¡MAJ TITACHIXTOKAN!
Kinixnamikij políticos | ¿Toni kijtoua Biblia?
Itech nochi taltikpak kinixnamikij políticos.
Itech altepet México, kinixnamikinij uan no kinmiktijkej 39 cantidatos políticos. Yejua ika kipatakej tein mochiuak keman tekiuajixtalijkej itech 2023-2024.
Ompa Europa kinixnamikkej políticos uan hasta kitemojkej kimiktiskej yekinika ministro de Eslovaquia itech 15 de mayo de 2024.
Ompa Estados Unidos semi kimojkaitakej keman kitemojkej kimiktiskej expresidente Donald Trump itech 13 de julio de 2024.
¿Keyej semi kinixnamikij políticos? ¿Se tonal tamis nejon? ¿Toni kijtoua Biblia?
Biblia kijtojka ke políticos xexeliujtoskiaj
Biblia kijtojka ke itech totonaluan, tein moixmati kemej “tonalmej keman tatamitiya”, miakej niman takuejmolchiuaskiaj uan amo kinekiskiaj kiyektaliskej kuejmolmej.
“Itech tonalmej keman tatamitiya, tein mochiujtos semi ouij yeski uan tamouilil. Porin tel miakej [...] amo motasojkamatiskej uan tekauaskej, [...] amo kinekiskej moyektenkauaskej iniuan oksekin, [...] kichiuaskej tein tel fiero, [...] kinchiuiliskej tein amo kuali inintasojikniuan uan amo takakiskej, [uan] senkis moueyimatiskej” (2 Timoteo 3:1-4).
Biblia no kijtojka ke itech nejin tonalmej takuejmolchiuaskiaj para kinixnamikiskej tekiuanij uan kinextiskiaj ke amo kiuelitaj tein kichiuaj políticos (Lucas 21:9). Sayoj ke nejon tein amo kuali tein mochiua amo uejkaua tamiti.
Tamis nejon tein amo kuali
Biblia techiluia ke Dios kinijkuanis tekiuanij de nikan taltikpak uan mokauas sayoj itaixyekanalis tein yetok ne iluikak.
“Dios akin nemi iluikak kiixtalis se taixyekanalis tein [...] kinkuechos uan kinixpolos nochi nejon [okseki] taixyekanalismej, uan sayoj yejua yetos nochipaya” (Daniel 2:44).
Itaixyekanalis Dios kichiuas maj amo xexeliujtokan nikan taltikpak uan maj yolseujkanemikan.
Tekiuaj, Jesucristo, kitokaytiaj kemej “Taixyekankej akin kiualkui tein kuali” uan kichiuas maj nochin yolseujkanemikan nochipaya (Isaías 9:6, 7).
Desde axkan, akin kitakamatij itaixyekanalis Dios, momachtijtokej keniuj yolseujkanemiskej. Biblia kijtoua tein kichiuaj yejuan: “Ininespadas kichiuaskej teposmej tein ika talkaxaniaj uan ininlanzas tein ika se tatejteki. Amo momiktiskejok de se ueyi altepet iuan okse, nion no momachtiskejok keniuj tateuiskej” (Isaías 2:3, 4).
Xikonlero nejin tamachtilis “¿Qué cosas logrará el Reino de Dios?” uan xikonita video ¿Toni iTekiuajyo Dios? kampa no kimelaua toni mochiuas.