Amaix The Watch Tower (La Torre del Vigía) 1 de junio de 1912 kijtoj: “Xa miakej akin kiixtajtoltiaj toamaixuan kinixmatij akin amo tachiaj”. Nejin amaix no kijtoj: “Moajsij amaixmej tein ueli kiixtajtoltiaj akin amo tachiaj. [….] Nejin amaixmej mochijchiuaj kemej uelis kiixtajtoltiskej akin amo tachiaj. Miakej akin amo tachiaj semi kitasojkamatij kimatiskej ke amo uejkaua kualtsin tinemiskej itech yankuik taltikpak”.

 Keman moijkuiloj nejin tajtolmej, tataman tajkuilol ika braille mokuia itech altepemej kampa motajtoua inglés. Sayoj ke itaixpantijkauan Jiova kichijchiujtoyajya amaixmej ika braille tein katka puntitos tein ixpajpankistoyaj. Uan ijkon mosentoka hasta axkan. Nejin amaixmej ika braille mochijchiua itech panoua 50 tataman tajtolmej. ¿Keniuj mochijchiua?

 Achto, moijkuiloua tamachtilis kemej kisas ika braille. ¿Ika toni moijkuiloua? Michael Millen, akin tekiti Servicios de Procesamiento de Texto ompa Patterson (Nueva York), kimelaua: “Achto tikixtauayaj se taman programa tein ika tikijkuilouayaj tein nesis ika braille, sayoj ke amo uelia tikijkuilouayaj itech nochi tataman tajtolmej tein monekiskia. Axkan tikuij Watchtower Translation System, uan ika nejin kemaj ueli tikijkuilouaj tein nesis ika braille itech miak tataman tajtolmej. Niknemilia ke amo akin kipia se taman kemej nejon”.

 Itech nejin amaixmej no momelaua tein moita itech taixkopimej. Kemej neskayot, taixkopin tein kiualkui ipanko amaix ¡Uelis tiyolpakiskej nochipaya! momelaua ijkon: “Se takat nejnentok itech se ojti tein chijchikoltik kemej kouat, tepitsin tepeyoj uan semi taxoxouixtok”. Jamshed, se tokniuj tapaleuijkej uan precursor akin amo tachia, kijtoua: “Semi nechpaleuia maj momelaua taixkopin”.

 Satepan, tiktitanij archivos itech sucursales kampa yetokej teposmej tein kichijchiuaj amaixmej ika braille. Mokui tilauak amat tein amo tsayani keman tepos kiixchijchiuilia puntitos tein ixpajpankistokej uan amo pojpoliui puntitos keman kimaixtajtoltiaj. Satepan, kintekpanaj amamej kemej se amaix, kinijtsomaj inakastan uan kintitanij itech nechikolmej kampa tajtaninij, oso kintitaniliaj akin amo tachiaj kemej se netetayokolil, komo correo postal kichiua nejon tekit. Uan keman moneki, amaixmej tein mokui itech nechikolmej, kitemouaj keniuj ajsitiuetsis ininmako tokniuan akin amo tachiaj oso amo yektachiaj.

 Nochi nejin tein mochiua kiuika tiempo uan tomin. Kemej neskayot, ompa Wallkill (Nueva York), tiempo tein kinuikilia kichijchiuaskej ome Biblias ika braille, itech nejon tiempo mochijchiua 50,000 tein ipa Biblias. Uan no, sayoj se Biblia inglés ika braille grado 2 kipia 25 amaixmej. a Para mochijchiuaskej nejin Biblias moneki 123 okachi tomin ke tein moneki para mochijchiuaskej tein ipa Biblias. Sayoj ipankakaujyo se Biblia ika braille tein kipia 25 amaixmej ipatiuj 150 dólares.

 ¿Keniuj momachiliaj tokniuan akin tapaleuiaj maj mochijchiua nejin Biblias ika braille? Nadia, akin tekiti itech sucursal ompa Sudáfrica, kijtoua: “Tokniuan akin amo tachiaj oso amo yektachiaj semi ouij tein kipanouaj, yejua ika se tatiochiualis maj nitapaleui maj mochijchiua nejin tein kinpaleuis tokniuan. Nikyekmati ke Jiova semi kintasojta”.

 ¿Toni panoua komo akin amo tachia amo ueli kiixtajtoltia braille? Seki xiujmej achto, mochijchiuak se folleto tein itokay Aprenda a leer braille. Nejin amaix ijkuiliujtok ika braille uan ika letra. Ijkon ueli kikui se akin tachia iuan akin amo tachia. Nejin no kipia tein ika tajkuilos ika braille akin amo tachia. Ika nejin nepaleuil yejua ueli momachtia tajkuilos ika braille. Ijkon kemej momachtijtiuj, kielnamiki keniuj moijkuiloua uan ueli kiixtajtoltia keman kimatemojtiuj puntitos.

 ¿Keniuj nejin amaixmej kinpaleuia tokniuan akin amo tachiaj oso amo yektachiaj? Ernst, akin nemi Haití, yaya nechikolmej sayoj ke amo kipiaya amaixmej ika braille. Yejua ika kipanoltiaya se tamachtilis itech nechikol sayoj ika tein kielnamikia, uan tanankiliaya sayoj ika tein kikakia. Yejua kijtoua: “Axkan ueli nimomaajokui uan nitanankilia keman yeski. Nimomachilia ke iniuan niyetok tokniuan. No nikselia tamachtilis iniuan tokniuan”.

 Ompa Austria, Jan, se tokniuj tayekankej akin amo tachia uan kiixyekana Tamachtilis ika amaix Tanejmachtijkej uan Nemachtil ika Biblia itech nechikol, kijtoua: “Toamaixuan ika braille okachi kuali chijchiujtokej. Kemej neskayot, kipia itapoualuan páginas, notas tein niman se kiajsi uan kimelaua toni nesi itech taixkopimej”.

 Seon-ok, se precursora akin nemi Corea del Sur, amo tachia nion ueli takaki. Seki xiujmej achto, monekia kimailuijtiaskej tein moijtouaya itech nechikolmej, sayoj ke axkan ueli iselti kiixtajtoltia toamaixuan ika braille. Yejua kijtoua: “Okseki amaixmej ika braille semi teouijmaka se kiixtajtoltis porin poliujtiuj puntitos, amo tekpantokej kemej moneki uan amat semi kanauak. Sayoj ke itaixpantijkauan Jiova kikuij okachi kuali amat uan puntos okachi ixpajpankistokej uan nejon tapaleuia maj amo ouij se kimaixtajtolti. Achto, monekia maj aksa nechpaleui maj nimomachti toamaixuan. Axkan ueli noselti nimomachtia. Nechyolpaktia nimomachtis tein tikitaskej itech nechikolmej uan ueli nitanankilia nochi tein uelis. Nikixtajtoltia nochi toamaixuan ika braille tein nikselia. Uelis tikijtoskej ke amo nikaualaniok amaixmej”.

 Itech nejin amaixmej ika braille kijtoua kemej itech nochi toamaixuan: “Nejin amaix tein momoyaua, tapaleuia itech tamachtilis ika Biblia tein motemaka semanauak taltikpak, uan mochijchiua ika tomin tein taltikpakneminij kitemakaj ika nochi ininyolo. Amo uelis se kinamakas”. Tiktasojkamatij namonepaleuil ika tomin tein ueli motemaka itech donate.pr418.com. Nejin tapaleuia maj ueli kiselikan tamachtilis hasta akin amo tachiaj oso amo yektachiaj.