1, 2. ¿Keniuj Jiova kinixyekana itekitikauan?

IJKON kemej panouanij xiujmej, Jiova tataman kemej kinixyekanani itekitikauan. Sekin kinmatiltij tein panoskia satepan oso kinnauatij maj kichiuanij se tekit inintenkopa ángeles, keman kinitaltij teisa oso keman kichiuak maj takochitanij (Núm. 7:89; Ezeq. 1:1; Dan. 2:19). Oksekin kinnauatij tein monekia kichiuaskej inintenkopa taltikpakneminij akin kitekitiliayaj Dios nikan taltikpak akin pouiaj itech inechikol. Sayoj ke, kemej yeski kemej Jiova kinmatiltiskia itajtol, akin kitakamatkej kiselijkej miak tatiochiualismej.

² Itech nejin tonalmej, Jiova techixyekana ika Biblia, ika iespíritu uan nechikol (Hech. 9:31; 15:28; 2 Tim. 3:16, 17). Kuali tikitaj keniuj techixyekana, kemej yeskia tikakiskiaj se tajtol toikampa tein techiluia: “Yejua nejin ojti. Itech xinentinemikan” (Is. 30:21). Jiova no techmatiltia teisa itechkopa Jesús, porin kiixtalij maj taixyekana itech nechikol ika “takeual takuaujtamach uan tamatkej” (Mat. 24:45, TNM). Moneki tikitaskej ke motelneki maj Jiova techixyekana uan maj tiktakamatikan, porin sayoj ijkon uelis tikseliskej nemilis nochipaya (Heb. 5:9).

3. ¿Toni uelis techuikas maj amo tikakikan itajtol Jiova? (Xikonita taixkopin ipeujyan tamachtilis.)

³ Satanás kimati ke komo Dios techixyekana uelis timomakixtiskej, yejua ika kitemoua maj amo tikakikan. Uan no, toyolo uelis  techkajkayauas uan techuikas maj amo tiktakamatikan Jiova (Jer. 17:9). Yejua ika, maj tikitakan keniuj uelis tikixtopeuaskej tein uelis techtsakuilis maj amo tikakikan itajtol Dios. Uan no, maj tikitakan keniuj komo nochipa tiktataujtiaj Jiova techpaleuis maj tikyekpiakan tokuali uikalis iuan maski tein yeski tikpanoskej.

4. ¿Keniuj Satanás kitemoua kichiuas maj taltikpakneminij tanemilikan kemej yejua kineki?

⁴ Satanás kitemoua kichiuas maj taltikpakneminij tanemilikan kemej yejua kineki, yejua ika taolinia maj moteixmatilti teisa tein tekajkayaua (xikonixtajtolti 1 Juan 5:19). Noyampa taltikpak moteixmatiltia teisa itech amat, radio, televisión uan Internet. Uan maski nejin uelis tapaleuis, miakpa taoliniaj maj se monejnemilti uan maj se kichiua teisa tein kitapanauilia itanauatiluan Jiova (Jer. 2:13). Kemej neskayot, kinextia ke kuali yetok maj takamej monamiktikan iniuan takamej uan siuamej iniuan siuamej, uan nejon kichiua maj miakej kinemilikan ke tein Biblia kijtoua ika nejin taman tel amo taixejekol (1 Cor. 6:9, 10).

5. ¿Toni techpaleuis maj amo tikauakan maj techkajkayaua tein Satanás taolinia maj moteixmatilti?

⁵ ¿Toni kinpaleuis akin kitasojtaj itanauatiluan Jiova maj amo kikauakan maj kinkajkayaua tein Satanás taolinia maj moteixmatilti? ¿Keniuj uelis kimatiskej toni kuali yetok uan toni amo? Komo kiyekitaj tein kijtoua iTajtol Dios (Sal. 119:9). Tayolmajxitilis tein kipia itajtol Dios techpaleuia maj tikitakan itech toni uelis titakuaujtamatiskej uan toni sayoj takajkayaualis (Prov. 23:23). Jesús kiyeknextij nejin tein kijtoua Biblia: “In taka ma nemikan [...] ika nochi in tajtolme ten Dios techmaktilijtinemi” (Mat. 4:4). Nejon kijtosneki ke moneki timochikauaskej tikchiuaskej itech tonemilis tein Biblia tayolmajxitia. Kemej neskayot, tel miak xiujmej achto ke Jiova kitemakaskia tanauatil tein kinextia ke amo kuali yetok maj aksa akin kipia inamik moteka iuan akin amo inamik, telpoch José kiajsikamatik ke komo motekaya iuan inamik Potifar tajtakoskia iixpan Dios. Nion tepitsin kinemilij ke ueliskia amo kitakamatis Jiova (xikonixtajtolti Génesis 39:7-9). Maski inamik Potifar kiteliluiaya maj iuan motekaskia, José kiixtalij kikakis itajtol Jiova uan amo tein kiluiaya nejon siuat. ¿Toni techmachtia nejon? Techpaleuis maj tikitakan toni kuali uan toni amo komo tikakij itajtol Jiova uan nion tepitsin tikakij tein Satanás kisentoka taolinia maj moteixmatilti.

6, 7. ¿Toni uelis techpaleuis maj Satanás amo techkajkayaua ika tein tayolmajxitia?

⁶ Itech taltikpak, taneltokalismej kimoyauaj miak tamachtilis tein moixnamikij, yejua ika miakej kinemiliaj ke amo uelis se kiajsis taneltokalis tein melauak. Sayoj ke, komo tiknekij tikakiskej Jiova, yejuatsin kichiua maj amo techouijmaka tikajsiskej tein melauak. Sayoj moneki tikixpejpenaskej akoni tikakiskej. Uan kemej semi ouij se kinsenkakis omen akin tajtouaj, moneki tikixmatiskej  itajtol Jesús uan tikakiskej, porin yejua akin Jiova kiixtalij maj kinixyekana iichkauan (xikonixtajtolti Juan 10:3-5).

⁷ Jesús kijtoj: “Xikyekchiuakan cuenta [...] ten nankikaktokke” (Mar. 4:24). Tein Jiova tayolmajxitia amo ouij se kiajsikamati uan tel tapaleuia, sayoj ke moneki tikpiaskej se kuali tanemilil tein techpaleuis maj tikselikan. Komo amo timoyekpiaj uelis tikakiskej itayolmajxitilis Satanás tein amo kuali uan amo tein Dios techyolmajxitia ika netasojtalis. Maj amo keman tikauakan maj tanemilil tein onkak nikan taltikpak techixyekana itech tonemilis, uelis yeski ika tatsotson, videos, tasojiknimej, tamachtianij oso akin kinitaj kemej tamatinij (Col. 2:8).

8. 1) ¿Keniuj toyolo uelis techuikas maj tiuetsikan itech itakajkayaualis Satanás? 2) ¿Toni uelis techpanos komo amo tikitaj tein technejmachtia toni panotok itech toyolo?

⁸ Satanás kimati ke tikpiaj amo kuali tanejnekilis. Keman techolinia maj tikchiuakan nejon, semi techouijmaka tiktakamatiskej Jiova (Juan 8:44-47). Maj tiknemilikan ke aksa kikaua maj kiyekana itanejnekilis tein amo kuali uan kichiua teisa tein amo keman kinemilijka ke kichiuaskia (Rom. 7:15). ¿Toni kiuikak maj kichiua nejon tein tel tetayokoltij? Iyolo xa yolik peuak amo kikaki itajtol Jiova. Xa amo kiitak tein kinejmachtiaya toni panotoya itech iyolo, oso xa amo kinekik kiitas. Kemej neskayot, xa amo kichiuayaok netataujtil, amo semi tanojnotsayaok oso xa peuak amo youi nochi nechikolmej. Satepan kikauak maj kiyekana itanejnekilis uan kichiuak tein kimattoya ke amo kuali. ¿Toni techpaleuis maj amo tikchiuakan nejon tein amo kuali? Komo tikitaj tein technejmachtia toni panotok itech toyolo uan niman tikpataj tein moneki. Komo tikakij ika nejmachkayot itajtol Jiova, techpaleuis maj amo keman tikakikan tamachtilis tein kimoyauaj akin kinekepiliaj yejuatsin (Prov. 11:9).

9. ¿Keyej motelneki maj niman tikitakan keman tikpiaj se amo kuali tanejnekilis?

⁹ Keman aksa niman kiajxiliaj kokolis tein kipia, uelis kipaleuiskejok maj pajti. No ijkon, komo niman tikitaj ke tikpiaj se amo kuali tanejnekilis uan niman tikchiuaj tein moneki, Satanás amo ‘techkuatapololtis’ uan amo tikchiuaskej tein yejua kineki (2 Tim. 2:26). Yejua ika, ¿toni moneki tikchiuaskej komo tikitaj ke tikaujkej maj totanemililuan uan tein tiknejnekij amo mouika ika tein Jiova kineki maj tikchiuakan? Moneki niman timokepaskej iuan ika yolyemanilis, tiktemoskej maj techixyekana uan tikchiuaskej tein techyolmajxitia (Is. 44:22). Komo teisa amo kuali tikixpejpenaj, nejon uelis techualkuilis miak tekokojkayot uan tajyouilis itech nejin taltikpak kampa mochiujtok tein amo kuali. Yejua ika, ¡okachi  kuali maj niman tikitakan ke amo kuali tein tikchiujtokej uan ijkon amo tiuetsiskej itech itakajkayaualis Satanás!

10, 11. 1) ¿Keniuj aksa kinextia ke moueyineki? 2) ¿Toni techmachtia amo kuali neskayot tein kikaujkej Coré, Datán uan Abiram?

¹⁰ Moneki tikajsikamatiskej ke toyolo uelis kichiuas maj timouejkatilikan iuan Jiova. Kemej neskayot, uelis timoueyinekiskej oso timochiuaskej tixijxikuimej. Nejin uelis techtsakuilis maj amo tikakikan itajtol Jiova uan techuikas maj tikchiuakan tein tel amo kuali. Akin moueyineki uelis kinemilis ke semi ueyichiujkej uan ke uelis kichiuas tein kinekis uan amo akin uelis kiluis teisa. Nejin uelis kiuikas maj kinemili ke amo onkak keyej kichiuas tein kiyolmajxitiaj okseki tokniuan oso tayekananij, nion inechikol Dios. Aksa akin ijkon tanemilia, uelis mouejkatilis iuan Jiova uan semi kiouijmakas kikakis itajtol.

¹¹ Keman xolal Israel moajsia taluakyan, Coré, Datán uan Abiram kiixnamikkej tanauatil tein Jiova kinmakaka Moisés uan Aarón. Ininueyinekilis kinuikak maj kinekiskiaj kiueyichiuaskej Jiova kemej yejuan kiixtaliayaj. ¿Toni kichiuak Jiova? Kinixpoloj yejuan uan nochin oksekin taixnamikinij (Núm. 26:8-10). Nejon tein panok techmachtia se taman tein motelneki: keman se kiixnamiki Jiova teualkuilia tein amo kuali. Uan no techelnamiktia ke “ueyinekilis yetok achto ke se uetsis” (Prov. 16:18; Is. 13:11).

12, 13. 1) Xikonijto se neskayot tein kinextia ke xijxikuiyot teualkuilia tein amo kuali. 2) Xikonmelaua keniuj xijxikuiyot uelis moskaltis komo amo niman se moijkuanilia.

¹² Axkan maj ika titajtokan xijxikuiyot. Aksa akin xijxikui miakpa kimachilia ke amo kinamiki tein Jiova tayolmajxitia uan xa kinemilis ke uelis kikuis teisa tein amo iaxka. Naamán, akin kinixyekanaya tateuianij sirios, kipiaya lepra uan Eliseo, itanauatijkauj Dios, kipajtij. Naamán kinekia kitasojkamatilis ika seki netetayokolilmej, tein tanauatijkej amo kinekik kiselis. Sayoj ke Guehazí, itapaleuijkauj Eliseo, kinejnekik kipias nejon netetayokolilmej, yejua ika kinemilij: “Yekmelauj kemej Jiova nemi, nejua niktojtokati [Naamán] uan niktajtaniti seki taman”. Yejua amo teyi kiluij Eliseo, ta kitojtokak Naamán uan moixeuij kikajkayauas keman kitajtanij nejon netetayokolilmej. Satepan no kikajkayauak itanauatijkauj Jiova. ¿Toni kipanok Guehazí keman kinejnekik kipias nejon? ¡Lepra tein kipiaya Naamán yejua kikuik! (2 Rey. 5:20-27.)

¹³ Xijxikuiyot uelis peuas ika se tanejnekilis tein amo ueyi. Sayoj ke komo amo timoijkuaniliaj, uelis ijsiujka moskaltis hasta techuikas maj tikchiuakan teisa tein semi techijtakos. Tein kipanok Acán kinextia keniuj xijxikuiyot tel chikauak uan keniuj uelis ijsiujka moskaltis. Acán kijtoj: “Keman nikitak ke ompa moajsia se tel kualtsin taken tein kikuiaj Sinar uan doscientos siclos plata uan sentakoton oro, tein etik cincuenta siclos, niknekik nikpias, uan nikuik”. Acán amo moijkuanilij nejon amo kuali tanejnekilis, ta ika xijxikuiyot kiichtekik nejon uan kitatij itech ikaltaken. Keman momatik tajtakol tein kichiujka, Josué kiluij ke Jiova kitatsakuiltiskia. Uan ijkon mochiuak, porin itech nejon tonal yejua uan ichankauan kintetenkej uan ijkon momikilijkej (Jos. 7:11, 21, 24, 25). Xijxikuiyot se taman tein tamouilil tein kemansa uelis techuetsiltis. Yejua ika maj tikixtopeuakan “nochi taman xijxikuiyot” (Luc. 12:15, TNM). Kemansa xa tikpiaskej se amo kuali tanemilil oso titanemiliskej itech auilnemilis, sayoj ke motelneki maj timoijkuanilikan nejon tanemililmej uan maj amo tikauakan maj totanejnekilis moskalti hasta techuikas maj titajtakokan (xikonixtajtolti Santiago 1:14, 15).

14. ¿Toni moneki tikchiuaskej komo tikitaj ke toyolo techolinia maj tikchiuakan teisa porin timoueyinekij oso tixijxikuimej?

¹⁴ Ueyinekilis uan xijxikuiyot uelis semi  techijtakos. Komo titanemiliaj itech tein amo kuali tein techualkuilis, techpaleuis maj tiksentokakan tikakikan itajtol Jiova (Deut. 32:29). Itech Biblia, Dios akin melauak amo sayoj technextilia katiyejua ojti moneki tiktojtokaskej, ta no techmelauilia tein kuali tein tikseliskej komo itech tinentinemij uan keniuj techijtakos komo oksekopa tiyouij. Komo toyolo techolinia maj tikchiuakan teisa porin timoueyinekij oso tixijxikuimej, kuali tikchiuaskej komo tiknemiliaj keniuj techijtakos tejuan uan akin tikintasojtaj, uan tein okachi moneki, keniuj kijtakos tokuali uikalis iuan Jiova.

15. ¿Toni techmachtia ineskayo Jesús?

¹⁵ Jiova kineki maj tel kuali tinemikan (Sal. 1:1-3). Yejuatsin techixyekana ika miak taman uan techmaka keman moneki (xikonixtajtolti Hebreos 4:16). Hasta Jesús, akin amo kipiaya tajtakol, monekia nochipa kinojnotsas Jiova, yejua ika nochipa kichiuaya netataujtil, uan Jiova kipaleuij uan kiixyekanak ika miak taman tein se kimoujkaita. Kintitanik ángeles maj kiyekpiaskiaj, kimakak iespíritu uan kiixyekanak keman kinixpejpenak 12 itatitaniluan. Uan no, ompa iluikak Jiova ualpantajtoj uan ijkon kinextij ke iKonetsin kipiaya inepaleuil uan itatiochiualis (Mat. 3:17; 17:5; Mar. 1:12, 13; Luc. 6:12, 13; Juan 12:28). Tejuan, ijkon kemej Jesús, moneki tikiluiskej Jiova tein tikmachiliaj toyolijtik (Sal. 62:7, 8; Heb. 5:7). Komo nochipa tiktataujtiaj, uelis tikpiaskej se kuali uikalis iuan uan tinemiskej kemej tikueyitaliskej yejuatsin.

16. ¿Toni moneki tikchiuaskej uan ijkon Jiova techpaleuis maj tikakikan itajtol?

¹⁶ Maski Jiova tinochin techmaka tayolmajxitilis, amo kichikaujkauia nion akin maj kichiua ijkon kemej tayolmajxitia. Moneki tiktajtaniskej iespíritu komo tiknekij maj techixyekana uan yejuatsin techmakas okachi ke tein monekis (xikonixtajtolti Lucas 11:10-13). Uan no, Biblia kijtoua: “Ximoyekakiltikan nijin tajtol” (Luc. 8:18). Kemej neskayot, komo tiktajtaniaj Jiova maj techpaleui maj tikixtopeuakan auilnemilis, sayoj ke tiksentokaj tikitaj kampa nesi nejon oso tikitaj películas tein kipia auilnemilis, tein melauj tiknextijtoskiaj ke amo tiknekij maj techpaleui. Komo tiknekij tikseliskej inepaleuil, moneki tiyetoskej kampa moajsi iespíritu Jiova oso kampa mochiujtos teisa tein tapaleuia maj ompa yeto iespíritu. Uan tikmatij ke iespíritu Jiova moajsi itech nechikolmej. Miakej tokniuan, keman ompa kikakinij itajtol Jiova, kiajsikamatinij ke itech ininyolo peuayaj kipiaj se amo kuali tanejnekilis uan kiyektalianij (Sal. 73:12-17; 143:10).

17. ¿Keyej tamouilil maj totech titakuaujtamatikan?

¹⁷ Maj titanemilikan itech ineskayo tekiuaj David, akin taixyekanak itech xolal Israel. Ijkuak takuaujtamatik iuan Jiova, uelik kichiuak uejueyi taman. Keman katka telpoch, kimiktij Goliat, se filisteo akin tel uejkapantik katka. Satepan, mochiuak tateuijkej uan tekiuaj, uan yejua ika kiyekpiak uan kiixpejpenak miak taman tein motelnekia tein kipaleuiskia xolal. Sayoj ke, ijkuak peuak itech takuaujtamati, iyolo kikajkayauak uan yejua ika kichiuak se ueyi tajtakol iuan Bat-seba uan hasta kichiuak maj kimiktianij itakauj, Urías. Sayoj ke, ijkuak Jiova kimelauak, kinextij yolyemanilis, kiselij inepolol uan uelik kiyektalij ikuali uikalis iuan (Sal. 51:4, 6, 10, 11).

18. ¿Toni techpaleuis maj tikakikan itajtol Jiova?

¹⁸ Maj tikchiuakan tein tayolmajxitia 1 Corintios 10:12 uan maj amo totech titakuaujtamatikan. Kemej amo tiuelij ‘tikyekanaj totaksalis’, uelis tikakiskej itajtol Jiova oso xa itajtol Satanás (Jer. 10:23). Yejua ika, maj nochipa tikchiuakan netataujtil uan maj tikauakan maj techyekana iespíritu Jiova. Kemaj, maj nochipa kuali tikakikan itajtol Jiova.