Keman se siuapiltsin kiitak ke pokti tein kisaya itech se fábrica moitaya kemej mixti tein tamatia kemej algodón, kinemilij ke ompa kichijchiuayaj mixti. Se nepolol tein amo ueyi kemej nejon tein kipia se konetsin uelis hasta teuetskitis. Sayoj ke, moajsij uejueyi nepololmej tein uelis kijtakoskej tonemilis. Kemej ijkuak amo kuali se kiixtajtoltia tein kipia se pajti, uelis senkis teijtakos.

Sayoj ke, okachi teijtakoua keman taman se kiajsikamati tein kijtoua Biblia. Moajsikej akin amo kuali kiajsikamatkej seki taman tein tamachtij Jesús (Juan 6:48-68). Semi tetayokoltij maj amo kinekinij momachtiskej okachi uan maj kiixtopeuanij nochi tein kinmachtij.

¿Tikonixtajtoltia Biblia porin tikonneki maj mitsonyekana? Semi kuali nejon. Sayoj ke ¿tikonmatia ke miakej amo kuali kiajsikamatij seki textos keman kiixtajtoltiaj? Maj tikitakan eyi taman tein miakej amo kuali kiajsikamatij.

• Sekin amo kiyekajsikamatij tanauatil “xikmoujkatoka Dios akin melauak” (Eclesiastés 12:13). Kinemiliaj ke kijtosneki maj se kitelmouili. Sayoj ke Dios amo kineki maj ijkon momachilikan akin kitekitiliaj. Yejuatsin techiluia: “Amo ximoui, porin nejua niyetok mouan. Amo ximotekipacho porin nejua nimoDios. Nejua nimitschikauas, kemaj, nejua nimitspaleuis” (Isaías 41:10). Se kimoujkatokas Dios kijtosneki se kimoujkaitas uan senkis se kipoujkaitas.

• Oksekin amo kuali kiajsikamatij nejin tajtolmej: “Nochi ixyetok tonal keman mochiuas teisa, [...] tonal keman se yoli uan tonal keman se momikilia” (Eclesiastés 3:1, 2). Kiajsikamatij ke Dios kiixtalijya tonal uan hora keman tisejsemej timomikiliskej. Sayoj ke, nejon tajkuilol ika tajtoua se inemilis uan ke tinochin timomikiliskej. ITajtol Dios no kijtoua ke tein tikixejekoskej tikchiuaskej itech tonemilis, uelis kichiuas maj okachi tinemikan oso amo. Kijtoua ke komo tikmoujkatokaj Dios okachi tinemiskej (Proverbios 10:27; Salmo 90:10; Isaías 55:3). ¿Keniuj mochiua nejon? Keman tikpoujkaitaj Dios techyololinia maj tikixtopeuakan tein teijtakoua, kemej tauanalis uan auilnemilis (1 Corintios 6:9, 10).

• Moajsij akin kiajsikamatij tein kijtoua Biblia ijkon kemej senkis ijkuiliujtok kemej ijkuak kijtoua ke iluikak uan taltikpak “kintamichichinos ya”; yejua ika kineltokaj ke Dios kiixpolos semanauak taltikpak (2 Pedro 3:7). Sayoj ke yejuatsin motenkaua ke amo keman kikauas maj ixpoliui taltikpak. Dios “kichijchiuak taltikpak kampa ixyetok, amo keman kiajchiuaskej, nochipa moajsis” (Salmo 104:5; Isaías 45:18). Taltikpak amo kiixpoloskej, ta ixpoliuis nochi tein amo kuali tein mochiujtok noyampa, kemej yeskia kitamichichinoskej. Uan keman ika tajtoua iluikak, kijtosneki tein ueli tikitaj, nochi semanauak uan sitalimej uan kampa nemi Dios. Nion semej nejin poliuis.

Kemej achto tikitakej, sekin amo kuali kiajsikamatij seki tajkuilolmej itech Biblia. ¿Keyej kikauaskia Dios maj pano nejon? Aksa ueliskia kinemilis: “Komo Dios kimati nochi uan yejuatsin akin okachi tel tamatkej, ¿keyej amo kichijchiuak Biblia kemej nochin ueliskiaj kiajsikamatiskej?”. Maj tikitakan eyi taman tein kichiua maj amo kuali kiajsikamatikan nejin amatajkuilol.

1. Biblia mochijchiuak kemej kiajsikamatiskej akin yolyemankej uan kinekij momachtiskej. Jesucristo kiluij iPopaj: “Nimitsonueyimouistilia, Notajtsin Dios, tion Tekotsin den eluiyaktsinko uan nikan taltikpak. Porin Tejuatsin tikintatilij ya nijin taixmatilis para ma amo kimatikan in taixmatini uan in tamachilejke. Uan Tejuatsin  tikinnextilij ya [...] ten yoltanemilijtinemij keme koneme ten ayamo yolmajsij” (Lucas 10:21). Biblia moijkuiloj kemej sayoj ueliskiaj kiajsikamatiskej akin kipiaj se kuali tanemilil. “Taixmatini uan in tamachilejke” akin moueyinekij, miakpa amo kuali kiajsikamatij. Sayoj ke akin kiixtajtoltiaj ika se kuali tanemilil uan kinekij momachtiskej “keme koneme ten ayamo yolmajsij”, kipiaj tatiochiualis okachi kuali kiajsikamatiskej tein kijtoua Dios. Senkis tikmatij ke Dios tel kuali kemej kichijchiuak Biblia.

2. Biblia kinijkuilouilijkej akin kiyolnejnekij maj Dios kinpaleui maj kiajsikamatikan. Jesús kijtoj ke akin kinekiskia kuali kiajsikamatis itamachtilisuan monekiskia maj kipaleuikan. Sayoj ke ¿keniuj kipaleuiskiaj? Jesús kimelauak: “In Yektikatsin Espíritu ika in chikaualis de notokaytsin [...] namechyeknextilijtiyas de notanauatiluan” (Juan 14:26). Kemej tikitaj, Dios kikui iespíritu, tein kijtosneki ichikaualis uan ika kinpaleuia taltikpakneminij maj kiajsikamatikan tein kijtoua Biblia. Sayoj ke, amo kinmaka iespíritu akin amo takuaujtamatij itech inepaleuil, yejua ika kinouijmaka kiajsikamatiskej Biblia. Iespíritu Dios no kichiua maj itatojtokakauan Cristo akin kipiaj okachi taixmatilis kinpaleuikan akin kinekij okachi kiajsikamatiskej tein kijtoua Biblia (Hechos 8:26-35).

3. Seki tajkuilolmej moajsikamatij sayoj hasta keman Dios kiixtalia. Tanauatijkej Daniel kiluijkej maj kijkuilo seki tajtolmej tein moajsikamatiskia satepan. Se ángel kiluij: “Daniel, xikeua nejin tajtolmej uan xiktsakua amaix hasta itech tonalmej keman ejkos tamilis”. Ijkon kemej panouanij xiujmej, miakej kiixtajtoltianij amatajkuilol Daniel, sayoj ke amo kiajsikamatinij. Nion Daniel kiajsikamatik tein kijkuiloj uan ika yolyemanilis kijtoj: “Nikakik, sayoj ke amo uelik nikajsikamatik”. Ejkoskia tonal keman moajsikamatiskia nejon tein achto Dios kijtojka, sayoj ke yeskia ijkuak Dios kiixtaliskia. Ángel kimelauilij: “Xiksentoka Daniel, porin nejin tajtolmej moeuaj uan motsakuaj hasta itech tonalmej keman ejkos tamilis”. ¿Akonimej kiajsikamatiskiaj? “Nion se akin amo yolkuali kiajsikamatis; sayoj ke akin kipiaskej tamatilis kiajsikamatiskej.” (Daniel 12:4, 8-10.) Kemej tikitaj, Dios amo kitematiltia tein kijtosneki seki tajkuilolmej hasta keman ejko tonal ijkuak kiixtalia.

¿Kemansa amo kuali tikajsikamatinij tiitaixpantijkauan Jiova tein kijtoua Biblia porin ayamo ajsia tonal tein Dios kiixtalijka? Kemaj. Sayoj ke ijkuak ajsik tonal tein Dios kiixtalij keman monekia moajsikamatis seki tamachtilismej, niman tikyektalijkej. Tikneltokaj ke ijkon tikchiuaj kemej kichiujkej imomachtijkauan Jesús, akin amo moueyinekkej uan kipatakej tein kinemiliayaj keman Jesús kinpaleuij maj kiitakan ke mopolojtoyaj (Hechos 1:6, 7).

Tein melauj, amo ueyi nepolol maj nejon siuapiltsin kinemiliani ke mixti mochijchiua itech fábrica. Sayoj ke, tein tamachtia Biblia uelis semi techpaleuis. Tein kijtoua motelneki uan amo uelis tiktemoskej tikajsikamatiskej toselti. Yejua ika timitsonyoleuaj xikontemo maj mitsonpaleuikan xikonajsikamati tein tikonixtajtoltia. Xikontemo akin momachtiaj Biblia ika yolyemanilis akin takuaujtamatij ke Dios kinpaleuia ika iespíritu maj kiajsikamatikan iTajtol uan senkis kineltokaj ke tinemij itech tonalmej keman Dios kineki maj tikajsikamatikan tein kijtoua Biblia. Komo tikonneki, xiontajto iniuan itaixpantijkauan Jiova oso xikonixtajtolti tamachtilis tein kitemouanij ika nejmachkayot, tein moajsi itech jw.org, Internet kampa moteixmatiltiaj. Biblia kijtoua: “Komo titajtani taajsikamatilis [...,] tikajsis taixmatilis tein Dios kitemaka” (Proverbios 2:3-5).