“Uan Jiova kikuik takat uan kitalij maj yeto itech xochital Edén uan ijkon tatokaskia uan kiyekpiaskia. Jiova no kimakak nejin tanauatil takat: ‘Nochi itakilo koujmej tein moajsij itech xochital uelis tikuas hasta tiixuis. Sayoj ke kouit tein kiixnextia taixmatilis ika tein kuali uan tein amo kuali, moneki amo tikuas, porin itech tonal keman tikuas, yekmelauj timomikilis’.” (Génesis 2:15-17.)

Dios kitalij yekinika takat, Adán, itech xochital Edén, se kualtsin xochital nikan taltikpak kampa moajsiaj miak tapialmej uan koujmej. Adán kipiaya miak koujmej tein kitemakayaj itakilo tein ueliskia kikuas. Sayoj ke, Jiova kiluijka ke moajsia se kouit tein amo ueliskia kikuas itakilo. Dios kinejmachtij ke komo kikuaya, momikiliskia.

¿Toni kiajsikamatik Adán ika tein Dios kinejmachtij? Yejua kimatia toni katka mikilis. Porin kiitaka keniuj mikiaj tapialmej. Komo Adán no ijkon kichijchiuanij kemej tapialmej, tein Dios kinejmachtij amo semi taixejekol yeskia, porin satepan momikiliskia. Yekinika takat kiajsikamatik ke komo kitakamatia Dios uan amo kikuaya itakilo nejon kouit, nemiskia nochipaya.

Moajsij akin kinemiliaj ke nejon kouit katka se taman tein kiixnextiaya keman se takat uan se siuat mosentekaj, sayoj ke amo ijkon, porin Jiova kiluij Adán uan Eva: “Xikinpiakan konemej uan ximomiakilikan uan ximomoyauakan noyampa taltikpak uan xikixyekanakan” (Génesis 1:28). Nejon kouit yekmelauj moajsia. Jiova kitokaytij “kouit tein kiixnextia taixmatilis ika tein kuali uan tein amo kuali” porin kiixnextiaya ke sayoj yejuatsin kinamiki kiixtalis toni tein kuali uan toni tein amo kuali uelis kichiuaskej taltikpakneminij. Komo Adán amo kikuani itakilo nejon kouit, amo sayoj kinextiskia ke katka tatakamatkej, ta no ke kitasojkamatiliaya iTachijchiujkauj nochi tein kuali tein yejuatsin kimakaka.

Dios kiluij Adán: “Peuak tikua itakilot kouit tein nimitsnauatij”. Uan no kijtoj: “Ika moneton itech moixko tikajsis tein tikuas hasta keman timokepas itech tal, porin ika tichijchiujtok. Porin titalnex uan talnex timokepas” (Génesis 3:17, 19).

Adán kikuaj itakilo se kouit tein kinauatijkaj maj amo kikua, uan Dios amo kiixpanauij tein kichiuak porin katka se taixnamikilis, ika nejon senkis kinextij ke amo kitasojkamatiliaya Jiova nochi tein yejuatsin kimakaka. Keman kikuaj itakilo kouit, Adán kiixtopeuak Jiova uan kiixpejpenak iselti moixyekanas, nejon senkis kiualkuiskia tein tel amo kuali.

Ijkon kemej Jiova kinejmachtij, Adán momikilij satepan. Dios kichijchiujka ika talnex, uan kiluij ke oksepa mokepaskia talnex. Yekinika takat amo kisentokaya yoltok kemej okse taman nion okseko. Senkis amo nemiaok ijkon kemej talnex tein ika kichijchiujkaj (Génesis 2:7; Eclesiastés 9:5, 10).

“Itechkakopaka ne achtopa tagat Adán ten motajtakolmakak in tajtakol momauak ya tech nochi senmanauak. Uan no tikmatij ke ongak mikilis nochi senmanauak ika por ne tajtakol de Adán. Uan no ne, mikilis mosouako uan takitskijtinemiko inpan nochi in taltikpakuani porin nochi in taltikpakuani motajtakolmakakke.” (Romanos 5:12.)

Kemej Adán amo tatakamatik, nejon kiualkuik tein tel amo kuali. Yekinika, Adán kipoloj inemilis, sayoj ke amo se nemilis kemej tein tejuan tikpiaj tein uelis uejkauas 70 oso 80 xiujmej: kipoloj se nemilis nochipaya. Uan no, mochiuak tajtakojkej, yejua ika nochin ikoneuan yolkej tajtakouanij.

Adán techpanoltilij tajtakol, yejua ika tinochin titajtakouanij uan nejon kichiua maj satepan timomikilikan. Pablo kiyekijtoj keniuj timoajsij ika nejin tajtolmej: “Notalnamikilis momautok ika tajtakol uan nejua majya niteaxkatitok tech in tajtakol ten nechyekana keme yeskia nopatrón. Ika ya nojon nejua semi nionteiknelti, porin amo aken uelis nechmakixtis den chikaualis de notalnamikilis de tajtakol ten nechuikas kampa ixpoliuilis” oso mikilis. Yejua tanankilij: “Niktasojkamachilia ke Totajtsin Dios nechmakixtis ika por ichikaualis de Totekotsin Jesucristo” (Romanos 7:14, 24, 25).

“Totajtsin Dios kualtitanik Nikonetsin para ma Yejuatsin kinmakixtiki in taltikpakuani.” (1 Juan 4:14.)

Jiova kichiuak tein moneki uan ijkon uelis techkixtilis tajtakol uan mikilis. ¿Toni kichiuak? Kiualtitanik iKonetsin akin semi kitasojtaya nikan taltikpak maj nemiki kemej se takat akin amo kipiaya tajtakol ijkon kemej Adán. Sayoj ke Jesús “amo teyika motajtakolmakak” (1 Pedro 2:22). Yejua ika, amo keman momikiliskia uan ueliskia kipias nemilis nochipaya.

Sayoj ke, Jiova kikauak maj iKonetsin kimiktikan akin kitauelitayaj uan eyi tonal satepan oksepa kimakak nemilis. Jesús kimakakej se nemilis tein amo tami uan tepitsin satepan mokepak iluikak. Ompa kimaktilij iPopaj inemilis tein amo kipiaya tajtakol uan ijkon taltikpakneminij kiseliskiaj tein Adán kipoloj. Jiova kiselij inemilis tein kitemakak iKonetsin uan nejon kichiua maj nochin akin takuaujtamatiskej iuan Jesús uelis kiseliskej nemilis nochipaya (Romanos 3:23, 24; 1 Juan 2:2).

Kemaj, Jesús ika inemilis tein kitemakak kichiuak maj taltikpakneminij kipiakan tein Adán kipoloj. Jesús momikilij uan ijkon tejuan uelis tikpiaskej nemilis nochipaya. Biblia kijtoua ke: “Totajtsin Dios techyoliknelij uan kimonekiltij ma momikili Cristo Jesús uan ma techixpatkayotiki ika por totajtakoluan de nochi tejuan titaltikpakuani” (Hebreos 2:9).

Nochi nejin techmachtia miak taman kemej tamati Jiova. Kemej taltikpakneminij tajtakouanij, amo ueliaj kichiuaskej tein Dios tajtania uan ijkon momakixtiskiaj. Sayoj ke, kemej Dios techtasojta uan techiknelia, kiixtalij kichiuas tein yejuatsin tajtani. Sayoj ke monekia kichiuas se taman tein tel ouij tein ika techkixtiliskia mikilis: kitemakas inemilis iKonetsin (Romanos 5:6-8).

“Cristo [...] pankisak ya yoltok [...] keme in tayekanke de nochi itaneltokakauan [...] ten momikilijke [...]. Porin kuak ne achto tagat Adán [motajtakolmakak], ijkuakon in mikilis peuak kinkitskia in taltikpakuani. Uan no ijkon kuak Cristo pankisak yoltok [...], ijkuakon Dios kitsinpeualtij nitekiu de kinpankixtis yoltokke itaneltokakauan. Uan nochi tejuan [...] timomikiliske porin [...] Adán [...] motajtakolmakak. Pero [...] komo tipoutinemij iuan Cristo, ijkuakon se tonal Totajtsin Dios techpankixtis tiyoltokke.” (1 Corintios 15:20-22.)

Tikyekmatij ke Jesús yekmelauj nemik uan ke momikilij, sayoj ke ¿keniuj tikmatij ke oksepa kipiak nemilis? Se taman tein kinextij ke yekmelauj panok nejon yejua ke ininixpan miakej monextij itech tataman xolalmej uan itech tataman tonalmej. Se tonal monextij ininixpan panoua 500 taltikpakneminij. Itech amatajkuilol tein tatitanil Pablo kinijkuilouilij tokniuan akin nemiaj ompa Corinto ika tajtoj keman Jesús monextij. Hasta kijtoj ke sekin akin kiitakej nejon yoltoyajok, ijkon kiteajsikamatiltij ke yejuan ueliskiaj kijtoskej tein kiitakej uan tein kikakkej (1 Corintios 15:3-8).

Semi teyolnotsa maj Pablo kitokaytiani Cristo kemej “tayekanke de nochi itaneltokakauan”, oso akin yekinika kimakakej nemilis, porin kijtosneki ke moajsiskiaj okachi akin oksepa kiseliskiaj nemilis. Jesús kijtoj ke ejkoskia tonal keman “nochin akin yetokej itech miketekochmej” kikakiskej itajtol (Juan 5:28, 29, TNM).

“Dios semi kintasojtak in taltikpakuani. Ika ya nojon Yejuatsin kualtitanik Iyojtsin Ikonetsin de Dios para ma nochi ne ten iuantsin takuautamatiske, yejuan nojonkes ma amo ixpoliuikan. Ta, ma kipiakan ne yek nemilis nachipa.” (Juan 3:16.)

Tein ika peua tajtoua Biblia kinextia keman ixnesik mikilis uan ijkuak ixpoliuik xochital Edén. Uan tajkuilolmej tein ika tami Biblia kinextia keman ixpoliuis mikilis uan ijkuak Dios kichiuas se xochital nochi taltikpak. Keman ejkos nejon tonal, nochin nemiskej ika yolpakilis uan nochi tein kichiuaskej nochipa kuali kinkisas. Apocalipsis (Revelación) 21:4 kijtoua: “Amo aken momikilis ok”, uan Dios kineki maj senkis tikneltokakan nejon tein yejuatsin motenkaua, yejua ika itech versículo 5 kijtoua: “Notajtoluan nochi kuika ten melau”. Nochi tein Jiova motenkaua, senkis kichiua.

¿Tikonneltoka tejuatsin ke nejon tajtolmej “kuika ten melau”? Komo ijkon, okachi xionmomachti akoni Jesús uan xiontakuaujtamati iuan, ijkon Jiova kuali mitsonitas. Yejuatsin amo sayoj mitsonmakas miak tatiochiualismej axkan, ta uelis tikonchias tionnemis nochipaya itech se xochital nikan taltikpak, kampa amo akin momikilisok nion “amo aken mochoktis ok; uan amo aken motekipachos ok; uan amo aken yoltajyouis ok”.