Itech metsti enero xiuit 2021, tokniuan Oloch Taojtokaltianij techiluijkej ke tikpiaskiaj se yankuik amatajkuilol tein ika titamachtiskej: amatajkuilol ¡Uelis tiyolpakiskej nochipaya! a ¿Keniuj tionmomachilij keman tikonmatik nejon? Matthew, akin nemi Canadá, kijtoua: “¡Semi niyolpakik! Uan okachi niyolpakia keman nikaktiaya tein kijtouayaj itech tanojnotsmej uan nikitaya videos kampa kijtouayaj keyej kichijchiujkej nejin amatajkuilol uan keniuj kiitstiajkej para okachi tapaleuis. Niknektokya nikitas uan nikuis”.

 Amo titamachtiskejok kemej achto keman tikuiskej nejin amatajkuilol. Sayoj ke, amo sayoj nejon tein yankuik, ta komo tikonpia nejin amatajkuilol ika amat no tikonitas ke tepitsin taman. Maj tikitakan tepitsin keniuj chijchiujtok nejin amatajkuilol.

 Amat okachi tilauak. Keman yaya kichijchiuatij amatajkuilol ¡Uelis tiyolpakiskej nochipaya! kiitakej ke monekia se amat tein okachi tilauak. ¿Keyej? Nejin amatajkuilol kipia panoua 600 taixkopimej. Amatajkuilol Techmachtia sayoj kipia kemej 60. Uan no okachi tajtakaujtok para se tajkuilos. Komo amat kanauak yeskia, nochi taixkopimej moitaskiaj itech okse página, maski sayoj tepitsin. Kemej tokniuan ompa Wallkill (Nueva York), amo kinekiaj maj ijkon moita, kiamakixtijkej seki amatajkuilolmej uan kikuikej naui taman amat tein ipa mokuia. Tokniuan akin kiixyekanaj tein moijkuiloua kiitakej nejon amatajkuilolmej uan kiijitakej tein okachi tilauak. Nejin amat okachi patiyoj ke tein ipa tikuij. Sayoj ke, akin momachtiskej nejin amatajkuilol amo kiitaskejok taixkopimej tein moajsij itech okse página.

 Tein ika panpiktok amatajkuilol. Nejin amatajkuilol amo kemej okseki, porin maski no kipanpikkej ika plástico, amo milini. Uan nejon kipaleuia maj okachi kualtsin nesi taixkopin tein kipia. Uan kemej miakpa se kikui, no kipaleuia maj amo niman ixpati. Nejin taman plástico okachi patiyoj ke tein milini. Yejua ika itech miak kalmej Betel, tokniuan mosenpaleuijkej para kitemoskej kani kikouaskej se plástico tein amo semi patiyoj.

 ¿Keyej mokuik nejon plástico komo okachi patiyoj? Se tokniuj akin tekiti kampa moamakixtiaj amatajkuilolmej kijtoua: “Kemej nejin amatajkuilol okachi mokuiti, tiknekij maj okachi uejkaua uan maj kualtsin moita”. Eduardo, akin tekiti kampa kiamakixtiaj amatajkuilolmej ompa Brasil, kijtoua: “Semi tiyolpakij tikitaskej keniuj itech inechikol Dios, kuali kikuij tomin uan ika nejon kichijchiujkej se kualtsin amatajkuilol tein taxikoua”.

 Peuak tikamakixtiaj amatajkuilol ¡Tiyolpakiskej nochipaya! itech metsti marzo xiuit 2021, keman momoyaujtoya coronavirus. Kemej itech kalmej Betel tatsaktoya, amo uelia kinyoleuayaj tokniuan maj tapaleuitij para moamakixtis nejin amatajkuilol. Yejua ika, miakkan amo onkaya miak tokniuan para kichiuaskej nejin tekit, uan miakkan, tekiuanij kijtojkej maj seki tonalmej amo kiamakixtikan amatajkuilolmej.

 ¿Keniuj uelik tikamakixtijkej nejin amatajkuilol? Keman uelik oksepa moamakixtiaj amatajkuilolmej, kiniluijkej tokniuan akin yetokej Betel uan tapaleuiaj itech okseki departamentos maj tapaleuikan seki tonalmej. Joel, akin tapaleuia kampa moamakixtiaj amaixmej, kijtoua: “Kemej nejin tokniuan kinekiaj tapaleuiskej uan kimatiskej keniuj kichiuaskej okseki taman, uelik tiktamichiujkej nochi tekit tein monekia”.

 Maski techouijmakak tikchiuaskej seki taman, uelik tikamakixtijkejya tel miak amatajkuilolmej. Mokuini miak taman kemej láminas, plástico tein kipanpiki amatajkuilol, amat, pintura uan tein ika se tapepechoua. Keman tikuikayajya makuil metsti tikamakixtijtoyaj nejin amatajkuilol, mokuikaya tomin 2.3 millones de dólares sayoj para nejin. Kemej amo tiknekij tikauiloskej tomin, sayoj tikamakixtijtokej amatajkuilolmej tein tokniuan kikuiskej.

 ¿Keniuj kiitaj nejin amatajkuilol akin tamachtiaj uan akin momachtiaj? Paul, se tokniuj akin nemi Australia, kijtoua: “Semi nikuelita nitamachtis ika nejin amatajkuilol. Semi kualtsin uan kipia miak taman. Kualtsin moajsikamati tein kijtoua, tein ompa tajtani kitanemililtia akin momachtijtok, uan semi tapaleuiaj videos, taixkopimej, recuadros uan tein moneki kichiuas. Semi kualtsin chijchiujtok; nechpaleuis maj okachi kuali nitamachti”.

 Se akin momachtijtok Biblia ompa Estados Unidos kijtoua: “Semi nikuelita nejin yankuik amatajkuilol. Taixkopimej nechpaleuiaj maj nikajsikamati tanemilil tein moneki, uan videos kualtsitsin uan nechpaleuiaj maj nikchiua tein nimomachtia”. Nejin takat youi nochi nechikolmej uan momachtijtok ojpa semana.

 Moneki tikamakixtiskejok miak millones nejin amatajkuilol itech okseki tajtolmej. Tokniuan Oloch Taojtokaltianij kijtojkej maj mokixti itech 710 tajtolmej, 340 tajtolmej okachi ke amatajkuilol Techmachtia.

 ¿Kani tikuij tomin para moixtauas nochi? Itech nochi taltikpak miakej tapaleuiaj ika tomin. Miakej kikuij donate.pr418.com para tapaleuiskej. Tamechtasojkamatiliaj miak tein nankitemakaj ika nochi namoyolo. Nejon techpaleuia maj tikixtikan amatajkuilolmej kemej nejin para tikinmachtiskej akin kinekij kiixmatiskej Jehová uan yolpakiskej nochipaya (Salmo 22:26).