“Seki xiujmej achto, tiknemiliskiaj ke semi ouij tikseliskiaj tamachtilis itech tepos”. ¿No ijkon tikonnemilia? Nejin tajtolmej kijtoj tokniuj Geoffrey Jackson itech tanojnots tein kitemakak itech video Tein Oloch Taojtokaltianij kitematiltiaj xiuit 2020 tapoual 6. No kijtoj: “Sayoj ke axkan timotajtaniaj keniuj tikchiuaskiaj itech nejin tonalmej ke onkak ueyi kokolis komo amo tikpiaskiaj manamikmej kemej JW Library. Jiova techmachtijtoni tein techpaleuis maj tikixnamikikan ouijkayomej kemej tein axkan tikpiaj”.

 ¿Keniuj Jiova techmachtijtoni? ¿Keniuj mochijchiuani JW Library? ¿Uan keniuj kiyankuilijtiyouij uan kitalilijtiyouij tein okachi tapaleuis?

 Itech mayo de 2013, tokniuan Oloch Taojtokaltianij kinnauatijkej akin tekitij itech Programación de MEPS, se departamento tein yetok itech ueyi kali kampa techixyekanaj, maj kichiuakan se aplicación tein kipiaskia Traducción del Nuevo Mundo. Paul Willies akin tektiti itech nejin departamento, kijtoj: “Amo keman tiktalijtoyaj se aplicación itech tiendas de aplicaciones. Maski ijkon, tikinixtalijkej tokniuan akin tekitiskiaj, tikaujkej seki tekit tein tikchiujtoyaj uan iniuan okseki tokniuan akin tekitij itech okseki departamentos tikchijchiujkej aplicación. Semi timotataujtijkej. Uan tikitakej keniuj Jiova techpaleuij. Sayoj makuil metsti satepan, aplicación moteixmatiltij itech nechikol tein mochiuaj xijxiujtika”.

 No tikpiakej okse ouijkayot keman tiktemojkej maj JW Library chijchiujto kemej se biblioteca ajsitok tein kipias miak amaixmej itech miak tataman tajtolmej. Itech enero de 2015, itech nejin aplicación moajsiaya miak amaixmej itech tajtol inglés, uan chikuasen metsti satepan, ueliaya motemouia amaixmej itech miak tataman tajtolmej.

 Tokniuan kisentokanij kitalilianij okseki yankuik taman. Kitalilianij videos uan no kitalianij kampa nesis amaixmej uan videos tein mokuij itech nechikolmej. Uan no, itech versículos tein kipia Biblia, ueli se kiita referencias tein kipia amaix Nepaleuil tein ika timomachtiaj.

 Mojmostaj 8 millones kitapouaj JW Library uan mejmetstika kitapouaj panoua 15 millones. Kemej semi miakej kitapouaj nejin aplicación, ¿toni moneki mochiuas para kuali tekititos? Tokniuj Paul Willies kimelaua: “Se aplicación amo keman ueli se kitamiltia. Nochipa tiktemolijtokej yankuik taman tein tiktaliliskej uan tikchiuaskej maj okachi amo ouij se kitekitilti. Kemej moyankuilijtiyouij teposmej kampa se kitapoua nejin aplicación, no moneki tikyankuiliskej nejin aplicación para uelis kuali tekitis. Uan kemej okachi miak amaixmej uan videos tiktaliaj itech JW Library, no moneki tikyankuiliskej uan tikpatiliskej seki taman tein tapaleuis maj taxikoj keman tiktekitiltiskej”. Axkan, itech JW Library moajsij kemej 200,000 amaixmej uan panoua 600,000 audios uan videos itech tataman tajtolmej.

 Amo sayoj ika computadoras tikyankuiliaj aplicación. No moneki tikouaskej seki licencias tein uelis ika mochiuas nejin tekit. Sayoj semej nejon licencia moneki tikixtauaskej 1,500 dórales itech se xiuit. Uan no, departamento de Programación de MEPS xijxiujtika kikui kemej 10,000 dólares itech tataman teposmej para kiyekitas ke kuali tekititi nejin aplicación itech yankuik computadoras, tabletas uan teléfonos.

 Kemej yetokya JW Library, amo miakok amaixmej moneki tikamakixtiskej uan tiktitaniskej itech nechikolmej uan nejon tapaleuia maj amo semi miak tomin mokui. Kemej neskayot, folleto Maj timomachtikan iTajtol Dios mojmostaj itech xiuit 2013, tikixtijkej itech amat 12 millones. Uan tein tikuikej itech xiuit 2020, tikixtijkej itech amat sayoj 5 millones, maski moajsiajya 700,000 okachi tanojnotsanij itech nochi taltikpak. ¿Keyej ijkon panok? Porin axkan miakej tokniuan kiixtajtoltiaj texto tein moita mojmostaj itech JW Library. a

 Ika JW Library ueli tikchiuaj miak taman. Kemej neskayot, Geneviève, akin nemi Canadá, kimachilia ke nejin aplicación kipaleuiani maj okachi kuali momachti Biblia. Kijtoua: “Nikyekijtoua ke komo monekiskia nikixtis nochi amaixmej tein nikuiti itech nonemachtil, amo nimomachtiskia mojmostaj kualkan. Uan ika nejin aplicación, sayoj nikui notableta uan ompa yetok nochi tein nikuis. Nonemachtil nechpaleuiani maj okachi nitakuaujtamati uan maj okachi nimotoki iuan Jiova.

 Nejin aplicación okachi tapaleuiani itech nejin tonalmej keman momoyaujtok COVID-19. Ijkon kijtoua Charlyn, akin nemi Estados Unidos: “Keman peuak COVID-19 uan hasta axkan, amo tikselianij nion se amaix itech panouaya se xiuit. Sayoj ke itech JW Library tikpianij tein ika timomachtiskej. Semi niktasojkamatilia Jiova nejin netetayokolil”.

 Miakej momachiliaj kemej Faye, akin nemi Filipinas. Yejua kijtoua: “Semi kualtsin nejin aplicación. Kipia nochi tein nechpaleuia maj nimotoki iuan Jiova. Ompa nikixtajtoltia amaixmej mojmostaj kualkan, nikaki teisa tein ompa yetok keman nikchiujtok notekiuj kalijtik. No ompa nimomachtia tein tikitaskej itech nechikolmej uan nikui keman nimomachtia Biblia. No nikita videos keman nikpia seki minutos, uan keman nitechia, nikixtajtoltia amaixmej oso Biblia. Yekmelauj semi tapaleuia”.

 Nejin aplicación no semi tapaleuia itech tanojnotsalis. Kemej neskayot, ompa Camerún se tokniuj siuat kinekia kikuis itech tanojnotsalis se texto tein se semana achto kikuika okse tokniuj siuat. Sayoj ke amo kielnamikia katiyejua texto katka. Tokniuj kijtoua: “Semi kuali ke nikelnamikik tanemilil tein kijtoua texto. Niktapoj Biblia itech aplicación uan niktemoj tanemilil. Nimantsin nikajsik texto. Ika nejin aplicación, ueli nikajsi textos tein nikelkaua”.

 ¿Keniuj mochijchiua, moyektalia uan moyankuilia JW Library tein kitekitiltiaj tokniuan noyampa taltikpak? Ueli mochiua ika nepaleuil ika tomin tein ueli motemaka itech donate.pr418.com. Semi tiktasojkamatij nejon nepaleuil tein nankitemakaj ika nochi namoyolo.

1. Octubre de 2013: Moteixmatiltij aplicación tein kipiaya Traducción del Nuevo Mundo tein oksepa kiyekitakej.

2. Enero de 2015: Nesiaya amaixmej itech tajtol inglés uan satepan itech miak tataman tajtolmej.

3. Noviembre de 2015: Ueliaya se kitsojkuiloua texto.

4. Mayo de 2016: Nesiaya kampa kijtoua “Nechikolmej”.

5. Mayo de 2017: Ueliaya se kitalilia notas.

6. Diciembre de 2017: Ixnesik Biblia tein ika timomachtiaj itech tajtol inglés.

7. Marzo de 2019: Ueliaya se kitemouia audios uan se kiita videos itech tepos, uan no referencias tein kipia Nepaleuil tein ika timomachtiaj.

8. Enero de 2021: Mochijchiuak kemej uelis se kitekitiltis amaix Tiyolpakiskej nochipaya keman titamachtiskej ika Biblia.