Jesús kiniluij imomachtijkauan: “Nanyeskij nanotaixpantijkauan [...] hasta kampa okachi uejka itech taltikpak” (Hechos 1:8, TNM). Axkan itaixpantijkauan Jiova kichiujtokej nejin tekit ika yolpakilis. Sayoj ke miakkan, uan hasta itech altepemej kampa semi miakej nemij, amo kintapouianij iTajtol Dios. Uan itech seki altepemej amo moajsij miakej itaixpantijkauan Jiova (Mateo 9:37, 38). ¿Keniuj tiktemojtokej maj kintapouikan iTajtol Dios okachi miakej taltikpakneminij?

 Tiktemojtokej tikchiuaskej tein Jesús tanauatij, yejua ika Oloch Taojtokaltianij itechkopa Tokniuan akin Kiitaj tein Mouika ika Tanojnotsalis kintitanij misioneros maj tapaleuitij kampa okachi moneki. Axkan, moajsij 3,090 misioneros noyampa taltikpak. a Miakej kiselianij Tamachtilis tein Kiseliaj akin Kiteixmatiltiaj iTekiuajyo Dios oso okseki tamachtilis. Nejin misioneros ika miak pakilis kikauaj ininchan uan youij itech okse altepet. Kemej nejin misioneros kiselianij tataman tamachtilis, yekyolmajsitokej uan kimatij kichiuaskej tekit, yejua ika tapaleuiaj maj moteixmatilti iTajtol Dios uan kinkauiliaj se kuali neskayot tokniuan akin yankuikej.

 Itech sejse sucursal, Kampa kiitaj tein mouika ika Tanojnotsalis itechkopa Kampa Kinitaj akin Tanojnotsaj miak Tonalmej tekitij iniuan akin taixyekanaj itech sucursal uan ijkon kiitaj tein kinpoloua misioneros, kemej kani mokalotiskej oso mokauaskej, tapajtilis uan tepitsin tomin tein ika moixpanoltiskej. Itech xiujtekit 2020, mokuik ajsitokya 27 millones de dolares tein ika kinyekpiakej misioneros. Ika nejin nepaleuil, yejuan ueli senkis motemakaj tanojnotsaskej uan kinyolchikauaj tokniuan itech nechikol kampa tapaleuiaj.

 ¿Keniuj nejin misioneros tapaleuiaj itech tanojnotsalis? Frank Madsen, semej akin taixyekana itech sucursal ompa Malawi kijtoua: “Nejin misioneros yolchikaujkej uan akin kichiuaj se kuali tekit, tapaleuijtokej kampa ouij se tanojnotsas, kemej itech xolalmej kampa tatsaktok oso kampa nemij akin tajtouaj okseki tajtolmej. Uan kemej mochikauaj momachtiskej tajtol uan kitemouaj kiajsikamatiskej kemej nemij, kikauaj se kuali neskayot uan nejon kinyolchikaua telpochmej maj kipeualtikan tekit kemej precursor. Tiktasojkamatiliaj Jiova maj kinualtitanini misioneros”.

 Se akin taixyekana itech se sucursal itech okse altepet kijtoj: “Ika inintekiuj misioneros moyeknextia ke itekitikauan Jiova noyampa taltikpak amo xexeliujtokej. Hasta akin amo itaixpantijkauan Jiova kiitaj ke amo tixexeliujtokej maski seseko tikayomej. Tein Biblia tamachtia techpaleuia maj timosenpaleuikan kemej iknimej”.

 ¿Keniuj misioneros kinpaleuiaj tokniuan itech nechikol? Paulo, akin kayot Timor Oriental, kitasojkamati maj yetokan misioneros itech inechikol. Kijtoua: “Nikan semi momachilia totonik. Maski misioneros ualeuaj kampa semi taseseya, amo kikauaj maj totonik kintsakuili. Nochipa yetokej itech nechikol tein tikpiaj achto ke titanojnotsatiuij. Nikinitani nepantaj keman okachi tona oso tiotakpa ke kinkalpanotij akin kinekij kimatiskej okachi. Semi miakej kinpaleuijtokej maj momachtikan iTajtol Dios ijkon kemej nejua. Senkis motemakaj kitekitiliskej Jiova uan nejon neskayot kinpaleuia nochi tokniuan maj okachi kitekitilikan Dios.

 Ketti, se precursora regular akin kayot Malaui, kijtoua keniuj ome misioneros namikuanij kipaleuijkej ichankauan: “Keman ejkokej ome misioneros namikuanij itech tonechikol, nochankauan amo katkaj itaixpantijkauan Jiova, sayoj nejua. Yejuan semi nechpaleuijkej nejin namikuanij uan kuali mouikakej iniuan nochankauan. Ininneskayo kinpaleui nokoneuan maj kiitakan ke semi kualtsin uan semi teualkuilia yolpakilis se kitekitilis Jiova. Nejon tein kuali tein kichiuanij misioneros, kinolinij eyi noichpochuan maj peuakan tekitikan kemej precursores regulares uan notakatsin peujtokya monechikoua”.

 ¿Keniuj moixtaua tein kinpoloua misioneros? Ika tomin tein ika mochiua itekiyo Dios noyampa taltikpak. Seki nejin nepaleuil ueli motemaka itech donate.pr418.com. Semi tiktasojkamatij namonepaleuil ika tomin.