Itech xiujtekit 2021, a noyampa taltikpak semi taijtakoj COVID-19. Itech tamachtilis “Itech nejin ueyi kokolis kinpaleuiaj noyampa taltikpak”, moijtoj ke tikuikej millones de dólares b para tikinpaleuiskej akin kinijtakoj nejin ueyi kokolis, uan moixtalij panoua 950 Oloch Tokniuan akin kiitaj maj motapaleui kampa mochiua tetsauit.

 Tein melauj, amo sayoj nejin ueyi kokolis taijtakoj, ta no panoua 200 tetsaujmej kinijtakouani tokniuan. Yejua ika amo sayoj mokuiskia tomin tein ika kinpaleuiskiaj akin kinijtakoskia ueyi kokolis, ta Oloch Taojtokaltianij itechkopa Oloch Tokniuan akin Taixyekanaj kiixtalijkej ke mokuiskia 8 millones de dólares para kinpaleuiskej akin kinijtakoj nejin tetsaujmej. Maj tikitakan keniuj ika tomin tein nankitemakanij tikinpaleuijkej akin kinijtakoj ome tetsaujmej tein yankuixtok panok.

 Itech 22 de mayo de 2021, volcán Nyiragongo tein moajsi República Democrática del Congo, kikixtij teisa kemej tekol tetsauak tein kiluiaj lava, uan nejon kinixpoloj kalmej, escuelas uan ameyalmej. Uan no, miak tonalmej kikixtijtoya koujnex tein taijtakoua uan xinia itech altepet Goma, uan miakpa momachilij ke talolinik. Panoua tajko akin nemiaj itech altepet kinnauatijkej maj kisanij ininkalijtik. Miakej cholojkej uan sekin ajsikej hasta Ruanda.

 Panoua 5,000 itaixpantijkauan Jiova no monekik kisaskej ininchan. Seki ininchan tokniuan ixpoliujkej keman volcán kikixtij tein taijtakoua, uan oksekin tokniuan kintachtekilijkej ininchan keman amo ompa yetoyajok. Oloch tokniuan akin kiitaj maj kinpaleuikan akin kinijtakoj tetsauit ompa Ruanda uan República Democrática del Congo mosenpaleuijkej. Sucursal tein moajsi República Democrática del Congo techiluia tein kichiuak semej nejon oloch tokniuan: “Maski semi motaouijkantalij itech altepet uan achto ke motanauatiskia maj kisanij ininkalijtik, nejin oloch tokniuan kiitakej maj moxejxelo takual, at, ayamej uan taken”. Itech se altepet kampa ajsikej panoua 2,000 tokniuan, semej nejon oloch tokniuan kiitakej maj kitalianij takenkalmej, kinmakakej cubrebocas uan kinmelauilijkej keniuj amo momauaskej ika COVID-19 uan cólera.

 Itech eyi metsti, tokniuan kixejxelojkej arroz 6 toneladas, harina de taol no 6 toneladas, panoua 8,000 litros de aceite tein ika se takualchiua uan panoua 8,000 litros ika at. Kemej kitemojkej kuali kikuiskej tomin, sucursal amo kikouak takual itech okse altepet, ta kitemoj kikouas miak takual ompakauin kampa moxejxeloskia.

 Se tokniuj siuat akin ichan tein yankuik ixpoliuik keman taijtakoj volcán, kijtoj ke semi tajyouijtoyaj. Sayoj ke yejua uan ichankauan kinpaleuijkej ika takual uan kinyolchikaujkej ika Biblia. Axkan kijtoua: “Ika inepaleuil Jiova, tikpiaj tein moneki. Tikitanij ke Jiova kiuika totamamal uan ijkon kichiua maj amo semi techetili”.

 Itech nejin xiujmej ompa Venezuela semi kipanouanij tatasojtilis. Tasojti takual uan semi moajsij tachtekinij. Sayoj ke inechikol Jiova amo kinsenkauani tokniuan.

 Itech xiujtekit tein panok, mokuik panoua se millón uan tajko dólares para kikouaskej takual uan xapoj tein kinuikilijkej tokniuan akin semi kinpolojtoya nepaleuil. Sucursal tein moajsi Venezuela kijtoua: “Semi ouij se kixejxelos 130 toneladas de takual mejmetstika itech nochi altepet para tokniuan akin semi kinpolojtok nepaleuil”. Kitemouaj kixejxeloskej takual tein amo niman uejueliui. Sucursal no kijtoua: “Tikouaj miak takual itech tonalmej keman kitekij tatok porin ijkuak amo semi patiyoj. Uan tiktemouaj kemej amo semi patiyoj kisas tikinuikiliskej nejon takual”.

 Leonel yejua semej akin kiita maj motemaka nepaleuil ompa Venezuela uan kipaktia nejon tekit. Kijtoua: “Nejin tekit tein nechmakanij semi nechpaleuiani maj kuali nimomachili satepan ke momikilij nonamik ika COVID-19. Nikpia tekit tein nikchiuas uan kuali nimomachilia nikitas ke ueli nikinpaleuia tokniuan. Nikitani ke Jiova amo kinsenkaua itekitikauan ijkon kemej motenkauani kichiuas”.

 Se tokniuj akin achto katka semej akin kiitaya maj motemaka nepaleuil, kijtoj: “Axkan nejua monekik nikselis nepaleuil. Amo sayoj techmakakej takual uan okseki taman tein monekia, ta no techpaleuijkej maj tiyolseujtokan, techyolchikaujkej uan techyekpiakej”.

 Seki tetsaujmej mochiuaj keman amo akin kichiaya. Maski ijkon, inechikol Dios ueli kinechikoua uan kixejxeloua takual uan okse taman tein moneki porin nankitemakaj nepaleuil ika tomin tein ika mochiua itekiyo Dios noyampa taltikpak. Itech donate.pr418.com moijtoua seki taman kemej uelis se kitemakas. ¡Semi tiktasojkamatij namonepaleuil!