Keman kuali titajtouaj iuan aksa okachi kuali timouikaj iuan. Dios techyoleua maj iuan titajtokan uan ijkon kuali iuan timouikaskej. Yejuatsin techiluia: “Namejuan yekmelauj nanechnotsaskej uan nanualaskej uan nanechtataujtiskej, uan nejua yekmelauj namechkakis” (Jeremías 29:12). Ijkon kemej titajtoskej iuan Dios, okachi iuan timotokiskej uan “Yejuatsin no motokis” touan (Santiago 4:8). Biblia kijtoua: “Jiova amo moajsi uejka iniuan nochin akin kinotsaj” (Salmo 145:18). Ijkon kemej okachi tiktataujtiskej, okachi kuali iuan timouikaskej.

Jesús kijtoj: “¿Xe aksa de namejuan uelis nankimaktiliske namokoneu se tet kuak namechtajtanilis xikmakakan taxkal? Pues amo. Uan, ¿xe no aksa de namejuan uelis nankimaktiliske namokoneu se kouat, kuak namechtajtanis xikmakakan tsiktsin pescadojnakat? Pues amo. Porin maski namejuan [...] kuali nankimatokke toni nankimaktiske namokoneuan ten kuali uan den uelik. Pues kachi ok Namoueyitajtsin ten yetika ne eluiyaktsinko namechmaktis nemaktil ten kuali para nochi naken kiyektajtaniske” (Mateo 7:9-11). Kemaj, Dios kineki maj tiktataujtikan porin ‘semi techyolnejneki de techyekpixtinemis’ uan kiyolnejnektok techpaleuis (1 Pedro 5:7). Tein melauj, techyoleua maj iuan timotokikan keman tikpiaj kuejmolmej. Biblia techiluia: “Amo teyika ximoyolkuejmolokan. Ta, nachipa ximoteixpantikan iixpantsinko Totajtsin Dios ika namonetatatautilis uan xiktasojkamachilikan Dios. Uan no xiktajtanilikan Dios nochi ten namechpoloa” (Filipenses 4:6).

Motelmachtianij akin kiitaj keniuj monejnemiltiaj taltikpakneminij, kiitanij ke miakej millones kimachiliaj ke moneki kitataujtiskej Dios. Nejin kichiuaj hasta akin amo kineltokaj ke nemi yejuatsin uan akin amo kimachiliaj ke moneki iuan motokiskej. * Nejin kinextia ke techchijchiujkej kemej tikmachiliskej ke moneki timotokiskej iuan toTachijchiujkauj. Yejua ika, Jesús kijtoj: “Yolpakij akin kimachiliaj ke moneki motokiskej iuan Dios” (Mateo 5:3, TNM). Nejon tikchiuaj keman nochipa tiktataujtiaj Dios.

¿Toni ueliskia panos komo tikseliaj itayoleualis?