Amo. Tiitaixpantijkauan Jiova amo moneki tiktemakaskej diezmo. Tekit tein tikchiuaj moixtaua ika tomin tein taltikpakneminij kitemakaj ika nochi ininyolo. Sayoj ke, ¿keyej miakej kitemakaj diezmo uan keyej itaixpantijkauan Jiova amo?

 Tanauatil tein kiselij ne uejkauj xolal Israel kijtouaya ke monekia kinmakaskej diezmo tiopixkamej. Biblia kiyekijtoua ke itatojtokakauan Cristo amo moneki kichiuaskej kemej kijtoua Tanauatil. Yejua ika, axkan amo moneki kitemakaskej diezmo (Hebreos 7:​5, 18; Colosenses 2:​13, 14).

 Tiitaixpantijkauan Jiova tikchiuaj ijkon kemej kichiujkej yekinika itatojtokakauan Cristo, yejua ika amo moneki tiktemakaskej diezmo nion okse taman netetayokolil. Yejuan tapaleuiayaj itech nechikol ika ome taman: kitemakayaj tomin kemej netetayokolil ika nochi ininyolo uan kiteixmatiltiayaj uan tamachtiayaj ika iTajtol Dios uan amo kintaxtauiayaj.

 Nejin mouika iuan tein kijtoua Biblia: “Cada tokniu, ma amo kitemaka itapaleuilis ika ne yolkokolis. Uan amo no ma kitemaka tapaleuilis porin kimachilia ke Dios kifuerzajuia ma kitemaka. Porin Totajtsin Dios kitasojta se tagat ten kitemaka itapaleuilis ika yolpakilis” (2 Corintios 9:7).