Tiitaixpantijkauan Jiova timochikauaj tikchiuaskej tein Cristo tamachtij uan tein kichiujkej akin kitojtokayaj. Itech nejin tamachtilis momelaua seki taman tein tikneltokaj tein okachi tayekantok.

1.   Dios. Tikueyichiuaj Dios akin melauak, akin okachi Ueyichiujkej uan kichijchiuak nochi tein onkak. Itokay Jiova (Salmo 83:18; Apocalipsis [Revelación] 4:​11). Yejuatsin iDios Abrahán, Moisés, uan Jesús (Éxodo 3:6; 32:11; Juan 20:17).

2.   Biblia. Tikneltokaj ke tein kijtoua yejua tein Dios kineki kinmatiltis taltikpakneminij (Juan 17:17; 2 Timoteo 3:​16). Tein tikneltokaj mokixtia itech 66 amatajkuilolmej tein moixmati kemej Antiguo uan Nuevo Testamento. Tamachtijkej Jason BeDuhn ika tajtoj nejin taman keman kijkuiloj ke itaixpantijkauan Jiova “kikixtiaj tein kineltokaj uan tein kichiuaj itech Biblia uan amo kipataj nion kiixtaliaj tein kijtosneki”. a

    Maski tikneltokaj nochi tein kijtoua Biblia, amo tiktemouaj tikajsikamatiskej kemej tejuan tiknekij. Tikmatij ke seki tajkuilolmej kiixnextiaj seki taman, yejua ika amo moneki se kiajsikamatis senkis kemej ijkuiliujtok (Apocalipsis 1:1).

3.   Jesús. Tikchiuaj kemej tamachtij Jesucristo uan tikpoujkaitaj porin toTemakixtijkauj uan iKonetsin Dios (Mateo 20:28; Hechos 5:​31). Nejon kinextia ke tiktojtokaj Cristo (Hechos 11:26). Sayoj ke, Biblia amo kijtoua ke Jesús yejua Dios akin kipia nochi uelilis nion kipaleuia tamachtilis Trinidad (Juan 14:28).

4.   ITekiuajyo Dios. Se taixyekanalis tein moajsi iluikak uan amo se taman tein kipiaj itech ininyolo akin kichiuaj kemej Cristo. Kiixpatas nochi taltikpaktekiuajyomej uan kichiuas tein Dios nochipa kinekini maj mochiua nikan taltikpak (Daniel 2:​44; Mateo 6:​9, 10, TNM). Nejin amo uejkaua mochiuas porin tein achto kijtoua Biblia kinextia ke tinentokej itech “itamian tonalmej” (2 Timoteo 3:​1-5, TNM; Mateo 24:​3-​14, TNM).

    Jesús taixyekana itech iTekiuajyo Dios. Yejua peuak taixyekana itech xiuit 1914 (Apocalipsis 11:15).

5.   Nemakixtilis. Ika inemilis Jesús tein kitemakak, taltikpakneminij amo kipiaskejok tajtakol nion momikiliskejok (Mateo 20:28; Hechos 4:​12). Komo kinekij maj kinpaleui tein Jesús kichiuak moneki itech takuaujtamatiskej, kipataskej ininnemilis uan moauiskej (Mateo 28:19, 20; Juan 3:​16; Hechos 3:​19, 20). Ika tein kichiua se taltikpaknenkej kinextia ox yekmelauj takuaujtamati (Santiago 2:​24, 26). Sayoj ke, nemakixtilis amo se taman tein timotaniliaj, ta tikseliaj porin Dios technextilij ueyi netasojtalis (Gálatas 2:​16, 21).

6.   Iluikak. Jiova, Jesucristo, uan ángeles akin amo kikauaj Dios nemij iluikak (Salmo 103:19-​21; Hechos 7:​55). b Sayoj 144,000 taltikpakneminij moajokuiskej ne iluikak uan taixyekanaskej iuan Jesús itech iTekiuajyo Dios (Daniel 7:​27; 2 Timoteo 2:​12; Apocalipsis 5:​9, 10; 14:​1, 3).

7.   Taltikpak. Dios kichijchiuak porin kineki maj nochipaya itech tinemikan (Salmo 104:5; 115:16; Eclesiastés 1:4). Yejuatsin kintiochiuas akin tatakamatij, keman kichiuas maj amo kokolispeuakanok uan maj nemikan nochipaya itech se kualtsin xochital nikan taltikpak (Salmo 37:11, 34).

8.   Tein amo kuali tein mochiua uan tajyouilis. Biblia kimelaua ke se ángel kiixnamikik Dios. Ompa peuak mochiua tein amo kuali uan peuak onka tajyouilis (Juan 8:​44). Nejin ángel, akin satepan moixmatik kemej Amokuali uan Satanás, kichiuak maj yekinika takat uan yekinika siuat no kiixnamikikan Dios kemej yejua. Nejon kinualkuilij ininkoneuan sayoj tajyouilis (Génesis 3:​1-6; Romanos 5:​12). Tein kijtoj Satanás moneki moitas ox melauak, yejua ika Dios kikaujtok seki tonalmej maj mochiua tein amo kuali uan maj onka tajyouilis, sayoj ke amo kikauas maj nochipa mochiua nejon.

9.   Mikilis. Keman aksa momikilia amo nemiti okseko (Salmo 146:4; Eclesiastés 9:​5, 10). Akin momikilijkejya amo tajyouijtokej itech se miktan kampa onkak tit.

    Tel miakej millones akin momikilianij oksepa nemiskej keman Dios oksepa kinmakas nemilis (Hechos 24:15). Sayoj ke, akin oksepa nemiskej uan kiixnamikiskej itanauatiluan Dios, kinixpoloskej uan amo keman uelis oksepa nemiskej (Apocalipsis 20:14, 15, TNM).

10.   Kalyetouanij. Ijkon kemej Dios kiixtalij yekinika, nenamiktilis mochiua keman se takat uan se siuat mosentiliaj uan sayoj uelis kitsayanaskej amat ininixpan tekiuanij komo semej auilnemi (Mateo 19:4-9). Senkis tikyekmatij ke tein Biblia tayolmajxitia semi kinpaleuia kalyetouanij maj yolpakikan (Efesios 5:22–​6:1).

11.   Totaueyichiualis. Amo tikueyichiuaj cruz nion no se taixkopin (Deuteronomio 4:​15-​19; 1 Juan 5:​21). Seki taman tein ika tikueyichiuaj Jiova yejua nejin:

    •   Tiktataujtiaj Dios (Filipenses 4:6).

    •   Tikixtajtoltiaj uan timomachtiaj Biblia (Salmo 1:​1-3).

    •   Titanemiliaj itech tein timomachtiaj itech Biblia (Salmo 77:12).

    •   Timosentiliaj uan ijkon timotataujtiaj, timomachtiaj Biblia, timosenkuikatiaj, tikijtouaj tein tikneltokaj uan tikinyolchikauaj oksekin (Colosenses 3:​16; Hebreos 10:23-​25).

    •   Tikteixmatiltiaj kuali tanauatilmej “ika tekiuajyot” (Mateo 24:14, TNM).

    •   Tikinpaleuiaj akin kipanouaj tatasojtilis (Santiago 2:​14-​17).

    •   Tikinchijchiuaj uan tikinyekpiaj kalmej kampa timosentiliaj uan okseki kalmej kampa titamachtiaj tein Biblia kijtoua (Salmo 127:1).

    •   Titapaleuiaj keman mochiua se tetsauit (Hechos 11:27-​30).

12.   Tonechikol. Timoajsij itech nechikolmej. Sejse nechikol kiixyekanaj akin tikintokaytiaj tayekananij, yejuan amo tekitij kemej tiopixkamej nion kintaxtauiaj (Mateo 10:8; 23:8). Amo tiktemakaj diezmo nion titajtanij tomin (2 Corintios 9:7). Tekit tein tikchiuaj moixtaua ika tomin tein miakej kitemakaj ika nochi ininyolo uan amo moteixmatiltia inintokay.

     Seki itatojtokakauan Cristo akin yekyolmajsitokej uan moixmatij kemej Oloch Taojtokaltianij kiixyekanaj ompa Brooklyn (Nueva york) tekit tein kichiuaj nochin itaixpantijkauan Jiova (Mateo 24:45).

13.   Amo tixexeliujtokej. Maski kampa yeski tikayomej, amo tikneltokaj se taman uan oksekin okse taman (1 Corintios 1:​10). Timochikauaj amo timochikoitaskej maski tataman kemej tinemij, tiyeskij timaseualmej oso amo, tataman tiixtamatij oso tikpiaskej tomin oso amo (Hechos 10:34, 35; Santiago 2:4). Maski ijkon, tisejsemej tikixpejpenaj tein tikchiuaskej itech tonemilis ijkon kemej timomachtianij itech Biblia (Romanos 14:​1-4; Hebreos 5:​14).

14.   Kemej timonejnemiltiaj. Timochikauaj tiknextiskej netasojtalis itech nochi tein tikchiuaj (Juan 13:34, 35). Timochikauaj amo tikchiuaskej nion teyi tein Dios amo kiuelita. Yejua ika, tiktemouaj amo tikuiskej esti kemej amo kinamiki. Kemej neskayot, amo tikauaj maj techtalilikan itech tonakayo (Hechos 15:28, 29; Gálatas 5:​19-​21). Amo timokuejmolkalakiaj iuan nion akin uan amo no timokalakiaj itech neteuilis (Mateo 5:9, TNM; Isaías 2:4). Tikinpoujkaitaj tekiuanij uan tiktakamatij tanauatilmej tein kiixtaliaj komo amo kiixnamikij itanauatiluan Dios (Mateo 22:21; Hechos 5:​29).

15.   Kemej timouikaj iniuan oksekin. Jesús kijtoj: “Xiktasojta moknitsin ijkon keme tejuatsin timotasojta”. Uan no, kijtoj ke itatojtokakauan “amo no poutinemij nikan taltikpak” (Mateo 22:39; Juan 17:16). Yejua ika, tiktemouaj nochin tikinpaleuiskej, maski senkis amo timokalakiaj itech política uan amo timosenpaleuiaj iniuan okseki taneltokalismej (Gálatas 6:​10; 2 Corintios 6:​14). Sayoj ke, tikpoujkaitaj tein kiixpejpenaj oksekin itech nejin taman (Romanos 14:12).

 Komo tikonneki tikonmatis okachi tein tikneltokaj tiitaixpantijkauan Jiova, tikonajsis okachi itech jw.org, internet kampa timoteixmatiltiaj. No uelis tiontajkuilos itech semej sucursales tein tikpiaj, tionyas itech se Kali kampa Timosentiliaj tein moajsi ompakauin kampa tionnemi, oso tikontajtanis se itaixpantijkauj Jiova akin nemi ompakauin.