Panoua 60% akin kitajtolkepaj amaixmej amo moajsij Betel, ta itech kalmej kampa motajtolkepaj amaixmej. ¿Keniuj kinpaleuia nejin? ¿Toni moneki kipiaskej akin kitajtolkepaj amaixmej itech nejin kalmej? ¿Keyej ompa okachi kuali kitajtolkepaj amaixmej?

 Tokniuan akin kitajtolkepaj amaixmej itech nejin kalmej uelij nemij kampa motajtoua inintajtol. Karin, akin kitajtolkepa amaixmej itech bajo alemán, techiluia: “Axkan ke tietokej itech kali kampa tiktajtolkepaj amaixmej nikan Cuauhtémoc, Chihuahua (México), nochipa titajtouaj bajo alemán, uan amo sayoj iniuan akin kitajtolkepaj amaixmej oso itech tanojnotsalis ta no keman tiouij titakouatij. Nikan senkis tikakij totajtol. Tikakij tajtolmej tein uejkaujya amo tikaktoyaj. Axkan tikmatij keniuj yekmelauj tajtouaj taltikpakneminij”.

 Tokniuj James akin nemi Ghana uan tekitij iniuan tokniuan akin kitajtolkepaj amaixmej itech tajtol Frafra, kijtoua ke kemansa kintemoua tokniuan akin nemij Betel. Sayoj ke no techiluia: “Nikuelita nietos itech kali kampa tiktajtolkepaj amaixmej. Nikuelita nitanojnotsas itech inintajtol uan nechyolpaktia nikitas keniuj kualtsin kikakij iTajtol Dios akin tikinnojnotsaj”.

 ¿Keniuj moixtalia kani moajsis se kali kampa kitajtolkepaskej amaixmej? Joseph, akin tapaleuia itech Departamento Mundial de Diseño y Construcción ompa Warwick (Nueva York), kimelaua: “Onkak se ouijkayot tein okachi tikixnamikij. Kampa monemilia motalis nejon kalmej amo nochipa onkak at oso luz oso internet amo semi chikauak uan amo ueli kitemoltiaj archivos tein ika tekitiskej. Yejua ika, achto tiktemouaj tataman xolalmej kampa motajtoua nejon tajtol uan ompa tikixtaliaj semej nejon xolalmej kampa uelis moajsis se kali kampa kitajtolkepaskej amaixmej”.

 Okachi ijsiujka mochiua uan amo patiyoj kisa komo tiktaliaj kampa kitajtolkepaskej amaixmej itech se Kali kampa mochiuaj uejueyi nechikolmej, itech Kali kampa tiMosentiliaj oso itech kali kampa yetokej misioneros, uan tokniuan akin kitajtolkepaj amaixmej ueli youij uan mokepaj. Komo amo onkak semej nejin kalmej, tokniuan kiniluiaj maj kikouakan kalmej kampa tokniuan uelis nemiskej uan kitajtolkepaskej amaixmej. Komo moneki mokalpataskej, nejin kalmej uelis niman monamakaskej uan tomin uelis mokuis kampa monekis.

 Itech xiujtekit 2020 motekitiltij 13 millones de dólares para kuali moajsiskej nejin kalmej. Tokniuan akin kitajtolkepaj amaixmej moneki kipiaskej computadoras, programas itech computadoras tein kinpaleuia itech tajtolkepalis, teposmej tein ika kichiuaskej grabaciones, internet uan okseki taman tein moneki. Kemej neskayot, moneki 750 dólares para kikouaskej se computadora uan kitaliliskej programas tein moixtaua. Uan no kikuij Watchtower Translation System, se programa tein kitekpana tataman tekit tein kichiuaskej uan ompa kitapouaj archivos tein ika tekitiskej.

 Tokniuan akin kitajtolkepaj amaixmej no kinmakaj teposmej tein ika kichiuaskej grabaciones kampa tekitij. Nejin teposmej okachi kinpaleuij keman peuak ueyi kokolis COVID-19, porin miakej akin kitajtolkepaj amaixmej uelik kiuikakej ininchan nejin teposmej uan ijkon kisentokakej kichiujkej grabaciones ika audio uan video.

 Okseki tokniuan akin ompakauin nemij tapaleuiaj maj moita ox tein kitajtolkepanij kuali mokaki uan oksekin no tapaleuiaj maj moyektali kalmej kampa kitajtolkepaj amaixmej. Cirstin akin tekiti itech kali kampa kitajtolkepaj amaixmej itech tajtol afrikáans ompa Ciudad del Cabo (Sudáfrica), kijtoua: “Miakej tokniuan tanojnotsanij uan precursores regulares ueli nikan tapaleuiaj”.

 Nejin tokniuan semi yolpakij tapaleuiskej. Kemej neskayot, se tokniuj siuat akin ompa tapaleuia kijtoua ke semi kiyolchikaua kichiuas nejon. Seki tokniuan akin ompakauin nemij tapaleuiaj ika grabaciones. Juana, akin kitajtolkepa amaixmej itech tajtol totonaco ompa Veracruz (México), techiluia: “Axkan ke tinemij kampa okachi motajtoua totajtol, tokniuan okachi amo ouij kinkisa kichiuakiuij grabaciones”.

 ¿Yekmelauj okachi tapaleuia maj kichiuakan tekit itech kalmej kampa kitajtolkepaj amaixmej? Miakej akin kiixtajtoltiaj amaixmej kijtouaj ke kemaj. Cédric, akin kitajtolkepa amaixmej itech tajtol Congo ompa República Democrática del Congo, kijtoua: “Seki tokniuan kijtouayaj ke tiktajtolkepayaj amaixmej itech congo ‘de la Watch Tower’, porin amo semi mokakia kemej ipa tajtouaj. Sayoj ke axkan kijtouaj ke tiktajtolkepaj amaixmej kemej axkan tajtouaj, kemej yejuan tajtouaj mojmostaj”.

 Andile akin kitajtolkepa amaixmej itech tajtol xhosa ompa Sudáfrica no ijkon kijtoua: “Miakej kiitaj ke okachi kuali kitajtolkepaj amaixmej. Hasta seki konemej akin achto kiixtajtoltiayaj amaix Tanejmachtijkej itech tajtol inglés axkan kiixtajtoltiaj itech tajtol xhosa. Uan semi kiuelitaj kemej mokauak Traducción del Nuevo Mundo tein oksepa kiyekitakej porin okachi kualtsin mokaki”.

 Nochi tomin tein mokui keman mochijchiuaj nejin kalmej oso moyektaliaj uan para kipiaskej tein kinpoloua akin ompa tekitij, mokixtia itech nepaleuil ika tomin tein ika mochiua itekiyo Dios noyampa taltikpak, tein no motemaka itech donate.pr418.com.