Keman tikonkaki tanauatilmej xa tikonitani ke kemansa mochiua tein tel amo kuali uan ika mopaleuiaj taneltokalis. Sayoj ke tein melauj, amo nochin taneltokalismej kipiaj itatiochiualis Dios (Mateo 7:15). Nejin kijtosneki ke tel miakej taltikpakneminij sayoj kinkajkayauaj. (Xikonixtajtolti 1 Juan 5:19.)

Sayoj ke, Dios kimati ke moajsij taltikpakneminij akin yolmelaujkej, akin kitasojtaj tein kuali uan tein melauak (Juan 4:23). Yejua ika kinyoleua maj kitemokan tein yekmelauj tamachtia iTajtol, Biblia. (Xikonixtajtolti 1 Timoteo 2:3-5.)

Jiova kichiujtok maj taltikpakneminij akin tataman taneltokalis kipiayaj axkan senyetokan. ¿Keniuj? Keman kinmachtia tein melauak uan maj motasojtakan se uan okse (Miqueas 4:2, 3). Tejuatsin uelis tikonmatis akonimej pouij itech taneltokalis tein melauak komo tikonita netasojtalis tein mopialiaj se uan okse. (Xikonixtajtolti Juan 13:35.)

Itekitikauan Dios tein melaujkej kineltokaj tein Biblia kijtoua uan kitakamatij itanauatiluan (2 Timoteo 3:16). Kipoujkaitaj itokay Dios (Salmo 83:18). Uan no kiteixmatiltiaj ke sayoj iTekiuajyo Dios kinualkuilis tein kuali taltikpakneminij (Daniel 2:44). Uan keman kinpaleuiaj oksekin, kikauaj maj kemej yeskia petanikan, ijkon kemej kichiuak Jesús (Mateo 5:16). Tein melauj, amo teouijmaka se kimatis akonimej porin kinkalpanouaj oksekin uan kinmatiltiaj nochi tein kuali tein kichiuas nejin Tekiuajyot. (Xikonixtajtolti Mateo 24:14; Hechos 5:42 uan 20:20.)