Tein kijtouaj: Itaixpantijkauan Jiova amo kiseliaj tapajtilis porin amo kineltokaj maj kinpajti.

 Tein melauak: Tiitaixpantijkauan Jiova senkis tiktemouaj tapajtilis tein uelis techpaleuis. Keman tejuan oso semej tochankauan kokolispeua oso moneki kitekiskej, titajtouaj iniuan tapajtianij uan iniuan akin tatekij tein kiuikajya miak xiujmej kemej tapajtianij uan amo kikuij esti. Uan tiktasojkamatij seki taman tein mochiuani uan ijkon amo motekitiltis esti. Uan no, tapajtilis tein mokui itech miak altepemej uan tein ika kinpajtiaj itaixpantijkauan Jiova no ika kinpajtiaj okseki taltikpakneminij. Axkan akin yeski uelis kiixpejpenas tapajtilis kampa amo kitekitiltiskej esti tein uelis kiualkuilis kokolismej, kemej tein kipia esti, amo kiselis inakayo uan nepololmej tein uelis kipiaskej tapajtianij.

 Tein kijtouaj: Itaixpantijkauan Jiova kineltokaj ke mopajtiaj ika inintakuaujtamatilis.

 Tein melauak: Tejuan amo tikneltokaj ke timopajtiaj ika totakuaujtamatilis.

 Tein kijtouaj: Tapajtilis tein tapaleuia maj amo mokui esti semi patiyoj.

 Tein melauak: Tapajtilis kampa amo mokui esti okachi teualkuilia tein kuali ke tein se taxtauas. a

 Tein kijtouaj: Miakej itaixpantijkauan Jiova, hasta konemej, momikiliaj xijxiujtika porin amo kiseliaj maj kintalilikan esti.

 Tein melauak: Amo onkak nion teyi maj kinexti ke melauak nejon. Axkan tapajtianij uelij kichiuaj operaciones tein semi ouijkej tein moixmatij kemej ortopédicas o de corazón uan trasplantes de órganos uan amo kikuij esti. b Akin amo kiseliaj esti pajtij ijkon kemej akin kemaj kiseliaj oso hasta okachi ijsiujka, hasta konemej ijkon kinpanoua. c Uan no, amo akin uelis kiyekijtos ke amo mikis porin amo kiselia esti nion ke momakixtis komo kiselia.

 Amo kiseliaj porin kineltokaj tein kijtoua Biblia uan amo porin kiitaj kemej se taman tein ika mopajtiskej. Amatajkuilol Antiguo Testamento ijkon kemej Nuevo Testamento technauatia maj amo tikselikan esti (Génesis 9:4; Levítico 17:10; Deuteronomio 12:23; Hechos 15:​28, 29). Uan no, iixpan Dios esti kiixnextia nemilis (Levítico 17:14). Yejua ika tiitaixpantijkauan Jiova amo tikseliaj esti ijkon kemej tanauatia Biblia porin tikpoujkaitaj Dios, akin techmakak tonemilis.

 Seki tonalmej tapajtianij akin tamachtilmej kinemiliayaj ke tataman tapajtilis kampa amo moneki mokuis esti, semi tamouilil katka uan hasta kijtouayaj ke akin tajtania maj amo kipajtikan ika esti kitemouaya momiktis. Sayoj ke nejon tein kinemiliayaj mopatani itech nejin xiujmej. Kemej neskayot, itech xiuit 2004 kikixtijkej se amaix tein ika tajtoua tapajtilis, itech se taxelol kijtouaya: “Miak taman tein moixejekouani tein ika kinpajtiskej itaixpantijkauan Jiova yeski kemej motapajtis satepan”. d Uan itech xiuit 2010, amaix Medicina transfusional kinextij ke ika nejin taman tapajtilis “uelis kitekiskej aksa uan ‘amo mokuis esti’ nejin uelis mochiuas miakpa ijkon kemej ijkuak kitekij aksa uan amo ouij kinkisa tapajtianij”.

 Miakej tapajtianij itech nochi taltikpak amo kikuij esti keman kichiuaj operaciones tein ouijkej. Nejin taman tapajtilis mochiuaj hasta itech altepemej kampa semi tatasojti, uan miakej akin amo itaixpantijkauan Jiova tajtanij maj ijkon kinpajtikan.