Biblia achto kijtojka ke itech totonaluan moteuiskiaj uejueyi altepemej, miakkan taloliniskia, mochiuaskiaj uejueyi kokolismej uan okseki taman “tein amo keman moitstoya” (Lucas 21:10, 11). Itech xiujtekit 2022 a tikitakej ke tein achto moijtoj kisentoka mochiujtok hasta axkan, miakej millones kinijtakoj ueyi neteuilis ompa Ucrania. No ueyi kokolis COVID-19 semi taijtakoj itech miak altepemej. Uan miakej tajyouijkej porin talolinik ompa Haití uan tetsaujkaejekak tein taijtakoj ompa Centroamérica, Filipinas uan sureste ompa África. ¿Keniuj tapaleuijkej itaixpantijkauan Jehová?

 Itech xiuit 2022, inechikol Jehová tapaleuij itech 200 tataman tetsaujmej tein mochiujkej. Kemej 12 millones de dólares motekitiltij tein ika tapaleuijkej. b Maj tikitakan keniuj mokuik nepaleuil itech ome altepemej.

 Itech 14 de agosto xiuit 2021, itech sur de Haití semi chikauak talolinik. Ome tokniuan siuamej uan se tokniuj takat momikilijkej, sekin kinkojkokoj uan nochi nejon kichiuak maj amo kuali momachilianij. Stephane se itaixpantijkauj Jehová kijtoj: “Miakej momikilijkej, mojmostaj kemej ome metsti miakej kintokayaj”. Éliézer okse itaixpantijkauj Jehová kijtoua: “Miakej itaixpantijkauan Jehová kipolojkej ininchan, amo kipiayaok tilmaj, zapatos uan okseki taman. Uan no, kemej kisentokaya talolinia, miakej nenkej ika moujkayot miak metsti”.

 Inechikol Jehová niman peuak tapaleuia. Sucursal tein kiixyekana tekit ompa Haití peuak kixeloua takenkalmej, lonas, colchones, cargadores solares para teléfonos uan miak takual panoua 53 toneladas. No kinyekchijchiujkej panoua 100 kalmej uan nochi tein mokuik, ika motapaleuij panoua se millón de dólares.

 Tokniuan semi motasojkamatij. Lorette kijtoua: “Keman talolinik, ixpoliuik tochan uan kampa titekitiaj. Nion tikpiayaj toni tikuaskej. Sayoj ke, inechikol Jehová nochipa techpaleuij keman monekia”. Micheline kijtoua: “Nejua uan ome nokoneuan tinemiaj itech se kaltsin, keman talolinik semi kijtakoj. Sayoj uelia nimotataujtiaya uan Jehová. Nechpaleuij ika inechikol, ika ininnepaleuil tokniuan, axkan tikpiaj se kali tein okachi kuali. Jehová semi nechpaleuiani, uan mojmostaj nikneki niknextilis ke niktasojkamati”.

 Tekiuanij kiitaj keniuj titapaleuiaj. Se akin taixyekana itech municipio ompa L’Asile kijtoua: “Nikneki namechiluis ke kuali tein nankichiuaj, porin niman nantapaleuikoj. Uan amo sayoj nejon, ta nochipa nankinpoujkaitaj tekiuanij akin taixyekanaj. Semi nanmotekipachouaj ininka oksekin uan amo tomin. Moita ke nankichiuaj porin nanmotasojtaj”.

 Itech 24 de enero xiuit 2022, tetsaujkaejekat Ana ajsik ompa Mozambique uan satepan hasta Malaui. Nejin tetsaujkaejekat kichiuak maj chikauak kioui uan maj chikauak taejeka hasta 100 kilómetros por hora. No kichiuak maj amo onka luz, kinuejueloj puentes uan semi taapexonik.

 Panoua 30,000 itaixpantijkauan Jehová akin semi kinijtakoj tetsaujkaejekat ompa Malaui uan Mozambique. Charles, se tokniuj akin tapaleuij, kijtoj: “Semi nechtayokoltij nikitas keniuj tajyouiayaj tokniuan uan nochi tein kipolojkaj”. No tepitsin takual tein kieujtoyaj uan tatokmej tein kipiayaj, tetsaujkaejekat kichiuak maj kipolokan. Miakej kipolojkej ininchan. Se tokniuj, inamik momikilij uan no ome isiuapipiluan porin keman yayaj kinpaleuitij, lancha moixkepak uan atojtolojkej.

 Chikauak tetsaujkaejekak. A la una de youak, ompa Nchalo, Malaui, ichankauan Sengeredo kikakkej ke at chikauak motokiaya ompa ininchan. Porin ome uejueyi amej motapojkej ika tetsaujkaejekak. Tokniuj Sengeredo kiniluij ichankauan ke monekia kisaskej de ininchan. Semi kuali maj kisanij porin amo uejkauak at kitamotak ininchan, uan nochi tein kipiayaj poliuik oso kiuikak at. Tokniuan yajkej mokauatoj itech kali kampa titaueyichiuaj, tein moajsia 30 minutos, sayoj ke, uejkaujkej ome hora para uelik ajsikej. Maski semi sioujtiayaj uan apaliujkej kuali moajsiaj.

 Sucursales ompa Malaui uan Mozambique niman peuak tapaleuiaj. Tokniuan akin takalpanouaj itech nechikolmej uan tayekananij kiniluijkej maj kinitakan sejsemej kalyetouanij toni kinpolouaya uan maj kinyolchikauanij. Moixtalijkej miakej tokniuan akin kiixyekanaskiaj tekit keman panoua se tetsauit, uan ika ininnepaleuil, tokniuan niman kiselijkej takual uan okseki taman. Mokuik panoua 33,000 dólares tein ika motemakak nepaleuil uan panoua 300,000 dólares para moyektaliskiaj uan mochijchiuaskiaj yankuikej kalmej.

 Tokniuan akin kiixyekanaj tekit keman panoua se tetsauit, kuali kitekitiltijkej tomin, nejon semi tapaleuij porin tapatiyouak. Yekinika chikome metsti desde keman peuak tapaleuiaj tokniuan, harina tein semi monamaka ompa Malaui semi patiyouak uan gasolina no pankisak. Tokniuan kuali kitekitiltijkej tomin, yejuan kinnojnotsatoj tanamakanij ompa Malaui para kinkouiliskej miak takual, ijkon amo miak taxtauaskiaj uan amo no miak moixtauaskia tein ika moxejxeloskia takual.

 Ika nochi nejin, tokniuan semi motasojkamatij. Felisberto, se tokniuj akin nemi Mozambique, kijtoua: “Amo keman nikitstoya se nechikol maj semi kualtakat, tetayokoliaj tein moneki para se kichijchiuas se ichan, tepaleuiaj para se yas kampa monekis, kintaliaj akin tekitiskej, tepaleuiaj ika takual uan teiluiaj toni moneki se kichiuas. Nejin kinextia ke tetasojtaj ijkon kemej Jesús kijtoj itech Juan 13:34, 35”. Ester, se tokniuj akin momikilij itakatsin akin nemi Malaui uan no kipoloj ichan, kijtoua: “Amo nikmatiok toni nikchiuas. Amo nikpiaya tomin para nikchijchiuas se kali, yejua ika, keman tokniuan ualajkej uan kichijchiujkej se kali para maj ompa ninemi, nimomachilij kemej yeskia nietoskiaya ompa itech xochital”.

 Tetsaujmej kisentokaskej uan tamiskej hasta keman timoajsiskej itech xochital (Mateo 24:7, 8). Sayoj ke, ika tomin tein nankitemakaj, tikmatij ke itech inechikol Jehová nochipa tikonselis nepaleuil keman monekis. Itech donate.pr418.com nankiitaskej keniuj uelis nankitemakaskej namonepaleuil. ¡Miak tasojkamatik porin nantapaleuiaj!