Xijxiujtika, miakej akin kitekitiliaj Jehová nochi tonalmej, kinyoleuaj maj kiselitij Tamachtilis tein motemaka Galaad, tein mochiua ompa Patterson (Nueva York). a Ompa, tokniuan momachtiaj keniuj okachi kuali kichiuaskej tekit tein kipiaj itech inechikol Jehová. Nejin tamachtilis kinpaleuia maj kinyolchikauakan uan maj kinpaleuikan tokniuan itech nechikolmej uan tokniuan akin tekitij itech kalmej Betel.

 Nejin tamachtilis uelis kiseliskej tokniuan akin tataman kayomej. Itech tamachtilis 147, tein mochiuak itech xiuit 2019, moajsiaj 56 momachtianij akin kayomej itech 29 tataman altepemej. Tokniuan akin kiseliaj nejin tamachtilis kitekitiliaj Jehová nochi tonalmej kemej betelitas, misioneros, precursores especiales oso tokniuan akin takalpanouaj itech circuito.

 Tel achto ke peuas nejin tamachtilis tokniuan kiitaj seki taman tein moneki, tokniuan akin tekitij itech Departamento de Viajes kinkouiliaj boletos para avion akin kinyoleujkej maj kiselikan nejin tamachtilis. Itech tamachtilis 147, boleto tein moixtauak para sejse momachtijkej tein ika yajki Patterson uan tein ika mokepak, kisak kemej itech 1,075 dólares. Tokniuan momachtianij akin kayomej islas Salomón monekik kikouaskej naui boletos para yaskej Patterson, uan okseki eyin para ika mokepaskej. Sennochia yajkej panoua 35,400 kilómetros. Sejse boleto kisak itech 2,300 dolares. Para amo semi patiyoj taxtauaskej tokniuan akin tekitij itech Departamento de Viajes kikuij se programa para kiktemoskej boletos tein amo semi patiyojkej. Satepan ke kixelouaj se boleto, nejin programa miak metsti uan semanas kisentoka kitemoua boletos tein amo semi patiyojkej. Nejin tokniuan no kikuij seki taman tein kinmakaj akin semi kikouaj boletos, ijkon okachi amo semi patiyoj kinkisa.

 Miakej tokniuan moneki kipiaskej se visa para uelis kalakiskej ompa Estados Unidos. Yejua ika, tokniuan akin tekitij itech Departamento de Asuntos Legales ompa itech Ueyi kali kampa techixyekanaj, kinpaleuiaj nejin tokniuan maj kikixtikan se visa kemej tein kinmakaj momachtianij. Para mokixtis sejse visa moneki taxtauaskej 510 dólares.

 ¿Keniuj techpaleuia tinochin tamachtilis tein kiseliaj nejin tokniuan? Tokniuj Hendra Gunawan akin tekiti kemej tayekankej itech se nechikol ompa Sureste Asiático, kampa no mosentiliaj se namikuanij akin kiselijkej Tamachtilis tein motemaka Galaad, techtapouia: “Achto amo onkayaj precursores regulares itech tonechikol. Sayoj ke, keman ejkokej nejin namikuanij, yejuan kinyolchikaujkej oksekin, nejon kinpaleuij maj no mochiuakan precursores. Uan satepan se tokniuj siuat akin poui itech tonechikol kiyoleujkej maj kiseliti Tamachtilis tein kiseliaj akin kiteixmatiltiaj iTekiuajyo Dios”.

 Sergio Panjaitan akin tekiti iniuan sekin tokniuan akin kiselijkej Tamachtilis tein motemaka Galaad itech kali Betel, ompa Sureste Asiático, kijtoua: “Tamachtilis tein kiselijkej nejin tokniuan, amo sayoj kinpaleuia yejuan, ta no tejuan. ¡Momachtijkej miak taman! Sayoj ke, amo moueyimatij, ta kintapouiaj oksekin tein momachtijkej. Nejon techyolchikaua, uan tejuan no tikinyolchikauaj oksekin”.

 Nejin tamachtilis tein motemaka Galaad moixtaua ika tomin tein nankitemakaj para maj mosentoka motanojnotsa. Miakej kitemakaj itech donate.pr418.com. Tasojkamatik porin nankitemakaj namotomin ika nochi namoyolo, ijkon ueli kiseliaj nejin tamachtilis tokniuan akin seseko kayomej.