Akin tiktekitiliaj Jehová panoua 130 xiujmejya tikchiuanij uejueyi nechikolmej xijxiujtika. Ompa tikakij panoua 40 tataman tanojnotsmej. No tikakij tatsotson, tikinkakij miakej akin kintajtaniaj maj techtapouikan ininnemilis uan tikitaj videos. Akin mosentiliaj moneki kuali kikakiskej uan kiitaskej nochi tein mopanoltis porin nejon kinpaleuis maj yolpakikan uan maj moyolchikauakan (Lucas 2:20). Miakkan mochiuaj nejin uejueyi nechikolmej uan miakej mosentiliaj. ¿Keniuj tapaleuia tomin tein tiktemakaj para maj kuali kiitakan uan maj kuali kikakikan nejin uejueyi nechikolmej?

 Seki uejueyi auditorios uan estadios tein tikixtauaj para maj ompa mochiua uejueyi nechikolmej kipiajya bocinas uan pantallas. Uan itech seki, moneki tejuan tiktaliskej tobocinas uan topantallas. ¿Keyej moneki tikchiuaskej nejon? David akin tekiti itech Departamento de Broadcasting itech kali kampa techixyekanaj kijtoua keyej ijkon tikchiuaj: “Itech uejueyi nechikolmej tokniuan kipanoltiaj miak tanojnotsmej. Uan auditorios oso estadios tein tikixtauaj amo kipiaj nochi tein moneki para maj tokniuan takaktokan panoua chikuasen hora. Kemansa ininbocinas sayoj kikuij para kitematiltiskej teisa oso kitaliskej sayoj seki tatsotson. Uan pantallas tein kipiaj sayoj kikuij para kinextiskej akoni tatanik, keniuj mauiltijkej oso para kinextiskej teisa tein kinamakasnekij. Sayoj ke itech uejueyi nechikolmej tein tikpiaj monextiaj videos tein uejkauaj, uan tiknekij maj kuali mokaki nochi tein moijtoua itech plataforma”.

 Tokniuan akin kiitaj maj kuali mokaki uan maj kuali moita videos moneki kipataskej miak taman porin tataman kemej chijchiujtok kampa mochiua sejse ueyi nechikol. Tokniuan peuaj tekitij desde keman kimatij kani mochiuas. Akin tekitij itech Departamento de Broadcasting itech sejse kali Betel kiitaj kanachimej akij itech auditorio uan kanachimej mosentiliskej, porin nejon tapaleuis maj kimatikan kani motaliskej akin mosentiliskej. Satepan tokniuan kiitaj kani kitaliskej bocinas uan pantallas uan keniuj kitaliskej cables. Satepan kijkuilouaj nochi tein mokuis para kuali mokakis uan kuali moitas nochi tein mopanoltis itech ueyi nechikol.

 Tokniuan moneki kichiuaskej okachi miak taman keman tamachtilis no mopanoltia itech okseki tajtolmej. Tokniuan akin kitajtolkepaj tanojnotsmej kikaktiuij uan kiitstiuij nochi tein mopanoltia, uan tein kikepaj sayoj kinkakiltiaj akin tajtouaj nejon tajtol. Ika seki taman tein mokui itech computadora, video sepasan monextia uan mokaki itech chikueyi tataman tajtolmej. David no kijtoua: “Kemej semi ouij se kichiuas nejin, moneki semi tikinmachtiskej tokniuan akin kichiuaj nejin tekit”.

 Itech miak kalmej Betel onkakej bocinas, pantallas uan okseki taman tein mokui xijxiujtika. Tokniuan kititanij nochi nejon noyan kampa mochiua uejueyi nechikolmej. Kali Betel tein yetok Estados Unidos taxtaua xijxiujtika panoua eyi millones de pesos para kititanis pantallas, bocinas uan okseki taman tein mokuis. Maski miak tomin, okachi amo patiyoj kisa ke kikoujtiaskej okseki tein yankuik uan kinyekchijchiujtiaskej. Se tokniuj akin monotsa Steven, akin tapaleuij maj kuali mokaki uan moita tein mopanoltij itech se ueyi nechikol ompa Canadá kijtoua: “Nochin akin tapaleuijkej itech nejin tekit kiyekitakej maj amo poliui nion teyi. Kiitakej maj yetonij nochin tuercas, tornillos uan cables. Kipoujkej nochi uan sekosan kinsentilijkej para maj tokniuan kikuikan itech okse ueyi nechikol”.

 Semi patiyoj kisa titaxtauaskej para maj techtaneujtikan pantallas uan bocinas uan amo yekkualtiaj. Yejua ika, okachi kuali tikouaj nochi teposmej tein tikuij. Se ueyi pantalla tein moixmati kemej LED tein ueyak makuil metro uan uejkapan eyi metro, ipatiuj kemej 446 mil pesos uan se cable de 15 metros tein kikuij para micrófono ipatiuj kemej 372 pesos. Yejua ika achto ke kikouaskej, kiniluiaj tokniuan akin kiitaj tein mokoua maj kiixejekokan kanachi tomin monekis para kikouaskej nochi nejon (Lucas 14:28). Yejuan motajtaniaj: ¿Kanachimej tokniuan kikuiskej nejin pantallas uan bocinas?, ¿moneki maj se kikoua se tein yankuik?, ¿onkak kani se kitalis? uan ¿onkakej tokniuan akin kimatij keniuj kikuiskej nejin tepos uan tikpiaj nochi tein moneki para tikyekchijchiuaskej?

 Para maj uejkauakan bocinas uan pantallas moneki nochipa kinyekchijchiujtoskej, uan nejon tapaleuia maj mokui tomin tein tokniuan kitemakaj kemej moneki. No tikuij seki cajas tein amo mokelpachouaj para ompa tikalakiskej pantallas uan maj amo teyi kinpano keman tikintitaniskej. Kemansa nejin cajas no moneki kinyekchijchiuaskej.

 Sekin akin amo itaixpantijkauan Jehová kijmojkaitanij porin kuali mokaki uan kuali moita nochi tein mopanoltia itech uejueyi nechikolmej. Se takat akin tekiti itech se ueyi empresa tein motelixmati porin kipanoltiaj miak taman itech radio uan televisión kijtoj ke tokniuan kichijchiuaj tel kuali videos. Jonathan akin tapaleuia keman kitaliaj bocinas uan pantallas uan kiolinijtiuj para maj kuali mokaki kijtoua tein panok nejon tonal: “Keman kimatik ke nochin akin ompa tekitiaj amo momachtijkej para kichiuaskej nejin tekit, ta sayoj tapaleuijtoyaj, semi kimojkaitak. Kijtoj ke nochi pantallas uan bocinas tein kitalijkej itech se tonal uan tajko, yejuan kinkuiliskia makuil tonal kitaliskej”. Keman mochiuak okse ueyi nechikol, se takat akin taixyekana itech ueyi auditorio kampa mochiuak kijtoj: “Miakej akin momachtijkej keniuj kuali kikakistiltiskej bocinas uan kitaliskej pantallas ualanij nikan tekitikij, sayoj ke amo keman nikinitstoya takamej uan siuamej akin kuali kimatij keniuj kichiuaskej nejin tekit uan kualtsin tekitij”.

 Tejuatsin xa no mitsonpaleuiani nochi nejin para kuali tikakis uan tikitas nochi tein mopanoltis itech ueyi nechikol. Xa no tiontanemilia kemej David akin nemi Inglaterra. Yejua kijtoua: “Nikpia 88 xiujmejya uan desde ke niyolik niani uejueyi nechikolmej. Sayoj ke axkan amo teyi nechtapololtia uan ueli nikaki nochi tein mopanoltia itech ueyi nechikol. Onkak miak videos tein semi kualtsitsin, niman moajsikamati nochi tein motamachtia. ¡Amo se kimachilia ox uejkaua!”. Uan Micheal akin kayot Nigeria kijtoua: “Kemej tokniuan kuali kikakij uan kuali kiitaj videos, amo teyi kintapololtiaok”.

 Keman tionyas ueyi nechikol tein mochiujtok nejin xiuit tein motokaytia “¡Maj tikteixmatiltikan kuali tanauatilmej!”, xikonnemili nochi tein tokniuan monekik kichiuaskej para kuali tikonkakis tamachtilis uan para kuali tikonitas videos. Nochi nejin uelini mochiuani porin nankitemakanij namotomin para nantapaleuiskej. Uan no semi tapaleuiani tomin tein nankitemakanij itech donate.pr418.com. ¡Miak tasojkamatik!