Ipeujyan marzo de 2022, itech jw.org motemakak nejin tanauatil: “Techyolpaktia tamechmatiltiskej ke tokniuan Oloch Taojtokaltianij kiixtalijkej ke, itech tonal 1 de abril uelisya peuas timonechikoskej itech kali kampa timosentiliaj”. ¡Noyampa taltikpak tiitaixpantijkauan Jehová semi techyolpaktij tikakiskej nejon tanauatil! Sayoj ke ueyi kokolis COVID-19 ayamo tamia. a Itech kalmej kampa timosentiliaj monekia mokuis uan mochiuas seki taman para amo momauaskiaj akin mosentiliskiaj. Sayoj ke kemej ome xiuitya amo timosentilijtoyaj ompa, ¿toni monekia mochiuas?

 Tein melauj, tokniuan ipa kiitstoyajya miak metsti achtoya maj yetoni nochi para keman peuaskia timosentiliskiaj.

 Se metsti satepan ke amo timosentiliskiajok itech kalnechikolmej itech xiuit 2020, Kampa Moixtalia uan Moixyekana Kalchiualis noyampa Taltikpak ompa Warwick (Nueva York), peujkej kiitaj keniuj moijtakoskiaj kalmej kampa timosentiliaj porin momoyaujtok ueyi kokolis COVID-19, uan toni monekiskia mochiuas para ueliskia ompa timosentiliskej.

 Itech seki altepemej monekia mochiuas se taman, uan itech okseki monekia okse taman. Matthew De Sanctis, akin tekiti Kampa Moixtalia uan Moixyekana Kalchiualis noyampa Taltikpak kijtoua: “Itech seki xolalmej katka ouij kipiaskej kani momapajpakaskej. Komo itech se kali kampa timosentiliaj amo kipiaj at, moneki kikuitiuij ameyal oso kampa onkas. Itech okseki altepemej tekiuanij tamanya kiixtalianij keniuj mochipauas ejekat, keniuj mokuis aire acondicionado uan letreros tein kijtouaj keniuj se moyekpias uan se mochipauas”.

 ¿Toni kichiujkej tokniuan? Matthew techiluia ke itech miak kalmej kampa timosentiliaj kiajsikej se taman tein amo patiyoj uan tein semi tapaleuiskia. Kemej neskayot, ompa Papúa Nueva Guinea tokniuan kintaliaj galomej de 20 litros tein kipia se llave kampa momapajpakaskej. Ijkon, ika sayoj 40 dólares uelik kitalijkej tein monekia itech kalmej kampa timosentiliaj. Uan no, tokniuan kikoujkej 6,000 kampa se momapajpakas tein ueli se kiajchiujtinemi para tokniuan akin mosentiliaj ompa África.

 Itech okseki altepemej, monekik kitaliskej ventiladores oso teposmej tein kiseselia ejekat para maj amo momachili totonik itech kali kampa timosentiliaj. Itech miak nechikolmej monekik kikouaskej tein ika kinmetstiskej micrófonos para amo monekis momapanoltiliskej. No kichipauayaj tein semi kikitskiayaj, kemej puertas uan llaves kampa momapajpakaj para amo momoyauas kokolis. Itech seki kalmej kampa timosentiliaj kitalilijkej baños se taman para maj iselti kitapo at oso maj kitsakua at kampa momapajpakaj. Ompa Chile, monekik kemej 1,400 dólares para sejse nechikol kitaliliskej tein monekia.

 Keman tokniuan kitemouayaj kitaliskej tein tapaleuiskia maj amo se momaua, no kitemouayaj kuali kikuiskej tomin. ¿Keniuj kichiujkej? Itech seki altepemej tekiuanij kitemakayaj nepaleuil uan tokniuan kikuikej para kikouaskej seki taman kampa momapajpakaskej tein ueli se kiajchiujtinemi uan no teposmej tein ika kimetstiskej micrófonos. Uan no, sucursales sentekitikej para kisenkouaskej tein monekia uan ijkon uelia kintsinkixtiliayaj ipatiuj. Sucursales uan Kampa kiitaj tein Mokoua noyampa Taltikpak kitemouayaj tajtoskej kampa kichijchiuaj tein kinamakaj uan ijkon kiajsiaj tein amo semi patiyoj uan no niman kinmaktiliayaj.

 Nochi tein kitalijkej itech kalnechikolmej tein tapaleuiskia maj amo momauanij, semi kipaleuij uan kinyolseuij akin monechikouayaj. Dulcine, se tokniuj siuat akin kayot Perú, kijtoj ke tepitsin yolmouik keman kimatik ke oksepa timosentiliskiaj itech kalnechikol. Yejua kijtoua: “Nimomauak ika COVID-19 keman yekin momoyaujtoya nejin ueyi kokolis, yejua ika nikmouiliaya maj oksepa nimomaua komo nimonechikoua itech kali kampa timosentiliaj. Sayoj ke keman niajsik, nikitak ke tayekananij kiixtalijkaj seki taman tein tapaleuiskia maj amo se momaua. Kitalijkaj desinfectante para se imay uan kimetstiayaj micrófonos para amo momapanoltiliskej. No moixtalij maj motachipaua ika desinfectante achto uan satepan ke tamiskia nechikol, uan nejon nechpaleuij maj amo niknemilianiok ke ueliskia nimomauas”. b

 Sara, se tokniuj siuat akin kayot Zambia, kipiak okse ouijkayot. Yejua kijtoua: “Seki metsti achto, notakatsin momikilij ika COVID-19. Nimotajtaniaya keniuj nimomachiliskia keman yekinika niajsiskia kampa timosentiliaj uan notakatsin amo nouan yetoskiaok”. ¿Keniuj momachilia axkan toknitsin? Yejua kijtoua: “Keman timonechikouaj itech kalnechikol ueli nikita ke Jehová yetok touan itech nejin tonalmej keman tatamitiya. Axkan okachi nikmachilia ke tayekananij uan okseki tokniuan nechyolchikauaj, nechtasojtaj uan nechpaleuiaj”.

 Noyampa taltikpak tokniuan semi kitasojkamatij maj ueli oksepa timosentilikan itech kalnechikol. Tiktasojkamatij xitapaleuikan ika tomin tein seki tikseliaj itech donate.pr418.com. Ika nejin uelini tikouanij tein tapaleuis maj tokniuan amo momauakan keman mosentiliaj.