¿Tionmochiuiliani nejin netajtanilmej? Komo ijkon, amo sayoj tejuatsin. Itech semanauak taltikpak miakej kitemouanij itanankililuan nejon netajtanilmej. ¿Uelis tikajsiskej?

Millones taltikpakneminij kijtoskiaj ke kemaj. ¿Keyej? Porin kiajsikej tanankililmej tein kintaneltoktij itech Biblia. ¿Tikonuelitaskia tikonmatis tein tamachtia? Komo ijkon, xa tikonnekis tikonselis se nemachtil ika Biblia tein amo moixtaua tein kitemakaj itaixpantijkauan Jiova. *

Tein melauj keman moneki momachtiskej Biblia, moajsij akin kijtouaj ke amo kipiaj tiempo, ke semi ouij oso amo kinekij motenkauaskej kichiuaskej teisa. Sayoj ke, moajsij akin kixelouanij tiempo uan ijkon kiitaskej tein kijtoua iTajtol Dios. Yejua nejin tein kijtouanij sekin:

• “Niajki itech tiopamej católicos uan tein amo, itech se taneltokalis tein moixmati kemej sij, se monasterio budista uan hasta nimomachtij Teología itech ueyi kaltamachtiloyan. Sayoj ke amo nikajsik itanankililuan miak netajtanilmej tein nikpiaya. Ompa se itaixpantijkauj Jiova tanotsak nokaltenoj. Nikmoujkaitak maj nechnankiliani ika Biblia, yejua ika nikselij se nemachtil ika Biblia.” (Gill, Inglaterra.)

• “Nikpiaya miak netajtanilmej ika nemilis, sayoj ke tein nechiluiaya akin taixyekanaya itech tiopan kampa nipouia amo nechtaneltoktiaya. Sayoj ke, se itaixpantijkauj Jiova kinankilij netajtanilmej tein nikpiaya sayoj ika Biblia. Keman nechtajtanij ox niknekia nimomachtis okachi, ika miak pakilis nikiluij ke kemaj.” (Koffi, Benín.)

• “Niknekia nikmatis toni kinpanoua akin momikiliaj. Nikneltokaya ke ueliskiaj nechijtakoskej uan nimotajtaniaya toni kijtoua Biblia ika nejon. Yejua ika peuak nimomachtia iTajtol Dios iuan se itaixpantijkauj Jiova akin kuali iuan nimouika.” (José, Brasil.)

• “Peuak nikixtajtoltia Biblia sayoj ke amo nikajsikamatia nion teyi. Se tonal, itaixpantijkauan Jiova ualajkej nokalijtik uan nechmelauilijkej toni kijtosnekiaj miak tajkuilolmej tein kipia Biblia. Nejon kichiuak maj nikneki nikmatis okachi.” (Dennize, México.)

• “Nimotajtaniaya ox melauj kitekipachouaya Dios tein nechpanouaya. Nikixtalij niktataujtis Dios akin ika tajtoua Biblia. Se tonal satepan, nechkalpanojkej itaixpantijkauan Jiova uan peuak nimomachtia Biblia iniuan.” (Anju, Nepal.)

Tein kijtojkej nejin taltikpakneminij mouika ika nejin tajtolmej tein kijtoj Jesús: “Yolpakij akin kimachiliaj ke moneki motokiskej iuan Dios” (Mateo 5:3, TNM). Tinochin tiknekij tiyolpakiskej uan sayoj Dios uelis techixyekanas uan technextilis keniuj uelis tikajsiskej yolpakilis. ¿Keniuj? Ika iTajtol, Biblia.

¿Keniuj uelis tikonmatis tein kijtoua Biblia? ¿Keniuj uelis mitsonpaleuis? Maj tikitakan.