Miakej kineltokaj ke sayoj nenkaj maj se kitataujti Dios, ke amo techkaki. Oksekin iuan motataujtianij sayoj ke kimachiliaj ke amo kinnankilia. Se akin amo kineltoka ke nemi Dios kinemilij keniuj yeskia Dios uan ompa kitataujtij: “Maski sayoj xinechilui teisa ichtakatsin”. Sayoj ke kijtoj ke Dios nion teyi kinankilij.

Sayoj ke, Biblia kiyekijtoua ke Dios kikaki netataujtilmej. Itech iTajtol tikajsij nejin tajtolmej tein kiluijkej se xolal ne uejkauj: “[Dios] mitsnankilis keman tiktataujtis; satepan keman yejuatsin kikakis, yekmelauj mitsnankilis” (Isaías 30:19). Okse tajkuilol kijtoua: “Netataujtil tein kichiuaj akin yolmelaujkej kiyolpaktia” (Proverbios 15:8).

Biblia no ika tajtoua netataujtilmej tein Dios kikakik. Se tajkuilol kijtoua ke Jesús “kitsajtsiliaya Itajtsin ika ne itatautilis uan hasta no ka chokilis. [...] Uan [...,] Totajtsin Dios kikakilij uan kipaleuij Ikonetsin” (Hebreos 5:7). Tikajsij okseki netataujtilmej kemej nejon itech Daniel 9:20, 21 uan 2 Crónicas 7:1.

Sayoj ke, ¿keyej sekin kimachiliaj ke Dios amo kinkaki keman kitataujtiaj? Komo tiknekij maj techkaki Jiova, * Dios akin ika tajtoua Biblia, moneki tiktataujtiskej sayoj yejuatsin. Amo moneki tiktataujtiskej nion okse tiotsin. Uan no, Tachijchiujkej kineki maj tiktajtanikan “tensa ijkon keme yejua in itanejnekilis”, tein kijtosneki teisa tein yejuatsin kiselia. Komo ijkon tikchiuaj, yejuatsin “techkakilia” (1 Juan 5:14). Yejua ika, komo tiknekij maj Dios techkaki, moneki tikixmatiskej uan tiktakamatiskej.

Miakej kineltokaj ke netataujtil amo sayoj se taman tein taneltokalismej tamachtiaj, ta kineltokaj ke Dios yekmelauj kikaki uan kinankilia ininnetataujtiluan. Isaac, akin kayot itech altepet Kenia, kijtoua: “Niktataujtij Dios porin niknekia nikajsikamatis Biblia. Satepan, aksa nouan motokij uan nechmakak nepaleuil tein niknekia”. Hilda, akin nemi itech altepet Filipinas, kinekia kikauas tachichinalis. Miakpa mochikauak kikauas, sayoj ke amo uelik. Yejua ika itakauj kiluij maj kitajtani Dios maj kipaleui. Satepan ke iuan motataujtij, yejua kijtoua: “Nikmoujkaitak keniuj nechpaleuij. Peuak amo niknekiok nitachichinas. Uelik nikauak tachichinalis”.

Komo tein mitsontekipachoua mouika iuan itanejnekilis Dios, ¿kinekis yejuatsin mitsonpaleuis?