Oloch Taojtokaltianij kiitaj ke semi moneki maj mokui tomin tein motemaka para maj mochijchiuakan kalmej tein tapaleuiskej maj kisentoka moteixmatilti iTaixyekanalis Dios. Itech xiujtekit 2023, entidades legales de sucursales tein kinpiaj itaixpantijkauan Jehová, kitekitiltijkej panoua 500 millones de dólares a para kinkouaskej uan kinchijchiuaskej Kalmej kampa tiMosentiliaj uan kampa mochiuaj uejueyi nechikolmej uan no para moyektaliskej uan moyekpiaskej nejin kalmej itech nochi taltikpak. Uan itech nejin tomin tein motekitiltij, amo poui tomin tein tokniuan itech sejse nechikol kitemakaj tein ika kiyekpiaj Kali kampa Mosentiliaj.

 Uan no, tomin tein motemaka no mokui para mochijchiuaskej uan moyektaliskej sucursales, tein semi tapaleuiaj para maj okachi kuali motanojnotsa noyampa taltikpak. Mopatak kemej mochiuaya seki tekimej itech sucursales uan ijkon okachi motekitiltis tomin para mochijchiuaskej uan moyektaliskej Kalmej kampa tiMosentiliaj uan kampa mochiuaskej uejueyi nechikolmej. Sayoj ke monekiok miak tomin para kinyektaliskej uan kinyekchijchiuaskej sucursales oso para kinpanoltiskej okseko. ¿Keyej moneki mochiuas nejin tekit? ¿Uan keniuj tapaleuia tein mochiua itech sucursales para okachi motanojnotsas uan ijkon miakej momakixtiskej? Maj tikitakan.

 Miak sucursales mochijchiujkej kemej 30 oso 40 xiujmej achtoya. Nicholas, akin tapaleuia itech Departamento Mundial de Diseño y Construcción, kijtoua: “Hasta kalmej tein okachi se kinyekpia uejueliuij ijkon kemej panouaj xiujmej. Keman tikyekchijchiuaj se kali, titapaleuiaj maj oksepa kuali tekiti uan maj okachi uejkaua”.

 Uan kemej itech inechikol Jehová mopatatok miak taman, no monekini maj mopata kemej chijchiujtokej seki kalmej itech sucursales. Kemej itech nejin tonalmej semi momiakilianij tanojnotsanij, monekini maj okachi miakej tapaleuikan itech sucursales. Sayoj ke seki de nejin sucursales amo chijchiujtoyaj para ompa nemiskej miakej. Uan nejon kichiuani maj amo semi akikan akin ompa tapaleuiaj.

 Se sucursal no moneki kuali chijchiujtos para amo akin moxokolis. Kemej tinemij itech tonalmej keman tatamitiya, axkan okachi mochiuaj tetsaujmej uan hasta uelis timomikiliskej (Lucas 21:11). Komo tikyekchijchiuaj se sucursal ika tein okachi yankuik moixtaliani, okachi taxikos uan amo kinijtakos akin ompa tekitij. Uan komo mochiua se tetsauit, desde ompa uelis kiixyekanaskej nochi tein mochiua keman panoua se tetsauit uan no uelis kisentokaskej kiixyekanaskej tekit para mosentokas motanojnotsas.

 Itech xiujtekit 2023, tokniuan Oloch Taojtokaltianij kiixtalijkej maj moyekchijchiuakan 43 sucursales. Nejon kijtosneki ke moyekchijchiujtokej ajsitokya tajko de nochi sucursales tein moajsij noyampa taltikpak. Para tikmatiskej keyej motelneki maj mochiuakan nejin tekimej, maj tikitakan tein mochiuani itech seki sucursales.

 Angola. Matt, semej akin taixyekana itech sucursal de nejon altepet, kijtoua: “Tikmojkaitaj keman tikitaj keniuj mochiujtok tein kijtoua Ageo 2:7. ¡Sayoj itech 10 xiujmej, tokniuan momiakilijkej 60%! Maski monekia maj okachi miakej tapaleuikan Betel, amo uelia tikinyoleuayaj oksekin porin amo taueyika katka. Yejua ika, akin ompa tapaleuijtoyajya kipiayaj miak tekit uan monekia okachi tekitiskej”.

 Kemej panotoya nejon, kiniluijkej seki tokniuan maj kiitanij keniuj ueliskia okachi kiueyiltiskej sucursal. Yekinika kiixejekojkej ke sayoj monekia kinyekchijchiuaskej kalmej tein ipa yetoyajya. Sayoj ke satepan ke okachi tatemojkej, kiitakej ke ijkon amo kuali kitekitiltiskiaj tomin tein tokniuan kitemakayaj. Kiitakej ke okachi kuali maj kikouanij uan maj kiyekchijchiuanij se kali tein amo uejka moajsia. Matt kijtoua: “Keman nejin tokniuan kinmatiltijkej akin taixyekanayaj itech sucursal ke kinekiaj kikouaskej uan kiyekchijchiuaskej se kali tein ipa yetoyaya, tiknemilijkej ke kemej kali amo tejuan tikchijchiujkaj, xa amo chijchiujtoya kemej techpaleuiskia. Sayoj ke axkan tikitaj ke Jehová techixyekanak porin nejin kali yejua tein techpolouaya”.

 Ijkon kemej panouaj xiujmej, xa monekisok maj okachi mopataua sucursal de Angola. Sayoj ke, ika nejin kali tein mokouak, uan kemej motalijkej seki kalmej taijtik de Betel uan ompakauin morentarojkej seki cuartos, miakej tokniuan uelij tapaleuiaj ompa. Ijkon kinpaleuiaj nochin tanojnotsanij akin semi momiakilijtokej.

 Japón. Seki kalmej de nejin sucursal kiajxitijtoyajya 40 xiujmej ke mochijchiujkaj uan amo semi kiyekchijchiuanij. Maski tokniuan kinyekpianij, nejin kalmej mokuinij okachi ke tein ixyetoya maj mokuinij. Yejua ika tikyekchijchiujtokej miak taman itech nejon kalmej.

 Itech sucursales, seki taman amo mochiuaok kemej achto mochiuaya. Achto de 2015, tokniuan betelitas kinchijchiuiliayaj nochi tein kikuayaj. Sayoj ke axkan moneki okachi motakualchiuiskej itech inincuarto. Sayoj ke miak cuartos den Betel de Japón, amo chijchiujtoyaj para ompa ueliskia mochijchiuiliskej tein kikuaskej. Yejua ika, monekik moyekchijchiuaskej nejon cuartos kemej ueliskia ompa motakualchiuiskej. Kumiko, se tokniuj siuat akin tapaleuia sucursal de Japón, kijtoua: “Kuali nimomachilia porin kualtsin chijchiujtok kampa nimotakualchiuia itech nocuarto. Uan nejon nechpaleuia maj kuali nikchiua tekit tein ika nitapaleuia nikan Betel”.

 Tekit tein mochiua itech sucursal de Japón tapaleuia para maj okachi motanojnotsa noyampa (Mateo 28:19, 20). Itech nochi taltikpak, sayoj itech ome sucursales kinamakixtiaj Biblias, itech sucursal de Japón uan itech okseok. Yejua ika keman peuak moyekchijchiua sucursal de ompa, no kikoujkej uan kitalijkej se tepos tein kisentiliskia amakotol uan talnex. Ajsitoyaya se millón de dólares tein kiixtaujkej para kikouaskej nejin tepos uan para peuaskej kitekitiltiskej. Sayoj ke tapaleuia para maj amo teyi kinpano akin tekitij itech imprenta, uan ika nejon no uelis mosentokas moamakixtis amaixmej tein techpaleuiaj maj tiksentokakan titakuaujtamatikan iuan Dios.

 Tokniuan kichiujkej maj mosentokani moamakixtiani Biblia maski motayekchijchiujtoya itech sucursal. Trey, semej akin taixyekana itech sucursal de Japón, kijtoua: “Keman titayekchijchiujtoyaj, okachi monekik maj moamakixtikan Biblias porin moajsiajya itech miak tataman tajtolmej”. Ompa itech sucursal, akin tapaleuiayaj itech tataman departamentos monekik sentekitikej uan mosenpaleuiskej para maj mosentokani moamakixtiani Biblias uan no maj motaliani yankuik tepos. Maski seki taman kinouijmakak kichiuaskej, kemej itech metsti marzo hasta agosto 2023 moamakixtijkej ajsitoyaya 220,000 Biblias itech sejse metsti. Uelik mochiuak nochi nejin maski ijkuak okachi moyektalijtoya miak taman itech imprenta. Uan amo monekik mokuis okachi tomin ke tein moixtalijkaya.

 Keman moyekchijchiuak seki taman itech sucursal no moixtalij maj amo semi motekitiltianiok luz oso tit. Motaliskej okseki paneles solares, uan ika nejon xijxiujtika amo mokuisok 120,000 dólares. No motaliskej seki ventanas tein vidrio ixeyi tilauak. Ijkon, okachi tatanestos uan amo monekisok motekitiltis miak tit oso luz. Uan amo no monekisok mokuis kemej 10,000 dólares xijxiujtika. Maski para mochiuas nejin moneki miak tomin, itech nochi tiempo tein tikuitoskej tapaleuis para maj xijxiujtika amo mokuiok panoua 3.5 millones de dólares. No tapaleuis para maj taltikpak amo semi moijtakook.

 Tein mochiujtok itech sucursales de Angola uan Japón technextilia ke itech sucursales moneki mochiuas miak tekit para tapaleuiskej maj kisentoka moteixmatilti kuali tanauatilmej. ¡Uan moneki mochiuasok miak tekit itech okseki sucursales! Aaron, akin tapaleuia itech Departamento Mundial de Diseño y Construcción, kijtoua: “Mochiuania tel miak taman, sayoj ke monekiok mochiuas okseki taman…”. Yejua kijtoua toni moneki para maj mochiua tekit tein poliuiok: “Komo tokniuan amo tapaleuiskiaj ika inintomin, amo ueliskia tikchiuaskej nochi nejin tekimej tein moneki itech sucursales. Sayoj ke no moneki tikintasojkamatiliskej nochin tokniuan akin motemakaj tapaleuiskej itech nejin tekit, uan no akin kiixtalijtokej tapaleuiskej satepan. Keman tokniuan motemakaj tapaleuiskej oso no kitemakaj inintomin kinextia ke Jehová techtatiochiuijtok” (Salmo 110:3).

 Ika tomin tein tiktemakaj ueli mochiua nochi tekit para moyektalis oso moueyiltis se sucursal. Miakej kitemakaj inintomin itech donate.pr418.com. ¡Miak tasojkamatik porin nochipa nantapaleuiaj ika tein nankipiaj!