Xijxiujtika tel miakej moauiaj, uan moneki okachi kalmej kampa titaueyichiuaskej. Yejua ika tokniuan akin tekitij itech departamentos locales de Diseño y Construcción kiixtalijkej kichijchiuaskej uan kiyekchijchiuaskej panoua 2,700 kalmej itech nochi xiujtekit 2020. a

 Semi tetayokoltij porin kokolis COVID-19 kichiuak maj motsakuilikan nejin tekimej. Tokniuan akin kiixyekanaj tein moamakixtia akin tekitij iniuan Oloch Taojtokaltianij, kitsakuilijkej nejin tekimej para maj tokniuan amo momauakan uan no para kitakamatiskej tein kiixtalianij tekiuanij. Sayoj ke itech xiujtekit 2020 uelik kinchijchiujkej uan kinyekchijchiujkej panoua 1,700 kalmej kampa titaueyichiuaj achto ke peuaskia kokolis COVID-19. Uan no, kitamichiujkej panoua 100 tekimej tein ixyetoya mochiuas itech sucursales. Maj tikitakan ome taman tein mochiuak uan keniuj kinpaleuiani tokniuan nejon tekimej.

 Sucursal ompa Camerún. Sucursal tein achto yetoya ompa Duala, amo semi ueyi katka uan kipolouaya miak taman. Tokniuan akin kiixyekanaj tein moamakixtia, kinemiliayaj maj moyekchijchiua nejon sucursal, sayoj ke kiitakej ke okachi patiyoj yeskia. No kinemiliayaj kikouaskej se tal okseko uan kichijchiuaskej se sucursal oso kikouaskej se ueyi kali uan kiyekchijchiuaskej.

 Sayoj ke tokniuan kimatkej ke tekiuanij kiixtalijtoyaj kichijchiuaskej se ojti tein panoskia kampa ika norte ompa Duala, ompaka no yetok se Kali kampa mochiuaj uejueyi nechikolmej. Nejon ojti tapaleuiskia maj ijsiujka se ajsi sucursal uan maj kipia nochi tein moneki, yejua nejon tein kitemojtoyaj. Yejua ika, tokniuan Oloch Taojtokaltianij, kijtojkej ke ueliskia mochijchiuas se sucursal itech tal kampa yetok Kali kampa mochiuaj uejueyi nechikolmej.

 Tokniuan monekik kitemoskej akin kalchijchiuaj para ueliskia kichiuaskej seki taman tekimej, nejon tapaleuij maj ijsiujka mochiua tekit uan maj amo mokui miak tomin. Tomin tein kiixtalijtoyaj para nejin tekit amo motamikuik: mokauak panoua ome millones de dólares. Tokniuan akin tekitij Betel, yajkej itech yankuik sucursal achto ke peuaskia ueyi kokolis COVID-19.

 Axkan tokniuan betelitas ompa Camerún okachi kuali nemij uan tekitij, uan yankuik sucursal kiitaj kemej se inetetayokolil Jehová. Se namikuanij kijtouaj: “Axkan okachi tiknekij titekitiskej uan semi tikpatiuitaj nejin kali”.

 Kali kampa tajtolkepaj itech tajtol tojolabal (México). Miak xiujmej akin kitajtolkepaj amaixmej itech tajtol tojolabal, tekitikej itech sucursal de Centroamérica tein amo uejka moajsi de México. Sayoj ke nejin tajtol okachi motajtoua itech xolal Altamirano uan Las Margaritas, tein moajsi kemej 1,000 kilómetros de kampa yetok sucursal. Nejin amo semi kinpaleuiaya akin tajtolkepaj porin amo mojmostaj kikakiaj inintajtol. Uan akin tekitij Betel, ouij kinajsiskiaj tokniuan akin tajtouaj tojolabal tein amo uejka nemiaj para maj tajtolkepakan, uan maj kichiuakan grabación.

 Yejua ika, tokniuan akin kiixyekanaj tein moijkuiloua uan tekitij iniuan Oloch Taojtokaltianij, kiixtalijkej maj tajtolkepanij nemitij kampa motajtoua tojolabal. Yejua ika, tokniuan akin tekitij sucursal kikoujkej se kali uan kiyekchijchiujkej. Nejin okachi amo patiyoj kisak ke kichijchiuaskej se kali oso taxtaujtoskiaj mejmetstika.

 Se akin tajtolkepa tojolabal techtapouia keniuj momachilia: “Niyetoya majtakti xiuit itech sucursal, sayoj ke ompaka amo keman nikinajsik akin no tajtouaj notajtol. Axkan, kali kampa titajtolkepaj moajsi kampa motajtoua tojolabal. Mojmostaj ueli nitajtoua iniuan akin no tajtouaj kemej nejua. Nejin semi nechpaleuia maj nikmati yankuik tajtolmej tein mokuij uan maj okachi kuali nitajtolkepa”.

 Itech xiujtekit 2021, komo ueli, tikixtalijtokej tikchijchiuaskej 75 kalmej kampa tajtolkepaskej uan kampa kitemakaskej tataman tamachtilismej ika Biblia. No, mochiuaskej chikueyi tekimej itech tataman sucursales, uan semej nejin tekimej mochiuas ompa Rámapo (Nueva York) uan sucursales tein moajsij Argentina uan Italia kinajchiuaskej. Uan no, moneki maj kinchijchiuakan panoua 1,000 Kalmej kampa tiMosentiliaj, uan panoua 6,000 kalmej amo yekkualtiaj uan moneki maj kinixpatakan uan okseki 4,000 Kalmej kampa tiMosentiliaj moneki maj kinyekchijchiuakan.

 ¿Keniuj moixtaua nochi nejin tekimej? Tokniuj Lázaro González, akin poui iniuan tokniuan akin taixyekanaj itech Sucursal de Centroamérica, kinankilia nejin netajtanil keman ika tajtoj kali kampa tajtolkepaj tojolabales, yejua kijtoua: “Miak xolalmej tein pouij kampa taixyekana sucursal de Centroamérica, tokniuan amo kipiaj miak taman. Komo amo tapaleuiskiaj tokniuan akin moajsij itech nochi taltikpak, amo ueliskia tikinchijchiuaskej kalmej kampa tajtolkepaskej tokniuan akin tajtouaj tataman tajtolmej. Tomin tein nankitemakaj tapaleuia maj tikinuikakan akin tajtolkepaj kampa motajtoua inintajtol. Tamechtasojkamatiliaj nannochin porin nankitemakaj namotomin ika nochi namoyolo”. ¿Tikonitak? Nochi nejin tekimej ueli mochiuaj porin nantapaleuiaj ika tomin para maj mosentoka motanojnotsa. Uan nankitemakaj itech donate.pr418.com.