Jiova techmaka tatsotson kemej se netetayokolil. Nejin kichiua maj kuali timomachilikan uan kemej yeskia techchikaualismaka. Uan no ijkon techpaleuia nekuikatilmej tein moajsij itech JW Broadcasting®. Uan tein okachi moneki, techtokiaj iuan Jiova.

 Itech xiuit 2014 uan hasta axkan, panoua 70 nekuikatilmej mochiuanij, uan seki nejon nekuikatilmej moajsiya itech panoua 500 tajtolmej. Xa timotajtaniaj: “¿Akonimej kichiuaj nejon nekuikatilmej uan keniuj tekitij?”.

 Ika inintaixyekanalis Oloch Tokniuan akin Kiixyekanaj Tamachtilis tein Motemaka, nejin nekuikatilmej kichiuaj tokniuan akin tekititij ika tatsotson itech Servicios de Audio y Video. Nikan tekitij 13 tokniuan akin kixejxelouaj tekit, kichiuaj nekuikatil, kitaliliaj tatsotson uan kichiuaj okseki taman tekit. Uan no, akin Kiixyekanaj Tamachtilis tein Motemaka kijtouanij maj no tapaleuikan okseki tokniuan akin nemij noyampa taltikpak, kemej akin ueli kichiuaj tatsotson, akin kimatij tatsotsonaskej oso mokuikatiskej. Ika yolyemanilis nejin tokniuan tapaleuiaj ika tein ueli kichiuaj uan amo kitemouaj maj kiueyitalikan.

 ¿Keniuj mochiua nekuikatilmej? Yekinika, akin Kiixyekanaj Tamachtilis tein Motemaka kijtouaj itech katiyejua texto motaksaltis uan keniuj moneki teyolchikauas. Uan tokniuan akin tekitij ika tatsotson kijtouaj akonimej kichiuaskej tatsotson uan akonimej kichiuaskej nekuikatil. Mochiua se yekinika grabación uan akin Kiixyekanaj Tamachtilis tein Motemaka kikakij uan kijtouaj toni moneki moyektalis. Ompa, tokniuan akin tekititij ika tatsotson, kiyektaliaj uan kichiuaj grabación kemej yekmelauj mokauas. Nejin grabaciones mochiua itech sucursales oso ininchan tokniuan akin kipiaj kampa mochiuas nejin tekit.

 Tokniuan kikuij seki programas itech computadoras para kichiuaskej nekuikatilmej uan grabaciones. No moneki manamikmej tein ika tatsotsonaskej, mezcladoras de sonido, amplificadores, seki taman bocinas uan micrófonos. Sejse micrófono ipatiuj 100 dólares hasta 1,000 dólares oso okachi. Itech xiuit 2020, mokuik 116,000 dólares para nejin teposmej tein ika mochiua grabación.

 ¿Keniuj kichiuaj para maj amo semi miak tomin mokui? Yekinika, amo miakej tokniuan akin tekititij ika tatsotson yetokej Betel, uan miakej tokniuan kinyoleuaj maj tapaleuikan ika tekit ininkalijtik. Uan no, kichiuaj tatsotson ika seki programas itech computadoras uan ijkon amo miakej tokniuan tatsotsonanij moneki kinnechikoskej keman kichiuaj grabación.

 Tokniuan semi kiuelkakij nejin nekuikatilmej. Tara, akin nemi Alemania, kijtoua: “Nejin nekuikatilmej nechyolseuia keman nimotekipachojtok. Keman nikaki itech notajtol, nikmachilia kemej yeskia Jiova nechnaua”. Dimitri akin nemi Kazajistán techiluia: “Semi nikuelita nikakis nejin nekuikatilmej uan amo moneki niknemilis ox teisa kijtoua tein amo kuali porin nikmati ke motaksaltia itech Biblia. Uan tein okachi moneki, nechpaleuia maj nitanemili itech nokuali uikalis iuan Dios”.

 Delia akin nemi Sudáfrica, techtapouia: “Semi nechpaleuia nekuikatilmej. Keman niyolkuetaui oso nikpia se ouijkayot, nochipa nikajsi se nekuikatil tein ika tajtoua kemej nimomachilia uan nechyolchikaua. Kemansa, nimansaj keman nikaki tatsotson peua kuali nimomachilia”.

 Sekin kijtouanij katiyejua nekuikatilmej semi kiuelitaj. Lerato akin nemi Sudáfrica, kijtoua: “Tein motokaytia Amo uejkaua mochiuas uan Kualtsin tinemiskej nechtanemililtia itech tonal keman nomaj oksepa nemis. Nochipa keman nikaki nejin nekuikatil, nimonemilia ke ualtsikuini nechajsiki uan nechnaua”.

 Semej nejin nekuikatilmej semi kipaleuij se ichpoch akin nemi Sri Lanka. Yejua techiluia: “Notamachtijkauj ika Ciencias kimatia ke niitaixpantijkauj Jiova, yejua ika se tonal nechiluij miak taman tein amo kualtsin ininixpan nochin akin iniuan nimomachtia. Semi nimomoujtij uan amo nikmatik toni niknankilis. Keman niajsik kalijtik, nomaj nechiluij maj nikakini nekuikatil Fuerte tú serás. Nejin nechpaleuij maj nikitani ke monekia niktemos tamachtilis uan niknemilis keniuj nitanankilis. Mostika nitajtoj iuan tamachtijkej. Nechkakik uan nechiluij ke axkan kuali kimatiya toni tikneltokaj tiitaixpantijkauan Jiova. Semi niktasojkamatilia inechikol Jiova tein techmaka nejin nekuikatilmej tein teyolchikaua”.

 ¿Keniuj moixtaua tein moneki keman mochiua nejin nekuikatilmej? Ika namonepaleuil ika tomin tein ueli motemaka itech donate.pr418.com. Semi tiktasojkamatij nejon namonepaleuil tein ika ueli mochiua itekiyo Dios noyampa taltikpak.