Itaixpantijkauan Jiova kikuinij miak tataman Biblias tein ika momachtiaj. Maski ijkon, kiitaj ke motelneki Traducción del Nuevo Mundo de las Santas Escrituras, tein moajsi itech miak tataman tajtolmej, porin kikui itokay Dios uan no kipia tamachtilis ajsitok uan amo ouij moajsikamati.

•   Kikui itokay Dios. Amo nochin akin kichijchiuaj amaixmej kipoujkaitaj kemej kinamiki akin yekmelauj kichijchiuak Biblia. Kemej neskayot, itech se Biblia moijtoua inintokay panoua setenta taltikpakneminij akin tapaleuijkej maj mokixti, sayoj ke nion sepa kijtoua itokay akin yekmelauj kichijchiuak Biblia: Jiova.

   Sayoj ke, Traducción del Nuevo Mundo de las Santas Escrituras kemaj kitalij itokay Dios tel miakkan kampa ixnesia itech yekinika amatajkuilolmej uan amo kijtoua inintokay akin tapaleuijkej maj motajtolkepa.

•   Kipia tamachtilis ajsitok. Moajsij Biblias tein amo ajsitok kitajtolkepkej tanemililmej tein moajsij itech yekinika amatajkuilolmej. Kemej neskayot, semej Biblia kikepa Mateo 7:​13 ijkon: “Xikalakikan itech kalteno tein amo patauak. Porin kalteno uan ojti tein teuika itech miktan pataujkej uan uejueykej”. Kemej tikitaj, yekinika tajkuilol amo kijtoua “miktan”, ta “ixpoliuilis”. Nesi ke tajtolkepanij kineltokayaj ke akin amo yolkualmej kintajyouiltiayaj nochipaya itech miktan. Sayoj ke Biblia amo tamachtia nejon. Yejua ika, Traducción del Nuevo Mundo kijtoua “ixpoliuilis”, ijkon kemej ijkuiliujtok itech yekinika tajkuilol.

•   Amo ouij moajsikamati. Tein melauj, se Biblia kuali kitajtolkepaj keman kipia tanemililmej ajsitok, sayoj ke no moneki moajsikamatis tein kijtoua. Maj tikitakan se neskayot. Miakej Biblias kikepaj Mateo 5:3 ika nejin tajtolmej: “Tatiochiualme de Dios ne taneltokani ten kajsikamatij ke ninyolojuan iuke”. Sayoj ke nejon amo semi moajsikamati axkan. Yejua ika, Traducción del Nuevo Mundo kikepa nejin versículo ika nejin tajtolmej: “Yolpakij akin kimachiliaj ke moneki motokiskej iuan Dios”.

 Traducción del Nuevo Mundo amo sayoj kipia itokay Dios kampa moneki, tanemililmej tein ajsitokej uan tajtolmej tein kipia Biblia tein kuali moajsikamatij, ta no okse taman tein kuali: amo monamaka keman momoyaua. Nejon kichiua maj millones taltikpakneminij kiixtajtoltikan Biblia itech inintajtol maski amo kipiaskej tomin tein ika kikouaskej.