan techajsikamatij? Sayoj ke, akin moneki okachi kuali iuan timouikaskej yejua toUeyi Tachijchiujkauj (Ecl. 12:1).

2. 1) ¿Toni motenkaua Jiova? 2) ¿Keyej miakej amo kineltokaj nejon?

² Itech iTajtol, Jiova techyoleua maj iuan timotokikan uan motenkaua ke komo tikchiuaj “Yejuatsin no motokis” touan (Sant. 4:8). ¡Tikmatiskej nejin semi techyolchikaua! Sayoj ke, miakej kinouijmaka kineltokaskej ke Dios kineki motokis iniuan; kimachiliaj ke amo kinnamiki maj iuan motokikan oso kinemiliaj ke tel uejka yetok. ¿Yekmelauj uelis kuali iuan timouikaskej Jiova?

3. ¿Toni moneki senkis tikneltokaskej?

³ Moneki senkis tikneltokaskej ke uelis tikixmatiskej Jiova, porin yejuatsin “amo uejka yetika” komo tiknekij tikajsiskej (xikonixtajtolti Hechos 17:26, 27 uan Salmo 145:18). Maski titajtakouanij, toDios kineki maj iuan timotokikan uan maj timochiuakan tiitasojikniuan (Is. 41:8; 55:6). Ika tein kipanok itech inemilis, akin  kijkuiloj Salmo uelik kijtoj nejin keman ika tajtoj Jiova: “Tejua Akin tikaki netataujtil, mouan motokiskej nochi tataman taltikpakneminij. Yolpaki akin tikixpejpena uan tikchiua maj motoki” (Sal. 65:2, 4). Maj tikitakan ineskayo se taltikpaknenkej akin motokij iuan Dios: tekiuaj Asá. Uan maj tikitakan itech Biblia toni kichiuak Jiova. *

4. ¿Toni kuali neskayot tekiuaj Asá kikauilij xolal Judá?

⁴ Tekiuaj Asá senkis kipaleuij taueyichiualis tein melauak: kinkixtij akin auilnemiaj itech templo uan kinijkuanij tiotsitsin tein kinueyichiuayaj, nejin ome taman motelchiuaya itech altepet (1 Rey. 15:9-13). Yejua ika, uelik kinyekiluij akin nemiaj Judá “maj kitemouanij Jiova ininDios ininuejkaujtatuan uan maj kichiuanij tajtolmej tein moajsi itech tanauatil”. Jiova kitiochiuak yekinika majtakti xiuit keman tekiuajtitoya porin senkis onkaya yolseuilis itech xolal. Asá kimatia ke Jiova kichiuaya maj kipiaskiaj nejon yolseuilis. Yejua ika kiluij xolal: “Tiktemouanij Jiova toDios. Tiktemouanij, uan yejua techmakani yolseuilis” (2 Crón. 14:1-7). Maj tikitakan tein panok satepan.

5. 1) ¿Itech toni ouijkayot Asá kinextij ke takuaujtamatia iuan Dios? 2) ¿Toni panok satepan?

⁵ Xionmonemili ke tejuatsin tikonpanotok tein kipanok tekiuaj Asá. Tel miakej tateuianij, 1,000,000 takamej uan 300 carros tein ika tateuiaj kiteuikij Judá uan kinixyekana “Zérah akin etíope” (2 Crón. 14:8-10). Sayoj ke, tejuatsin sayoj tikonpia 580,000 tateuianij. ¡Yejuan kemej se achiok ke tein mouan moajsij! ¿Toni tikonchiuaskia? ¿Tionmotajtaniskia keyej Dios kikaua maj pano nejon? ¿Tiontakuaujtamatiskia itech tein ueli tikonchiua oso tikontemoskia inepaleuil Jiova? Tein kichiuak Asá kinextij ke kipiaya se kuali uikalis iuan Jiova uan ke iuan takuaujtamatia. Yejua kitataujtij: “Xitechpaleui Jiova toDios porin tejuan motech titakuaujtamatij uan motokaykopa tiualajkej ininixpan nejin taltikpakneminij. Tejua Jiova toDios. Amo xikaua maj taltikpaknenkej akin momikilia mitstani”. ¿Keniuj Jiova kinankilij inetataujtil tein kichiuak ika nochi iyolo? Yejuatsin “kintanik etíopes”. ¡Nion semej akin kiixnamikiaj momakixtijkej! (2 Crón. 14:11-13.)

6. ¿Itech toni taman moneki tikchiuaskej kemej Asá?

⁶ ¿Keyej Asá uelik senkis takuaujtamatik ke Dios kiyekanaskia uan kiyekpiaskia? Porin kemej kijtoua Biblia, yejua “kichiuak tein melauak iixpan Jiova” uan iyolo “katka ajsitok iixpan Jiova” (1 Rey. 15:11, 14). Tejuan no moneki tiktekitiliskej Jiova ika se yolo ajsitok. Motelneki maj ijkon tikchiuakan komo tiknekij tikpiaskej se kuali uikalis iuan axkan uan satepan. Jiova kiixtalijya tein moneki uan tein techpaleuia maj ueli timotokikan iuan uan maj amo tikauakan. ¡Semi tiktasojkamatiliaj nejon! Axkan maj tikitakan ome taman kemej Dios techpaleuia maj ueli timotokikan iuan.

7. 1) ¿Toni kichiuani Jiova tein techpaleuia maj ueli timotokikan iuan? 2) ¿Toni okachi tapaleuia maj ueli timotokikan iuan Jiova?

⁷ Jiova technextilij inetasojtalis keman kichijchiuak nejin kualtsin taltikpak. Uan mojmostaj kisentoka kinextia ke techtasojta porin techmaka miak taman tein se kimoujkaita tein techpaleuia maj tiyoltokan (Hech. 17:28; Apoc. 4:11). Uan tein okachi moneki, techmaka tein techpaleuia maj ueli timotokikan iuan (Luc. 12:42). Uan no techyekiluia ke techkakis keman tiktataujtiskej (1 Juan 5:14). Sayoj ke, tein okachi tapaleuia maj ueli  timotokikan iuan uan kemej okachi technextilia inetasojtalis yejua inemilis Jesús tein kitemakak (xikonixtajtolti 1 Juan 4:9, 10, 19). Jiova kiualtitanik iKonetsin nikan taltikpak maj techmakixtiki itech tajtakol uan mikilis (Juan 3:16).

8, 9. ¿Toni kichiua Jesús tein tapaleuia maj mochiua itanejnekilis Jiova?

⁸ Jiova kiitani maj inemilis Jesús tein kitemakak kinpaleui nochin taltikpakneminij, hasta akin nenkej achto ke Cristo momikiliskia. Ijkuak Jiova kitematiltij ke ualaskia se Temakixtijkej, yejuatsin kiitaya kemej yeskia motemakakaya nejon nemilis, porin kimatia ke kichiuaskia ijkon kemej kiixtalijka (Gén. 3:15). Miak xiujmej satepan, tatitanil Pablo kinextij ke kitasojkamatiliaya Dios porin Jesús “kixtauak ya nochi totajtakoluan uan techmakixtij ya”. Uan no kijtoj ke Dios “ne achtopa ya [...] amo kinchiuiliaya cuenta in tajtakol den taltikpakuani” (Rom. 3:21-26). Tein melauj, komo Jesús amo kitemakaskia inemilis amo ueliskia timotokiskej iuan Dios.

⁹ Sayoj itechkopa Jesús, akin yolyemankej uelis kiixmatiskej Jiova uan kipiaskej se kuali uikalis iuan. ¿Keniuj kinextia Biblia nejin taman tein melauak? Pablo kijkuiloj: “Totajtsin Dios techueyinextilia iueyitetasojtalistsin maski tejuan tech ne tonal tikatkaj semi titajtakolejke [...,] kuak Cristo momikilij toixpatka para kixtauas totajtakoluan” (Rom. 5:6-8). Jiova uan Jesús techmakakej nejon netetayokolil porin techteltasojtaj, amo porin technamikia tikseliskej. Jesús kijtoj: “Amo aken uelis ejkos [...] nouantsin komo amo achto Notajtsin Dios kinualkuis”. Uan no kijtoj: “Amo aken uelis kajsis Notajtsin Dios komo amo Nejuatsin nikyekantiyas” (Juan 6:44; 14:6). Sayoj ke, ¿keniuj Jiova techpaleuia maj iuan timotokikan itechkopa Jesús? Ika iespíritu techpaleuia maj timotokikan iuan uan maj amo tikauakan uan ijkon uelis tinemiskej nochipaya (xikonixtajtolti Judas 20, 21, TNM). Maj tikitakan okse taman kemej Jiova techpaleuia maj timotokikan iuan.

10. ¿Keniuj techpaleuia Biblia maj timotokikan iuan Dios?

¹⁰ Itech nejin tamachtilis ika titajtouanij textos tein mokixtiaj itech 14 amaixmej tein kipia Biblia. Komo amo tikpiaskiaj Biblia ¿keniuj tikmatiskiaj ke uelis timotokiskej iuan toTachijchiujkauj? ¿Keniuj tikmatiskiaj toni kijtosneki inemilis Jesús tein kitemakak uan ke Jiova techpaleuia maj timotokikan iuan itechkopa Jesús? Ika iespíritu, Jiova kichiuak maj kijkuilouanij Biblia, tein technextilia keniuj tel kualtsin tamati yejuatsin uan katiyejua itanejnekilis tein tel kuali. Kemej neskayot, itech Éxodo 34:6, 7 Jiova kiluij Moisés ke yejuatsin “se Dios teiknelijkej uan kineki tapaleuis, amo niman kualani uan kitelpia ueyi netasojtalis tein amo tami uan nochipa kijtoua tein melauak, akin kinpialia tel miakej ueyi netasojtalis tein amo tami, akin kitapojpoluia akin mopoloua uan akin kitapanauilia tanauatil uan akin tajtakoua”. ¿Akoni amo kiuelitaskia motokis iuan aksa akin kinextia nejon? Jiova kimati ke komo okachi tikixmatij ika tein kijtoua Biblia, okachi tikitaskej ke yekmelauj nemi uan tikmachiliskej ke okachi kuali iuan timouikaj.

11. ¿Keyej moneki timochikauaskej timomachtiskej kualneskayomej tein kinextia Dios uan iojuan? (Xikonita taixkopin ipeujyan tamachtilis.)

¹¹ Tein ika peua amaix Acerquémonos a Jehová kimelaua keniuj uelis timochiuaskej tiitasojikniuan Dios. Ompa kijtoua: “Kuali timouikaj iuan aksa keman tikixmatij keniuj tamati, tein semi tikmoujkaitaj uan tikpatiuitaj tein sayoj yejua ueli kichiua. Yejua ika motelneki maj timomachtikan kualneskayomej tein kinextia Dios uan iojuan, ijkon kemej monextia itech Biblia”. Jiova kichiuak maj moijkuilouani Biblia kemej ueliskia tikajsikamatiskej. ¡Semi tiktasojkamatiliaj nejon!

12. ¿Keyej Jiova kichiuak maj taltikpakneminij kijkuilouanij Biblia?

 ¹² Jiova ueliskia kinnauatis ángeles maj kijkuilouanij Biblia, ta tein melauj, yejuan toka motekipachouaj uan kintekipachoua tein tikchiuaj (1 Ped. 1:12). Tikyekmatij ke yejuan ueliskiaj kijkuiloskej tein Dios kinekia kinmatiltis taltikpakneminij. Sayoj ke, ¿ueliskiaj kiitaskej teisa kemej taltikpakneminij kiitaj? ¿Ueliskiaj tel kuali kimelauaskiaj tein tikmachiliaj, tein techpoloua uan tonepololuan? Amo, uan Jiova kimatia nejon. Yejua ika kiixtalij maj taltikpakneminij kijkuilouanij Biblia uan ijkon okachi ajsi itech toyolo. Amo techouijmaka tikajsikamatiskej tein kinemiliayaj uan keniuj momachiliayaj akin kijkuilojkej Biblia uan akin ininka tajtojkej. Ueli kuali tikajsikamatij keniuj momachilijkej keman amo kiselijkej tein kichiayaj, keman omeyolouayaj, keman mouiaj uan keman mopolouayaj, ijkon kemej yolpakilis tein kimachilijkej. Kemej tanauatijkej Elías, nochin takamej akin kijkuilojkej Biblia kipiayaj “nemilis keme tejuan” (Sant. 5:17).

13. ¿Keniuj tionmomachilia keman tikonixtajtoltia inetataujtil Jonás?

¹³ Kemej neskayot, xionmonemili keniuj momachilij Jonás keman choloj porin amo kinekia kichiuas tein Dios kinauatijka. ¿Ueliskia se ángel tel kuali kimelauaskia keniuj momachilij? Kemej tikitaj, tel kuali tein kichiuak Jiova keman kiixpejpenak Jonás maj kijkuilouani tein kipanok. ¡Uan tanauatijkej kiixpejpenak tajtolmej tein teyololiniaj! Kemej neskayot, keman yetoya aijtik, kichiuak nejin netataujtil: “Keman nikmachilij ke nikpoloti nonemilis, yejua Jiova Akin nikelnamikik” (Jon. 1:3, 10; 2:1-9).

14. ¿Keyej ueli tikajsikamatij tein Isaías kijkuiloj?

¹⁴ No xikonnemili tein kijkuiloj Isaías. Ijkuak kiitaltijkej iueyiyo Jiova, kiajsikamatik ke semi tajtakojkej katka uan nejon kiolinij maj kijto: “¡Niteikneltij! ¡Nimikiti porin se nitakat akin amo chipauak notenoj, uan ninemi itech se xolal akin amo chipauak inintenoj;  porin noixtololouan kiitakej Tekiuaj, Jiova akin kinyekana itateuijkauan!” (Is. 6:5). Se ángel amo keman ueliskia kijkuilos nejon tajtolmej, sayoj ke Isaías kemaj uelik kijkuiloj. Uan tejuan, kemej titajtakouanij ijkon kemej yejua, ueli tikajsikamatij tein kimachilij.

15, 16. 1) ¿Keyej ueli tel kuali tikajsikamatij tein kimachiliaj okseki taltikpakneminij? Xikonijto seki neskayomej. 2) ¿Toni techpaleuis maj okachi timotokikan iuan Jiova?

¹⁵ ¿Ueliskia se ángel kijtos “amo nechnamiki”, ijkon kemej Jacob kijtoj, oso “nitajtakole” ijkon kemej Pedro momachilij? (Gén. 32:10; Luc. 5:8.) ¿Mouiskia, ijkon kemej moujkej imomachtijkauan Jesús? ¿Monekiskia maj moyolchikaua uan ijkon kiteixmatiltiskia kuali tanauatilmej maski kitajyouiltiskiaj, ijkon kemej Pablo uan okseki tokniuan monekik kichiuaskej? (Juan 6:19; 1 Tes. 2:2.) Amo, porin ángeles kitelpiaj chikaualis uan yektikej itech nochi taman, amo kemej taltikpakneminij tajtakouanij. Yejua ika, keman okseki taltikpakneminij techiluiaj keniuj momachiliaj, niman tikinajsikamatij. Keman tikixtajtoltiaj iTajtol Dios, yekmelauj ueli tiyolpakij iniuan akin yolpakij uan tichokaj iniuan akin chokaj (Rom. 12:15).

¹⁶ Keman tikixtajtoltiaj itech Biblia keniuj Jiova kinitak itekitikauan akin amo keman kikaujkej ne uejkauj uan itech titanemiliaj, uelis tikixmatiskej miak taman keniuj tamati toDios, akin amo yolijsiuik uan kinextij netasojtalis keman motokij iniuan nejon taltikpakneminij akin tajtakouanij katkaj. Ijkon, tel kuali tikixmatiskej uan tikteltasojtaskej. Uan nejon techpaleuis maj okachi iuan timotokikan (xikonixtajtolti Salmo 25:14).

17. 1) ¿Toni Azarías kiyolmajxitij Asá? 2) ¿Kemanian Asá amo kitakamatikok itayolmajxitilis Azarías, uan toni kiualkuilij nejon?

¹⁷ Satepan ke tekiuaj Asá senkis kintanik tateuianij etíopes, tanauatijkej Azarías kiyolmajxitij tekiuaj uan xolal se taman tein kinextiaya tamatilis. Yejua kijtoj: “Jiova namouan yetos keman iuan nanyetoskej; uan komo nankitemouaj mokauas xikajsikan; sayoj ke komo nankikauaj yejua no namechkauas” (2 Crón. 15:1, 2). Tetayokoltij tikijtoskej ke seki xiujmej satepan, Asá amo kitakamatik nejin tayolmajxitilis. Keman kiitak ke tekiuajyot tein kiyekanaya majtakti uejueyi kalyetouanij tein moixmatia kemej Israel, kinekiaj kiteuiskej, yejua kitemoj inepaleuil Siria. Asá amo oksepa kitajtanij Jiova maj kipaleui, okachi kuali kiixpejpenak mokuis iuan se xolal tein amo kiueyichiuaya Jiova. Yejua ika Jiova kiluij: “Itech nejin taman amo timonejnemiltij ika tamatilis, yejua ika axkan uan satepan onkas neteuilis mouan”. Uan ijkon mochiuak (2 Crón. 16:1-9). ¿Toni techmachtia nejin?

18, 19. 1) ¿Toni moneki tikchiuaskej komo tikmachiliaj ke timouejkatilijtokej iuan Jiova? 2) ¿Keniuj uelis timotokiskej iuan Jiova?

¹⁸ Maj amo keman timouejkatilikan iuan Jiova. Komo tikmachiliaj ke tepitsin timouejkatilijtokej iuan, maj tikchiuakan tein tayolmajxitia Oseas 12:6: “Ximokepa iuan moDios, xiksentoka xikpia netasojtalis tein amo tami uan melaujkayot, uan [moneki] nochipa ximochia itech moDios”. Maj ika netasojtalis titanemilikan itech inemilis Jesús tein kitemakak uan ika nejmachkayot maj timomachtikan Biblia, iTajtol Dios, uan nejon techpaleuis maj okachi timotokikan iuan Jiova (xikonixtajtolti Deuteronomio 13:4).

¹⁹ Akin kijkuiloj Salmo kijtoj: “Semi kuali maj nimotoki iuan Dios” (Sal. 73:28). Tejuan no ijkon tikitaj. Yejua ika, maj tikixtalikan tiksentokaskej okachi timomachtiskej keniuj tamati Jiova. Komo ijkon tikchiuaj, tikajsiskej miak tamanok tein techolinis maj tiktasojtakan. Komo iuan timotokiaj, yejuatsin motokis touan ¡axkan uan nochipaya!