Jehová kineki maj nochin kiixmatikan uan maj kimatikan tein kichiuas keman taixyekantos, maski amo uelij tajtouaj, nion uelij takakij (1 Timoteo 2:3, 4). Yejua ika, itaixpantijkauan Jehová kikixtiaj Biblias uan okseki taman tein tapaleuia maj miakej momachtikan Biblia uan nejon no kinpaleuia akin amo uelij takakij. Inechikol Jehová kikixtiani ika video a miak amaixmej itech panoua 100 tataman tajtolmej ika señas. ¿Keniuj mochijchiuaj uan motemakaj? ¿Toni okachi mochiuani?

 Noyampa taltikpak moajsij akin tajtolkepaj tataman tajtolmej ika señas. Keman kitajtolkepaj se amaix, achto kuali kiitaj toni ika tajtoua. Ompa, kiitaj keniuj okachi kuali kiteajsikamatiltiskej tamachtilis itech tajtol señas. Satepan, kichiuaj grabación ika video. Axkan, moajsij 60 oloch tajtolkepanij akin kitajtolkepaj amaixmej tein tapaleuia maj se momachti ika Biblia. Uan okseki 40 tapaleuiaj sayoj seki tonalmej.

 Achto, katka semi patiyoj se kinchijchiuas videos ika señas. Cámaras uan okseki taman tein kikuiaj katka okachi patiyoj ke axkan. Uan no, videos tikinchijchiuayaj itech se kali tein tejuan tikchijchiuayaj, oso kemansa monekia tikyekchijchiuaskej se kali. Para maj takepanij itech tajtol señas kipianij nochi tein mokui, monekia moixtauas 30,000 dólares b.

 Para kuali mokuis tomin tein motemaka, inechikol Jehová kitemouani okseki taman kemej uelis kitajtolkepas amaixmej uan maj amo mokui miak tomin. Yejua ika, mokuitok seki taman tein okachi yankuik, tein amo patiyoj uan tein okachi tapaleuia. Uan amo monekijok kalmej kampa mochiuas grabación. Sejse oloch takepanij uelis kitaliskej teisa tein xoxoktik itech ininoficina uan ompa uelis kichiuaskej grabación. Keman itech se video moitaj miakej tokniuan, sejse ueli kichiua grabación itech ioficina oso desde ichan.

 Uan no, mochijchiuani programas itech computadora tein kinpaleuis tajtolkepanij maj kichiuakan inintekiuj. Nejon tapaleuia maj okachi amo uejkauakan keman kichiuaskej se tekit. Tokniuan kitasojkamatij kipiaskej nochi nejin. Se tokniuj akin motokaytia Alexander kijtoua: “Semi niyolpaki porin axkan okachi mokixtiaj amaixmej itech tajtol señas, amo kemej achto, mojmostaj nikita videos”.

 Axkan amo panoua 5,000 dolares tein mokui para kikouaskej tein moneki para tajtolkepaskej. Nejin tapaleuia para maj mochijchiuakan okachi videos itech okachi tajtolmej ika señas.

 Satepan ke se amaix kisa itech grabación, moneki kintitaniliskej akin kikuiskej. Miak xiujmej achto, grabación tein mochiuaya kititaniaj kampa ueliskia kikixtiskej itech videocinta uan DVD uan satepan kintitaniliayaj nechikolmej. Sayoj ke, semi uejkauayaj kichiuaskej nochi nejin tekit uan monekia miak tomin. Sayoj itech xiuit 2013 moixtauak panoua 2,000,000 de dolares para kikixtiskej miak DVD itech tajtol señas.

 Akin amo uelij takakij semi yolpakiaj kipiaskej nejin videos, sayoj ke kemansa katka ouij kikuiskej uan okachiok keman momiakiliayaj DVD. Kemansa, sayoj se amatajkuilol tein kipia Biblia ueliskia kikuis miak DVD. Se tokniuj akin kayot Brasil akin itokay Gilnei kijtoua: “Keman tiknekiaj tiknextiskej se texto, monekia tiktemoskej itech katiyejua videocinta yetoya, uan ompa tiktemoskej versículo, semi ouij katka”. Se tokniuj siuat akin monotsa Rafayane, akin kikuia DVD itech tajtol señas, kijtoua: “Semi nisiouia keman nimomachtiaya, porin semi niuejkauaya keman niktemouaya textos itech Biblia uan okseki tamachtilismej”. Uan keman tokniuan yayaj tanojnotsatij, monekia kiuikaskej DVD uan videocintas, para kitaliskej itech inintelevisión akin kinekiaj kimatiskej okachi. Sekin hasta kiuikayaj tein ika kitaliskej DVD. Satepan, peuak kinamakaj teposmej tein uelia kinextiaya video, nejin semi kinpaleuiaya tokniuan maj tanojnotsakan. Bobby akin kayot Estados Unidos, kijtoua: “Komo tiknekiaj tiknextiskej se texto, uan satepan okse, miakpa monekia tikpataskej DVD. Kemej semi tiuejkauayaj, ouij techkisaya tikuiskej Biblia keman titanojnotsayaj”

 Itech xiuit 2013, inechikol Jehová kikixtij aplicación JW Library Sign Language, kampa tokniuan ueli kitemouiaj uan kiitaj videos ika tajtol señas itech inincelular oso tableta. Achto sayoj yetoya itech tajtol señas americano. Sayoj ke itech xiuit 2017 kiyektalijkej para maj ueli kikuikan nochin akin tajtouaj ika señas. Tokniuan semi yolpakiaj. Se tokniuj akin kayot Brasil uan monotsa Juscelino, kijtoua: “Amo uelia nikneltokaya. Tokniuan Oloch Taojtokaltianij semi techtasojtaj akin amo tiuelij titakakij, uan kinekij maj tiktekitilikan Dios ijkon kemej kichiuaj akin uelij takakij. Keman kisak JW Library semi niyolpakik uan okachi niknekia nimomachtis Biblia”.

 Axkan tikinchijchiuaj videos itech tajtol señas uan tikinpankixtiaj itech Jw.org uan itech JW Library Sign Language. Nejin tapaleuia maj amo uejkauakan miak metsti oso hasta xiujmej, ta sayoj itech seki tonalmej kintajtolkepaj, kichiuaj grabación uan kinpankixtiaj. Uan no, miakej amaixmej ika señas no mokixtiaj keman mokixtiaj itech okseki tajtolmej.

 Xikonita tein techtapouiaj seki tokniuan akin amo uelij takakij. Se tokniuj siuat akin monotsa Klízia, kijtoua: “¿Katiyejua nechikol semi ininka motekipachoua akin amo uelij takakij para maj kuali mouikakan iuan Dios? Nion akin kichiua nejon, ta sayoj inechikol Jehová”. Uan Vladimir kijtoua: “Videos kinextiaj ke Jehová semi kintasojta akin amo uelij takakij, ijkon kemej kintasojta akin uelij takakij”.

 Miak videos tein kisaj ika señas kipiaj nejin tajtolmej: “Nejin amaix tein momoyaua, tapaleuia itech tamachtilis ika Biblia tein motemaka semanauak taltikpak, uan mochijchiua ika tomin tein taltikpakneminij kitemakaj ika nochi ininyolo”. Semi tiktasojkamatij porin nantapaleuiaj ika namotomin uan nankitemakaj itech donate.pr418.com. Nejin tomin tapaleuia maj mochijchiuakan Biblias, uan tein kinpaleuis nochin maj momachtikan Biblia, hasta akin tajtouaj ika señas.