PEDRO tel tayokolchokaya satepan ke kijtoj ke amo kiixmatia Jesús; monekia motelchikauas uan ijkon ueliskia kiyektalis ikuali uikalis iuan Dios. Maski ijkon, Jesús kinekia maj yejua kinpaleuiskia okseki imomachtijkauan. Yejua ika kiluijka: “Kuak timoyolnemilij ya de motajtakoluan, ijkuakon xikinyolmajxiti motekitikaikniuan” (Luc. 22:32, 54-62). Pedro mochiuak kemej yeskia se kalikxit itech nechikol kampa kichiuayaj kemej Cristo itech yekinika siglo, porin kitelpaleuij (Gál. 2:9). No ijkon, akin achto katkaj tayekananij itech nechikol xa uelis oksepa kichiuaskej nejon tekit uan kipiaskej yolpakilis kinyolchikauaskej tokniuan.

Seki tokniuan akin amo kichiuajok tekit kemej tayekananij porin amo kichiujtoyaok tein moneki, xa kimachiliaj ke amo teyi tapaleuiaj. Julio, * akin tekitik kemej tayekankej panoua veinte xiujmej ompa Sudamérica, kijtoj: “Nikuia miak tonalmej itech nonemilis keman nimomachtiaya keniuj nitemakaskia tanojnotsmej, keman nikinkalpanouaya tokniuan uan nikinyolchikauaya. Ompa, nochi nejon panok uan nikmachiliaya ke amo teyi nikchiuayaok. Semi amo kuali nimomachiliaya itech nejon tonalmej”. Axkan, Julio oksepa tekiti kemej tayekankej.

Momachtijkej Santiago kijkuiloj: “Xikpiakan ueyi pakilis kuak namopan uetsis miak tataman tajyouilis” (Sant. 1:2). Santiago ika tajtojtoya tajyouilis tein ika timoixnamikij porin tiktekitiliaj Dios uan porin titajtakouanij. Ika tajtoj tanejnekilis tein amo kuali uan keman se techikotasojta, uan okseki tamanok (Sant. 1:14; 2:1; 4:1, 2, 11). Keman Jiova techmelaua, xa semi techyolkokoua, sayoj ke moneki amo tikpoloskej yolpakilis (Heb. 12:11).

Komo kiitakej ke amo uelisok tikchiuaskej se tekit itech nechikol, nejon techpaleuis maj tikitakan ox chikauak totakuaujtamatilis uan maj tiknextilikan Jiova ke tiktasojtaj. No uelis timotajtaniskej keyej tiknekiaj tikchiuaskej nejon tekit. ¿Tiktemouayaj tiktayekanaltiskej  totanejnekilis? ¿Oso tiktasojtayaj Jiova uan tikyekmatiaj ke nechikol iaxka yejuatsin uan kinamiki maj kiyekpiakan ika netasojtalis? (Hech. 20:28-30.) Tokniuan akin achto tekitikej kemej tayekananij uan kisentokaj kitekitiliaj Dios uan amo kikauaj, kinnextiliaj nochin, hasta Satanás, ke yekmelauj kitasojtaj Jiova.

Keman tekiuaj David kimelaujkej porin kichiujka uejueyi tajtakolmej, yejua kiselij inepolol uan kitapojpoluijkej. Satepan mokuikatij: “Yolpaki akin kitapojpoluiaj keman kitapanauilia tanauatil, akin kitapojpoluiaj itajtakol. Yolpaki taltikpaknenkej akin Jiova amo kitaxtaualtia inepolol, akin itech itanemilil amo onkak takajkayaualis” (Sal. 32:1, 2). Keman kimelaujkej kipaleuij maj okachi kuali monejnemiltiskia uan tikyekmatij ke no okachi kuali kiixyekanak ixolal Dios.

Miakpa, tokniuan akin oksepa kiseliaj tekit kemej tayekananij mochiuaj okachi kuali ichkatajpianij ke achto. Se tokniuj kijtoj: “Axkan ueli okachi kuali nikinpaleuia akin mopolouaj”. Uan okse kijtoj: “Axkan okachi nikpatiuita tatiochiualis tein nikpia nikinpaleuis tokniuan”.

Akin kijkuiloj Salmo kijtoj: “[Jiova] amo nochipa kiitstos nepololmej” (Sal. 103:9). Yejua ika, moneki amo tiknemiliskej ke Dios amo kemanok takuaujtamatis iuan aksa akin kichiuak se ueyi tajtakol. Ricardo, akin kiitakej ke amo ueliskiaok tekitis kemej tayekankej, satepan ke miak xiujmej kichiuak nejon tekit, kijtoua: “Tel amo kuali nimomachiliaya porin nimopolojka. Miak tonalmej nikmachiliaya ke amo nitapaleuiaya uan nejon nechtsakuilij maj oksepa nitekitiskia kemej tayekankej. Nikmouiliaya maj tokniuan amo oksepa nouan takuaujtamatiskiaj. Sayoj ke kemej nochipa nikuelita nikinpaleuis oksekin, nitemakaya nemachtilmej ika Biblia, nikinyolchikauaya tokniuan itech Kali kampa tiMosentiliaj uan iniuan nitanojnotsaya. Nejon nechpaleuij maj nimoijkuaniliani tein nikmouiliaya uan axkan oksepa nitekiti kemej tayekankej”.

Komo se tokniuj yolkualani, nejon uelis kitsakuilis maj oksepa tekiti kemej tayekankej. Okachi kuali maj se kichiua kemej David. Yejua monekik cholos porin Saúl kiteltauelitaya. Sayoj ke maski miakpa ueliskia momakepaskia, amo kinekik kichiuas (1 Sam. 24:4-7; 26:8-12). Keman Saúl momikilij itech se neteuilis,  kichokilij uan kijtoj ke yejua uan ikonetsin Jonatán katkaj takamej akin “kintasojtayaj” (2 Sam. 1:21-23). David amo yolkualanik iuan Saúl.

Komo tikonnemilia ke mitsonijtakojkej porin taman kiajsikamatkej tein panok oso amo mochiuak ika melaujkayot, amo xikonkaua maj kualanyot mitsonyekana itech motanemililuan. William, akin tekitik kemej tayekankej kemej treinta xiujmej ompa Gran Bretaña, yolkualanik iniuan seki tayekananij keman amo kisentokakok kichiuak nejon tekit. ¿Toni kipaleuij maj kiitaskia teisa ika taixejekolis? Yejua kijtoj: “Keman nikixtajtoltij amatajkuilol Job nechtelyolchikauak. Komo Jiova kipaleuij Job maj kiyektaliskia ikuali uikalis iuan eyi itasojikniuan, ¿xe amo nechpaleuiskia nejua maj nikyektaliskia nokuali uikalis iniuan tayekananij?” (Job 42:7-9).

Komo tejuatsin tikonixpejpenak tikonkauas tekit kemej ichkatajpixkej, kuali yeskia xionmotajtani keyej tikonchiuak. ¿Amo kuali tionmomachiliaya porin tikonpiaya kuejmolmej? ¿Peuak tikontayekanaltia okseki taman itech monemilis? ¿Mitsonijtakoj ininnepololuan okseki tokniuan? Tein yeski tein mitsonolinij xikonkaua, xikonelnamiki ke ijkuak tiontekitia kemej tayekankej uelia tikonpaleuiaya tokniuan ika miak taman. Tanojnotsmej tein tiontemakaya uan neskayot tein tikonkauaya kinyolchikauaya, uan keman tikonkalpanouaya porin tikonnekia tikonyolchikauas kinpaleuiaya maj kixikoskiaj tayejyekolis. Uan no, tekit kemej tayekankej tein tikonchiuaya ika nochi moyolo kiyolpaktiaya Jiova uan no mitsonyolpaktiaya tejuatsin (Prov. 27:11).

Jiova kinpaleuiani tel miakej tokniuan maj oksepa kipiakan yolpakilis uan maj kinejnekikan oksepa taixyekanaskej itech nechikol. Komo tejuatsin tikonixpejpenak tikonkauas oso kiitakej ke amo ueliskiaok tikonchiuas, kuali yeskia xionmochikaua oksepa tikonselis tekit kemej “tayekanke” (1 Tim. 3:1). Pablo kisentokaya kitataujtiaya Dios maj tokniuan akin nemiaj Colosas kuali kiixmatiskiaj katiyejua katka itanejnekilis yejuatsin. ¿Keyej? Porin ijkon ueliskiaj kichiuaskej nejin: “Xichipaukanentinemikan [...] para ke namejuan xikchiutinemikan sayo ten Yejuatsin kiyolpaktia” (Col. 1:9, 10). Komo oksepa tikonpia tatiochiualis tionyeski tayekankej, xikontajtani Jiova maj mitsonpaleui xikonpia chikaualis, yolnejmachkayot uan yolpakilis. Itech nejin itamian tonalmej, ichkatajpianij tetasojtanij moneki kipaleuiskej ixolal Dios maj kichikaua ikuali uikalis iuan. ¿Tionueli tejuatsin uan tikonnejneki tikonyolchikauas tokniuan?