Itech nejin tonalmej, miakkan moteuijtokej (Mateo 24:6). Yejua ika, miakej tokniuan tajyouiaj. Maski ijkon, nochipa kinpaleuianij. Semi techyolseuij tikitaskej video Tein Oloch Taojtokaltianij kitematiltiaj (3) itech xiuit 2022. Ompa tikitakej ke tokniuan ompa Ucrania tajyouijtokej porin ompakauin moteuijtokej. Yejua ika, tokniuan akin nemij Europa del Este kinpaleuijtokej. ¿Keniuj ueli kinpaleuiaj nejon tokniuan? ¿Keniuj momachiliaj tokniuan akin nemij Ucrania?

 Itech tonal 24 metsti febrero xiuit 2022, akin nemij Rusia peujkej kinteuiaj akin nemij Ucrania. Nejon tonal Tokniuan Taixyekananij kiixtalijkej kanachi tomin mokuiskia para kinpaleuiskej tokniuan ompa Ucrania. Uan nimantsin itech kali Betel peujkej kikouaj tein kinpoloskia tokniuan, uan 27 oloch tokniuan peujkej kixejxelouaj.

 Uan no, tokniuan akin moajsij itech kali Betel ompa Estados Unidos niman kinemilijkej keniuj no tapaleuiskiaj. Tokniuan taixyekananij uan akin kiixyekanaj tein moamakixtia kinemilijkej toni ueliskia kichiuaskej. Yejua ika kiniluijkej tokniuan itech Departamento Mundial de Compras maj mosenpaleuikan iniuan akin tapaleuiaj itech kali Betel ompa Ucrania uan Polonia, para kiitaskej toni kichiuaskiaj. Mojmostaj, miakej tokniuan mosentiliayaj para kiitaskej keniuj tekitiskej. Mosentiliayaj tokniuan akin tapaleuiaj itech departamento de Compras, Envíos uan Asuntos Legales, se tokniuj akin taixyekana itech kali Betel ompa Ucrania uan seki tokniuan akin tapaleuiaj itech Departamento Mundial de Compras.

 Tokniuj Jay Swinney, akin tapaleuia itech Departamento Mundial de Compras, kijtoua: “Achto, monekia tikmatiskej toni kinpolojtoya tokniuan. Tiknekiaj tikinmakaskej tein ipa kikuayaj uan tein ipa ika tachipauayaj. Amo sayoj monekia tikmatiskej toni kinpolouaya, ta no keniuj ueliskia ijsiujka tikajxitiskej hasta Ucrania uan maj amo teyi techpano”.

 Itech tonal 9 metsti marzo tokniuan kimatiajya toni kititaniskej. Itech cajas kitalijkej miak taman kemej nakat uan pescado itech lata, arroz, et, xapoj uan amat. Ijkuak, tokniuan yaya kinmajmakatij despensas tein kinajsiskia para se metsti. Sejse despensa ipatiuj yeskia kemej 1,300 pesos. Tokniuan taixyekananij kijtojkej ke ueliskia mokuis tel miak tomin, porin tel miakej tokniuan kinpoloskia nejon despensas. Sayoj ke ¿keniuj kuali ajsiskiaj akin kiuikaskiaj uan kixejxeloskiaj?

 Tokniuan itech kali Betel ompa Ucrania uan Polonia kiixtalijkej keniuj kiuikaskiaj nochi despensas. Kikixtijkej amamej para maj ome tokniuan panokan Ucrania para tapaleuiskej. Yejua ika, carros tein kiuikayaj kinijkuilouilijkej ke yayaj tapaleuitij. Iniuan tokniuan akin nemij Ucrania kiitakej kanikauin yaskiaj para okachi niman ajsiskiaj kampa kinkauaskiaj despensas. Itech tonal 13 metsti marzo, ome tokniuan kiuikakej despensas desde kali Betel ompa Polonia hasta xolal Leópolis (Lviv, Ucrania). Itech sayoj se tonal, kinmakakej nochin tokniuan akin kiitaj maj motapaleui kampa mochiua se tetsauit. Uan nejon ome tokniuan kuali ajsikej keman mokepkej Polonia. Jehová kitiochiuak nochi tein kiixtalijkej tokniuan.

 Nejin tein kichiujkej semi tapaleuij, sayoj ke tokniuan sayoj uelik kiuikakej kemej mil kilos de despensa. Poliuiaok kiuikaskej kemej 200 mil kilos. ¿Keniuj kiuikaskiaj uan ijsiujka kixejxeloskiaj?

 Miakej keman kiitakej itech jw.org ke tokniuan akin nemij Ucrania tajyouijtoyaj, kinekkej tapaleuiskej. Akin amo nemij Ucrania, kitemakakej inintomin, porin kimatiaj ke kuali kikuiskiaj nejon tomin. Akin nemij itech okseki altepemej tapaleuijkej ika seki taman kemej nejin:

 Ompa Polonia, tel miakej kichijchiujkej miak despensas, uan miakej konemej kichijchiujkej dibujos. Bartosz Kościelniak, se tokniuj akin tapaleuia itech Departamento de Compras ompa Polonia, kijtoua: “Salmo 110:3 kijtoua ke itekitikauan Jehová tapaleuiskiaj ika nochi ininyolo. Maski miakpa niklerouani nejin tajtolmej, amo keman nikitstoya maj miakej niman mosentilikan para tapaleuiskej”.

 Se tokniuj akin kipia se ueyi negocio uan kipia uejueyi carros tein ika tasakaj, kintetaneujtij nejon carros uan no yejua kiixtauak gasolina para kiuikaskej despensas. Yejua kijtoj: “Nejin nechpaleuij maj niknexti ke yekmelauj niktasojta Jehová uan tokniuan. Semi nikuelitak nitapaleuis”. Mokuik panoua 7,700 litros de gasolina, uan okseki tokniuan no tapaleuijkej porin kiuikakej tein monekia, maski monekik tamanejaroskej 48,000 kilómetros.

 Ome semana satepan ke peujkej kititanij miak taman, itech tonal 28 metsti marzo kiuikakajya Ucrania 100 mil kilos de despensa uan pajti. Nejin uelik mochiuak porin miakej tokniuan tapaleuijkej ika nochi ininyolo. Kemej miakej tokniuan uan oksekin kitemakakej miak taman, amo miak tominok mokuik para kikouaskej tein monekia. Itaixpantijkauan Jehová kititaninij hasta axkan panoua 190 mil kilos de despensas. ¿Keniuj momachiliaj tokniuan akin kinmakanij nejon despensas?

 Keman despensas ajsikej Leópolis, tokniuan akin kiitaj maj motapaleui ompa Ucrania, kixejxelojkej. Miak despensas kinuikakej okachi uejka de Leópolis, itech xolalmej tein yetokej panoua 1,300 kilómetros. Maski moijsiuilijkej, uejkaujkej para kitamixejxeloskej. a

 Markus Reinhardt, akin poui iniuan Taixyekananij itech Sucursal ompa Ucrania, kijtoj: “Nochi tein mochiujtok kinpaleuiani miakej tokniuan maj kiitakan ke Jehová semi kintasojta. No kiitanij ke semi tapaleuia maj se kichiua tein tokniuan techiluiaj achto ke mochiuas se tetsauit. Techelnamiktianij maj nochipa tikeujtokan tein uelis tikuaskej uan titayiskej seki semanas. Anton, se tokniuj tayekankej akin nemi Kiev, kijtoj: ‘Tiktasojkamatij maj tokniuan techiluianij toni moneki tikchiuaskej keman panoskia se taman kemej nejin. Semi techpaleuij tikpiaskej at, takual uan se radio’. Tiyolpakij porin tokniuan kichiujkej tein technauatijkej; nejon tapaleuij maj tokniuan itech kali Betel horajtikan kiixtaliskej keniuj kinpaleuiskej”.

 ¿Keniuj momachilijkej tokniuan keman kinmajmakakej inindespensa? Míkola uan Zinaida, akin nemij Járkov, kijtoua: “Semi techyolpaktia maj semi toka tanemilikan tokniuan. Miak tasojkamatik porin nantechmakakej tein tikuaskej uan pajti. Tikitaj ke yejua Jehová akin kichiujtok xitechpaleuikan”. Valentina, akin no nemi Járkov, kijtoua: “Keman peuak moteuiaj, miakej mosentiliayaj para kikouaskej tein kikuaskiaj uan kemansa amo nochipa ajsia. Sayoj ke Jehová kimatia tein tikpanotoyaj, yejua ika kichiuak maj tokniuan techualkuilianij despensas tein kipiaya nochi tein techpolouaya. Keman se kipanotok teisa tein semi ouij uan se kinemilia ke amo akin uelis teyi kichiuasok, Jehová uan tokniuan semi tepaleuiaj. Semi se yolseui keman tepaleuiaj uan teyolchikauaj keman okachi moneki”.

 Evguen, Irina uan Mikita, akin monekik kisaskej de Mariúpol uan choloskej, kijtojkej: “Semi tiktasojkamatij porin nantechyekpiaj uan nantechtasojtaj. Nejin despensas techualkuilijkej keman okachi monektoya. Keman techmakakej tiknemiliayaj ke sayoj kiualkuia miak taman tein tikuiskiaj, sayoj ke keman tiktapojkej tikitakej ke nantechijkuilouilijkej ke nantechtasojtaj”.

 Jehová ika ichikaualis kinpaleuiani tokniuan para maj kinpaleuikan akin nemij kampa moteuijtokej. No semi tapaleuiani tomin tein namejuan nankitemakanij. Namiakej nankitemakakej itech Internet, itech donate.pr418.com. ¡Miak tasojkamatik porin nankitemakaj tein nankipiaj!

Niman tikinpaleuiaj tokniuan, sayoj ke no timoyekpiaj

1. 24 metsti febrero, 2022: Tokniuan Taixyekananij kiixtalijkej kanachi tomin kikuiskiaj akin tapaleuiaj itech kali Betel ompa Ucrania para kinpaleuiskej tokniuan.

2. 24 metsti febrero hasta 8 metsti marzo, 2022: Tokniuan itech kali Betel ompa Ucrania kikouaj tein moneki uan kiseliaj tein kintitaniliaj tokniuan ompa Polonia uan kixejxelouaj.

3. 9 metsti marzo, 2022: Tokniuan Taixyekananij kiixtaliaj maj kinpaleuikan tokniuan akin nemij Ucrania.

4. 10 hasta 12 metsti marzo, 2022: Kiitaj keniuj uelis kiuikaskej despensas desde Polonia hasta Leópolis (Ucrania).

5. 13 metsti marzo, 2022: Kiuikaj despensas desde Polonia hasta Leópolis (Ucrania).

6. 14 hasta 16 metsti marzo, 2022: Ompa Polonia, akin tapaleuiaj kampa moixtalia uan moixyekana kalchiualis, mosentiliaj itech se Kali kampa mochiuaj uejueyi nechikolmej ompa Poznán para kinchijchiuaskej despensas.

7. 17 metsti marzo, 2022: Seki tonalmej satepan kiuikakej 13 mil kilos de despensa para kipanoltiskej Ucrania.

8. 21 hasta 27 metsti marzo, 2022: Kichijchiuaj okachi despensas ompa Polonia uan kititanij Ucrania. Amo panok se tonal uan kinmakakajya akin kintelpolojtoya.

9. 28 metsti marzo, 2022: Desde 9 de marzo keman moijtoj maj kinpaleuikan tokniuan ompa Ucrania, kitemakanij 100 mil kilos de despensa uan pajti.

 Itaixpantijkauan Jehová kititaninij despensas, hasta axkan panoua 190 mil kilos.