SEKI xiujmej achto, panoua 800 telpochmej akin pouiaj itech tataman taneltokalismej kinankilijkej seki netajtanilmej kampa kintajtaniayaj ox kineltokayaj ke Jesús kikakia netataujtilmej. Panoua 480 telpochmej tanankilijkej ke kemaj, sayoj ke semej kitsojkuiloj itokay Jesús itech netajtanil uan kijkuiloj “Dios”.

¿Toni tikonnemilia tejuatsin? ¿Akoni moneki tiktataujtiskej? ¿Dios oso Jesús? * Maj tikitakan tein Jesús kinmachtij itatojtokakauan, nejon techpaleuis maj tiknankilikan nejin netajtanilmej.

Jesús amo sayoj kijtoj ke monekia se kitataujtis Dios, ta yejua ijkon kichiuak.

TEIN TAMACHTIJ: Se tonal, semej itatojtokakauan Jesús kiluij: “Totekotsin, tikneki xitechonmachti de keniu timotatatautiliske”. Jesús tanankilij: “Kuak namejuan nankinekij nanmotatatautiliske iuan Dios, ijkuakon xikijtojkan ijkuin: Toueyitajtsin” (Lucas 11:1, 2). Satepan, itech tanojnots tein kitemakak itech se tepet ika tajtoj ke moneki timotataujtiskej. Kijtoj: “Ximotatatautili iuan Moueyitajtsin”. Uan no kijtoj: “Namoueyitajtsin Dios ipa kuali kimatok ya toni namechpoloa achtopa ya ke namejuan nankitajtaniskiaj” (Mateo 6:6, 8). Uan youak achto ke momikiliskia kinyekiluij itatojtokakauan: “Notajtsin Dios namechmaktilis nochi ten nankitajtaniliske ika in chikaualis de notokaytsin” (Juan 16:23). Kemej tikitaj, Jesús miakpa tamachtij ke moneki tiktataujtiskej iPopaj, Jiova, akin no toTajtsin (Juan 20:17).

TEIN KICHIUAK: Jesús kitataujtij Dios: “Nimitsonueyimouistilia, Notajtsin Dios, tion Tekotsin den eluiyaktsinko uan nikan taltikpak” (Lucas 10:21). Okse tonal “ajkotachia ne eluiyak uan kijtoj ijkuin: —Noueyijtatsin Dios, nimitsontasojkamachilia porin Tejuatsin nachipa tinechonkakilia nonetatatautilis” (Juan 11:41). Uan no, kijtoj nejin tajtolmej keman yaya momikiliti: “Notajtsin Dios, nimotemaktia momakotsinko” (Lucas 23:46). Kemej tikitaj, Jesús kinextij akoni moneki tiktataujtiskej: sayoj Jiova, akin “Tekotsin den eluiyaktsinko uan den nikan taltikpak” (Mateo 11:25; 26:41, 42; 1 Juan 2:6). Uan yejua nejon tein kichiujkej akin kitojtokayaj Jesús itech yekinika siglo.

Seki semanas satepan ke Jesús yajki iluikak, tekiuanij kintajyouiltijtoyajya akin kitojtokayaj (Hechos 4:18). Kemej ipa kichiuayaj, motataujtijkej maj kinpaleuikan. Sayoj ke ¿iuan akoni? “Mosepantatautilijke iuan Dios”, kitajtanilijkej maj kinmaka chikaualis ika ‘itokaytsin ten ikonetsin Jesús ten Yolchipauaktsin’ (Hechos 4:24, 30). Yejuan kichiujkej kemej kiniluijka Jesús: motataujtijkej iuan Dios.

Seki xiujmej satepan, tatitanil Pablo kijkuiloj: “Nachipa tiktasojkamachiliaj Dios ika por namejuan. Uan Totajtsin Dios Yejuatsin ne Itajtsin de Totekotsin Jesucristo” (Colosenses 1:3). Uan akin no kitojtokayaj Jesús kemej yejua kinyolmajxitij maj nochipa kitasojkamatilikan “Totajtsin Dios ika por  nochi ten Yejuatsin namechseliltijtiu ika in chikaualis den tokaytsin Totekotsin Jesucristo” (Efesios 5:20). Okse tonal kiniluij maj kitataujtikan “Totajtsin Dios”, sayoj ke itokaykopa Jesús (Colosenses 3:17).

Ijkon kemej yekinika itatojtokakauan Cristo, moneki timotataujtiskej kemej kijtoj Jesús; ijkon tiknextiaj ke tiktasojtaj (Juan 14:15). Se akin kijkuiloj Biblia kijtoj: “Nejua niktasojta Jiova, porin yejuatsin kikaki notajtol, nonetataujtiluan. Uan nochi tonalmej tein ninemis yejuatsin niknotsas” (Salmo 116:1, 2). Tejuan no uelis ijkon tikijtoskej komo tiktataujtiaj Jiova, uan amo akin okse. *