Tiitaixpantijkauan Jiova semi ininka motekipachouaj tokniuan (1 Pedro 2:17). Timiakej timomachiliaj kemej Tannis, se tokniuj siuat akin kayot Kenia. Yejua kijtoua: “Nechpaktia nikmatis keniuj moajsij tokniuan noyampa taltikpak”. ¿Keniuj itaixpantijkauan Jiova kimatij keniuj moajsij tokniuan? Porin kiitaj “Tein motematiltia” itech jw.org tein peuak moajsi nejin taxelol itech xiuit 2013.

 Itech nejin taxelol motematiltia nochi taman tein takuaujtamach kemej ijkuak mokixtia se yankuik Biblia, keman tapaleuiaj kampa taijtakoj se tetsauit, keman mochijchiuaj kalmej kampa titaueyichiuaj. Ompa no techmatiltiaj akonimej tokniuan kintsakuaj porin kitakamatij Dios. No moijtoua keman sucursal kiixtalia maj motanojnotsa itech seki xolalmej oso tein mochiua keman moelnamiki imikilis Jesús. ¿Keniuj kitemouaj tein kitematiltiskej uan keniuj moijkuiloua?

 Kampa Kinixyekanaj akin Kiitaj tein Motematiltis kiita tein kisas itech taxelol “Tein motematiltia” itech jw.org. Itech nejin departamento tein yetok itech ueyi kali Betel, tekitij ika inintaixyekanalis Oloch Tokniuan Taixyekananij kampa yetokej Oloch Taojtokaltianij. Nikan tekitij panoua 100 tokniuan tein miakej amo yetokej Betel ta ininkalijtik ualtapaleuiaj. Nejin tokniuan tajkuilouaj, tatemouaj, kitaliaj taixkopimej uan tajtolkepaj. Sekin tapaleuiaj kemej akin tajtotij iniuan chiuanimej, tamachtianij uan kampa kitematiltiaj teisa. Nejin departamento no kiselia ininnepaleuil panoua 80 sucursales tein kipiaj Kampa Kiitaj tein Motematiltis.

 Kampa Kinixyekanaj akin Kiitaj tein Motematiltis tekitij iniuan sucursales Kampa Kiitaj tein Motematiltis para kichiuaskej se taman tein motematiltis. Keman tokniuan kiixejekouaj ke se taman tel kuali yeskia maj motematilti, kitemouaj tein moneki uan kisentiliaj tein takuaujtamach. Kemansa moneki kinchiuiliskej netajtanilmej sekin oso tajtoskej iniuan taixmatinij. Satepan, kijkuilouaj tein motematiltis, kiyektaliaj, oksekin kiitaj toni moyektalis, kitaliliaj taixkopimej uan kintitaniliaj Oloch Tokniuan Taixyekananij para maj kiitakan ox kuali yetok kemej mokauak.

 ¿Keniuj kiitaj tokniuan nejin taxelol “Tein motematiltia”? Cheryl, se tokniuj siuat akin nemi Filipinas kijtoua: “Semi nechpaktia nikixtajtoltis kualkan teisa tein motematiltiani tein mouika iuan inechikol Jiova uan itekitikauan”.

 Miakej akin kiixtajtoltiaj kijtouanij keniuj tein motematiltia itech jw.org semi taman ke tein motematiltia okseko. Tatiana, akin nemi Kazajistán kijtoua: “Niktasojkamati maj itech jw.org motematilti tein takuaujtamach. Motematiltia tein yekmelauj mochiuani”. Alma, se tokniuj siuat akin nemi México, kijtoua: “Tein motematiltia itech jw.org semi teyolchikaua, amo kemej tein motematiltia okseko kampa sayoj moita tein amo kuali tein mochiua”.

 Nejin taxelol “Tein motematiltia” amo sayoj takuaujtamach, ta no kichikaua totakuaujtamatilis. Bernard, akin nemi Kenia, kijtoua: “Nejin tein motematiltia nechpaleuiani maj nikinita tokniuan kemej nochankauan maski kampa yeski nemiskej. Keman ininka nimotataujtia tokniuan, ueli nikijtoua inintokay oso ouijkayot tein kipanotokej”. Se tokniuj siuat akin monotsa Bybron, akin no nemi Kenia, kijtoua: “Nochipa nechyolpaktia keman nikita ke motematiltia se yankuik Biblia tein mokixtia itech se tajtol. Nejon nechelnamiktia ke Jiova amo techichikotasojta”.

 Maski motematiltia ke tokniuan kintajyouiltiaj oso kintsakuaj, no uelis techyolchikauas. Jackline akin nemi Kenia kijtoua: “Nitanemilis itech yolchikaualis tein kinextianij tokniuan semi kichikaua notakuaujtamatilis. Nochipa niktemoua nikitas toni kinpaleuia maj taxikokan. Nikajsini ke semi kichiuaj netataujtil, kiixtajtoltiaj Biblia uan no mokuikatiaj, uan yejua tein okachi kinpaleuiani maj semi chikaujkej uan maj taxikokan”.

 Beatriz, se tokniuj siuat akin nemi Costa Rica kitasojkamati maj motematilti teisa tetsauit tein mochiua. Yejua kijtoua: “Semi kualtsin maj nikita ke inechikol Jiova ijsiujka kinmaka tokniuan tein kinpoloua, uan kichiua kemej moneki uan ika netasojtalis. Nejin nechpaleuia maj senkis nikneltoka ke yejua nejin inechikol Jiova”.

 ¡Semi tiktasojkamatij maj moajsi taxelol “Tein motematiltia” itech jw.org! Ijkon ueli tikmatij keniuj yetokej tokniuan noyampa taltikpak. Nejin ueli mochiua porin itech donate.pr418.com nantemakaj namonepaleuil ika tomin tein ika mochiua itekiyo Dios noyampa taltikpak. Semi tiktasojkamatij nejon nepaleuil tein nankitemakaj ika nochi namoyolo.