Niyolik ompa Paddington, se xolal kampa miakej nemij ompa Londres (Inglaterra). Ninemia iuan nomomaj uan eyi nokniuan siuamej akin okachi uejueykej. Nopopaj semi tauanaya yejua ika kemansa techkauaya.

Keman katka ninojnel, nomomaj nechmachtij maj youak nimotataujti. Nikpiaya se Biblia tsikitsin tein sayoj kipiaya amatajkuilol Salmos uan niknemiliaya tatsotson kemej ueliskia nimokuikatis nejon Salmos. Se tonal nikixtajtoltij teisa itech se amatajkuilol tein semi nikmoujkaitak: “Se tonal amo titanesiskejok”. Nejon tajtolmej amo nechkauayaj maj nikochi; nitanemiliaya itech tein panoskia satepan. Niknemiliaya: “Nemilis amo uelis yeski sayoj nejin. ¿Keyej ninemi?”. ¡Amo niknekia nimikis!

Peuak semi nechyolnotsa tein mouika iuan naualot. Yejua ika, niktemoj nitajtos iniuan akin momikilijkajya uan niyajki kampa kinpachouaj mikemej iniuan akin nimomachtiaya. No nimosentiliaya iniuan uan tikitayaj películas tein temojmoujtiaj. Nochi nejon techmojmoujtiaya sayoj ke no tikuelitayaj.

Keman sayoj nikpiaya majtakti xiuit, amo kuali nimonejnemiltiayaok. Peuak nitachichina uan amo ueliok nikauak. Satepan peuak nikchichina marihuana. Keman nikpiaya 11 xiujmej peuak nitayi tein teuintij uan maski amo nikueliliaya, kemaj nikuelitaya niuintitos. Nechyolpaktiaya tatsotson uan nikuelitaya nimijtotis uan nochipa keman niuelia niyaya iluimej uan kampa moixmati kemej discotecas. Youak niichtakakisaya nochan uan keman yaya tanesitiya ichtaka nikalakia. Mostika semi nisiujtoya uan amo niyaya kaltamachtiloyan. Uan keman niyaya, miakpa nitayaya tein teuintij achto ke peuaskiaj techmachtiskej.

Itech xiuit keman yaya nikisatiya kaltamachtiloyan, amo nikixtij kuali calificaciones. Kemej nomomaj amo kimatia nochi tein nikchiuaya, senkis amo kuali momachilij uan tel kualanik keman kimatik. Timotajtolteuijkej uan ninemito okseko. Seki tonalmej ninemik iuan Tony, akin iuan nimoixmattoya. Yejua tachtekia, kinamakaya drogas uan kitelixmatiaj kemej tateuijkej. Amo uejkauak nimokokoxkatalij uan  keman nikpiaya sayoj 16 xiujmej, nikpiak toyekinika konetsin.

Nikinixmatik itaixpantijkauan Jiova keman ninemia itech se kali kampa moajsij siuamej akin kipiaj ininkoneuan sayoj ke amo kipiaj inintakauj. Ompa ninemia porin nechpaleuijkej tekiuanij. Ome siuamej itaixpantijkauan Jiova nochipa ualayaj kinitakij okseki ichpochmej akin kipiayaj ininkoneuan. Se tonal peuak iniuan nitajtoua porin niknekia niknextis ke nejon siuamej mopolojtoyaj. Sayoj ke, yejuan kinankilijkej nochi netajtanilmej tein nikpiaya ika Biblia uan kichiujkej ika yolseuilis uan ika tajtolmej tein amo ouijkej. Semi nikuelitak maj nechnojnotsanij ika netasojtalis. Yejua ika, peuak nimomachtia Biblia iniuan.

Niman nimomachtij se taman itech Biblia tein kipatak nonemilis. Keman katka ninojnel semi nikmouiliaya nimomikilis, sayoj ke nikmatik ke Jesús kijtoj ke akin momikilijkejya oksepa nemiskej (Juan 5:28, 29). No nimomachtij ke Dios noka motekipachoua (1 Pedro 5:7). Tein kijtoua Jeremías 29:11 ajsik itech noyolo. Ompa kijtoua: “Porin nejua kuali nikixmati tanemililmej tein niknemilijtok namoka, ijkon kijtoua Jiova, tanemililmej ika yolseuilis, uan amo ika tajyouilis, ijkon namechmakas satepan tein kuali uan se nechialis”. Peuak nikneltoka ke ueliskia ninemis nochipaya itech xochital nikan taltikpak (Salmo 37:29).

Itaixpantijkauan Jiova nechnextilijkej ueyi netasojtalis. Keman yekinika niyajki itech semej ininnechikol, nikitak ke semi kualtsin mouikayaj uan kuali moseliayaj. Nochin kinextiayaj tein kuali (Juan 13:34, 35). ¡Itech tiopan amo ijkon nechseliayaj! Itaixpantijkauan Jiova amo nechijijtojkej kemej ninemia. Ta nouan tajtouayaj, nechnextilijkej netasojtalis uan nechpaleuijkej. Nikmachilij ke nipouia iniuan se ueyi kalyetouanij.

Ijkon kemej nimomachtiaya Biblia, nikajsikamatik ke monekia nikpatas nonemilis, ijkon ueliskia nimonejnemiltis kemej kijtoua itanauatiluan Dios. Semi nechouijmakak nikauas tachichinalis. Uan no, nikitak ke seki taman tatsotson kichiuaya maj nikneki nikchichinas marihuana, yejua ika peuak nikaki okse taman tatsotson. Amo niyayaok iluimej nion discotecas, kampa nikmatia ke oksepa ueliskia niknekis nitayis tein teuintij. Uan nikintemoj akin kuali iniuan nimouikaskia akin nechpaleuiskiaj maj kuali nimonejnemilti (Proverbios 13:20).

Itech nejon tonalmej, Tony no momachtijtoya Biblia iniuan itaixpantijkauan Jiova. Ijkon kemej kinankiliayaj ika Biblia netajtanilmej tein kipiaya, kichiuak maj kineltoka ke tein momachtijtoya katka tein melauak. Kipatak miak taman itech inemilis: amo mouikayaok iniuan akin tateuiayaj, amo tachtekiaok uan amo kichichinayaok marihuana. Kemej tiknekiaj tikyolpaktiskej Jiova uan tinemiskej kemej yejuatsin kineki uan maj tokonetsin moskaltiani kampa onkak yolseuilis, timonamiktijkej itech xiuit 1982.

Nikelnamiki ke niktemouaya itech amaix Tanejmachtijkej uan ¡Despertad! * keniuj sekin kipatakej seki taman tein nejua no niknekia nikpatas. Tein kijtojkej semi nechyolchikauaya, nechpaleuiaya maj niksentoka niktemo nimopatas uan maj amo nimosenkaua. Nochipa niktajtaniaya Jiova maj kisentoka nechpaleui. Tony uan nejua timoauijkej kemej itaixpantijkauan Jiova itech metsti julio xiuit 1982.

Kuali nimouikas iuan Jiova nechmakixtiani. Tony uan nejua tikitanij keniuj yejuatsin techpaleuiani keman tikpanouanij ouijkayomej. Timomachtianij titakuaujtamatiskej iuan Jiova keman tikpanouaj ouijkayomej uan nochipa tikitanij ke yejuatsin kinyekpiani tochankauan (Salmo 55:22).

Semi techyolpaktiani tikpaleuiskej tookichpiltsin uan tosiuapiltsin maj kuali mouikakan iuan Jiova. Uan axkan no niyolpaki nikitas ke noixuiuan no kiixmattiyouij yejuatsin.

Amo nimokochijsolouaok nitanemilijtos itech tein ualas satepan oso itech mikilis. Tony uan nejua chijchikueyitika tikalpanouaj se nechikol tein kipiaj itaixpantijkauan Jiova uan tikinyolchikauaj tokniuan. Uan ijkon kemej yejuan, tikinmachtiaj oksekin ke komo takuaujtamatij iuan Jesús, no uelis nemiskej nochipaya.